Dzo kpo yi emenuwo dzi

Dzo kpo yi emenuawo dzi

 TA ENYILIA

Nu Kae Nye Mawu Ƒe Fiaɖuƒe La?

Nu Kae Nye Mawu Ƒe Fiaɖuƒe La?

1. Gbedodoɖa xɔŋkɔ ka mee míadzro fifia?

AME miliɔn geɖe nya gbedodoɖa xɔŋkɔ si woyɔna be Mía Fofo Si Le Dziƒo, Mía Tɔ Si Le Dziƒo alo Aƒetɔ ƒe Gbedodoɖa la nyuie. Yesu zã gbedodoɖa sia tsɔ fia eƒe nusrɔ̃lawo ale si woado gbe ɖae. Nu kawoe wòbia le gbedodoɖaa me? Eye nu ka tae gbedodoɖa sia le vevie na mí egbea?

2. Nu vevi etɔ̃ kawoe Yesu fia mí be míado gbe ɖa abia?

2 Yesu gblɔ be: “Miawo mido gbe ɖa ale: ‘Mía Fofo si le dziƒowo, wò ŋkɔ ŋuti nakɔ. Wò Fiaɖuƒe nava. Wò lɔlɔ̃nu nava eme le anyigba dzi abe ale si wòle le dziƒo ene.’” (Xlẽ Mateo 6:9-13.) Nu ka tae Yesu fia mí be míado gbe ɖa abia nu etɔ̃ siawo?—Kpɔ Dzesidenya 20.

3. Nu kawoe wòle be míanya tso Mawu ƒe Fiaɖuƒea ŋu?

3 Míesrɔ̃e va yi be Mawu ƒe ŋkɔe nye Yehowa. Eye míedzro nu me ku ɖe nu si nye Mawu ƒe lɔlɔ̃nu na amegbetɔwo kple anyigba la siaa ŋu. Gake nu kae nya si Yesu gblɔ be “Wò Fiaɖuƒe nava” la fia? Míasrɔ̃ nu tso nu si Mawu ƒe Fiaɖuƒe la nye, nu siwo wòawɔ kple ale si wòana Mawu ŋkɔ ŋuti nakɔ la hã ŋu.

NU KAE NYE MAWU ƑE FIAÐUƑE LA?

4. Nu kae nye Mawu ƒe Fiaɖuƒe la, eye ame kae nye eƒe Fia?

4 Yehowa ɖo dziɖuɖu aɖe anyi le dziƒo eye wòtia  Yesu wònye dziɖuɖu sia ƒe Fia. Biblia yɔ dziɖuɖu sia be Mawu ƒe Fiaɖuƒe. Yesue nye “ame si nye fiawo katã ƒe Fia kple aƒetɔ katã ƒe Aƒetɔ.” (1 Timoteo 6:15) Yesu ate ŋu awɔ nu nyui wu dziɖula siwo nye amegbetɔwo la dometɔ ɖe sia ɖe, eye ŋusẽ le esi wu amegbetɔwo ƒe dziɖulawo katã.

5. Afi kae Mawu ƒe dziɖuɖua anɔ aɖu dzi? Nu ka dzie wòaɖu?

5 Esi wofɔ Yesu ɖe tsitre la, etrɔ yi dziƒo le ŋkeke blaene megbe. Mlɔeba la, Yehowa ɖoe Fiaɖuƒea ƒe Fia. (Dɔwɔwɔwo 2:33) Mawu ƒe dziɖuɖua anɔ dziƒo aɖu anyigba la dzi. (Nyaɖeɖefia 11:15) Esia tae Biblia yɔ Mawu ƒe Fiaɖuƒea be “Fiaɖuƒe si le dziƒo.”—2 Timoteo 4:18.

6, 7. Nu ka tae Yesu de ŋgɔ sãsãsã wu fia siwo nye amegbetɔwo?

6 Biblia gblɔ be Yesu de ŋgɔ sãsãsã wu fia siwo nye amegbetɔwo la dometɔ ɖe sia ɖe, elabena Yesu “ko si makumakunyenye le.” (1 Timoteo 6:16) Dziɖula siwo nye amegbetɔwo katã va kuna mlɔeba, gake Yesu ya maku gbeɖe o. Nu nyui siwo katã Yesu awɔ na mí la anɔ anyi tegbee.

