Dzo kpo yi emenuwo dzi

Dzo kpo yi emenuawo dzi

 TA EVELIA

Biblia La—Agbalẽ Si Tso Mawu Gbɔ

Biblia La—Agbalẽ Si Tso Mawu Gbɔ

1, 2. Nu ka tae Biblia la nye nunana dodzidzɔname aɖe tso Mawu gbɔ na mí?

ALEKE nàse le ɖokuiwò me ne xɔ̃wò aɖe na nu nyui aɖe wò le vo me? Nunana la ʋuʋu manɔ tsɔtsɔm na wò o, eye dzi adzɔ wò be xɔ̃wòa bu ŋuwò. Àda akpe nɛ ɖe eta.

2 Biblia la nye nunana tso Mawu gbɔ na mí. Nyatakaka siwo mímate ŋu akpɔ le teƒe bubu aɖeke o la woe le eme na mí. Le kpɔɖeŋu me, egblɔ na mí be Mawue wɔ dziƒowo, anyigba la kple ŋutsu gbãtɔ kpakple nyɔnu gbãtɔ. Mɔfiame siwo ate ŋu akpe ɖe mía ŋu míakpɔ míaƒe kuxiwo gbɔ la le Biblia me. Biblia gblɔ ale si Mawu ana tame si wòɖo be yeana nɔnɔmeawo nanyo wu le anyigba dzi la nava eme na mí. Nunana dodzidzɔname ka gbegbee nye esi Biblia la nye!

3. Nu kae nàva kpɔ ne èyi Biblia la sɔsrɔ̃ dzi?

3 Ne èle Biblia srɔ̃m la, àva kpɔe be Mawu di be nànye ye xɔlɔ̃. Ne èyi edzi le nu srɔ̃m tso eŋu la, wò kplii dome xɔlɔ̃dzedzea me anɔ sesẽm ɖe edzi.

4. Nu kae wɔ dɔ ɖe dziwò le Biblia ŋu?

4 Woɖe Biblia gɔme ɖe gbe 2,600 aɖewo me, eye wota ɖekaɖeka miliɔn akpe geɖewo. Anyigbadzinɔla siwo wu 90 le alafa me ate ŋu akpɔ Biblia axlẽ le wo degbe me. Womaa Biblia miliɔn ɖeka kple edzivɔ kwasiɖa ɖe sia ɖe! Vavãe, agbalẽ bubu aɖeke megali de Biblia nu o.

5. Nu ka tae míagblɔ be Biblia “tso Mawu ƒe gbɔgbɔ me”?

 5 Biblia la nye agbalẽ si “tso Mawu ƒe gbɔgbɔ me.” (Xlẽ 2 Timoteo 3:16.) Gake ame aɖewo abia be, ‘Esi wònye be amegbetɔwoe ŋlɔ Biblia ɖe, ke aleke wòate ŋu atso Mawu gbɔe?’ Biblia ɖo eŋu be: “Gbɔgbɔ kɔkɔe ye ʋã [alo fia mɔ] amewo wogblɔ Mawu ƒe nyawo ɖi.” (2 Petro 1:21) Esia sɔ kple ale si dɔtɔ aɖe nabia tso eƒe agbalẽŋlɔla si be wòaŋlɔ lɛta aɖe na ye. Ame ka tɔe lɛta la nye? Dɔtɔ la ƒe lɛtae, menye agbalẽŋlɔlaa tɔe o. Nenema ke Mawu tɔe Biblia nye, ke menye ame siwo wòzã woŋlɔe la tɔe o. Mawue fia mɔ wo woŋlɔ eƒe susuwo ɖi. Eya ta “Mawu ƒe nya” ye Biblia la nye vavã.—1 Tesalonikatɔwo 2:13; kpɔ Dzesidenya 2.

Ŋɔŋlɔ Kɔkɔeawo—Xexe Yeye Gɔmeɖeɖe Biblia la le gbe geɖewo me

 BIBLIA ME NYAWO DE PƐPƐPƐ

6, 7. Nu kae ɖo kpe edzi be Biblia me nyawo wɔ ɖeka?

