Dzo kpo yi emenuwo dzi

Dzo kpo yi emenuawo dzi

 TA 68

Mawu Ƒe Vi Lae Nye “Xexea Ƒe Kekeli”

Mawu Ƒe Vi Lae Nye “Xexea Ƒe Kekeli”

YOHANES 8:12-36

  • YESU GBLƆ AME SI VI LA NYE

  • MƆ KA NUE YUDATƆWO NYE KLUVIWO LE?

Agbadɔŋkekenyuia ƒe ŋkeke adrelia si nye mamlɛtɔ ɖo, eye Yesu le nu fiam le gbedoxɔa me “le teƒe si nudzɔɖakawo nɔna.” (Yohanes 8:20; Luka 21:1) Anye be teƒe sia le Nyɔnuwo ƒe Xɔxɔnua, afi si amewo va dzɔa nu le.

Le zã me le ŋkekenyuia ɖuɣi la, wosia akaɖi tɔxɛ aɖe le gbedoxɔa ƒe akpa sia. Akaɖiti gã ene le afi sia, eye agba gã ene siwo yɔ kple ami la li na wo dometɔ ɖe sia ɖe. Akaɖi siawo ƒe keklẽ nu sẽ ale gbegbe be edea didiƒe ʋĩi ke. Nu si Yesu gblɔ azɔ la ahe eƒe nyaselawo ƒe susu ayi nu sia dzi. Egblɔ be: “Nyee nye xexea ƒe kekeli. Ame si dzea yonyeme la mele viviti me zɔ ge akpɔ o, ke boŋ agbe ƒe kekeli anɔ esi.”—Yohanes 8:12.

Farisitɔwo tsɔ nya ɖe nu si Yesu gblɔ la ŋu hegblɔ be: “Wò ŋutɔe le ɖase ɖim le ɖokuiwò ŋu; wò ɖaseɖiɖi la menye nyateƒe o.” Yesu ɖo eŋu na wo be: “Ne nye ŋutɔe le ɖase ɖim le ɖokuinye ŋu hã la, nye ɖaseɖiɖi la nye nyateƒe, elabena menya afi si metso kple afi si meyina. Ke miawo ya mienya afi si metso kple afi si meyina o.” Egblɔ kpee be: “Woŋlɔ ɖe miawo ŋutɔ miaƒe Se la me hã be: ‘Ame eve ƒe ɖaseɖiɖi nye nyateƒe.’ Nyee nye ame si le ɖase ɖim le ɖokuinye ŋuti, eye Fofo si dɔm ɖa la hã le ɖase ɖim le ŋunye.”—Yohanes 8:13-18.

Esi nya sia medze Farisitɔwo ŋu o ta la, wobiae be: “Afi kae Fofowò le?” Yesu gblɔ na wo kã be: “Mienyam o, eye mienya Fofonye hã o. Ne ɖe mienyam la, anye ne mienya Fofonye hã.” (Yohanes 8:19) Togbɔ be Farisitɔwo di be yewoana woalé Yesu hã la, ame aɖeke meka asi eŋu o.

Yesu gagblɔ nya aɖe si wògblɔ do ŋgɔ be: “Nye la mele dzodzo ge, eye miadim, gake miaku ɖe miaƒe nu vɔ̃ me. Afi si yim mele la, miate ŋu ava o.” Esi Yudatɔwo mese nya si Yesu gblɔ  la gɔme kura o ta la, wode asi gbɔgblɔ me be: “Ðe wòyina eɖokui wu gea? Elabena egblɔ be, ‘Afi si yim mele la, miate ŋu ava o.’” Womese Yesu ƒe nyaawo gɔme o, elabena womenya afi si wòtso o. Eya ta eɖe eme na wo be: “Miawo la, anyigba dzie mietso; nye ya dziƒoe metso. Miawo mietso xexe sia me; nye ya nyemetso xexe sia me o.”—Yohanes 8:21-23.

