Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Yesu—Mɔ La, Nyateƒe La Kple Agbe La

Mɔ La, Nyateƒe La Kple Agbe La

Mɔ La, Nyateƒe La Kple Agbe La

Anɔ eme be nya nyui sese dzɔa dzi na wò. Ne nenemae la, ke nya nyui aɖe li na wò kple wò ame veviwo.

Nya nyui sia le Biblia me, eyae nye agbalẽ si xexea me katã Wɔla, Yehowa Mawu na woŋlɔ ƒe gbogbowo va yi. Míahe susu ayi Biblia-gbalẽ ene siwo me nya nyui aɖe le na mí katã la dzi le agbalẽ sia me. Ame siwo Mawu zã woŋlɔ Biblia-gbalẽ siawo ƒe ŋkɔwoe le wo ŋu, agbalẽawoe nye Mateo, Marko, Luka kple Yohanes.

Ame geɖe yɔa agbalẽ siawo be Nyanyuigbalẽ eneawo. Nyanyuigbalẽ eneawo katã ƒo nu tso Yesu ŋu be eya dzie Mawu ato ana amewo nakpɔ ɖeɖe, eye abe Mawu Fiaɖuƒea ƒe Fia ene la, Yesu ahe yayra mavɔwo vɛ na ame siwo katã xɔa edzi sena.—Marko 10:17, 30; 13:13.

NU KA TAE WÒNYE AME ENE?

Ðewohĩ àbia be nu ka tae Mawu na ame ene sɔŋ ŋlɔ nu tso Yesu ƒe agbenɔnɔ kple nufiafiawo ŋu.

Nu nyui aɖe ŋutɔe wònye be ame vovovo ene ŋlɔ nu tso nu siwo Yesu fia kple nu siwo wòwɔ ŋu. Míawɔ eƒe kpɔɖeŋu ale, tsɔe be ŋutsu ene le tsitre ɖe nufiala xɔŋkɔ aɖe gbɔ. Ŋutsu si tɔ ɖe nufialaa ŋkume nye adzɔxɔla. Ame si tɔ ɖe eƒe ɖusime la nye ɖɔkta. Ame si tɔ ɖe eƒe miame hele to ɖom la nye tɔƒodela, eye wònye nufialaa ƒe xɔlɔ̃ vevi. Ŋutsu enelia si tɔ ɖe megbea nye nudzɔdzɔawo teƒe kpɔla, eye eyae nye ɖevitɔ le ame eneawo dome. Ŋutsu siawo katã nye anukwareɖilawo, eye wo dometɔ ɖe sia ɖe kple nu si me wòtsɔ ɖe le. Ne wo dometɔ ɖe sia ɖe aŋlɔ nu tso nufialaa ƒe nufiafiawo kple dɔwɔnawo ŋu la, ɖewohĩ woaŋlɔ nu siwo me wotsɔ ɖe le la tsitotsito. Ne míele Nyanyuigbalẽ eneawo me dzrom, eye nu siwo me ame ene siawo tsɔ ɖe le la le susu me na mí la, akpe ɖe mía ŋu míase nu siwo nufialaa fia kple nu siwo wòwɔ la gɔme nyuie wu. Kpɔɖeŋu sia na míekpɔ vi siwo wòaɖe na mí ne míedzro nu siwo ame vovovo ene ŋlɔ tso Nufiala Gã, Yesu ŋu la me.

Le kpɔɖeŋua dziyiyi me la, adzɔxɔlaa di be yeƒe nyawo nado dzidzɔ na Yudatɔwo koŋ, eya ta eŋlɔ  Yesu ƒe nufiafiawo kple dɔwɔnawo le mɔ si awɔ dɔ ɖe Yudatɔwo dzi la nu. Ðɔktaa ŋlɔ nu tso ale si woda dɔ na dɔnɔwo kple nuwɔametɔwo ŋu la ŋu, eya ta meƒo nu tso nanewo siwo adzɔxɔlaa ŋlɔ tsitotsito la ŋu o. Nufialaa xɔlɔ̃ ya ŋlɔ nu tso nufialaa ƒe nɔnɔmewo kple seselẽlamewo ŋu. Ðevitɔ si le wo dome la ƒe nuŋlɔɖiwo le kpuie, eye wòyi nyawo gbɔ tẽe. Togbɔ be ele alea hã la, nu siwo wo dometɔ ɖe sia ɖe ŋlɔ la de pɛpɛpɛ. Esia ɖe susu si tae nu si ame ene ŋlɔ tso Yesu ƒe agbenɔnɔ ŋu la nana míesea eƒe dɔwɔnawo, nufiafiawo kple amenyenye gɔme nyuie wu la me.

Zi geɖe la amewo yɔa nya tsoa ‘Mateo ƒe Nyanyuia’ alo ‘Yohanes ƒe Nyanyuia’ ko me. Naneke megblẽ le eŋu o, elabena woƒo nu tso ‘Yesu Kristo ŋuti nya nyuia’ ŋu. (Marko 1:1) Gake le nyateƒe me la, nya nyui ɖeka koe li ku ɖe Yesu ŋu si míakpɔ le nuŋlɔɖi eneawo katã me.

