Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

“Minɔ Mawu Ƒe Lɔlɔ̃ La Me Ðaa”

 MEGBENYAWO

Nya Si Biblia Gblɔ Tso Kaklã Kple Srɔ̃gbegbe Ŋu

Nya Si Biblia Gblɔ Tso Kaklã Kple Srɔ̃gbegbe Ŋu

Yehowa di tso ame siwo ɖe srɔ̃ si be woawɔ ɖe woƒe srɔ̃ɖetamkakaa dzi nuteƒewɔwɔtɔe. Esime Yehowa wɔ nyɔnu na ŋutsu gbãtɔa be wòazu srɔ̃a la, Yehowa gblɔ be: “Ŋutsu . . . [aku] ɖe srɔ̃a ŋu, eye woazu ŋutilã ɖeka.” Emegbe Yesu Kristo hã va yɔ nya mawo, eye wògblɔ kpee be: “Eya ŋuti nu si Mawu bla ɖekae la,  ame aɖeke megama eme o.” (1 Mose 2:24; Mateo 19:3-6) Eya ta Yehowa kple Yesu siaa bua srɔ̃ɖeɖe be enye nu si anɔ anyi ɖaa, negbe ku koe ama srɔ̃tɔwo dome. (1 Korintotɔwo 7:39) Esi srɔ̃ɖeɖe nye nu kɔkɔe ta la, mele be ame aɖeke nabu srɔ̃gbegbe nu tsɛe o. Le nyateƒe me la, Yehowa lé fu srɔ̃gbegbe si mesɔ ɖe Ŋɔŋlɔawo nu o.—Malaki 2:15, 16.

Nu ka dzie ame ate ŋu anɔ te ɖo agbe srɔ̃a wòasɔ ɖe Ŋɔŋlɔawo nu? Míenya be Yehowa lé fu ahasiwɔwɔ kple gbɔdɔdɔ ƒe agbe gbegblẽ nɔnɔ ƒomevi ɖe sia ɖe. (1 Mose 39:9; 2 Samuel 11:26, 27; Psalmo 51:4) Le nyateƒe me la, Yehowa bua gbɔdɔdɔ ƒe agbe gbegblẽ nɔnɔ be enye nu vɔ̃ gã ale gbegbe be, egblɔ be ne ame aɖe ɖi eƒe fɔ la, srɔ̃a ate ŋu anɔ te ɖe edzi agbee. (Woɖe nu si gbɔdɔdɔ ƒe agbe gbegblẽ nɔnɔ nye me le agbalẽ sia ƒe Ta 9 memama 7 lia me.) Yehowa gblẽe ɖe ame si srɔ̃ wɔ ahasi la si me be wòatso nya me nenye be agbe srɔ̃a loo alo magbee o. (Mateo 19:9) Eya ta ne ame si wɔ ahasi la srɔ̃ tiae be yeagbee la, ema manye afɔɖeɖe si Yehowa alé fui o. Gake mele be Kristo hamea me tɔ aɖeke nade dzi ƒo na ame aɖeke be wòagbe srɔ̃a o. Le nyateƒe me la, ame si srɔ̃ wɔ ahasi la ate ŋu abu nanewo ŋu, siwo ana wòatso nya me be yemagbe ye srɔ̃ si ɖi fɔ la o, vevietɔ ne srɔ̃a ɖe dzimetɔtrɔ vavãtɔ fia. Aleke kee wòɖale o, ame si kpɔ mɔ agbe srɔ̃a wòasɔ ɖe Ŋɔŋlɔawo nu la ŋutɔe atso nya me, eye eya ŋutɔe anɔ te ɖe nu siwo ado tso nyametsotso si wòawɔ me la hã nu.—Galatiatɔwo 6:5.

Ɣeaɖewoɣi la, nɔnɔme sesẽ aɖewo doa mo ɖa, siwo nana Kristotɔ aɖewo tsoa nya me be yewoaklã tso yewo srɔ̃ gbɔ alo agbee togbɔ be menye gbɔdɔdɔ ƒe agbe gbegblẽe wònɔ o hã. Le go sia me la, Biblia gblɔ be ame si dzo le srɔ̃a gbɔ la “nenɔ anyi srɔ̃maɖemaɖee, alo negawɔ ɖeka kple srɔ̃a.” (1 Korintotɔwo 7:11) Kristotɔ sia mekpɔ mɔ anɔ zɔzɔm kple ame bubu kple susu be yeava ɖee o. (Mateo 5:32) Azɔ na míakpɔ nɔnɔme sesẽ siwo ate ŋu ado mo ɖa, siwo mebɔ o, siwo ta ame aɖewo kpɔe be ehiã be yewoaklã tso yewo srɔ̃ gbɔ la dometɔ aɖewo ɖa.