Yesu nɔ nu ƒom tso eƒe anyinɔnɔ le dziƒo do ŋgɔ na eƒe amegbetɔ zuzu kple ale si wònye Mesia, alo Kristo si ŋugbe wodo, si wòle be subɔsubɔhaŋgɔnɔla siawo nanɔ mɔ kpɔm na la ŋu. Ke hã, wobiae vlodoametɔe be: “Ame kae nènye?”—Yohanes 8:25.

Le ale si wogbe Yesu hetsi tsitre ɖe eŋu ta la, eɖo eŋu na wo be: “Nu ka tae megale nu ƒom kpli mi ɖo ya?” Ke hã egahe susu yi Fofoa dzi eye wòɖe nu si tae wòle be Yudatɔwo naɖo to Vi la me ale: “Ame si dɔm ɖa la nye nyateƒetɔ, eye nu siwo tututu mese tso egbɔ la, nu siawo gblɔm mele le xexea me.”—Yohanes 8:25, 26.

Azɔ Yesu ɖe ale si wòka ɖe Fofoa, si dzi Yudatɔ siawo meka ɖo o la fia esi wògblɔ be: “Ne miehe Amegbetɔvi la ɖe ati ŋu vɔ hafi miadze sii be nyee, eye be nyemewɔa naneke le ɖokuinye si o; ke boŋ nu siwo tututu Fofo la fiam lae megblɔna. Eye Ame si dɔm ɖa la li kplim; megblẽ nye ɖeka ɖi o, elabena mewɔa nu siwo dzea eŋu ɣesiaɣi.”—Yohanes 8:28, 29.

Gake Yudatɔ aɖewo ya xɔ Yesu dzi se, eya ta egblɔ na wo be: “Ne mieyi edzi lé nye nya la me ɖe asi la, ekema nye nusrɔ̃lawo mienye vavã, eye miadze si nyateƒe la, eye nyateƒe la ana ablɔɖe mi.”—Yohanes 8:31, 32.

Nya sia si wògblɔ tso ablɔɖekpɔkpɔ ŋu la na wo dometɔ aɖewo tsi yaa. Eya ta wogblɔ be: “Abraham ƒe dzidzimeviwoe míenye, eye míenye kluviwo na ame aɖeke kpɔ o. Nu ka ŋuti nègblɔ be, ‘Woana ablɔɖe mi’?” Yudatɔwo nyae be dukɔ bubuwo ɖu yewo dzi kpɔ, ke hã, womelɔ̃na be woayɔ yewo be kluviwo o. Gake Yesu na wonya be wogakpɔtɔ nye kluviwo esi wògblɔ be: “Vavã, vavã mele egblɔm na mi be, ame sia ame si wɔa nu vɔ̃ la, nu vɔ̃ ƒe kluvi wònye.”—Yohanes 8:33, 34.

Ale si Yudatɔwo medi be yewoalɔ̃ ɖe edzi be yewonye nu vɔ̃ ƒe kluviwo o la ate ŋu agblẽ nu le wo ŋu vevie. Yesu gblɔ be: “Kluvi menɔa aƒe me ɖaa o; vi ya nɔa anyi ɖaa.” (Yohanes 8:35) Domenyinyi ƒe gome aɖeke mele kluvi si o, eye woate ŋu aɖe asi le eŋu ɣesiaɣi. Vi si wodzi ɖe aƒea me ŋutɔŋutɔ alo ame si woxɔ abe vi ene koe nɔa anyi “ɖaa,” si fia ŋkeke ale si wòle agbe.

Eya ta Vi la ŋuti nyateƒea ye nye nyateƒe si naa ablɔɖe amewo tso nu vɔ̃ si kplɔa ame yia ku mee la me tegbee. Yesu gblɔ be: “Ne Vi la na ablɔɖe mi la, ekema mianye ablɔɖeviwo vavã.”—Yohanes 8:36.