Dzo kpo yi emenuwo dzi

Dzo kpo yi emenuawo dzi

 TA 15

Kpɔ Dzidzɔ Le Wò Dɔ Sesẽ Wɔwɔ Me

Kpɔ Dzidzɔ Le Wò Dɔ Sesẽ Wɔwɔ Me

‘Ame sia ame nakpɔ dzidzɔ le eƒe dɔ sesẽ wɔwɔwo katã me.’—NYAGBLƆLA 3:13.

1-3. Aleke ame geɖe sena le wo ɖokuiwo me tso woƒe dɔwɔɖui ŋu? (b) Nukpɔsusu kae Biblia di be wòanɔ mía si ku ɖe dɔwɔwɔ ŋu, eye biabia kawo mee míadzro le ta sia me?

EGBEA dɔ sesẽ wɔwɔ mevivia ame geɖe nu kura o. Esi womekpɔa dzidzɔ ɖe woƒe dɔwɔɖui si bia be woaku kutri gaƒoƒo geɖe ŋu o ta la, ne wofɔ ŋdi be yewoayi dɔme la, ezua taɖui na wo. Nu kae akpe ɖe ame siwo le nɔnɔme sia me ŋu be woalé fɔ ɖe woƒe dɔwɔɖui ŋu ahakpɔ dzidzeme le eme gɔ̃ hã?

2 Biblia de dɔ sesẽ wɔwɔ ƒe dzi ƒo. Egblɔ be yayrae dɔwɔwɔ kple viɖe siwo dona tso eme la nye. Salomo gblɔ be: “Ame sia ame naɖu nu ano nu, eye wòakpɔ dzidzɔ le eƒe dɔ sesẽ wɔwɔwo katã me. Mawu ƒe nunanae wònye.” (Nyagblɔla 3:13) Yehowa, ame si lɔ̃ mí eye wòdia míaƒe nyonyo ɣesiaɣi la di be míakpɔ dzidzeme le míaƒe dɔ sesẽ wɔwɔ me ahakpɔ dzidzɔ ɖe eme kutsetsewo ŋu. Ne míedi be míanɔ Mawu ƒe lɔlɔ̃ la me la, ele be míana eƒe gɔmeɖosewo kple ale si wòbua dɔwɔwɔe nafia mɔ mí le agbe me.—Xlẽ Nyagblɔla 2:24; 5:18.

3 Míadzro biabia ene siwo gbɔna me le ta sia me: Aleke míawɔ akpɔ dzidzɔ le dɔ sesẽ wɔwɔ me? Dɔ kawo ƒomevie masɔ be Kristotɔ vavãwo nawɔ o? Aleke míawɔ ada asɔ be míaƒe ŋutilãmedɔwo nagavu tsyɔ gbɔgbɔmedɔwo dzi o? Eye dɔ kae nye vevitɔ kekeake si míate ŋu awɔ? Gake gbã la, mina míalé ŋku ɖe kpɔɖeŋu si ame eve siwo  nye dɔwɔla gãtɔwo kekeake ɖo na mí la ŋu—woawoe nye Yehowa Mawu kple Yesu Kristo.

DƆWƆLA GÃTƆ LA KPLE DƆWƆLA BIBI LA

4, 5. Aleke Biblia ɖee fia be Yehowa nye dɔwɔla nyui si ƒe dɔwo le vi ɖem?

4 Yehowae nye Dɔwɔla Gãtɔ la. Míexlẽ le 1 Mose 1:1 be: “Le gɔmedzedzea me Mawu wɔ dziƒo kple anyigba.” Esi Mawu wu anyigbaa wɔwɔ nu vɔ la, egblɔ tso dɔ siwo wòwɔ ŋu be “wonyo ŋutɔ.” (1 Mose 1:31) Esia fia be dɔ siwo katã wòwɔ le anyigba dzi la dze eŋu. Esi Yehowa nye “Mawu dzidzɔtɔ” ta la, ɖikeke mele eme o be dzi dzɔe ŋutɔ ɖe dɔ si me viɖe le wɔwɔ ŋu.—1 Timoteo 1:11.

