Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nu Kae Biblia Fia Mí?

 TA WUIETƆ̃

De Asixɔxɔ Nunana Si Nye Agbe Ŋu

De Asixɔxɔ Nunana Si Nye Agbe Ŋu

1. Ame kae na agbe mí?

YEHOWAE “nye Mawu gbagbe la.” (Yeremiya 10:10) Eyae nye mía Wɔla, eyae na agbe mí. Biblia gblɔ be: “Wòe wɔ nuwo katã, eye wò lɔlɔ̃nu ta woli, eye wowɔ wo ɖo.” (Nyaɖeɖefia 4:11) Ɛ̃, Yehowa di be míanɔ agbe. Agbe nye nunana xɔasi aɖe tso egbɔ.—Xlẽ Psalmo 36:9.

2. Aleke míawɔ agbe nadze edzi na mí?

2 Yehowa na nu siwo alé míaƒe agbe ɖe te la mí. Esiawo dometɔ aɖewoe nye nuɖuɖu kple tsi. (Dɔwɔwɔwo 17:28) Gake vevietɔ wu la, edi be míase vivi na agbea. (Dɔwɔwɔwo 14:15-17) Ke hã, hafi agbea nadze edzi na mí la, ele be míawɔ Mawu ƒe sewo dzi.—Yesaya 48:17, 18.

ALE SI MAWU BUA AGBEE

3. Nu kae Yehowa wɔ Kain esi wòwu Abel?

3 Biblia gblɔ na mí be míaƒe agbe kple ame bubuwo tɔ siaa xɔ asi na Yehowa. Le kpɔɖeŋu me, esi Kain, si nye Adam kple Xawa ƒe vi, do dziku ɖe nɔvia Abel ŋu vevie la, Yehowa xlɔ̃ nui be nèɖu eƒe dzikua dzi. Gake Kain meɖo to o, ke boŋ edo dɔmedzoe helĩhelĩ eye wòdze “nɔvia Abel dzi hewui.” (1 Mose 4:3-8) Yehowa he to na Kain le esi wòwu nɔvia ta. (1 Mose 4:9-11) Eya ta dzikudodo kple fuléle gblẽa nu, elabena woate ŋu ana míawɔ ŋutasẽnuwo alo  tagbɔsesẽnuwo. Ame siwo wɔa nu siawo tɔgbi mate ŋu akpɔ agbe mavɔ o. (Xlẽ 1 Yohanes 3:15.) Ne míedi be míaƒe nu nadze Yehowa ŋu la, ele be míasrɔ̃ ale si míalɔ̃ amewo katã.—1 Yohanes 3:11, 12.

4. Nu kae se siwo Mawu de na Israel-viwo la dometɔ ɖeka fia mí tso nunana si nye agbe ŋu?

4 Le ƒe akpe geɖe megbe la, Yehowa ɖee fia be agbe nye nu xɔasi na ye esi wòtsɔ Se Ewoawo na Mose. Seawo dometɔ ɖeka gblɔ be: “Mègawu ame o.” (5 Mose 5:17) Ne ame aɖe ɖoe koŋ wu ame la, woawu eya hã.

5. Aleke Mawu bua fuɖeɖee?

5 Aleke Mawu bua fuɖeɖee? Vi nɔdɔmewo gɔ̃ hã ƒe agbe xɔa asi na Yehowa. Yehowa gblɔ le Se si wòtsɔ na Israel-viwo me be, ne ame aɖe wɔ nu vevi funɔ aɖe eye ɖevia ku la, woawu eya hã. (Xlẽ 2 Mose 21:22, 23; Psalmo 127:3.) Esia fia mí be fuɖeɖe menyo o.—Kpɔ Dzesidenya 28.

6, 7. Aleke míeɖenɛ fiaa Yehowa be míebua agbe be enye nu xɔasi?

6 Aleke míaɖee afia Yehowa be míedea asixɔxɔ míaƒe agbe kple ame bubuwo tɔ siaa ŋu? Eyae nye be míaƒo asa na nu siwo ana míawo ŋutɔwo alo ame bubuwo ƒe agbe naɖo afɔku me la wɔwɔ. Eya ta míano sigareti, gbekui alo atike vɔ̃ɖi o, elabe wogblẽa nu le mía ŋu eye woate ŋu awu mí.