7 Biblia gblɔe ɖi be Yesu anye Fia dzɔdzɔe kple nublanuikpɔla. Egblɔ le Yesu ŋu be: “Yehowa ƒe gbɔgbɔ, nunya kple gɔmesese ƒe gbɔgbɔ, adaŋudede kple ŋusẽ ƒe gbɔgbɔ, sidzedze kple Yehowa vɔvɔ̃ ƒe gbɔgbɔ anɔ edzi. Eye Yehowa vɔvɔ̃ anyo eŋu. Madrɔ̃ ʋɔnu ɖe nu si eƒe ŋkuwo kpɔ la nu o, eye maka mo [alo aɖo aɖaŋu] na ame le nu si eƒe to se la ɖeɖe ko nu o. Adrɔ̃ ʋɔnu dzɔdzɔe na ame tsɛwo, eye wòaka mo na amewo ɖe eteƒe.” (Yesaya 11:2-4) Àdi be ame sia tɔgbi nanye yeƒe fia?

8. Aleke míewɔ nya be menye Yesu ɖeɖe koe aɖu fia o?

 8 Mawu tia amegbetɔ aɖewo be woaɖu fia kple Yesu le eƒe dziɖuɖua me le dziƒo. Le kpɔɖeŋu me, apostolo Paulo gblɔ na Timoteo be: “Ne míeyi edzi do dzi la, míaɖu fia hã kpakplii.” (2 Timoteo 2:12) Ame nenie aɖu fia kple Yesu?

9. Ame nenie aɖu fia kple Yesu? Ɣekaɣie Mawu te wo tiatia?

9 Abe ale si míesrɔ̃e le Ta 7 lia me ene la, apostolo Yohanes kpɔ ŋutega aɖe, eye le ŋutegaa me la, ekpɔ Yesu wònye Fia le dziƒo eye fia bubu akpe alafa ɖeka blane vɔ ene (144,000) kpe ɖe eŋu. Ame kawoe nye ame 144,000 mawo? Yohanes ɖe eme be “woŋlɔ [Yesu ƒe] ŋkɔ kple Fofoa ƒe ŋkɔ” ɖe ame siawo ƒe ŋgonu. Eye wògblɔ kpee be: “Ame siawoe dzea Alẽvi [si nye Yesu] la yome yia afi sia afi si wòyina. Woƒle ame siawo tso amegbetɔwo dome.” (Xlẽ Nyaɖeɖefia 14:1, 4.) Ame 144,000 siawo nye Kristotɔ wɔnuteƒe siwo Mawu tia be woakpe ɖe Yesu ŋu “woaɖu fia ɖe anyigba la dzi.” Ne woku la, wofɔa wo ɖe tsitre woyia dziƒo. (Nyaɖeɖefia 5:10) Tso apostoloawo ƒe ŋkekeawo me kee Yehowa te Kristotɔ wɔnuteƒewo tiatia be woanye fia 144,000 ƒe ƒuƒoƒoa me tɔwo.

10. Nu ka tae ale si Yehowa ɖoe be Yesu kple ame 144,000 la naɖu amegbetɔwo dzi la nye ɖoɖo si me lɔlɔ̃ le?

10 Yehowa tsɔ ɖe le eme na mí ale gbegbe be ewɔ ɖoɖo be amegbetɔwo naɖu fia kple Yesu. Yesu anye dziɖula nyui, elabena esea míaƒe nɔnɔmewo gɔme. Yesu ŋutɔ nye amegbetɔ kpɔ eye wòkpe fu hã kpɔ. Paulo gblɔ be Yesu sea “veve ɖe míaƒe gbɔdzɔgbɔdzɔwo nu” eye wodoe “kpɔ le go sia go me abe míawo ke ene.” (Hebritɔwo 4:15; 5:8) Ame 144,000 la hã nye  amegbetɔwo kpɔ. Woawo hã woto blibomademade kple dɔléle ƒe kuxiwo me. Eya ta míate ŋu aka ɖe edzi be Yesu kple ame 144,000 la ase míaƒe seselelãmewo kple kuxiwo siaa gɔme.