5 Mía Mawu veviedonula la medzudzɔa dɔwɔwɔ gbeɖe o. Ɣeyiɣi didi aɖe, esi Mawu wɔ míaƒe anyigbaa vɔ megbe la, Yesu gblɔ be: “Fofonye le dɔ wɔm va se ɖe fifi.” (Yohanes 5:17) Dɔ kawo wɔm Fofo la le? Ele mɔ fiam amegbetɔƒomea tso enɔƒe le dziƒo hele be lém na wo. Ele asi trɔm le “nuwɔwɔ yeye” aɖe ŋu, si nye Kristotɔ siwo wotsɔ gbɔgbɔ dzi, siwo ava ɖu fia kple Yesu le dziƒo. (2 Korintotɔwo 5:17) Ele dɔ wɔm tso ale si wòana tame si wòɖo ɖe amegbetɔwo ŋu nava emee ŋu—si nye be ame siwo lɔ̃e nakpɔ agbe mavɔ le xexe yeye si gbɔna me. (Romatɔwo 6:23) Aleke gbegbe Yehowa anya kpɔ dzidzɔ ɖe eƒe dɔwo me tsonuwo ŋue nye esi! Ame miliɔn geɖe le Fiaɖuƒegbedeasia xɔm, Mawu le wo hem va eɖokui gbɔ, eye wole tɔtrɔ wɔm le woƒe agbenɔnɔ me be woanɔ eƒe lɔlɔ̃ la me.—Yohanes 6:44.

6, 7. Nu kae ɖee fia be Yesu nye dɔsesẽwɔla tso gbe aɖe gbe ke.

6 Ŋɔŋlɔawo ƒo nu tso Yesu ŋu be enye dɔsesẽwɔla tso gbe aɖe gbe ke. Hafi wòava nɔ agbe le anyigba dzi abe amegbetɔ ene la, enye “dɔwɔla bibi” si wɔ dɔ kple Mawu le nu “siwo katã le dziƒowo kple anyigba dzi” la wɔwɔ me. (Lododowo 8:22-31; Kolosetɔwo 1:15-17) Esi Yesu va  anyigba dzi la, eyi eƒe dɔ sesẽ wɔwɔa dzi. Esrɔ̃ atikpadɔ tso eƒe ɖevime, eye woyɔe be “atikpala.” (Marko 6:3) Dɔ sia nye dɔ sesẽ si wɔwɔ bia aɖaŋu geɖe—vevietɔ le blemaɣeyiɣi mawo siwo me atidzemɔ̃, atidzraƒe, kple elɛktrikmɔ̃ aɖeke menɔ anyi o. Ðe nàte ŋu akpɔe ɖaa le susu me be Yesue nye ema yi ave me be yeadi ati si yeatsɔ awɔ dɔea? Ðewohĩ eya ŋutɔe amu atia, ahee hetsehetse ayi afi si wòle dɔ wɔ ge kplii le. Bu eŋu kpɔ be eyae nye ema le dɔ wɔm le xɔ aɖe ŋu—edze xɔgbatiwo hele wo dam ɖe xɔa dzi; ele ʋɔtruwo kple xɔmenu aɖewo hã kpam. Ðikeke mele eme o be Yesu nya dzidzeme si gbegbe dona tso dɔ sesẽ wɔwɔ aɖaŋutɔe me.

7 Yesu do vevie nu le eƒe subɔsubɔdɔa hã wɔwɔ me ŋutɔ. Elé fɔ ɖe dɔ vevi sia ŋu wɔ ƒe etɔ̃ kple afã sɔŋ. Esi wòdi vevie be yeaɖo ame geɖe ale si nu yeate ŋui gbɔ ta la, edzea dɔ sia gɔme ŋdi kanya heyia edzi ʋuu va se ɖe fiẽ. (Luka 21:37, 38; Yohanes 3:2) “Enɔ gbeƒã ɖem Mawu Fiaɖuƒe ŋuti nya nyui la tso du me yi du me kple kɔƒe me yi kɔƒe me.” (Luka 8:1) Yesu zɔ azɔli kilometa geɖe to mɔ siwo dzi ʋuʋudedi le la dzi nɔ gbeƒã ɖem nya nyuia na amewo.

8, 9. Nu kae ɖee fia be Yesu kpɔ dzidzɔ le dɔ sesẽ wɔwɔ me?