Ame geɖe siwo srɔ̃a Mawu ƒe Nya la dzea agbagba be yewoatsɔ nudzɔdzɔ siwo le Mateo, Marko, Luka kple Yohanes asɔ kple wo nɔewo ahakpɔ ɖekawɔwɔ siwo le wo me. Nu ma tututue Siriatɔ agbalẽŋlɔla Tatian wɔ le ƒe 170 Kristotɔwo Ŋɔli (K.Ŋ.) me. Ekpɔe be nuŋlɔɖi ene siawo de pɛpɛpɛ eye wotso gbɔgbɔ me. Esia na wòɖo Nyanyuigbalẽa me nudzɔdzɔ siwo ku ɖe Yesu ƒe agbenɔnɔ kple subɔsubɔdɔ ŋu la ɖe ɖoɖo si nu wodzɔ ɖo la nu, eye wòŋlɔ wo ɖe agbalẽ si wòna ŋkɔ be Diatessaron la me.

Nu ma tututue míewɔ le agbalẽ sia si nye Yesu—Mɔ La, Nyateƒe La Kple Agbe La me, ɖeko nuŋlɔɖi siwo le agbalẽ sia me la le eteƒe hede pɛpɛpɛ wu. Nu si tae nye be míese Yesu ƒe nyagblɔɖiwo kple lododowo gɔme fifia wu ɣeyiɣi ɖe sia ɖe. Woɖe nu siwo Yesu fia kple nu siwo wòwɔ kple ɖoɖo si nu nuawo dzɔ le la me nyuie wu le agbalẽ sia me. Tomenu siwo ŋu woke ɖo la na nudzɔdzɔ siwo ŋu Nyanyuigbalẽa ŋlɔlawo ƒo nu tsoe la dometɔ aɖewo me gava kɔ ɖe edzi wu. Le nyateƒe me la, ame aɖeke mate ŋu ate tɔ ɖe edzi be nu si yesusu tso ɖoɖo si nu nuawo dzɔ le lae nye nyuitɔ kekeake o. Gake le Yesu—Mɔ La, Nyateƒe La Kple Agbe La ƒe agbalẽ sia me la, woɖo nudzɔdzɔawo le mɔ aɖe nu be susu nanɔ wo me ale be míate ŋu ase wo gɔme bɔbɔe.

MƆ LA, NYATEƑE LA KPLE AGBE LA

Esi nèle agbalẽ sia xlẽm hele vivi sem nɛ la, dze agbagba be màgaŋlɔ gbedeasi vevi si le eme na wò kple wò ame veviwo la be o. Ðo ŋku edzi be Yesu Kristo ŋutɔ gblɔ na apostolo Toma be: “Nyee nye mɔ la kple nyateƒe la kpakple agbe la. Ame aɖeke mevaa Fofo la gbɔ o, negbe to dzinye ko.”—Yohanes 14:6.

Yesu—Mɔ La, Nyateƒe La Kple Agbe La ƒe agbalẽ sia akpe ɖe ŋuwò nàkpɔ ale si Yesu nye “mɔ la” adze sii nyuie. Yesu dzi koe míato ate ɖe Yehowa Mawu ŋu le gbedodoɖa me. Azɔ hã, eya dzie Mawu to dzra mía kplii dome ɖo. (Yohanes 16:23; Romatɔwo 5:8) Eya ta Yesu dzi koe míate ŋu ato be ƒomedodo nyui nanɔ mía kple Mawu dome.

Yesue nye “nyateƒe la.” Yesu to nyateƒe henɔ agbe ɖe nyateƒea nu; míagblɔ ko be eya ame bliboa nye nyateƒe. Nyagblɔɖi geɖewo va zu “‘ɛ̃’ to eya amea dzi.” (2 Korintotɔwo 1:20; Yohanes 1:14) Nyagblɔɖi mawo kpena ɖe mía ŋu míeva nyaa akpa vevi siwo wɔm wòle be Mawu ƒe tameɖoɖowo nava eme.—Nyaɖeɖefia 19:10.

Yesu Kristo ye nye “agbe la.” Etsɔ eƒe ʋu alo agbe deblibo na wònye tafe si wɔe be míaƒe asi nasu “agbe vavã,” si nye “agbe mavɔ” la dzi. (1 Timoteo 6:12, 19; Efesotɔwo 1:7; 1 Yohanes 1:7) Yesu aganye “agbe la” na ame miliɔn geɖe siwo ku siwo woava fɔ ɖe tsitre kple mɔkpɔkpɔ be woava nɔ agbe tegbee le Paradiso me.—Yohanes 5:28, 29.

Ele be mí katã míaɖee afia be míekpɔ ŋudzedze ɖe akpa si wɔm Yesu le be Mawu ƒe tameɖoɖowo nava eme la ŋu. Neva eme be nàse vivi na nu geɖe sɔsrɔ̃ tso Yesu si nye “mɔ la kple nyateƒe la kpakple agbe la” ŋu.