NU KAWOE MAWU ƑE FIAÐUƑE LA AWƆ?

11. Nu ka tae Yesu gblɔ na eƒe nusrɔ̃lawo be woado gbe ɖa be woawɔ Mawu ƒe lɔlɔ̃nu le dziƒo?

11 Yesu fia eƒe nusrɔ̃lawo be woado gbe ɖa be Mawu ƒe lɔlɔ̃nu nava eme le dziƒo. Nu ka tae? Míesrɔ̃e le Ta 3 lia me be Satana Abosam dze aglã ɖe Yehowa ŋu. Esi Satana dze aglã la, Yehowa ɖe mɔ na eya kple mawudɔla mawɔnuteƒe bubuwo alo gbɔgbɔ vɔ̃wo be woanɔ dziƒo hena ɣiyiɣi aɖe. Eya ta menye dziƒonɔlawo katãe nɔ Mawu ƒe lɔlɔ̃nu wɔm o. Míasrɔ̃ nu tso Satana kple gbɔgbɔ vɔ̃wo ŋu le Ta 10 lia me.

12. Nudzɔdzɔ vevi eve kawo ŋue woƒo nu tsoe le Nyaɖeɖefia 12:10?

12 Biblia gblɔ be ne wonya ɖo Yesu zi dzi teti ko la, awɔ aʋa kple Satana. (Xlẽ Nyaɖeɖefia 12:7-10.) Kpukpui 10 lia ƒo nu tso nudzɔdzɔ vevi eve aɖewo ŋu. Mawu Fiaɖuƒe, si Yesu Kristo nye Fia na la, dze dziɖuɖu gɔme, eye wotsɔ Satana ƒu gbe ɖe anyigba dzi. Míava kpɔe be nu siawo dzɔ xoxo.

13. Nu kae dzɔ esi wonya Satana ɖa le dziƒo?

13 Biblia gblɔ ale si gbegbe mawudɔla wɔnuteƒewo kpɔ dzidzɔ esi wonya Satana kple eƒe gbɔgbɔ vɔ̃wo ɖa le dziƒo la na mí. Biblia gblɔ be: “Dzi nedzɔ mi, mi dziƒowo kple mi ame siwo le wo me la!” (Nyaɖeɖefia 12:12) Ŋutifafa kple ɖekawɔwɔ blibo le dziƒo fifia, elabe ame siwo katã le dziƒo la le Mawu ƒe lɔlɔ̃nu wɔm.

Tso esime wonya Satana kple eƒe gbɔgbɔ vɔ̃wo le dziƒo la, fukpekpe sɔŋ koe xɔ aƒe ɖe anyigba dzi. Fukpekpe siawo nu ayi kpuie

14. Nu kae dzɔ le anyigba dzi esi wonya Satana le dziƒo?

 14 Gake mele alea le anyigba dzi o. Nu dziŋɔwo le dzɔdzɔm ɖe amewo dzi, “elabena Abosam ɖi va” anyigbaa dzi eye “dzi le ekum vevie, elabena enyae be ɣeyiɣi vi aɖe koe susɔ na ye.” (Nyaɖeɖefia 12:12) Dzi le Satana kum vevie. Wonyae le dziƒo, eye wònyae be eteƒe madidi o woatsrɔ̃ ye. Ele agbagba ɖe sia ɖe dzem le kuxiwo, vevesese kple fukpekpewo hem va anyigba blibo la dzi.

15. Nu kae nye Mawu ƒe lɔlɔ̃nu ku ɖe anyigba la ŋu?

15 Gake Mawu ƒe lɔlɔ̃nu ku ɖe anyigba la ŋu metrɔ o. Egadi kokoko be amegbetɔ deblibowo nanɔ paradiso me le anyigba la dzi tegbee. (Psalmo 37:29) Aleke Mawu ƒe Fiaɖuƒe la ana esia nava eme?

16, 17. Nu kae Daniel 2:44 gblɔ na mí tso Mawu ƒe Fiaɖuƒe la ŋu?