8 Ðe Yesu kpɔ dzidzɔ le subɔsubɔdɔa wɔwɔ kutrikukutɔe mea? Ɛ̃! Eƒã Fiaɖuƒe nyateƒea ƒe kuwo, si wɔe be le eƒe dzodzo megbe la, agbleawo ƒu hena ŋeŋe. Mawu ƒe dɔ la wɔwɔ do ŋusẽ Yesu heɖi ƒo nɛ ale gbegbe be metsi dzi ɖe nuɖuɖu ŋu o, ne yeawɔ dɔ la ade goe. (Yohanes 4:31-38) Kpɔ ale si gbegbe eƒe dzi dze emee ɖa, esi wòte ŋu gblɔ na Fofoa le eƒe anyigbadzisubɔsubɔdɔa ƒe nuwuwu be: “Medo wò ɖe dzi le anyigba dzi, esi mewu dɔ si nètsɔ nam be mawɔ la nu.”—Yohanes 17:4.

9 Eme kɔ ƒãa be Yehowa kple Yesue nye ame siwo kpɔ dzidzɔ le dɔ sesẽ wɔwɔ me ƒe kpɔɖeŋu gãtɔ kekeake.  Míaƒe lɔlɔ̃ na Yehowa ʋãa mí be míazu “Mawu srɔ̃lawo.” (Efesotɔwo 5:1) Míaƒe lɔlɔ̃ na Yesu ƒonɛ ɖe mía nu be ‘míadze eƒe afɔɖoƒewo yome.’ (1 Petro 2:21) Eya ta mina míadzro ale si míawo hã míawɔ akpɔ dzidzɔ le dɔ sesẽ wɔwɔ me la me.

ALE SI MÍAWƆ AKPƆ DZIDZƆ LE DƆ SESẼ WƆWƆ ME

Biblia ƒe gɔmeɖosewo dzi wɔwɔ ate ŋu akpe ɖe ŋuwò nàkpɔ dzidzɔ le wò dɔ sesẽ wɔwɔ me

10, 11. Nu kae ate ŋu akpe ɖe mía ŋu susu nyui nanɔ mía si ɖe míaƒe dɔwɔɖui ŋu?

10 Ehiã vevie ŋutɔ be Kristotɔ vavãwo nawɔ ŋutilãmedɔ. Míedina be míakpɔ dzidzɔ kple dzidzeme le míaƒe dɔwɔwɔ me, gake esia menɔa bɔbɔe o, vevietɔ ne dɔ si wɔm míele la medze mía ŋu o. Aleke wòanya wɔe be míakpɔ dzidzɔ le míaƒe dɔwɔwɔ me le nɔnɔme sia tɔgbi me?

11 Ele be susu nyui nanɔ mía si. Menye ɣesiaɣie wòanya wɔ be míatrɔ nɔnɔme siwo me míele o, gake míate ŋu atrɔ míaƒe nuŋububu ya. Ŋugbledede tso ale si Mawu bua dɔ sesẽ wɔwɔe ŋu akpe ɖe mía ŋu be susu nyui nanɔ mía si. Le kpɔɖeŋu me, ne ƒome ƒe tae nènye la, bu ale si wò dɔwɔɖuia na nète ŋu le wò ƒomea ƒe nuhiahiã veviwo gbɔ kpɔm, togbɔ be adze abe dɔ tsɛ aɖe ko wònye ene hã, ŋu kpɔ. Nenɔ susu me na wò be menye nu tsɛe wò ƒomea dzi kpɔkpɔ nye le Mawu ŋkume o. Eƒe Nya la gblɔ be ame si mekpɔa eƒe ƒomea dzi o la “[vɔ̃ɖi] wu dzimaxɔsetɔ.” (1 Timoteo 5:8) Eya ta ele be nyanya be wò dɔwɔɖuia te ŋu na nèle agbanɔamedzi vevi sia si Mawu na wò gbɔ kpɔm la nakpe ɖe ŋuwò nàkpɔ ŋudzedze ɖe dɔa ŋu, eye wòana dzidzeme wò togbɔ be ɖewohĩ manɔ alea le wò dɔwɔhati bubuwo ya gome o hã.

