Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Yesu—Mɔ La, Nyateƒe La Kple Agbe La

 TA 28

Nu Ka Tae Yesu Ƒe Nusrɔ̃lawo Metsi Nu Dɔ O?

Nu Ka Tae Yesu Ƒe Nusrɔ̃lawo Metsi Nu Dɔ O?

MATEO 9:14-17 MARKO 2:18-22 LUKA 5:33-39

  • YOHANES ƑE NUSRƆ̃LAWO BIA NYA YESU KU ÐE NUTSITSIDƆ ŊU

Esi Yesu de ƒe 30 K.Ŋ. ƒe Ŋutitotoŋkekenyuia ɖuƒe vɔ megbe la, wode Yohanes Amenyrɔɖetsimela gaxɔ me ɣeyiɣi aɖee nye esia. Yohanes di be yeƒe nusrɔ̃lawo nazu Yesu yomedzelawo, gake togbɔ be ɣleti aɖewoe nye ema tso esime wode Yohanes gaxɔ me hã la, menye wo katãe zu Yesu ƒe nusrɔ̃lawo o.

Azɔ esi ƒe 31 K.Ŋ. ƒe Ŋutitotoŋkekenyuia le ɖoɖom la, Yohanes ƒe nusrɔ̃la aɖewo va Yesu gbɔ va biae be: “Nu ka tae míawo kple Farisitɔwo míetsia nu dɔna, evɔ wò nusrɔ̃lawo ya metsia nu dɔna o?” (Mateo 9:14) Farisitɔwo tsia nu dɔna wònyea subɔsubɔkɔnu. Emegbe Yesu wɔ kpɔɖeŋu aɖe gɔ̃ hã, si me Farisitɔ aɖe si bua eɖokui ame dzɔdzɔe la do gbe ɖa le be: “Oo Mawu, meda akpe na wò be nyemele abe ame bubuawo . . . ene o. Metsia nu dɔna zi eve le kwasiɖa ɖeka me.” (Luka 18:11, 12) Ðewohĩ Yohanes ƒe nusrɔ̃lawo hã tsia nu dɔna wònyea subɔsubɔkɔnu. Alo anye be wonɔ nu tsim dɔ be yewoatsɔ afa konyi ɖe Yohanes ƒe gamenɔnɔ ta. Ame bubu siwo de dzesi esia la menya nu si tae Yesu ƒe nusrɔ̃lawo ya metsia nu dɔna o. Ðewohĩ wonɔ mɔ kpɔm be woawo hã naxa nu ɖe nu si dzɔ ɖe Yohanes dzi la ta.

Yesu wɔ kpɔɖeŋu aɖe tsɔ ɖo nyaa ŋu ale: “Alo ɖe ŋugbetɔsrɔ̃ la xɔlɔ̃wo afa konyi ŋkeke ale si ŋugbetɔsrɔ̃ la le wo gbɔa? Ke ŋkekewo li gbɔna, esime woakplɔ ŋugbetɔsrɔ̃ la adzoe le wo gbɔ, ekema woatsi nu adɔ.”—Mateo 9:15.

Yohanes ŋutɔ yɔ Yesu be ŋugbetɔsrɔ̃. (Yohanes 3:28, 29) Eya ta esime Yesu li la, eƒe nusrɔ̃lawo metsia nu dɔna o. Ne Yesu va ku emegbe la, eƒe nusrɔ̃lawo afa konyi eye nuɖuɖu madzro wo o. Gake ne wofɔe ɖe tsitre la, maganɔ nenema o. Eya ta susu aɖeke maganɔ anyi si tae woafa konyi ahatsi nu adɔ o.

Eyome Yesu wɔ kpɔɖeŋu eve siawo be: “Ame aɖeke metsɔa avɔ yeye ƒe nuɖeɖi kaa avɔ xoxo o; elabena avɔnuɖeɖi yeyea aho ɖa, eye teƒe vuvua alolo wu tsãtɔ. Eye womekɔa wain yeye ɖe lãgbalẽgolo xoxowo me o. Ne wowɔe nenema la, ekema lãgbalẽgoloawo awó, eye wain la aƒu gbe, eye lãgbalẽgoloawo hã dome agblẽ. Ke boŋ wokɔa wain yeye ɖe lãgbalẽgolo yeyewo me.” (Mateo 9:16, 17) Yesu ƒe nya siawo gɔme ɖe?

Yesu nɔ kpekpem ɖe Yohanes Amenyrɔɖetsimelaa ƒe nusrɔ̃lawo ŋu be woase egɔme be mele be ame aɖeke nakpɔ mɔ be Yesu ƒe nusrɔ̃lawo nanɔ agbe ɖe Yuda subɔsubɔ ƒe blemakɔnuwo abe nutsitsidɔ ene nu o. Menye ɖe wòva be yeaɖɔ tadedeagu ƒe nuɖoanyi xoxo si woaɖe ɖa kpuie la ɖo alo be yeana wòanɔ anyi adidi o. Tadedeagu si dom Yesu le ɖe ŋgɔ la to vovo na Yudatɔwo ƒe subɔsubɔ si nɔ anyi ɣemaɣi si me amegbetɔwo ƒe kɔnyinyiwo le. Ɛ̃, Yesu meva be yeatsɔ avɔ yeye aka avɔ xoxo alo akɔ wain yeye ɖe lãgbalẽgolo xoxo si lia tsakpaa la me o.