Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Yesu—Mɔ La, Nyateƒe La Kple Agbe La

 TA 41

Ame Ka Ƒe Ŋusẽ Mee Wòwɔ Nukunuwo Le?

Ame Ka Ƒe Ŋusẽ Mee Wòwɔ Nukunuwo Le?

MATEO 12:22-32 MARKO 3:19-30 LUKA 8:1-3

  • YESU DZE EƑE GBEƑÃÐEÐE ƑE MƆZƆZƆ EVELIA GƆME

  • ENYA GBƆGBƆ VƆ̃WO EYE WÒXLƆ̃ NU TSO NU VƆ̃ SI WOMATSƆ AKE O ŊU

Esi Yesu ƒo nu tso nu vɔ̃ tsɔtsɔ ke ŋu le Simon, Farisitɔ la, ƒe me megbe kpuie la, egadze gbeƒãɖeɖe ƒe mɔzɔzɔ bubu gɔme le Galilea nutoa me. Eƒe subɔsubɔdɔa ƒe ƒe evelia mee nye esia, eye menye eya ɖekae le mɔa zɔm o. Apostolo 12-awo kple nyɔnu aɖewo “siwo me wònya gbɔgbɔ vɔ̃wo do goe le eye wòda dɔ na wo” la kpe ɖe eŋu. (Luka 8:2) Wo dometɔ aɖewoe nye Maria Magdalatɔ, Susana, kple Yohana, si srɔ̃ nye Fia Herodes Antipa ƒe nuwo dzi kpɔla.

Esi ame geɖe nɔ Yesu ŋu nya sem la, nyaʋiʋli si ku ɖe eƒe dɔa ŋu hã nu nɔ sesẽm ɖe edzi. Esia dze ƒãa esi wokplɔ ŋutsu aɖe si me gbɔgbɔ vɔ̃ le si nye ŋkuagbãtɔ eye metea ŋu ƒoa nu o la va Yesu gbɔe wòda gbe le eŋu. Ŋutsua vo tso gbɔgbɔ vɔ̃wo si me azɔ eye wòtea ŋu kpɔa nu heƒoa nu. Esia wɔ moyaa na amehawo ale gbegbe, eye wogblɔ be: “Manye David Vi lae nye esia oa?”—Mateo 12:23.

Amehawo ƒo zi ɖe aƒe si me Yesu le la ŋu ale gbegbe be eya kple eƒe nusrɔ̃lawo mekpɔ asinu ne woaɖu nu gɔ̃ hã o. Gake menye ameawo katãe xɔe se be Yesu ye nye “David Vi” si ŋugbe wodo la o. Agbalẽfialawo kple Farisitɔ aɖewo tso keke Yerusalem ke va, gake menye kple susu be yewoasrɔ̃ nu tso Yesu gbɔ alo ado alɔe o. Wole gbɔgblɔm na ameawo be: “Beelzebul le eme,” si fia be ele dɔ wɔm kple “gbɔgbɔ vɔ̃wo ƒe fia” la. (Marko 3:22) Esi Yesu ƒe ƒometɔwo se nu tso zitɔtɔa ŋu la, wova be yewoalé Yesu. Nu ka tae?

Le ɣeyiɣi sia me la, Yesu nɔviwo gɔ̃ hã mexɔ edzi se be eyae nye Mawu ƒe Vi la o. (Yohanes 7:5) Ewɔ na wo be Yesu sia si he zitɔtɔ sia vɛ la le vovo na Yesu si yewonya esime yewo katã yewonɔ tsitsim le Nazaret. Esi woƒo nya ta be nane gblẽ le Yesu ƒe susu ŋu ta la, wogblɔ be: “Eƒe tagbɔ le gbegblẽm.”—Marko 3:21.

 Gake nu kae kpeɖodziawo ɖe fia? Fifia koe Yesu da gbe le ame si me gbɔgbɔ vɔ̃ le la ŋu, si wɔe be amea te ŋu le nu kpɔm hele nu ƒom. Ame aɖeke mate ŋu ake ɖi esia o. Eya ta agbalẽfialawo kple Farisitɔwo tsɔ nya ɖe ŋusẽ si zãm Yesu le la ŋu esi wogblɔ alakpanutsotso sia ɖe eŋu be: “Gbɔgbɔ vɔ̃wo ƒe fia Beelzebul dzie ame sia tona nyaa gbɔgbɔ vɔ̃wo.”—Mateo 12:24.

Esi Yesu nya nu si susum Farisitɔwo kple agbalẽfialawo le ta la, egblɔ be: “Fiaɖuƒe ɖe sia ɖe si ma ɖe eɖokui ŋu la zua aƒedo, eye du sia du alo aƒe sia aƒe si ma ɖe eɖokui ŋu la mate ŋu ali ke o. Nenema kee ne Satana nyaa Satana doa goe la, ekema ema ɖe eɖokui ŋu; ke aleke eƒe fiaɖuƒea awɔ ali ke?”—Mateo 12:25, 26.

Nya si me susu le kae nye esi! Farisitɔwo nya be Yudatɔ aɖewo nyaa gbɔgbɔ vɔ̃wo doa goe. (Dɔwɔwɔwo 19:13) Eya ta Yesu bia be: “Ne Beelzebul dzie metona nyaa gbɔgbɔ vɔ̃wo doa goe la, ekema ame ka dzie mia viwo ya tona nyaa wo doa goe?” Eƒe nyaa fia be ele be nya si wotsɔ ɖe ye ŋu la nayi na woawo hã. Azɔ Yesu yi eƒe numeɖeɖea dzi be: “Ke ne Mawu ƒe gbɔgbɔ dzie metona nyaa gbɔgbɔ vɔ̃wo doa goe la, ekema Mawu Fiaɖuƒe la ɖi ɖe mi ŋutɔŋutɔ.”—Mateo 12:27, 28.

Be Yesu naɖee afia be esi yekpɔ ŋusẽ ɖe Satana dzi tae yete ŋu nya gbɔgbɔ vɔ̃wo do goe la, egblɔ be: “Aleke ame awɔ age ɖe ame sesẽ aɖe ƒe aƒe me aha eƒe nuwo, ne mebla ame sesẽ la gbã hafi o? Ema ko hafi wòate ŋu aha eƒe aƒe la. Ame si mele dzinye o la, tsi tsitre ɖe ŋunye, eye ame si meƒoa amewo nu ƒu kplim o la kaa wo hlẽna.” (Mateo 12:29, 30) Edze ƒãa be Farisitɔwo kple agbalẽfialawo tsi tre ɖe Yesu ŋu, eye woto esia dzi ɖee fia be yewonye Satana ƒe dɔlawo. Wole amewo kam hlẽ le Mawu ƒe Vi, si Yehowa le zazãm la ŋu.

Yesu xlɔ̃ nu tsitretsiɖeŋula siawo siwo si Satana ƒe susu le la be: “Mawu atsɔ nu sia nu ake amegbetɔviwo, eɖanye nu vɔ̃ ka kee wowɔ alo busunya ka kee wogblɔ o. Gake ame si gblɔa busunya ɖe gbɔgbɔ kɔkɔea ŋu la, womatsɔe akee gbeɖegbeɖe o, ke boŋ eɖi nu vɔ̃ mavɔmavɔ ƒe fɔ.” (Marko 3:28, 29) Le esia ta, bu nu si ado tso eme na ame siwo le gbɔgblɔm be nu si dze ƒãa be woto Mawu ƒe gbɔgbɔa dzi wɔ la nye Satana ƒe dɔwɔwɔ la ŋu kpɔ!