Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Yesu—Mɔ La, Nyateƒe La Kple Agbe La

Srɔ̃ Yesu Be Nànye . . .

Srɔ̃ Yesu Be Nànye . . .

AME SI SEA VEVE ÐE AME NU

Esi Yesu nye ame deblibo ta la, meto xaxa kple kuxi siwo me amegbetɔwo tona la dometɔ geɖe me o. Ke hã, ese veve ɖe amewo nu vevie. Eya ta elɔ̃ faa tso le eɖokui si wɔ nu siwo wòkpɔ be aɖe vi na amewo. Ale si wòse veve ɖe amewo nu ʋãe be wòkpe ɖe wo ŋu. Àkpɔ esia ƒe kpɔɖeŋu aɖewo le Ta 32, 37, 57 kple 99.

AME SI ŊU WOTENA ÐO

Ameƒomeviwo katã—ɖeviwo kple tsitsiawo siaa tea ŋu tena ɖe Yesu ŋu elabena mebu eɖokui amegãe alo wɔ eɖokui ame si ŋu vovo mele o. Amewo ɖea dzi ɖi le egbɔ elabena wokpɔe be etsɔ ɖe le eme na yewo. Àkpɔ esia ƒe kpɔɖeŋu aɖewo le Ta 25, 27 kple 95.

AME SI DOA GBE ÐA

Ne Yesu ɖeɖe li alo le tadeagula vavãwo dome la, edoa gbe ɖa vevie na Fofoa edziedzi. Edoa gbe ɖa zi geɖe menye le nuɖuɣiwo ko o, ke le ɣeyiɣi bubuwo hã. Edo gbe ɖa da akpe na Fofoa, kafui, eye wòbia eƒe mɔfiame hafi wɔ nyametsotso veviwo. Àkpɔ esia ƒe kpɔɖeŋu aɖewo le Ta 24, 34, 91, 122 kple 123.

AME SI MEDIA EÐOKUI TƆ O

Ɣeaɖewoɣi ne ɖeɖi te Yesu ŋu wòle be wòaɖi ɖe eme gɔ̃ hã la, egakpena ɖe amewo ŋu kokoko. Medi eɖokui tɔ o. Eɖo kpɔɖeŋu le esia hã me na mí si míate ŋu asrɔ̃. Àte ŋu asrɔ̃ nu tso eƒe kpɔɖeŋu sia ŋu le Ta 19, 41 kple 52.

AME SI TSƆNA KENA

Menye ɖeko Yesu fia nu tso tsɔtsɔke ŋu o, ke eɖe esia fia to ale si wòlɔ̃ faa tsɔ ke eƒe nusrɔ̃lawo kple ame bubuwo me. De ŋugble le esia ƒe kpɔɖeŋu aɖewo ŋu le Ta 26, 40, 64, 85 kple 131.

AME SI ME DZO LE

Wogblɔ ɖi be Yudatɔ akpa gãtɔ maxɔ Mesia la o, eye eƒe futɔwo awui. Eya ta Yesu ate ŋu atiae be yemawɔ nu boo na amewo o. Le ema teƒe la, dzo nɔ eme wòdo tadedeagu vavãtɔ ɖe ŋgɔ. Eɖo dzonɔameme ƒe kpɔɖeŋu ɖi na eyomedzela siwo katã doa go ɖekematsɔleme kple yometitiwo. Àkpɔ esia ƒe kpɔɖeŋu aɖewo le Ta 16, 72 kple 103.

AME SI BƆBƆA EÐOKUI

Yesu de ŋgɔ wu amegbetɔ madeblibowo le mɔ geɖe nu, le kpɔɖeŋu me ede ŋgɔ le sidzedze kple nunya gome. Ðikeke mele eme o be esi wòde blibo ta la, ŋutete nyui siwo le esi kple ale si eƒe susu ɖae la de ŋgɔ wu ame siwo katã dome wònɔ la tɔ. Ke hã ebɔbɔ eɖokui hesubɔ ame bubuwo. Àkpɔ nufiame siwo le kpɔɖeŋu sia me le Ta 10, 62, 66, 94 kple 116.

AME SI GBƆA DZI ÐI

Yesu gbɔ dzi ɖi na eƒe apostolowo kple ame bubuwo zi geɖe ne womesrɔ̃ eƒe kpɔɖeŋu alo wɔ ɖe nu siwo wòfia wo la dzi o. Egbugbɔ fia nu siwo wòle be woawɔ be woate ŋu ate ɖe Yehowa ŋu la wo dzigbɔɖitɔe. De ŋugble le esia ƒe kpɔɖeŋu aɖewo ŋu le Ta 74, 98, 118 kple 135.