Dzo kpo yi emenuwo dzi

Dzo kpo yi emenuawo dzi

Lɛta Si Tso Dɔdzikpɔha La Gbɔ

Lɛta Si Tso Dɔdzikpɔha La Gbɔ

Mía Nɔvi Lɔlɔ̃tɔ Si Lɔ̃ Yehowa:

Yesu gblɔ be: “Miadze si nyateƒe la, eye nyateƒe la ana ablɔɖe mi.” (Yohanes 8:32) Nya siawo dea dzi ƒo na ame loo! Ɛ̃, le ‘ŋkeke mamlɛ’ siawo siwo me nɔnɔ sesẽ, siwo me aʋatsonyawo va bɔ ŋutɔ gɔ̃ hã me la, àte ŋu anya nyateƒe la. (2 Timoteo 3:1) Èɖo ŋku zi gbãtɔ si nèva kpɔ nyateƒe si me kɔ ƒãa le Mawu ƒe Nya la me dze sii la dzia? Dzi dzɔ wò ale gbegbe!

Ke hã, togbɔ be enyo ŋutɔ be nyateƒea ƒe sidzedze vavãtɔ va su mía si eye míegblɔa eŋu nya na amewo edziedzi hã la, egahiã vevie be míanɔ agbe ɖe nyateƒe la nu. Hafi míate ŋu awɔ esia la, ele vevie be míanɔ Mawu ƒe lɔlɔ̃ la me. Nu kae esia fia? Nya sia ƒe ŋuɖoɖo dze le Yesu ƒe nya siwo wògblɔ le zã si do ŋgɔ na eƒe ku me. Egblɔ na eƒe apostolo wɔnuteƒewo be: “Ne mielé nye seawo me ɖe asi la, ekema miayi edzi anɔ nye lɔlɔ̃ la me, abe ale si ko meléa Fofonye ƒe sewo me ɖe asi, eye mekpɔtɔ le eƒe lɔlɔ̃ la me ene.”—Yohanes 15:10.

De dzesii be esi Yesu wɔ Fofoa ƒe sewo dzi tae wòte ŋu yi edzi nɔ Eƒe lɔlɔ̃ la me ɖo. Nenema kee wòanɔ le míawo hã gome egbea. Be míanɔ Mawu ƒe lɔlɔ̃ la me ɖaa la, ele be míanɔ agbe ɖe nyateƒea nu gbe sia gbe. Le zã ma ke me la, Yesu gblɔ be: “Ne mienya nu siawo la, ekema dzidzɔtɔwoe mianye ne miewɔa wo dzi.”—Yohanes 13:17.

Míele mɔ kpɔm vevie be agbalẽ sia akpe ɖe ŋuwò nàyi edzi anɔ agbe nɔm ɖe nyateƒea nu ale be nànɔ “Mawu ƒe lɔlɔ̃ la me ɖaa . . . hena agbe mavɔ kpɔkpɔ.”—Yuda 21.

Yehowa Ðasefowo Ƒe Dɔdzikpɔha La