Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nu Kae Biblia Fia Mí?

 TA ETƆ̃LIA

Tame Kae Mawu Ðo Ðe Amegbetɔwo Ŋu?

Tame Kae Mawu Ðo Ðe Amegbetɔwo Ŋu?

1. Tame kae Mawu ɖo ɖe amegbetɔwo ŋu?

TAME nyui aɖe ŋutɔe Mawu ɖo ɖe amegbetɔwo ŋu. Ewɔ ŋutsu kple nyɔnu gbãtɔ, siwo ŋkɔe nye Adam kple Xawa, be woanɔ agbe le abɔ nyakpɔ aɖe me. Eƒe tameɖoɖoe nye be woadzi viwo, woana anyigba blibo la nazu paradiso, eye woakpɔ lãwo dzi.—1 Mose 1:28; 2:8, 9, 15; kpɔ Dzesidenya 6.

2. (a) Aleke míewɔ nya be Mawu awɔ tame si wòɖo la dzi? (b) Nya kae Biblia gblɔ tso agbe mavɔ nɔnɔ ŋu?

2 Èbu be míava nɔ paradiso me gbe ɖeka? Yehowa gblɔ be “meɖo tame, eye mawɔe hã.” (Yesaya 46:9-11; 55:11) Vavãe, awɔ nu sia nu si wòɖo tame be yeawɔ la, eye naneke maxe mɔ nɛ o. Yehowa gblɔ be susu aɖe tae yewɔ anyigba la ɖo. Biblia gblɔ na mí be “menye ɖeko wòwɔe dzodzro o.” (Yesaya 45:18) Edi be amewo nanɔ anyigba blibo la dzi. Ame kawo ƒomevie Mawu di be woanɔ anyigba la dzi? Ɣeyiɣi didi kae wòdi be woanɔ edzi? Biblia ɖo eŋu be: “Ame dzɔdzɔewo anyi anyigba la dome, eye woanɔ edzi tegbee.”Psalmo 37:29; Nyaɖeɖefia 21:3, 4.

3. Esi wònye be amewo dzea dɔ eye wokuna ta la, nya kawoe nàbia?

3 Gake egbea amewo dzea dɔ eye wokuna. Le teƒe geɖewo la, amewo wɔa aʋa hewua wo nɔewo. Edze ƒãa be menye aleae Mawu ɖoe be nuwo nanɔ o. Ke nu kae dzɔ, eye nu ka tae nuwo va le alea? Biblia koe ate ŋu aɖo nyabiase siawo ŋu na mí.

 MAWU ƑE FUTƆ AÐE

4, 5. (a) Ame kae ƒo nu kple Xawa to da aɖe dzi? (b) Aleke wòate ŋu adzɔe be ame si nye anukwareɖila nava zu fiafitɔ?

4 Biblia gblɔ na mí be futɔ aɖe le Mawu si “si woyɔna be Abosam kple Satana.” Satana to da aɖe dzi ƒo nu kple Xawa le Eden-bɔa me. (Nyaɖeɖefia 12:9; 1 Mose 3:1) Ena wòdze abe da lae nɔ nua ƒom ene.—Kpɔ Dzesidenya 7.

5 Ke Mawue wɔ Satana Abosam la? Ao. Mawudɔla aɖe si nɔ dziƒo esime Mawu dzra anyigba dzi ɖo na Adam kple Xawa lae trɔ eɖokui zu Abosam. (Hiob 38:4, 7) Aleke esia ate ŋu adzɔe? Le kpɔɖeŋu me, aleke wòdzɔnae be ame si nye anukwareɖila va zua fiafitɔ? Womedzii fiafitɔ o. Gake nane si menye etɔ o la va nɔ edzrom vevie. Eyi edzi nɔ nua ŋu bum ale gbegbe be eƒe dzodzroa nu va sẽ ɖe edzi. Eye esi mɔnukpɔkpɔ su esi la, efi nua. Etrɔ eɖokui zu fiafitɔ.—Xlẽ Yakobo 1:13-15; kpɔ Dzesidenya 8.

