Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Yesu—Mɔ La, Nyateƒe La Kple Agbe La

 TA 16

Dzo Nɔ Yesu Me Ðe Tadedeagu Vavãtɔ Ŋu

Dzo Nɔ Yesu Me Ðe Tadedeagu Vavãtɔ Ŋu

YOHANES 2:12-22

  • YESU KƆ GBEDOXƆA ŊU

Esi wowu srɔ̃ɖeɖea nu le Kana la, Yesu ɖo ta Kapernaum. Yesu dada kple dadaviawo, siwo nye Yakobo, Yosef, Simon kple Yuda yi kplii.

Gake nu ka tae Yesu yi Kapernaum? Afi si wotso du sia ɖo la ɖe dzesi wu Nazaret alo Kana eye edze ƒãa be elolo wu hã. Azɔ hã nusrɔ̃la yeye siwo Yesu kpɔ la dometɔ geɖe nɔ Kapernaum alo afi si te ɖe eŋu. Eya ta Yesu ate ŋu ana hehe wo esime wogakpɔtɔ le woƒe nutoa me.

Esime Yesu nɔ Kapernaum la, ewɔ nukudɔwo hã. Eya ta dua me tɔwo kple nutoa me tɔ geɖe se nu tso nukudɔ siwo wòwɔ le afi ma la ŋu. Gake eteƒe medidi o, ele be Yesu kple eƒe zɔhɛ Yudatɔ siawo siwo doa vevie mawusubɔsubɔ la naɖo ta Yerusalem be woaɖaɖu ƒe 30 K.Ŋ. ƒe Ŋutitotoŋkekenyuia.

Esime wonɔ gbedoxɔa me le Yerusalem la, Yesu wɔ nane si wɔ dɔ ɖe eƒe nusrɔ̃lawo dzi ŋutɔ si mewɔ wokpɔ kpɔ o.

Mawu ƒe Se la bia tso Israel-viwo si be woatsɔ lãwo asa vɔe le gbedoxɔa me, eye ame siwo zɔ mɔ va la ahiã nuɖuɖu kple nuhiahiã bubuwo. Eya ta Sea ɖe mɔ be ame siwo azɔ mɔ tso didiƒewo ava Yerusalem la natsɔ ga ɖe asi be woatsɔ aƒle “nyiwo, alẽwo, gbɔ̃wo,” kple nu bubu siwo ahiã wo esime wole dua me. (5 Mose 14:24-26) Eya ta asitsala siwo nɔ Yerusalem la dzraa lãwo alo xewo le gbedoxɔa ƒe xɔxɔnu gã aɖe me. Eye wo dometɔ aɖewo nɔ amewo bam to asi sesẽ dodo na wo dzi.

Dɔme ve Yesu ŋutɔ wòtrɔ gagbalawo ƒe gawo ƒu gbe eye wòtu asi woƒe kplɔ̃wo ƒu anyi henya wo do goe. Eye Yesu gblɔ be: “Mitsɔ nu siawo dzoe le afi sia! Migatsɔ Fofonye ƒe aƒe la wɔ asitsaƒee o!”—Yohanes 2:16.

Esi Yesu ƒe nusrɔ̃lawo kpɔ esia la, woɖo ŋku nyagblɔɖi si ku ɖe Mawu ƒe Via ŋu la dzi be: “Ŋuʋaʋã ɖe wò aƒe la ŋu abi le menye abe dzo ene.” Gake Yudatɔwo biae be: “Dzesi kae nàwɔ atsɔ aɖee afia be yekpɔ mɔ awɔ nu siawo?” Yesu ɖo eŋu be: “Migbã gbedoxɔ sia, eye magatui le ŋkeke etɔ̃ me.”—Yohanes 2:17-19; Psalmo 69:9.

Yudatɔwo susu be gbedoxɔ ŋutɔŋutɔ si le Yerusalem la ŋu nya gblɔmee Yesu nɔ, eya ta wobiae be: “Ƒe blaene vɔ adee wotsɔ tu gbedoxɔ sia, eye wò ya àgbugbɔ atui le ŋkeke etɔ̃ mea?” (Yohanes 2:20) Gake Yesu ƒe ŋutilã ŋue wònɔ nu ƒom le abe gbedoxɔ ene. Ƒe etɔ̃ megbe esi wofɔe ɖe tsitre tso ame kukuwo dome la, eƒe nusrɔ̃lawo ɖo ŋku eƒe nya siawo dzi.