Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Yesu—Mɔ La, Nyateƒe La Kple Agbe La

 TA 84

Nu Ka Gbegbee Nusrɔ̃lanyenye Bia?

Nu Ka Gbegbee Nusrɔ̃lanyenye Bia?

LUKA 14:25-35

  • NU SI WÒBIA BE AME NANYE NUSRƆ̃LA

Yesu fia nu vevi aɖewo esime wònɔ nuɖuƒe le Farisitɔwo ƒe amegã aɖe ƒe me. Esi Yesu yi eƒe mɔzɔzɔa dzi ɖo ta Yerusalem la, amehawo nɔ eŋu nɔ mɔa zɔm kplii. Nu ka tae? Ðe wodi le nyateƒe me be yewoanye eyomedzela vavãwo eɖanye nu ka kee esia abia tso wo sia?

Esime wonɔ mɔa dzi yina la, Yesu gblɔ nya aɖe na ameha la si anya wɔ moyaa na wo dometɔ aɖewo. Egblɔ be: “Ne ame aɖe va gbɔnye, eye melé fu fofoa, dadaa, srɔ̃a, viawo, nɔviaŋutsuwo kple nɔvianyɔnuwo, ɛ̃, ne melé fu eya ŋutɔ ƒe agbe kekeake gɔ̃ hã o la, mate ŋu anye nye nusrɔ̃la o.” (Luka 14:26) Gake nu kae eƒe nya mawo fia?

Menye ɖe Yesu le gbɔgblɔm be ele be ame siwo katã ava nye ye yomedzelawo la nalé fu woƒe ƒometɔwo ŋutɔŋutɔ o. Ke boŋ efia be ele be woalɔ̃ Yesu wu ƒometɔawo, eya ta womawɔ nu abe ŋutsu si ŋu wòƒo nu tsoe le kpɔɖeŋu si wòwɔ le nua ɖuɣi me si gbe wɔwɔ ɖe amekpekpe vevi aɖe dzi le esi wòɖe srɔ̃ teti koe nye ema ta la ene o.—Luka 14:20.

De dzesii be Yesu gblɔ be ele be nusrɔ̃la nalé fu “eya ŋutɔ ƒe agbe,” alo eƒe luʋɔ gɔ̃ hã. Esia fia be ele be nusrɔ̃la vavãtɔ nalɔ̃ Yesu wu ale si wòalɔ̃ eya ŋutɔ ƒe agbe, si fia be wòalɔ̃ faa aku gɔ̃ hã ne ehiã. Eya ta eme kɔ ƒãa be agbanɔamedzi gãe wònye be ame nanye Kristo ƒe nusrɔ̃la. Menye nu si gɔme woadze eŋumabumabu nyuie ye wònye o.

Nusrɔ̃lanyenye ate ŋu ana ame nakpe fu eye wòato yometitiwo me, elabena Yesu gblɔ be: “Ame si metsɔ eƒe fuwɔameti hedze yonyeme o la mate ŋu anye nye nusrɔ̃la o.” (Luka 14:27) Eya ta ele be nusrɔ̃la vavãtɔ nalɔ̃ faa be yeato vlododo me, abe ale si Yesu hã to emee ene. Yesu gblɔ gɔ̃ hã be yeaku le yeƒe futɔwo si me.

Eya ta ehiã be ameha si le mɔa zɔm kple Yesu la nabu nu si gbegbe wòbia be woanye Kristo ƒe nusrɔ̃la la ŋu nyuie. Yesu wɔ kpɔɖeŋu aɖe tsɔ te gbe ɖe esia dzi. Egblɔ be: “Le kpɔɖeŋu me, mia dometɔ kae li ne edi be yeatu xɔ la, manɔ anyi abu eŋu kɔnta gbã ahakpɔ ɖa be nu sɔ gbɔ ɖe ye si yeate ŋu awu enu o mahã? Ne menye nenema o la, aɖo egɔme anyi, gake mate ŋu awu enu o.” (Luka 14:28, 29) Eya ta hafi ame siwo nɔ mɔa zɔm kple Yesu yina Yerusalem la nava zu eƒe nusrɔ̃lawo la, ele be woaɖoe kplikpaa be yewoatsɔ agba si esia ada ɖe yewo dzi la bliboe. Ewɔ kpɔɖeŋu bubu tsɔ te gbe ɖe esia ƒe vevienyenye dzi ale:

“Fia kae li, eye ne eyina aʋa kpe ge kple fia bubu la, manɔ anyi abu eŋuti gbã, ne ate ŋu atsɔ asrafo akpe ewo anɔ te ɖe ame si gbɔna aʋa kpe ge kplii la ƒe asrafo akpe blaeveawo nu oa? Ne ekpɔe be manya wɔ o la, ekema ne ame kemɛa le adzɔge ʋĩi gbɔna la, adɔ eƒe amewo ɖa be woawɔ ŋutifafa kplii.” Be Yesu nate gbe ɖe  eƒe nyaa dzi la, egblɔ be: “Nenema kee mia dometɔ si magbe nu le nu siwo katã le esi la gbɔ o la mate ŋu anye nye nusrɔ̃la o.”—Luka 14:31-33.

Eme kɔ ƒãa be menye ameha siwo nɔ mɔa zɔm kple Yesu la koe wònɔ nya mawo gblɔm na o. Ele be Kristo yomedzelawo katã nalɔ̃ faa awɔ nya si gblɔm wòle le afi sia la dzi. Esia fia be ne wodi be yewoanye eƒe nusrɔ̃lawo la, ele be woalɔ̃ faa be yewoatsɔ nu sia nu si le yewo si, eɖanye woƒe nunɔamesiwo loo alo woƒe agbe gɔ̃ hã, asa vɔe. Esia nye nu si ŋu wòle be woabu nyuie ahado gbe ɖa tso eŋu.

Azɔ Yesu he susu yi nya aɖe si ŋu wòƒo nu tsoe le eƒe Todzimawunyaa me esi wògblɔ be yeƒe nusrɔ̃lawo nye “anyigba la ƒe dze” la dzi. (Mateo 5:13) Anɔ eme be eƒe nyaa fia be abe ale si ko dze ŋutɔŋutɔ kpɔa nu ta be wòagagblẽ o ene la, nenema kee yeƒe nusrɔ̃lawo ƒe ŋusẽkpɔɖeamedzi kpɔa amewo ta tso gbegblẽ me, si wɔnɛ be amewo kple Mawu dome nɔna nyuie eye wonɔa agbe nyui. Azɔ esi wòsusɔ vie wòawu eƒe subɔsubɔdɔa nu ta la, egblɔ be: “Nyateƒee, nu nyui aɖee dze nye. Ke ne dze bu eƒe ŋusẽ ɖe, nu kae woatsɔ adee?” (Luka 14:34) Eƒe nusrɔ̃lawo nyae be dze ƒomevi aɖe nɔ anyi ɣemaɣi si ŋu viɖe boo aɖeke menɔ o le esi anyigbamenuwo tsakae ta.

Eya ta Yesu nɔ gbɔgblɔm be mele be ame siwo nye yeƒe nusrɔ̃lawo xoxo la gɔ̃ hã nana tame si woɖo kplikpaa be yewoadze ye yome la me nagbɔdzɔ o. Ne menye nenema o la, viɖe aɖeke manɔ wo ŋu o, abe dze si bu eƒe ŋusẽ ene. Esia ana xexea naɖe alɔme le wo ŋu. Gawu la, Mawu makpɔ ŋudzedze ɖe wo ŋu o, eye woahe vlododo ava eƒe ŋkɔa dzi gɔ̃ hã. Yesu te gbe ɖe ale si wòle vevie be woaƒo asa na esia la dzi esi wògblɔ be: “Ame si to senu li na la, nesee.”—Luka 14:35.