Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Yesu—Mɔ La, Nyateƒe La Kple Agbe La

 TA 38

Yohanes Di Be Yease Nya Aɖe Tso Yesu Gbɔ

Yohanes Di Be Yease Nya Aɖe Tso Yesu Gbɔ

MATEO 11:2-15 LUKA 7:18-30

  • YOHANES AMENYRƆÐETSIMELAA BIA NYA TSO YESU ƑE WƆƑE ŊU

  • YESU KAFU YOHANES

Anɔ abe ƒe ɖeka ene ye nye esia Yohanes Amenyrɔɖetsimelaa le gaxɔ me. Ke hã, ele Yesu ƒe nukunuwo ŋu nya sem. Bu ale si Yohanes ase le eɖokui me esi eƒe nusrɔ̃lawo va gblɔ nɛ be Yesu fɔ ahosi aɖe si le Nain la viŋutsu ɖe tsitre la ŋu kpɔ. Gake Yohanes di be yease nu si nukudɔ siawo katã fia la tso Yesu ŋutɔ gbɔ tẽe. Eya ta Yohanes dɔ eƒe nusrɔ̃la eve ɖe egbɔ. Ðe susu ka ta? Edɔ wo be woabia Yesu be: “Wòe nye Ame Si Gbɔna laa, alo ɖe míakpɔ mɔ na ame bubua?”—Luka 7:19.

Ðe wòwɔ nuku be wòbia nya ma? Yohanes nye mawusubɔla dovevienu, eye ƒe eve kloe do ŋgɔ esime wònɔ Yesu nyrɔm la, ekpɔ Mawu ƒe gbɔgbɔ wòɖi ɖe Yesu dzi eye wòse Mawu ƒe gbe wògblɔ be yekpɔ ŋudzedze ɖe eŋu. Masɔ be míaƒo nya ta be Yohanes ƒe xɔsee gbɔdzɔ o. Ðe Yohanes ƒe xɔse gbɔdzɔ la, anye ne Yesu makafui nenema gbegbe abe ale si wòwɔe gbe ma gbe ene o. Gake ne menye ɖi kemee Yohanes le o ɖe, ke nu ka tae wòdɔ amewo be woabia nya ma Yesu?

Anye be ɖeko Yohanes di be yeakpɔ kpeɖodzi tso Yesu ŋutɔ gbɔ tẽe be eyae nye Mesia la. Esia ado ŋusẽ Yohanes esime wòle fu kpem le gaxɔa me. Edze ƒãa be susu bubu aɖe hã tae Yohanes bia nya ma ɖo. Enya Biblia me nyagblɔɖi siwo ɖee fia be Mawu ƒe Amesiamina la anye fia kple ɖela. Ke hã, ɣleti geɖe le Yesu ƒe nyɔnyrɔxɔxɔ megbe la, Yohanes gakpɔtɔ le gaxɔ me. Eya ta Yohanes di be yeanya nenye be ame bubu aɖe gbɔna ɖe Yesu yome si ana nu siwo katã wogblɔ ɖi be Mesia la awɔ la nava eme bliboe.

Le esi Yesu nagblɔ na Yohanes ƒe nusrɔ̃lawo be, ‘Ɛ̃, nyee nye Ame si gbɔna’ teƒe la, ena kpeɖodzi siwo ɖee fia be Mawu le megbe na ye esi wòda dɔléle kple lãmegbegblẽ ƒomevi vovovowo le ame geɖe ŋu. Eyome egblɔ na nusrɔ̃laawo be: “Miheyi ɖagblɔ nu siwo sem miele kple nu siwo kpɔm miele la na Yohanes: Ŋkuagbãtɔwo le nu kpɔm, bunɔwo le zɔzɔm, anyidɔlélawo ŋuti le kɔkɔm, tokunɔwo le nu sem, wole ame kukuwo fɔm ɖe tsitre, eye wole nya nyui la gblɔm na ame dahewo.”—Mateo 11:4, 5.

Yohanes ƒe nyabiabia la ate ŋu afia be ele mɔ kpɔm be Yesu nawɔ nu si yi ŋgɔ wu nu si wɔm wòle fifia eye ɖewohĩ wòaɖe ye le gaxɔa me. Gake Yesu le gbɔgblɔm na Yohanes be megakpɔ mɔ na nu si yi ŋgɔ wu nukunu siwo wɔm yele la o.

Esi Yohanes ƒe nusrɔ̃lawo dzo la, Yesu ka ɖe edzi na ameha la be menye nyagblɔɖila koe Yohanes nye o. Eyae nye Yehowa ƒe “dɔla” si ƒe nya wogblɔ ɖi le Malaki 3:1. Eya kee nye nyagblɔɖila Eliya si ƒe nya wogblɔ ɖi le Malaki 4:5, 6 hã. Yesu gblɔ be: “Vavã mele egblɔm na mi be, le ame siwo nyɔnuwo dzi dome la, ɖeke medo kpɔ, si nye gã wu Yohanes Amenyrɔɖetsimela o; gake ame si nye suetɔ le Dziƒofiaɖuƒea me la nye gã wui.”—Mateo 11:11.

Nya si Yesu gblɔ be ame si nye suetɔ le Dziƒofiaɖuƒea me nye gã wu Yohanes la fia be Yohanes manɔ Dziƒofiaɖuƒea me o. Yohanes ye dzra mɔ dzi ɖo na Yesu, gake eku hafi Kristo ʋu dziƒoyiyi ƒe mɔnukpɔkpɔa ɖi. (Hebritɔwo 10:19, 20) Ke hã, Yohanes nye Mawu ƒe nyagblɔɖila wɔnuteƒe eye anye Mawu Fiaɖuƒea tevi le anyigba dzi.