Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

“Minɔ Mawu Ƒe Lɔlɔ̃ La Me Ðaa”

 MEGBENYAWO

Ne Masɔmasɔwo Do Mo Ða Le Dɔwɔnyawo Me

Ne Masɔmasɔwo Do Mo Ða Le Dɔwɔnyawo Me

Apostolo Paulo ƒo nu tso haxɔsetɔwo kpɔkplɔ yi ʋɔnu ŋu le 1 Korintotɔwo 6:1-8. Ete ɖe edzi ŋutɔ be Kristotɔ siwo nɔ Korinto la dometɔ aɖewo ‘doa dzi kplɔa wo nɔviwo yia ʋɔnu le ame madzɔmadzɔwo gbɔ.’ (Kpukpui 1) Paulo ɖe susu vevi siwo tae mele be Kristotɔwo nakplɔ wo nɔewo ayi ʋɔnui o, ke boŋ woana hamea nakpɔ nyawo gbɔ na wo la me. Mina míadzro nu siwo tae gbɔgbɔ ʋã Paulo wòɖo aɖaŋu sia la dometɔ aɖewo me, eye míaƒo nu tso go ʋɛ aɖewo siwo ŋu Paulo ƒe aɖaŋuɖoɖoa meku ɖo o hã ŋu.

Gbã la, ne masɔmasɔ ɖo mía kple haxɔsetɔ aɖe dome le dɔwɔnyawo me la, ele be míadi be míakpɔ nyawo gbɔ le mɔ si adze Yehowa ŋu nu, ke menye ale si mía ŋutɔ míedii o. (Lododowo 14:12) Yesu ɖee fia be anyo wu be míakpɔ masɔmasɔwo gbɔ kaba bene woagava zu nya gã o. (Mateo 5:23-26) Gake nublanuitɔe la, Kristotɔ aɖewo hea nya kple wo nɔewo vevie hekplɔa wo nɔewo yia ʋɔnu kura gɔ̃ hã. Paulo gblɔ be: “Ne miekplɔa mia nɔewo yia ʋɔnu la, ekema miedo kpo nu xoxo.” Nu ka tae? Susu vevi ɖekae nye be esia maƒo nu nyui tso hamea kple Mawu si subɔm míele ŋu o. Eya ta ele be míabu Paulo ƒe biabia sia ŋu vevie, be: “Nu ka ta miena wowɔ vɔ̃ ɖe mia ŋu boŋ o?”—Kpukpui 7.

Paulo ɖe nu me hã be Mawu wɔ ɖoɖo nyui aɖe le hamea me be woatsɔ akpɔ nɔvi kple nɔvi dome nyawo gbɔ. Hamemetsitsiwo nye Kristotɔ siwo si nunya su to Ŋɔŋlɔawo me nyateƒea ƒe sidzedze dzi, eye Paulo gblɔ be ame siawo ‘ate ŋu adrɔ̃ ʋɔnu na nɔviawo’ le “agbe sia me nyawo” ŋu. (Kpukpui 3-5) Yesu gblɔ be afɔɖeɖe etɔ̃e woate ŋu awɔ le nu vɔ̃ gãwo, abe ameŋugbegblẽ alo ametafatafa ene, gbɔ kpɔkpɔ me: gbã la, ele be ame si dzi wodze agɔa le nakpɔ nyaa gbɔ le eya kple ame si dze agɔa ɖeɖe dzaa dome; evelia, ne afɔɖeɖe gbãtɔa mekpɔ dzidzedze o la, ate ŋu ayɔ ɖasefo ɖeka alo eve akpe ɖe eɖokui ŋu; etɔ̃lia, ne afɔɖeɖe evelia hã mekpɔ dzidzedze o la, wòatsɔ nyaa ayi na hame la, si nye hamemetsitsiwo.—Mateo 18:15-17.