6 Biblia la ŋɔŋlɔ xɔ ƒe 1,600 kple edzivɔ. Eŋlɔlawo nɔ agbe le ɣeyiɣi vovovowo me. Wo dometɔ aɖewo nye agbalẽnyalagãwo, gake bubuwo hã menya agbalẽ ale o. Le kpɔɖeŋu me, wo dometɔ ɖeka nye ɖɔkita. Wo dometɔ aɖewo hã nye agbledelawo, lãɖelawo, alẽkplɔlawo, nyagblɔɖilawo, ʋɔnudrɔ̃lawo kple fiawo. Togbɔ be ame vovovowoe ŋlɔ Biblia hã la, emenyawo katã wɔ ɖeka. Megblɔa nya aɖe le ta aɖe me evɔ gblɔa nya si tsi tsitre ɖe ema ŋu le ta bubu me o. *

7 Biblia ƒe ta gbãtɔwo gblɔ ale si amegbetɔƒomea ƒe kuxiwo dze egɔmee la na mí, eye eƒe ta mamlɛtɔwo gblɔ ale si Mawu ava kpɔ kuxi mawo gbɔ ahatrɔ anyigba bliboa wòazu paradiso la na mí. Nya siwo le Biblia me la ku ɖe nu siwo dzɔ le amegbetɔƒomea ƒe ŋutinya me ƒe akpe geɖe la ŋu eye woɖee fia be Mawu ƒe tameɖoɖo vaa eme godoo.

8. Gblɔ kpɔɖeŋu aɖewo siwo ɖee fia be Biblia me nyawo sɔ pɛpɛpɛ le dzɔdzɔmeŋutinunya gome.

8 Menye dzɔdzɔmeŋutinunya alo suku ƒe nusrɔ̃gbalẽe Biblia nye o, gake nya siwo wògblɔ tso nu siwo ŋu dzɔdzɔmeŋutinunyalawo va kena ɖo ŋu la dena pɛpɛpɛ ɣesiaɣi. Aleae míakpɔ mɔ be agbalẽ si tso Mawu gbɔ nanɔ. Le kpɔɖeŋu me, wode sewo le Mose Ƒe Agbalẽ Etɔ̃lia me na Israel-viwo ku ɖe nu siwo woawɔ be dɔlélewo magakaka o la ŋu. Woŋlɔ se siawo ɖi ɣeyiɣi didi aɖe megbe hafi amewo va nya nu tso ale si dɔlékuiwo  hea dɔléle vanɛ la ŋu. Biblia gblɔe wòsɔ pɛpɛpɛ hã be womeku anyigba la ɖe naneke ŋu o. (Hiob 26:7) Le ɣeyiɣi si me ame akpa gãtɔ xɔe se be ɖe anyigba le gbadzaa la, Biblia ya gblɔ be anyigba la le nogoo.—Yesaya 40:22.

9. Nu kae Biblia-ŋlɔlawo ƒe anukwareɖiɖi kpe ɖe mía ŋu míekpɔ dze sii?

9 Ŋutinyamenudzɔdzɔ siwo woŋlɔ ɖe Biblia me la de pɛpɛpɛ. Gake ŋutinyagbalẽ bubu siwo li la me nyawo ya medena pɛpɛpɛ o, elabe wo ŋlɔlawo metoa nyateƒe o. Le kpɔɖeŋu me, womeŋlɔa nu tso ɣeyiɣi siwo me woɖu wo dedukɔwo dzi le aʋa me la ŋu ɣesiaɣi o. Gake ame siwo ŋlɔ Biblia ya to nyateƒe eye woŋlɔ nu tso aʋa siwo me woɖu Israel dzi le gɔ̃ hã ŋu. Woŋlɔ woawo ŋutɔ ƒe vodadawo gɔ̃ hã ɖi. Le kpɔɖeŋu me, le Mose Ƒe Agbalẽ Enelia me la, Mose gblɔ be yeda vo gã aɖe, eye Mawu he to na ye ɖe eta. (4 Mose 20:2-12) Ale si Biblia-ŋlɔlawo ɖi anukware la ɖee fia be Mawu gbɔe Biblia tso. Esia fia be míate ŋu aka ɖe Biblia dzi.

AGBALẼ SI ME AÐAŊUÐOÐO NYUIWO LE

10. Nu ka tae Biblia ƒe aɖaŋuɖoɖowo kpena ɖe mía ŋu egbea?

10 Biblia la “tso Mawu ƒe gbɔgbɔ me, eye wònyo na nufiafia, na mokaka, na ɖɔɖɔɖo.” (2 Timoteo 3:16) Ɛ̃, Biblia ƒe aɖaŋuɖoɖowo kpena ɖe mía ŋu egbea. Yehowa nya míaƒe wɔwɔme, eya ta esea míaƒe tamebubu kple seselelãmewo gɔme. Enya mí wu míawo ŋutɔwo gɔ̃ hã, eye wòdi be míakpɔ dzidzɔ. Enya nu siwo aɖe vi na mí kple nu siwo maɖe vi na mí o siaa.