16 Nyagblɔɖi si le Daniel 2:44 gblɔ be: “Le fia mawo ŋɔli la, dziƒo ƒe Mawu la aɖo fiaɖuƒe aɖe anyi, si matsrɔ̃ gbeɖegbeɖe o. Eye fiaɖuƒe sia mayi ɖe dukɔ bubu aɖeke si me o. Agbã fiaɖuƒe mawo katã gudugudu, eye wòahe wo va nuwuwui, ke eya ɖeɖe anɔ anyi tegbee.” Nu kae nyagblɔɖi sia fia mí tso Mawu ƒe Fiaɖuƒea ŋu?

17 Gbã la, ena míenya be Mawu ƒe Fiaɖuƒea adze dziɖuɖu gɔme “le fia mawo ŋɔli.” Esia fia be dziɖuɖu bubuwo agakpɔtɔ anɔ anyigba dzi esime Fiaɖuƒea adze dziɖuɖu gɔme. Evelia, ena míenya be Mawu ƒe Fiaɖuƒea anɔ anyi tegbee eye dziɖuɖu bubu aɖeke mava xɔ ɖe eteƒe gbeɖe o. Eye etɔ̃lia, aʋa adzɔ ɖe Mawu ƒe Fiaɖuƒea kple xexe sia me dziɖuɖuwo dome. Mawu ƒe Fiaɖuƒe la aɖu aʋaa dzi eye eya ɖeɖe koe anye dziɖuɖu ɖeka kolia si aɖu anyigba la dzi.  Ekema dziɖuɖu nyuitɔ kekeake aɖu amegbetɔwo dzi azɔ.

18. Aleke woyɔa aʋa mamlɛtɔ si adzɔ le Mawu ƒe Fiaɖuƒea kple xexe sia me dziɖuɖuwo dome?

18 Aleke Mawu ƒe Fiaɖuƒea awɔ ava xɔ ɖe anyigbadzidziɖuɖuwo teƒe? Do ŋgɔ na aʋa mamlɛtɔ si woyɔna be Armagedon la, gbɔgbɔ vɔ̃wo able ‘anyigba blibo la dzi fiawo ahaƒo wo nu ƒu hena Mawu Ŋusẽkatãtɔ la ƒe ŋkeke gã la ƒe aʋawɔwɔ.’ Ɛ̃, amegbetɔwo ƒe dziɖuɖuwo awɔ aʋa kple Mawu ƒe Fiaɖuƒe la.—Nyaɖeɖefia 16:14, 16; kpɔ Dzesidenya 10.

19, 20. Nu ka tae míehiã Mawu ƒe Fiaɖuƒea?

19 Nu ka tae míehiã Mawu ƒe Fiaɖuƒea? Susu etɔ̃ ya teti tae. Gbã la, míenye nu vɔ̃ wɔlawo, eya ta míedzea dɔ eye míekuna. Gake Biblia gblɔ be le Mawu ƒe Fiaɖuƒea ƒe dziɖuɖu te la, míanɔ agbe tegbee. Le nyateƒe me la, Yohanes 3:16 gblɔ be: “Mawu lɔ̃ xexea ale gbegbe be wòtsɔ eƒe Tenuvi la na, be ame sia ame si xɔa edzi sena la nagatsrɔ̃ o, ke boŋ wòakpɔ agbe mavɔ.”

20 Susu evelia si tae míehiã Mawu ƒe Fiaɖuƒe lae nye be ame vɔ̃ɖiwo dome míele. Wo dometɔ geɖe daa alakpa, wofia fi, eye wonɔa agbe baɖa. Mímate ŋu aɖe wo ɖa o, gake Mawu le wo ɖe ge ɖa. Woatsrɔ̃ ame siwo yi edzi le nu vɔ̃ɖi wɔm la le Armagedon me. (Xlẽ Psalmo 37:10.) Susu etɔ̃lia si tae míehiã Mawu ƒe Fiaɖuƒe lae nye be ŋusẽ mele amegbetɔwo ƒe dziɖuɖuwo si o, wowɔa ŋutasẽnuwo alo nu fitifitiwo. Wometsɔ ɖeke le ale si woakpe ɖe amewo ŋu woaɖo to Mawu me o. Biblia la gblɔ be “amegbetɔ  ɖua fia ɖe amegbetɔ dzi hena eƒe gbegblẽ.”—Nyagblɔla 8:9.