6. Aleke mawudɔla aɖe wɔ va zu Mawu ƒe futɔ?

6 Alea tututu wòdzɔe le mawudɔla ma hã gome. Esi Yehowa wɔ Adam kple Xawa la, egblɔ na wo be woadzi vi ayɔ “anyigba la dzi.” (1 Mose 1:27, 28) Anɔ eme be mawudɔla ma gblɔ na eɖokui be: ‘Amegbetɔ mawo katã ate ŋu asubɔm le esi teƒe be woasubɔ Yehowa!’ Zi ale si wòyi edzi nɔ eŋu bum la, zi nenemae nu si nye Yehowa tɔ la nɔ edzrom. Mawudɔla ma di be amewo nasubɔ ye. Eya ta eda alakpa na Xawa hekplɔe tra. (Xlẽ 1 Mose 3:1-5.) Esi wòwɔ esia la, eva zu Satana Abosam, Mawu ƒe futɔ.

7. (a) Nu kae na Adam kple Xawa ku? (b) Nu ka tae míetsina kua amegã alo nyagã hekuna?

7 Adam kple Xawa meɖo to Mawu o, eye woɖu atikutsetse  la. (1 Mose 2:17; 3:6) Wowɔ nu vɔ̃ ɖe Yehowa ŋu, eye wova ku mlɔeba abe ale si tututu Yehowa gblɔe do ŋgɔ be adzɔ ene. (1 Mose 3:17-19) Adam kple Xawa ƒe dzidzimeviwo nye nu vɔ̃ wɔlawo, eya ta woawo hã wokuna. (Xlẽ Romatɔwo 5:12.) Na míakpɔ kpɔɖeŋu sia si akpe ɖe mía ŋu míase nu si tae Adam kple Xawa ƒe dzidzimeviwo hã nye nu vɔ̃ wɔlawo ɖo la gɔme. Tsɔe be èle abolo mèm le abolomegba si ƒe akpa aɖe nye ɖe eme la me. Aboloawo katã hã ƒe akpa ma anye ɖe eme abe abolomegba ke ene wòanye dzesi anɔ wo ŋu. Esi Adam meɖo to Mawu o la, ezu nu vɔ̃ wɔla. Esi wònye be Adam ƒe dzidzimeviwoe míenye ta la, mí katã míenye nu vɔ̃ wɔlawo alo nu vɔ̃ ƒe “dzesi” si nɔ eŋu la ke le míawo hã mía ŋu. Eye esi mí katã míenye nu vɔ̃ wɔlawo tae míetsina kua amegã alo nyagã hekuna ɖo.—Romatɔwo 3:23; kpɔ Dzesidenya 9.

8, 9. (a) Aleke Satana di be Adam kple Xawa nabu Mawu? (b) Nu ka tae Mawu mewu aglãdzelaawo enumake o?

8 Satana dze aglã ɖe Yehowa ŋu esi wòna Adam kple Xawa da le Mawu ƒe se dzi. Edi be Adam kple Xawa naxɔe ase be Mawu nye alakpatɔ kple dziɖula si media nyui na eteviwo o. Nya si Satana nɔ gbɔgblɔmee nye be amegbetɔwo mehiã Mawu ƒe mɔfiame o, eye ele be Adam kple Xawa natso nya me le nu si nye nyui kple vɔ̃ ŋu na wo ɖokuiwo. Eya ta aleke wòle be Yehowa nakpɔ nya sia gbɔe? Mawu ate ŋu awu aglãdzela mawo ahatsi aglãdzedzea nu enumake hafi. Gake ɖe ema wɔwɔ aɖo kpe edzi be aʋatsokalae Satana nyea? Kura o.