11, 12. (a) Aɖaŋu nyui kawoe Yesu ɖo le Mateo ta 5 va se ɖe ta 7? (b) Nu bubu kawoe míate ŋu asrɔ̃ le Biblia me?

11 Yesu ɖo aɖaŋu nyui aɖewo na mí le Mateo ta 5 va  se ɖe ta 7 ku ɖe ale si míawɔ akpɔ dzidzɔ, ale si míawɔ anɔ ŋutifafa me kple amewo, ale si míado gbe ɖa kple susu si wòle be wòanɔ mía si ɖe ga ŋu la ŋuti. Togbɔ be eɖo aɖaŋu siawo ƒe akpe evee nye esia hã la, ŋusẽ gakpɔtɔ le wo ŋu eye wogakpena ɖe ame ŋu egbea abe ale si ko wònɔ esime wòɖo wo ene.

12 Yehowa na gɔmeɖosewo alo mɔfiamewo mí le Biblia me ku ɖe nu si míawɔ be míaƒe ƒomegbenɔnɔ nanyo, míanye dɔ nyui wɔlawo kple nu siwo míawɔ be mí kple amewo dome nanɔ nyuie la ŋu. Biblia me mɔfiame siawo ate ŋu akpe ɖe mía ŋu eɖanye ame ka kee míenye o, afi ka kee míele alo kuxi ka ke me tomee míele o.—Xlẽ Yesaya 48:17; kpɔ Dzesidenya 3.

ÀTE ŊU AKA ÐE BIBLIA ME NYAGBLƆÐIWO DZI

Biblia-ŋlɔla Yesaya gblɔe ɖi be woatsrɔ̃ Babilon

13. Nu kae Yesaya gblɔ ɖi be adzɔ ɖe Babilon dzi?

13 Biblia me nyagblɔɖi geɖewo va eme xoxo. Le kpɔɖeŋu me, Yesaya gblɔe ɖi be woatsrɔ̃ Babilon. (Yesaya 13:19) Egblɔ ale si tututu woatsrɔ̃ du lae ɖi tsitotsito. Agbo gãwo kple tɔsisi aɖe nye takpɔnu na dua. Gake Yesaya gblɔe ɖi be tɔsisi la amie eye woagblẽ agboawo ɖe nuvo. Du la dzi dzelawo ava xɔ dua aʋamawɔmawɔe. Yesaya gblɔe ɖi gɔ̃ hã be ŋutsu si ŋkɔe nye Kores aɖu Babilon dzi.—Xlẽ Yesaya 44:27–45:2; kpɔ Dzesidenya 4.

14, 15. Aleke Yesaya ƒe nyagblɔɖia va emee?

14 Ƒe alafa eve le nyagblɔɖi sia megbe la, aʋakɔ aɖe va ɖi anyi, eye wonɔ klalo be yewoadze Babilon dzi. Ame kae nye woƒe aʋafia? Abe ale si tututu wogblɔe ɖi ene la, Persia-fia Kores ye. Aleae wòdzɔe be nɔnɔmeawo sɔ keŋ na nyagblɔɖia ƒe akpa susɔeawo me vava.

15 Babilontɔwo nɔ azã ɖum le zã si me wodze Babilon dzi. Wosusui be yewole dedie, elabe gli kɔkɔ aɖe  kple tɔsisi aɖe ƒo xlã wo. Le dua godo la, Kores kple eƒe amewo ɖe ʋewo tsɔ trɔ mɔ na tɔsisia. Tsia mie va ɖo afi si Persia-ʋawɔlawo te ŋu tsoe. Gake aleke aʋawɔlaawo awɔ alia gli si woɖo ƒo xlã Babilon-dua? Abe ale si wogblɔe ɖi ene la, wogblẽ dua ƒe agbowo ɖe nuvo, eye aʋawɔlaawo xɔ dua aʋamawɔmawɔe.

16. (a) Nu kae Yesaya gblɔ ɖi be adzɔ ɖe Babilon dzi mlɔeba? (b) Aleke míewɔ nya be Yesaya ƒe nyagblɔɖia va eme?