21. Aleke Fiaɖuƒea ana woawɔ Mawu ƒe lɔlɔ̃nu le anyigba dzi?

21 Le Armagedon megbe la, Mawu ƒe Fiaɖuƒea ana woawɔ Mawu ƒe lɔlɔ̃nu le anyigba dzi. Le kpɔɖeŋu me, aɖe Satana kple eƒe gbɔgbɔ vɔ̃wo ɖa. (Nyaɖeɖefia 20:1-3) Mlɔeba la, ame aɖeke magadze dɔ alo aku o. Le tafea ta la, amegbetɔ wɔnuteƒewo katã ate ŋu anɔ agbe tegbee. (Nyaɖeɖefia 22:1-3) Mawu ƒe Fiaɖuƒea akɔ Mawu ƒe ŋkɔ ŋuti. Nu kae nya sia fia? Efia be ne Mawu ƒe Fiaɖuƒea le anyigba dzi ɖum la, amegbetɔwo katã ade bubu Yehowa ƒe ŋkɔ ŋu.—Kpɔ Dzesidenya 21.

ƔEKAƔIE YESU ZU FIA?

22. Aleke míewɔ nya be Yesu mezu Fia esime wònɔ anyigba dzi alo esime wofɔe ɖe tsitre megbe teti o?

22 Yesu fia eƒe nusrɔ̃lawo be woado gbe ɖa be: “Wò Fiaɖuƒe nava.” Eya ta eme kɔ kɔtɛe be Mawu ƒe Fiaɖuƒe la ava le etsɔme. Gbã la, Yehowa aɖo eƒe dziɖuɖua anyi eye wòatsɔ Yesu aɖo Fia ɖe enu. Ðe wotsɔ Yesu ɖo Fia esi wòyi dziƒo tetia? Ao, ele be wòalala. Ɣeyiɣi  aɖe le Yesu ƒe tsitretsitsi megbe la, Petro kple Paulo na esia dze ƒãa esi wozã nyagblɔɖi si le Psalmo 110:1 ku ɖe Yesu ŋu. Le nyagblɔɖi ma me la, Yehowa gblɔ be: “Bɔbɔ nɔ nye ɖusime, va se ɖe esime matsɔ wò futɔwo awɔ wò afɔɖodzinui.” (Dɔwɔwɔwo 2:32-35; Hebritɔwo 10:12, 13) Ɣeyiɣi didi kae Yesu alala ase ɖo hafi Yehowa naɖoe Fia?

Mawu ƒe Fiaɖuƒea ana woawɔ Mawu ƒe lɔlɔ̃nu le anyigba dzi

23. (a) Ɣekaɣie Yesu zu Mawu ƒe dziɖuɖua ƒe Fia hedze dziɖuɖu gɔme? (b) Nu ka mee míadzro le ta si kplɔ esia ɖo me?

23 Ƒe geɖe do ŋgɔ na ƒe 1914 la, Kristotɔ dovevienuwo ƒe ƒuƒoƒo aɖe de dzesi be ƒe ma anye ƒe ɖedzesi aɖe le Biblia me nyagblɔɖiwo me. Nu siwo le dzɔdzɔm le xexea me tso ƒe 1914 me la ɖo kpe edzi be woƒe nyawo le eme. Yesu zu Fia hedze dziɖuɖu gɔme le ƒe ma me. (Psalmo 110:2) Le ema megbe kpuie la, wotsɔ Satana ƒu gbe ɖe anyigba dzi, eye “ɣeyiɣi vi aɖe koe susɔ” nɛ fifia. (Nyaɖeɖefia 12:12) Le ta si kplɔ esia ɖo me la, míakpɔ nu geɖe siwo ɖo kpe edzi be míele ɣeyiɣi ma me fifia. Eye míakpɔe hã be eteƒe madidi o Mawu ƒe Fiaɖuƒea ana be woawɔ Mawu ƒe lɔlɔ̃nu le anyigba la dzi.—Kpɔ Dzesidenya 22.