12. Mɔ kawo nu wòɖea vi na mí le ne míedoa vevie nu heɖia anukware le dɔ me?

12 Ele be míanye veviedonulawo kple anukwareɖilawo. Veviedodonu le dɔ me kple agbagbadzedze be míawɔ dɔa nyuie ate ŋu ahe yayra geɖe vɛ na mí. Zi geɖe la, dɔtɔwo  dea asixɔxɔ gã aɖe dɔwɔla siwo doa vevie nu eye wobi ɖe dɔa me la ŋu. (Lododowo 12:24; 22:29) Esi míenye Kristotɔ vavãwo ta la, ele vevie be míanye anukwareɖilawo hã—mele be míafi míaƒe dɔtɔ ƒe ga, dɔwɔnuwo, alo ɣeyiɣi o. (Efesotɔwo 4:28) Míekpɔe le ta si do ŋgɔ me be viɖe geɖe dona tso anukwareɖiɖi me. Wokana ɖe dɔwɔla si ɖia anukware la dzi. Míaƒe dɔtɔ ɖade dzesi míaƒe veviedodonu kple anukwareɖiɖi o, meɖade dzesii o, míaƒe dzi adze eme le esi “dzitsinya nyui” le mía si eye míenya be míele mía Mawu si míelɔ̃ vevie ƒe lɔlɔ̃nu wɔm ta.—Hebritɔwo 13:18; Kolosetɔwo 3:22-24.

13. Nu kawoe ate ŋu ado tso eme ne míeɖoa kpɔɖeŋu nyui le dɔwɔƒe?

 13 Ele be míanya be míaƒe agbenɔnɔ ate ŋu ana amewo nakafu Mawu. Ne míenɔa agbe nyui le míaƒe dɔwɔƒe abe ale si wòdze Kristotɔwo ene la, amewo dea dzesii. Nu kae ado tso eme? Esia ana “[míaɖo] atsyɔ̃ na Mawu, mía Xɔla, ƒe nufiafia la.” (Tito 2:9, 10) Nyateƒee, míaƒe agbe nyui nɔnɔ ate ŋu ana amewo nakpɔ atsyɔ̃ si gbegbe le míaƒe tadedeagu ŋu la adze sii eye wòadzro wo. Wò ya bu ale si nàse le ɖokuiwò me ne wò dɔwɔhati aɖe va le nyateƒea srɔ̃m le kpɔɖeŋu nyui si nèɖona le dɔwɔƒe ta la ŋu kpɔ! Gawu la, ɖe teƒeɖoɖo aɖe galolo wu nyanya be wò agbe nyui nɔnɔ hea kafukafu vanɛ na Yehowa hedoa dzidzɔ na eƒe dzia?—Xlẽ Lododowo 27:11; 1 Petro 2:12.

ALE SI MÍABU NUWO ŊU NYUIE LE DƆWƆÐUI TIATIA ME

14-16. Ne ehiã be míawɔ nyametsotso le dɔwɔɖui ŋu la, nya vevi kawo ŋue wòle be míade ŋugble le?

14 Biblia meyɔ dɔwɔɖui siwo katã sɔ kple esiwo mesɔ o, eye mewɔ esia ŋuti se kukluiwo hã o. Gake ema mefia be míate ŋu awɔ dɔ ɖe sia ɖe ƒomevi faa o. Ŋɔŋlɔawo ate ŋu akpe ɖe mía ŋu míatia dɔwɔɖui si sɔ, si aɖe vi, eye wòadze Mawu ŋu ahaƒo asa na esiwo madze eŋu o. (Lododowo 2:6) Nya vevi eve aɖewo li, siwo ŋu wòle be nàde ŋugble le ne èle nyametsotso wɔm le dɔwɔɖui ŋu.

15 Ðe dɔ sia wɔwɔ ana mawɔ nane si ŋu woƒo nu tsi tre ɖo le Biblia mea? Mawu ƒe Nya la tsi tre ɖe fififi, aʋatsokaka, kple legbawo wɔwɔ ŋu. (2 Mose 20:4; Dɔwɔwɔwo 15:29; Efesotɔwo 4:28; Nyaɖeɖefia 21:8) Ele be míaƒo asa na dɔwɔɖui ɖe sia ɖe si ana míawɔ nu siawo tɔgbi. Míaƒe lɔlɔ̃ na Yehowa mana mɔ mí be míalɔ̃ axɔ dɔ si abia be míaƒo mía ɖokui ɖe nuwɔna siwo dzi Mawu meda asi ɖo o la me gbeɖe o.—Xlẽ 1 Yohanes 5:3.

