Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Yesu—Mɔ La, Nyateƒe La Kple Agbe La

 TA 23

Yesu Wɔ Nukudɔwo Le Kapernaum

Yesu Wɔ Nukudɔwo Le Kapernaum

MATEO 8:14-17 MARKO 1:21-34 LUKA 4:31-41

  • YESU NYA GBƆGBƆ VƆ̃ DO GOE

  • YESU DA GBE LE PETRO LƆ̃XO ŊU

Yesu yɔ eƒe nusrɔ̃la ene siwo nye Petro, Andrea, Yakobo kple Yohanes be woava nye ameɖelawo. Azɔ le Sabat dzi la, wo katã woyi wo gbɔ ƒuƒoƒe aɖe si le Kapernaum la me. Yesu fia nu le ƒuƒoƒea, eye ale si wòfia nui la gana amewo ƒe nu ku. Efia nu wo abe ame si si ŋusẽ le ene, ke menye abe agbalẽfialawo ene o.

Ŋutsu aɖe si me gbɔgbɔ vɔ̃ le la nɔ afi ma le Sabat sia dzi. Kasia, ŋutsua do ɣli sesĩe le ƒuƒoƒea be: “Nya kae le mí kpli wò dome, wò, Yesu Nazaretetɔ? Ðe nèva be yeatsrɔ̃ mía? Menya ame si tututu nènye, Mawu ƒe Kɔkɔetɔ lae nènye!” Yesu ka mo na gbɔgbɔ vɔ̃ si nɔ ŋusẽ kpɔm ɖe ŋutsua dzi la be: “Zi ɖoɖoe, eye nàdo go le eme!”—Marko 1:24, 25.

Ale gbɔgbɔ vɔ̃a tsɔ ŋutsua xlã ɖe anyi henyamae eye wòdo ɣli sesĩe. Gake gbɔgbɔ vɔ̃a do go le eme eye “mewɔ nu vevi aɖekee o.” (Luka 4:35) Ame siwo kpɔ nu sia teƒe le ƒuƒoƒea la ƒe mo wɔ yaa ŋutɔ! Wobia be: “Nu ka gɔ̃e nye esia? . . . Ŋusẽ le esi wòɖea gbe na gbɔgbɔ makɔmakɔwo gɔ̃ hã, eye woɖoa toe.” (Marko 1:27) Mewɔ nuku o be nudzɔdzɔ wɔdɔɖeamedzi sia ŋu nya kaka ɖe Galilea nutoa katã me.

Esi Yesu kple eƒe nusrɔ̃lawo dzo le ƒuƒoƒea la, woyi Simon, si wogayɔna be Petro, ƒe me. Petro lɔ̃xo nɔ asrã sesẽ aɖe lém. Woɖe kuku na Yesu be wòakpe ɖe eŋu. Eya ta Yesu te ɖe eŋu eye wòlé eƒe alɔnu wòfɔ. Enumake ehaya eye wòsubɔ Yesu kple nusrɔ̃la siwo kpe ɖe eŋu, eye anye be eɖa nu na wo.

Le ɣeɖoto lɔƒo la, amewo tso afi ma nutowo katã me kplɔ woƒe dɔnɔwo va Petro ƒe aƒe me. Le ɣeyiɣi kpui aɖe ko me la, edze abe ɖe du bliboa katã va ƒo ƒu ɖe ʋɔtrua nu ene. Nu ka tae? Wodi be woada gbe le yewo ŋu. Le nyateƒe me la, “ame siwo si dɔ vovovo lélawo le la kplɔ wo va egbɔ. Eda eƒe asiwo ɖe wo dometɔ ɖe sia ɖe dzi heda dɔa na wo.” (Luka 4:40) Ɛ̃, eɖanye dɔ ka lém wole o, Yesu da gbe le wo ŋu, abe ale si wogblɔe ɖi ene. (Yesaya 53:4) Ena ame siwo me gbɔgbɔ vɔ̃wo le hã vo tso wo si me. Ne gbɔgbɔ vɔ̃awo le go dom la, wodoa ɣli be: “Wòe nye Mawu ƒe Vi la.” (Luka 4:41) Gake Yesu kaa mo na wo eye meɖea mɔ na wo be woaƒo nu o. Wonyae be Yesu ye nye Kristo la, eye Yesu medi be yeaɖe mɔ na wo woawɔ nu abe Mawu vavã la subɔmee wole ene o.