9 Eya tae Yehowa mewu aglãdzelaawo enumake o. Ke boŋ ena ɣeyiɣi amegbetɔwo be woaɖu wo ɖokuiwo dzi. Esia ana wòadze ƒãa be aʋatsokalae Satana nye ahaɖee afia be Yehowa nya nu si nyo na amegbetɔwo.  Míasrɔ̃ nu geɖe tso esia ŋu le Ta 11 lia me. Gake nu kae nèsusu tso Adam kple Xawa ƒe nyametsotsoa ŋu? Ðe wo tɔ dzɔ be woaxɔ Satana dzi ase ahagbe toɖoɖo Mawua? Yehowae na nu sia nu si nɔ Adam kple Xawa si la wo. Ena agbe deblibo, aƒe nyui aɖe kple dɔ si wosea vivi na la wo. Gake Satana ya mewɔ nu nyui aɖeke na wo  kpɔ o. Ne ɖe wò hã nènɔ afi ma la, anye ne nu kae nàwɔ?

10. Nyametsotso vevi kae dze ŋgɔ mía dometɔ ɖe sia ɖe?

10 Nyametsotso ma tɔgbi dze ŋgɔ mía dometɔ ɖe sia ɖe egbea, eye míaƒe agbe nɔ te ɖe nyametsotso ma dzi. Míate ŋu atiae be Yehowa nanye míaƒe Dziɖula ahaɖo toe eye míakpe asi ɖe eŋu woaɖo kpe edzi be aʋatsokalae Satana nye. Alo míate ŋu atiae hã be Satana nanye míaƒe dziɖula. (Psalmo 73:28; xlẽ Lododowo 27:11.) Xexea me nɔla ʋɛ aɖewo koe ɖoa to Mawu. Le nyateƒe me la, menye Mawue le xexe sia dzi ɖum o. Ne menye Mawue nye xexea dzi ɖula o ɖe, ke ame kae?

AME KAE LE XEXE SIA DZI ÐUM?

Ne ɖe xexemefiaɖuƒewo katã menye Satana tɔ o la, ɖe wòate ŋu agblɔ be yeatsɔ wo ana Yesua?

11, 12. (a) Nu kae ŋugbe si Satana do na Yesu la ɖe fia? (b) Mawunyakpukpui kawoe ɖee fia be Satanae le xexea dzi ɖum?

11 Yesu nya ame si tututu le xexe sia dzi ɖum. Gbe ɖeka Satana ɖe “xexemefiaɖuƒewo katã kple woƒe ŋutikɔkɔe” fia Yesu. Eye Satana do ŋugbe na Yesu be: “Matsɔ nu siawo katã ana wò ne èdze klo de ta agu nam.” (Mateo 4:8, 9; Luka 4:5, 6) Bia ɖokuiwò be, ‘Ne ɖe fiaɖuƒe mawo menye Satana tɔ o la, ɖe wòagblɔ be yeatsɔ wo ana Yesua?’ Ao. Eya ta Satana tɔe dziɖuɖuwo katã nye.

12 Ðewohĩ àbia be: ‘Aleke Satana ate ŋu anye xexe sia ƒe dziɖulae? Ðe menye Yehowa Ŋusẽkatãtɔ lae wɔ xexe blibo la oa?’ (Nyaɖeɖefia 4:11) Nyateƒee, Yehowae wɔ xexea, gake Yesu yɔ Satana tẽe be “xexe sia dzi ɖula.” (Yohanes 12:31; 14:30; 16:11) Apostolo Paulo hã yɔ Satana Abosam be “nuɖoanyi sia ƒe mawu.” (2 Korintotɔwo 4:3, 4) Eye apostolo Yohanes hã ŋlɔ bena “xexe blibo la katã le vɔ̃ɖitɔ la ƒe ŋusẽ te.”—1 Yohanes 5:19.

 ALEKE WOAVA TSRƆ̃ XEXE SI DZI ÐUM SATANA LE LAE?