 16 Ðe dɔ sia wɔwɔ ana makpe asi ɖe nuwɔna gbegblẽ aɖe ŋu alo adoe ɖe ŋgɔa? Bu kpɔɖeŋu sia ŋu kpɔ. Menye nu gbegblẽe wònye be Kristotɔ nawɔ dɔ abe telefon kaƒoƒoxɔla ene le dɔwɔƒe aɖe o. Ke ne lotodaƒee wòva kpɔ dɔ ma le ɖe? Ele eme be eƒe dɔa mabia be wòada loto na amewo tẽe o ya. Gake ɖe dɔwɔwɔ le afi ma manye asikpekpe ɖe tsatsadada, si nye nu si ŋu Mawu ƒe Nya tsi tre ɖo, ŋu oa? (Efesotɔwo 5:3-5) Esi míelɔ̃ Yehowa ta la, míadi gbeɖe be  míawɔ dɔ le afi si wowɔa nu siwo ŋu Ŋɔŋlɔawo tsi tre ɖo le o.

17. (a) Nu kawo ŋue wòle be míabu nyuie ne míele dɔ si míawɔ ŋuti nyametsotso wɔm? (Kpɔ aɖaka si nye “ Ðe Wòasɔ Be Mawɔ Dɔ Sia?”) (b) Aleke míaƒe dzitsinya ate ŋu akpe ɖe mía ŋu míawɔ nyametsotso siwo dzea Mawu ŋu?

17 Míate ŋu akpɔ ta na dɔwɔɖui ŋu nya siwo fɔna ɖe te ne míede ŋugble tso biabia vevi eve siwo dze le memama 15 kple 16 me la ŋu nyuie. Hekpe ɖe eŋu la, nu bubu aɖewo li siwo ŋu wòle be míabu nyuie ne míele dɔwɔɖui ŋuti nyametsotsowo wɔm. * Mele be míakpɔ mɔ be kluvi nuteƒewɔlaa naŋlɔ mɔfiame siwo akpɔ nɔnɔme ɖe sia ɖe si ate ŋu ado mo ɖa gbɔ la ɖi na mí o. Nɔnɔme siawo mee wòahiã be míawɔ nuŋububu nyuie ŋu dɔ le. Abe ale si  míesrɔ̃e le Ta 2 lia me ene la, ele be míana hehe míaƒe dzitsinya to Mawu ƒe Nya la sɔsrɔ̃ kple agbenɔnɔ ɖe enu gbe sia gbe dzi. Ne míena hehe míaƒe “nugɔmeseseŋutetewo to wo zazã me” alea la, awɔe be míaƒe dzitsinya akpe ɖe mía ŋu míawɔ nu siwo dzea Mawu ŋu ale be míayi edzi anɔ eƒe lɔlɔ̃ la me.—Hebritɔwo 5:14.

ALE SI MÍADA ASƆ LE DƆWƆNYAWO ME

18. Nu ka tae dadasɔ be ŋutilãmedɔwo nagavu tsyɔ gbɔgbɔme tɔwo dzi o mele bɔbɔe o?

18 Ale si míada asɔ be míaƒe ŋutilãmedɔwo nagavu tsyɔ gbɔgbɔme tɔwo dzi o mele bɔbɔe ‘le ŋkeke mamlɛ siawo siwo me nɔnɔ sesẽ’ la me o. (2 Timoteo 3:1) Dɔ kpɔkpɔ mele bɔbɔe kura o, eye agbagbadzedze be dɔ nagage le ame si o hã nye nya bubu. Mí Kristotɔ vavãwo míenyae be ele vevie be míawɔ dɔ sesĩe akpɔ míaƒe ƒome dzi. Gake ne míekpɔ nyuie o la, nu siwo míaƒe dɔa bia tso mía si, alo xexea ƒe ŋutilãmenudidi ƒe gbɔgbɔ, ate ŋu agblẽ nu le míaƒe gbɔgbɔmedɔwo ŋu. (1 Timoteo 6:9, 10) Eya ta mina míadzro ale si míawɔ ada asɔ me, eye esia akpe ɖe mía ŋu míakpɔ “nu siwo le vevie wu” adze sii.—Filipitɔwo 1:10.