Eɖoɖo koŋ agbe ƒomea dzi kpɔkpɔ. Srɔ̃ŋutsu si gbe eƒe ƒomea dzi kpɔkpɔ, evɔ ŋutete le esi be wòawɔe hafi, ate ŋu ana ƒomea nada ahe kolikoli ale gbegbe be womate ŋu akpɔ agbemenuhiahiã veviwo o. Biblia gblɔ be: “Ne ame aɖe mekpɔa . . . eya ŋutɔ ƒe  aƒemetɔwo ƒe nuhiahiãwo gbɔ o la, egbe xɔse la, eye wòvɔ̃ɖi wu dzimaxɔsetɔ.” (1 Timoteo 5:8) Ne ŋutsua ɖoe koŋ gbe be yemawɔ tɔtrɔ o la, srɔ̃a ate ŋu atso nya me be yeaklã tso ye srɔ̃ gbɔ le se nu le eya ŋutɔ kple viawo ƒe dedienɔnɔ ta. Ele be hamemetsitsiwo nabu nyawo ŋu nyuie ne wotso Kristotɔ aɖe nu be egbe eƒe ƒome dzi kpɔkpɔ. Ne ame aɖe ɖoe koŋ gbe eƒe ƒomea dzi kpɔkpɔ vavã la, woate ŋu aɖee le haa me.

Ŋutasẽnuwɔwɔ ɖe ame srɔ̃ ŋu. Ne wobe ame aɖe sẽa ŋuta le srɔ̃a ŋu la, efia be ewɔa adã heƒoa srɔ̃a vevie ale gbegbe be eƒe lãmesẽ alo eƒe agbe kura gɔ̃ hã ɖo afɔku me. Ne hamemetsitsiwo se be Kristotɔ aɖe wɔ nu sia tɔgbi la, ele be woaku nyaa me. Dɔmedzoedodo helĩhelĩ kple ŋutasẽnuwɔwɔ nye nu siwo ta woate ŋu aɖe ame le hamea me ɖo.—Galatiatɔwo 5:19-21.

Nana be ame srɔ̃ ƒe gbɔgbɔmemenyenye naɖo afɔku me. Ate ŋu adzɔ be ame aɖe nanɔ agbagba dzem ɣesiaɣi be yeana ye srɔ̃ nadzudzɔ Yehowa subɔsubɔ, alo anɔ edzi zim be wòada Mawu ƒe se dzi le mɔ aɖe nu. Le go sia me la, ekpo ɖe ame si ŋu srɔ̃a le nu sia wɔm ɖo la gbɔ be wòatso nya me nenye be kaklã le setɔwo gbɔ koe anye mɔ si dzi yeato “[aɖo] to Mawu abe dziɖula ene wu amewo.”—Dɔwɔwɔwo 5:29.

Ne nya sesẽ siwo ŋu míeƒo nu tsoe la tɔgbi do mo ɖa la, mele be ame aɖeke nazii ɖe ame si srɔ̃ le nu sia wɔm la dzi be wòadzo le egbɔ loo alo wòakpɔtɔ anɔ egbɔ o. Togbɔ be hamemetsitsiwo kple ame sia xɔlɔ̃ siwo tsi le gbɔgbɔ me ate ŋu ana kpekpeɖeŋui ahaɖo aɖaŋu nɛ tso Ŋɔŋlɔawo me hã la, womate ŋu anya nu sia nu si yia edzi le srɔ̃ŋutsu kple srɔ̃nyɔnu dome la tsitotsito o. Yehowa koe nya. Manye bubudede Mawu loo alo eƒe srɔ̃ɖeɖoɖoa ŋu kura ne Kristotɔ srɔ̃tɔ aɖe ɖe ami ɖe eƒe aƒemekuxiwo be yeana amewo nakpɔe be esɔ be yeadzo le ye srɔ̃ gbɔ o. Ne ame aɖe ɖoe be yeato ayemɔ aɖe dzi aklã tso ye srɔ̃ gbɔ la, Yehowa ya nya, alekeleke amea ɖaɣlae hã. Nyateƒeae nye be, “woklo nu le nuwo katã dzi eye wotsi ƒeƒle le ame si míabu akɔnta na la ŋkume.” (Hebritɔwo 4:13) Gake ne Kristotɔ aɖe le nɔnɔme sesẽ si nye afɔku me tom, eye wòdze agbagba ʋuu gake gbeɖegbeɖea koe, eye wòtso nya me be kaklã koe axɔ na ye la, mele be ame aɖeke natsɔ nya ɖe eŋu o. “Mí katã míava tsi tsitre ɖe Mawu ƒe ʋɔnudrɔ̃zikpui la ŋgɔ” mlɔeba.—Romatɔwo 14:10-12.