13. Nu ka tae míehiã xexe yeye?

13 Gbegblẽm ko nuwo le ɖe edzi le xexe sia me. Aʋawɔwɔ, nu fitifiti wɔwɔ, alakpanuwɔwɔ kple ŋutasẽnuwɔwɔ sɔŋ koe xɔ aƒe ɖe eme. Amegbetɔwo mate ŋu aɖe kuxi siawo ɖa o, eɖanye aleke kee wodze agbagbae o. Gake eteƒe madidi o Mawu atsrɔ̃ xexe vɔ̃ɖi sia le eƒe Armagedon-ʋa la me, eye wòana xexe yeye si me dzɔdzɔenyenye anɔ la nava xɔ ɖe eteƒe.—Nyaɖeɖefia 16:14-16; kpɔ Dzesidenya 10.

14. Ame kae Mawu tia be wòanye Dziɖula le Eƒe Fiaɖuƒea me? Nya kae Biblia gblɔ ɖi tso Yesu ŋu?

14 Yehowa tia Yesu Kristo wònye Eƒe dziɖuɖu alo Fiaɖuƒe si le dziƒo la ƒe Fia. Biblia gblɔe ɖi ƒe akpe geɖe do ŋgɔ be Yesu anye “Ŋutifafafia” eye nuwuwu manɔe na eƒe dziɖuɖu o. (Yesaya 9:6, 7) Yesu fia eyomedzelawo be woado gbe ɖa le dziɖuɖu sia ƒe vava ŋu esi wògblɔ be: “Wò Fiaɖuƒe nava. Wò lɔlɔ̃nu nava eme le anyigba dzi abe ale si wòle le dziƒo ene.” (Mateo 6:10) Míakpɔ ale si Mawu Fiaɖuƒea ava xɔ ɖe dziɖuɖu siawo teƒe le Ta 8 lia me. (Xlẽ Daniel 2:44.) Eyome Mawu ƒe Fiaɖuƒea ana anyigba la nazu paradiso nyakpɔ aɖe; kpɔ Dzesidenya 11.

XEXE YEYE TU AƑE!

15. Nu kae nye “anyigba yeye” la?

15 Biblia do ŋugbe be: “Míele dziƒo yeye kple anyigba yeye, siwo me dzɔdzɔenyenye anɔ la, lalam.” (2 Petro 3:13; Yesaya 65:17) Ɣeaɖewoɣi ne Biblia ƒo nu tso “anyigba” ŋu la, nu si wòwɔnae nye amegbetɔ siwo le anyigba dzi. (1 Mose 11:1) Eya ta “anyigba yeye” si le dzɔdzɔe la fia amegbetɔ toɖola siwo Mawu yra.

16. Nunana xɔasi kae Mawu ana ame siwo anɔ agbe le eƒe xexe yeyea me, eye nu kae wòle be míawɔ be míaƒe asi nasu nunana sia dzi?

 16 Yesu do ŋugbe be woana “agbe mavɔ” ame siwo anɔ Mawu ƒe xexe yeyea me. (Marko 10:30) Nu kae míawɔ be nunana sia nasu mía si? Taflatsɛ xlẽ Yohanes 3:16 kple 17:3 ne nàkpɔ ŋuɖoɖoa. Azɔ na míakpɔ ale si Biblia gblɔ be agbenɔnɔ anɔ le Paradiso me le anyigba dzi la ɖa.

17, 18. Aleke míewɔ nya be ŋutifafa axɔ aƒe ɖe anyigba bliboa dzi eye míanɔ anyi le dedienɔnɔ me?

17 Nu vɔ̃ɖi wɔwɔ, aʋawɔwɔ, nu vlo wɔwɔ kple ŋutasẽnuwɔwɔ nu ayi tegbee. Womagblẽ ame vɔ̃ɖi aɖeke ɖe anyigba dzi o. (Psalmo 37:10, 11) Mawu atsi “aʋawɔwɔwo nu le anyigba bliboa dzi.” (Psalmo 46:9; Yesaya 2:4) Ame siwo lɔ̃ Mawu heɖoa toe la sɔŋ koe ayɔ anyigba la dzi. Ŋutifafa axɔ aƒe ɖe anyigba dzi tegbee.—Psalmo 72:7.