19. Nu ka ta wòle be míaɖo ŋu ɖe Yehowa ŋu bliboe, eye nu kae kaka ɖe eyama dzi ana míaƒo asa na?

19 Ðo ŋu ɖe Yehowa ŋu bliboe. (Xlẽ Lododowo 3:5, 6.) Ame ka ŋue míagate ŋu aɖo ŋu ɖo wu eyama? Eyae léa be na mí. (1 Petro 5:7) Enya nu siwo hiã mí la nyuie wu mía ŋutɔwo gɔ̃ hã, eye eƒe alɔ meto ɖe eme o. (Psalmo 37:25) Eya ta anyo be míawɔ ɖe eƒe Nya la me ŋkuɖodzinya siawo dzi be: “Mina miaƒe agbenɔnɔ navo tso galɔlɔ̃ me, eye nu siwo le mia si fifia la nadze mia ŋu. Elabena [Mawu gblɔ] be: ‘Nyemaɖe asi le ŋuwò akpɔ o, eye nyemagblẽ wò ɖi hã akpɔ o.’” (Hebritɔwo 13:5) Ame geɖe siwo le ɣeyiɣiawo katã ƒe subɔsubɔdɔa wɔm la ate ŋu aɖo kpe edzi  be Mawu kpɔa míaƒe agbemenuhiahiãwo gbɔ na mí. Ne míeka ɖe Yehowa dzi bliboe be alé be na mí la, míatsi dzimaɖi fũu akpa ɖe ale si míawɔ akpɔ míaƒe ƒomea dzi ŋu o. (Mateo 6:25-32) Míaɖe mɔ gbeɖe be míaƒe ŋutilãmedɔwo navu tsyɔ gbɔgbɔmedɔwo, abe gbeƒãɖeɖe nya nyuia kple kpekpeawo dede ene dzi o.—Mateo 24:14; Hebritɔwo 10:24, 25.

20. Nu kae wòfia be míana míaƒe ŋku nanɔ nu ɖeka ŋu, eye aleke nàwɔ esiae?

 20 Na wò ŋku nanɔ nu ɖeka ŋu. (Xlẽ Mateo 6:22, 23.) Be míaƒe ŋku nanɔ nu ɖeka ŋu fia be míaganɔ nu geɖewo yome tim le agbe me o. Kristotɔwo nana woƒe ŋku nɔa nu ɖeka, si nye Mawu ƒe lɔlɔ̃nu wɔwɔ, ŋu. Ne míeto ŋku gã o la, esia akpe ɖe mía ŋu be míaƒo asa na dɔ gã dɔ gãwo kple nu gã nu gãwo didi. Nenema kee nu yeye sia nu yeye si gato ƒeƒle, si boblodolawo nana wòdzena abe wohiã godoo hafi ame nakpɔ dzidzɔ le agbe me ene, ƒe mɔ̃ maɖe mí o. Ke aleke nàwɔ ana wò ŋku nanɔ nu ɖeka ŋu? Dze agbagba nàtsri nugbanadodo madzemadzee. Mègatsɔ ŋutilãmenu gbogbowo do agba na ɖokuiwò ne woaxɔ ɣeyiɣi geɖe le asiwò o. Wɔ ɖe Biblia ƒe aɖaŋuɖoɖo be míana “nuɖuɖu kple nudodo” si le mía si nadze mía ŋu la dzi. (1 Timoteo 6:8) Dze agbagba ɖe sia ɖe nànɔ agbe tsɛ.

21. Nu ka tae wòle be míatsɔ nu siwo le vevie wu aɖo nɔƒe gbãtɔ le agbe me, eye nu kae wòle be wòaxɔ nɔƒe gbãtɔ?

21 Na gbɔgbɔmenuwo naxɔ nɔƒe gbãtɔ ɣeawokatãɣi. Esi wònye nu ʋɛ aɖewo koe míate ŋu akpɔ asinu awɔ gbe sia gbe ta la, ehiã be míatsɔ nu siwo le vevie wu aɖo nɔƒe gbãtɔ. Ne menye nenema o la, nu siwo mehiã boo o ate ŋu axɔ míaƒe ɣeyiɣiwo katã ahavu tsyɔ nu siwo le vevie wu la dzi. Nu kae wòle be míatsɔ aɖo nɔƒe gbãtɔ le agbe me? Ame geɖe siwo le xexea me tsɔa suku kɔkɔ dede, si wokpɔa mɔ be ana yewoava kpɔ dɔ gã awɔ le nuɖoanyi sia me la ɖoa nɔƒe gbãtɔ le agbe me. Gake Yesu xlɔ̃ nu eyomedzelawo be woayi edzi anɔ “Fiaɖuƒe la kple Mawu ƒe dzɔdzɔenyenye dim gbã.” (Mateo 6:33) Ɛ̃, Mawu ƒe Fiaɖuƒeae mí Kristotɔ vavãwo míetsɔ ɖoa nɔƒe gbãtɔ. Ele vevie be ale si míenɔa agbee—tiatia siwo míewɔna, taɖodzinu siwo míeminyana, kple nu siwo me míeƒoa mía ɖokui ɖo—naɖee afia be Fiaɖuƒea kple Mawu  ƒe lɔlɔ̃nu wɔwɔ le vevie na mí wu ŋutilãmenuwo kple dɔwɔɖuinyawo.