 16 Yesaya gblɔe ɖi be mlɔeba ame maganɔ Babilon gbeɖe o. Eŋlɔe ɖi be: “Ame maganɔ eme akpɔ o, eye maganye teƒe si ame anɔ o tso dzidzime yi dzidzime.” (Yesaya 13:20) Ðe wòva eme nenema? Glikpowo koe le afi si Babilon nɔ tsã si didi abe kilometa 80 ene tso Bagdad ƒe anyiehe le Irak. Va se ɖe egbea gɔ̃ hã la, ame aɖeke mele afi ma o. Yehowa tsɔ “tsɔtsrɔ̃ ƒe xa” kplɔe vavã!—Yesaya 14:22, 23. *

Babilon ƒe glikpowo

17. Nu ka tae míate ŋu aka ɖe Mawu ƒe ŋugbedodowo dzi?

17 Ale si Biblia me nyagblɔɖi geɖewo va eme la ɖee fia be míate ŋu aka ɖe nya siwo Biblia gblɔ ɖi be woava dzɔ le etsɔme la dzi. Míate ŋu aka ɖe edzi be Yehowa awɔ ɖe ŋugbe si wòdo be yeana anyigba la nazu  paradiso la dzi. (Xlẽ 4 Mose 23:19.) Vavãe, “agbe mavɔ ƒe mɔkpɔkpɔ si ƒe ŋugbe Mawu, ame si mate ŋu aka aʋatso o la, do tso gbe aɖe gbe ʋĩi ke la” le mía si.—Tito 1:2. *

BIBLIA ATE ŊU ATRƆ WÒ AGBENƆNƆ

18. Nya kae apostolo Paulo gblɔ tso “Mawu ƒe nya” la ŋu?

18 Míesrɔ̃e va yi be agbalẽ bubu aɖeke meli de Biblia nu o. Emenyawo wɔ ɖeka, eye le dzɔdzɔmeŋutinunya kple ŋutinya gome la, emenyawo dena ɣesiaɣi. Eɖoa aɖaŋu nyuiwo hã na mí, eye nyagblɔɖi gbogbo aɖewo le eme siwo va eme xoxo. Gake Biblia gawɔa dɔ geɖe wu emawo gɔ̃ hã. Apostolo Paulo gblɔ bena: “Mawu ƒe nya la le agbe, eye ŋusẽ le eŋu.” Nya mawo gɔme ɖe?—Xlẽ Hebritɔwo 4:12.

19, 20. (a) Aleke Biblia ate ŋu akpe ɖe ŋuwò nàdze si ɖokuiwò? (b) Nu kawoe nàwɔ atsɔ ada akpe na Mawu ɖe Biblia ta?

19 Biblia ate ŋu atrɔ wò agbenɔnɔ. Ate ŋu akpe ɖe ŋuwò nàdze si ɖokuiwò nyuie. Ate ŋu akpe ɖe ŋuwò nàse wò dzimesusuwo kple wò seselelãmewo gɔme. Le kpɔɖeŋu me, míate ŋu agblɔ be míelɔ̃ Mawu. Gake ne míedi be míaɖee afia be míelɔ̃ Mawu ŋutɔŋutɔ la, ele be míawɔ ɖe Biblia me nyawo dzi.

20 Biblia nye agbalẽ si tso Mawu gbɔ vavã. Mawu di be nàxlẽ Biblia, nàsrɔ̃e ahalɔ̃e. Da akpe nɛ ɖe nunana sia ta eye nànɔ Biblia srɔ̃m. Ekema àse tame si Mawu ɖo ɖe amegbetɔwo ŋu la gɔme. Le ta si kplɔ esia ɖo me la, míasrɔ̃ nu tso tameɖoɖo sia ŋu.

^ mm. 6 Togbɔ be ame aɖewo gblɔna be Biblia me nya aɖewo tsi tsitre ɖe bubuwo ŋu hã la, menye nyateƒee o. Kpɔ agbalẽ si nye Biblia La—Mawu Ƒe Nyae Loo Alo Amegbetɔ Tɔea?, si le yevugbe me ƒe ta 7 lia, Yehowa Ðasefowoe tae.

^ mm. 16 Ne èdi be yeasrɔ̃ nu geɖe tso Biblia ƒe nyagblɔɖiwo ŋu la, kpɔ agbalẽ gbadza si nye Agbalẽ si Nyo na Amesiame ƒe axa 27-29, Yehowa Ðasefowoe tae.

^ mm. 17 Babilon ƒe tsɔtsrɔ̃ nye Biblia ƒe nyagblɔɖi geɖe siwo va eme la dometɔ ɖeka ko. Àte ŋu akpɔ nyagblɔɖi siwo ku ɖe Yesu Kristo ŋu le Dzesidenya 5 lia me.