7 Mawue na míaƒe agbe kple míaƒe ŋutilã mí, eya ta ele be míazã nu siawo abe ale si wòdii ene. Le esia ta ehiã be míalé be na míaƒe ametia. Ne míewɔe o la, míazu ame makɔmakɔwo le Mawu ŋkume. (Romatɔwo 6:19; 12:1; 2 Korintotɔwo 7:1) Ne míebua agbe nu xɔasii ko hafi míate ŋu asubɔ Yehowa ame si na agbe mí la. Togbɔ be asesẽ be míaɖe asi le nuwɔna  gbegblẽwo ŋu hã la, Yehowa akpe ɖe mía ŋu ne míele agbagba dzem be míatrɔ asi le míaƒe agbenɔnɔ ŋu le esi míebua agbe be enye nu xɔasi ta.

8. Nu kae wòle be míawɔ be míagade míawo ŋutɔwo alo ame bubuwo ƒe agbe afɔku me o?

8 Míesrɔ̃e be agbe nye nunana xɔasi aɖe. Yehowa ka ɖe mía dzi be míate ŋu awɔ mía tɔ si nua ale be mímawɔ naneke si ade míawo ŋutɔwo alo ame bubuwo ƒe agbe afɔku me o. Míeɖea esia fiana le ale si míekua míaƒe ʋu kple dzokekewo la me. Míetsria kamedefefe siwo me afɔku le alo esiwo me wowɔa ŋutasẽnuwo le. (Psalmo 11:5) Míedzea agbagba ɖe sia ɖe be míaƒe aƒe me nanɔ dedie. Yehowa de se na Israel-viwo be: “Ne ètso aƒe yeye la, tɔ kpɔ ɖe xɔa tame, bena ame aɖeke magage le edzi, eye nàna wò aƒe naɖi ʋufɔ o.”—5 Mose 22:8.

9. Aleke wòle be míawɔ nu ɖe lãwo ŋui?

9 Ale si míewɔa nu ɖe lãwo ŋu gɔ̃ hã le vevie na Yehowa. Eɖe mɔ na mí be míawu lãwo aɖu, awu wo atsɔ awɔ nudodowo alo awu wo ne wona míaƒe agbe ɖo afɔku me. (1 Mose 3:21; 9:3; 2 Mose 21:28) Gake mele be míasẽ ŋuta le lãwo ŋu alo awu wo ɖe modzakaɖeɖe dzro ko ta o.—Lododowo 12:10.

DE ASIXƆXƆ AGBE ƑE KƆKƆENYENYE ŊU

10. Aleke míewɔ nya be ʋu le tsitre ɖi na agbe?

10 Ʋu nye nu kɔkɔe na Yehowa, elabena ʋu le tsitre ɖi na agbe. Esi Kain wu Abel la, Yehowa gblɔ na Kain be: “Nɔviwò ƒe ʋu le ɣli dom nam tso anyigba dzi.” (1 Mose 4:10) Abel ƒe ʋu le tsitre ɖi na eƒe agbe, eya ta Yehowa he to na Kain esi wòwu Abel. Le Noa ƒe ŋkekea me Tsiɖɔɖɔa megbe la, Yehowa gaɖee fia be  ʋu le tsitre ɖi na agbe. Yehowa ɖe mɔ na Noa kple eƒe ƒomea be woaɖu lãwo. Egblɔ na wo be: “Nu gbagbe siwo katã ʋãna la nanye nuɖuɖu na mi. Metsɔ wo katã na mi, abe amagbewo ke ene.” Gake Yehowa de se na wo be womegaɖu nu ɖeka aɖe ya o. Egblɔ be: “Ðeko migaɖu lã si me eƒe agbe, si nye eƒe ʋu, le la o.”—1 Mose 1:29; 9:3, 4.