DƆ SESẼ WƆWƆ LE SUBƆSUBƆDƆA ME

Ne míetsɔ gbeƒãɖeɖedɔa ɖo nɔƒe gbãtɔ le agbe me la, esia afia be míelɔ̃ Yehowa

22, 23. (a) Dɔ kae nye vevitɔ si wode asi na Kristotɔ vavãwo, eye aleke míaɖee afia be dɔ sia le vevie na mí? (Kpɔ aɖaka si nye “ Nyametsotso Si Mewɔ Na Mele Dzidzɔ Kple Dzidzeme Kpɔm Le Agbe Me.”) (b) Nu kae nèɖo kplikpaa be yeawɔ ku ɖe wò dɔwɔɖui ŋu?

22 Esi míenya nyuie be nuɖoanyi sia ƒe nuwuwu tu aƒe ta la, míenana míaƒe susu nɔa dɔ si wode asi na mí Kristotɔ vavãwo, si nye gbeƒãɖeɖe kple nusrɔ̃lawo wɔwɔ, koŋ ŋu. (Mateo 24:14; 28:19, 20) Míedi be míawɔ agbeɖeɖedɔ sia veviedodotɔe abe ale si míaƒe Kpɔɖeŋuɖola, Yesu, wɔe ene. Aleke míaɖee afia be dɔ sia le vevie na mí? Mawu ƒe amewo dometɔ akpa gãtɔ tsɔ dzi blibo le dɔ sia wɔm abe gbeƒãɖelawo ene le hameawo me. Ame aɖewo hã trɔ asi le woƒe nɔnɔmewo ŋu be woasubɔ abe mɔɖelawo alo dutanyanyuigblɔlawo ene. Esi dzila geɖe kpɔ gbɔgbɔmetaɖodzinuwo ɖoɖo ƒe vevienyenye dze sii ta la, wode dzi ƒo na wo viwo be woatsɔ ɣeyiɣiawo katã ƒe subɔsubɔdɔa awɔ woƒe agbemedɔe. Ðe Fiaɖuƒegbeƒãɖela veviedonula siawo kpɔa dzidzɔ le dɔ sesẽ siwo wowɔna le subɔsubɔdɔa me mea? Ɛ̃, wokpɔnɛ! Luʋɔ blibo tsɔtsɔ subɔ Yehowa ye nye mɔ vevitɔ si dzi míato akpɔ dzidzɔ, dzidzeme, kple yayra siwo wu gbɔgblɔ.—Xlẽ Lododowo 10:22.

23 Ele be mía dometɔ geɖe nawɔ ŋutilãmedɔ gaƒoƒo geɖe hafi ate ŋu akpɔ ƒomea ƒe nuhiahiãwo gbɔ. Ðo ŋku edzi be Yehowa di be míakpɔ dzidzɔ le míaƒe dɔ sesẽ wɔwɔ me. Ne míena míaƒe nuŋububu sɔ kple etɔ, eye míetsɔ gɔmeɖose siwo wòna mí wɔ dɔe la, míate ŋu akpɔ dzidzeme geɖe le míaƒe dɔwɔwɔwo me. Ke hã, mina míaɖoe kplikpaa be míagana míaƒe dɔwɔɖui nahe míaƒe susu ɖa le dɔ vevitɔ, si nye Mawu ƒe Fiaɖuƒe ŋuti nya nyuia gbɔgblɔ, dzi o. Ne míena dɔ vevitɔ sia xɔ nɔƒe gbãtɔ le míaƒe agbe me la, aɖee afia be míelɔ̃ Yehowa, eye esia ana míanɔ eƒe lɔlɔ̃ la me ɖaa.

^ mm. 17 Àte ŋu akpɔ nu siwo ŋu wòle be míade ŋugble le tso dɔwɔɖui ŋu la ŋuti numedzodzro deto le Gbetakpɔxɔ, April 15, 1999, axa 28-30, kple yevugbe me tɔ, July 15, 1982, axa 26.