18 Yehowa subɔlawo anɔ anyi le dedienɔnɔ me. Le Biblia-ŋlɔɣiwo la, ne Israel-viwo ɖo to Mawu la, wonɔa anyi le dedienɔnɔ me, elabe ekpɔa wo ta. (3 Mose 25:18, 19) Le Paradisoa me la, mímavɔ̃ na naneke alo ame aɖeke o. Míanɔ dedie ɣesiaɣi!—Xlẽ Yesaya 32:18; Mixa 4:4.

19. Nu kae na míeka ɖe edzi be nuɖuɖu abɔ ɖe Mawu ƒe xexe yeyea me?

19 Nuɖuɖu abɔ. “Agblemenukuwo ado agbogbo ɖe anyigba la dzi; woaxɔ towo tame keŋ.” (Psalmo 72:16) Yehowa “mía Mawu, ayra mí” eye “anyigba awɔ nu.”—Psalmo 67:6.

20. Aleke míewɔ nya be anyigba la azu paradiso?

20 Anyigba bliboa azu paradiso. Amewo atso aƒe kple abɔ nyakpɔwo. (Xlẽ Yesaya 65:21-24; Nyaɖeɖefia  11:18.) Anyigba bliboa dzi anya kpɔ abe Eden-bɔa ene. Yehowa ana nu sia nu si míehiã la mí ɣesiaɣi. Biblia gblɔ tso Mawu ŋu be: “Èʋua wò asi me, eye nètsɔa nu gbagbewo katã ƒe nudidi ɖia ƒo na woe.”—Psalmo 145:16.

21. Aleke míewɔ nya be ŋutifafa anɔ amegbetɔwo kple lãwo dome?

21 Ŋutifafa anɔ amegbetɔwo kple lãwo dome. Lãwo magawɔ nu vevi amegbetɔwo azɔ o. Ðevi suewo anɔ dedie le lã siwo wɔa nu vevi ame egbea la gɔ̃ hã gbɔ.—Xlẽ Yesaya 11:6-9; 65:25.

22. Nu kae Yesu awɔ na dɔnɔwo?

22 Ame aɖeke magadze dɔ o. Esime Yesu nɔ anyigba dzi la, eda dɔ na ame geɖewo. (Mateo 9:35; Marko 1:40-42; Yohanes 5:5-9) Esi Yesu zu Mawu Fiaɖuƒea ƒe Fia azɔ ta la, ada dɔ na ame sia ame. Ame aɖeke magagblɔ gbeɖe be “mele dɔ lém o.”—Yesaya 33:24; 35:5, 6.

23. Nu kae Mawu awɔ na ame siwo ku?

23 Ame kukuwo agbɔ agbe. Mawu do ŋugbe be yeafɔ ame miliɔn geɖe siwo ku la ɖe tsitre. “Tsitretsitsi li na ame dzɔdzɔewo kple ame madzɔmadzɔwo siaa.”—Xlẽ Yohanes 5:28, 29; Dɔwɔwɔwo 24:15.

24. Aleke nèse le ɖokuiwò me tso agbenɔnɔ le Paradiso me ŋu?

24 Nyametsotso aɖe dze ŋgɔ mí katã. Míate ŋu atiae be míasrɔ̃ nu tso Yehowa ŋu ahasubɔe loo alo awɔ nu si míawo ŋutɔwo míedi. Ne míetiae be míasubɔ Yehowa la, ke etsɔme nyui aɖe le mía lalam. Esi ŋutsu aɖe gblɔ na Yesu be wòaɖo ŋku ye dzi le eƒe ku megbe la, Yesu do ŋugbe nɛ be: “Ànɔ Paradiso me kplim.” (Luka 23:43) Na míasrɔ̃ nu geɖe tso Yesu Kristo kple ale si wòana Mawu ƒe ŋugbedodowo nava eme la ŋu.