 Gake menye senyalawo alo dɔwɔɖui ŋuti aɖaŋuɖolawoe hamemetsitsiwo nye o, eye mele be woawɔ wo ɖokui nenema hã o. Menye woawoe ade se ku ɖe ale si nɔvi kple nɔvi akpɔ masɔmasɔ siwo do mo ɖa le woƒe dɔwɔnyawo me gbɔ la ŋu na wo o. Ke boŋ wodzea agbagba be yewoakpe ɖe ame siwo dome masɔmasɔa le ŋu be woatsɔ Ŋɔŋlɔawo me gɔmeɖosewo awɔ dɔe ahakpɔ nyawo gbɔ le ŋutifafa me. Le nya sesẽ aɖewo gome la, woate ŋu abia kpekpeɖeŋu tso nutome sue dzikpɔla loo alo Yehowa Ðasefowo ƒe alɔdzedɔwɔƒea gbɔ. Gake nɔnɔme aɖewo ate ŋu ado mo ɖa si abia be nɔvi nakplɔ nɔvi ayi ʋɔnu, evɔ manye Paulo ƒe aɖaŋuɖoɖoa dzi dada o. Wo dometɔ aɖewoe nye kawo?

Le go aɖewo me la, nya aɖe tsɔtsɔ yi ʋɔnu ate ŋu anye senya aɖe ŋuti afɔɖeɖe dzro ko, ke manye le ɖokuitɔdidi alo dzrehehe ta o. Le kpɔɖeŋu me, xexea me ʋɔnudrɔ̃ƒewo koe ame ate ŋu axɔ nu siwo gbɔna la ŋuti ɖaseɖigbalẽwo le: srɔ̃gbegbe, dzila si gbɔ ɖevi anɔ ŋuti gomenɔamesi, dzikpɔga si woanɔ ame srɔ̃ nam le srɔ̃gbegbe megbe, nugblẽfexega xɔxɔ, ame ƒe ŋkɔ dede fetɔwo dome nenye be ame si nyi fea na setɔwo nya be yeɖu agba, kple kpeɖoɖo domenyinumagbalẽwo dzi. Nya aɖewo hã ate ŋu ado mo ɖa, si ana nɔvi aɖe nakpɔe be ahiã be yeasama nɔvi si sama ye atsɔ akpɔ ye ɖokui ta. *

Ne menya nye dzrehehe ƒe gbɔgbɔ tae Kristotɔ aɖe tsɔ woa kple nɔvia dome nya siawo tɔgbi yi setɔwo gbɔ o ko la, manye Paulo ƒe aɖaŋuɖoɖo si tso gbɔgbɔ me la dzi dada o. * Ke hã, nu si wòle be wòanɔ vevie na Kristotɔwoe nye Yehowa ƒe ŋkɔa ŋu kɔkɔ kpakple nana be ŋutifafa kple ɖekawɔwɔ nanɔ hamea me. Lɔlɔ̃ ye nye nu vevitɔ si wotsɔ dea dzesi Kristo yomedzelawo, eye “lɔlɔ̃ . . . media ye ŋutɔ tɔ o.”—1 Korintotɔwo 13:4, 5; Yohanes 13:34, 35.

^ mm. 2 Togbɔ be mebɔ o hã la, ate ŋu adzɔ be Kristotɔ aɖe nawɔ nu vlo ɖe nɔvia ŋu, abe ame gbɔ dɔdɔ sesẽe, ame dzi dzedze ŋutasesẽtɔe, amewuwu, alo adzodada ene. Le go siawo me la, manye Kristotɔwo ƒe nudidiwo dzi dada ne nɔvi aɖe tsɔ nya siawo yi na setɔwo o, togbɔ be ema ana woahe agɔdzelaa ayi ʋɔnu hã.

^ mm. 3 Kpɔ Gbetakpɔxɔ siwo gbɔna hena numekɔkɔ bubuwo: March 15, 1997, axa 17-22, kple October 15, 1991, axa 25-28 [Vol. 112, No. 20, axa 25-28].