11. Se kae Mawu de na Israel-dukɔa ku ɖe ʋu ŋu?

11 Esi Yehowa de se na Noa be womegaɖu ʋu o ƒe 800 megbe la, egade se na eƒe dukɔa be: “Ne Israel-vi aɖe alo amedzrovi aɖe si le mia dome da ade lé gbemelã alo xe si woɖuna la, ekema wòaɖuɖu eƒe ʋu ɖi, eye wòaxe ke ɖe edzi.” Egblɔ kpee be: “Migaɖu . . . ʋu o.” (3 Mose 17:13, 14) Yehowa gadi kokoko be yeƒe amewo nabu ʋu nu kɔkɔee. Woate ŋu aɖu ʋulã, gake menye ʋua ŋutɔ o. Ne wowu lã be yewoaɖu la, ele be woaɖuɖu eƒe ʋua ɖe anyigba.

12. Aleke Kristotɔwo bua ʋui?

12 Ƒe aɖewo le Yesu ƒe ku megbe la, apostolowo kple hamemetsitsi siwo nɔ Kristo-hamea me le Yerusalem kpe ta hetso nya me le Se si wode na Israel-viwo ƒe akpa si gasɔ na Kristotɔwo ŋu. (Xlẽ Dɔwɔwɔwo 15:28, 29; 21:25.) Yehowa kpe ɖe wo ŋu wose egɔme be yegakpɔtɔ bua ʋu nu xɔasii, eye egahiã kokoko be woabui nu kɔkɔee. Kristotɔ gbãtɔwo meɖua ʋu alo noa ʋu loo alo ɖua lã tsiʋume o. Ne ɖe wowɔ nu siawo la, ke ɖeko wòanɔ abe ɖe wosubɔ trɔ̃ alo kpɔ gome le gbɔdɔdɔ manɔsenu me ene. Tso ɣemaɣi la, Kristotɔ vavãwo tsri ʋuɖuɖu alo enono. Ke egbea ya ɖe? Yehowa gadi kokoko be míabu ʋu nu kɔkɔee.

13. Nu ka tae Kristotɔwo melɔ̃na wodoa ʋu na wo o?

 13 Ðe esia fia be ele be Kristotɔwo natsri ʋudodoa? Ɛ̃. Yehowa de se na mí be mele be míaɖu ʋu alo anoe o. Ne ɖɔkita gblɔ na wò be mègano aha o la, ɖe nàna woadoe na wòa? Gbeɖe! Nenema kee se si Mawu de be mígaɖu ʋu alo anoe o la fia be mele be míalɔ̃ woado ʋu na mí o.—Kpɔ Dzesidenya 29.

14, 15. Nu ka tae wòle vevie be Kristotɔwo nabu agbe nu xɔasii ahaɖo to Yehowa?

14 Ke ne ɖɔkita aɖe gblɔ be ne womedo ʋu na mí o la, míaku ya ɖe? Ele be mía dometɔ ɖe sia ɖe ŋutɔ natso nya me be yeaɖo to Mawu ƒe se alo yemaɖo toe o. Mí Kristotɔwo míedea asixɔxɔ nunana si nye agbe ŋu vevie, eye míadi be woazã dɔdamɔnu bubuwo na mí bene míatsi agbe, gake mímalɔ̃ woado ʋu na mí o.

15 Míedzea agbagba be míanɔ lãmesẽ me, gake esi wònye be agbe xɔ asi na Mawu ta la, mímalɔ̃ woado ʋu na mí o. Ele vevie be míaɖo to Yehowa wu be míada eƒe sewo dzi kple susu be míatsi agbe. Yesu gblɔ be: “Ame sia ame si di be yeaɖe yeƒe agbe la abui, ke ame sia ame si abu eƒe agbe le tanye la akpɔe.” (Mateo 16:25) Míedina be míaɖo to Yehowa elabe míelɔ̃e. Enya nu si nyo na mí, eye míebua agbe nu xɔasi kple nu kɔkɔee abe ale si Yehowa bunɛ ene.—Hebritɔwo 11:6.

16. Nu ka tae Mawu subɔlawo ɖoa toe?

16 Mawu subɔla wɔnuteƒewo ɖonɛ kplikpaa be yewoawɔ ɖe Mawu ƒe se si ku ɖe ʋu ŋu la dzi. Womaɖu ʋu alo anoe o, eye womalɔ̃ woazã ʋu le dɔdada na wo  me o. * Gake woalɔ̃ woazã dɔdamɔnu bubuwo na wo ale be woatsi agbe. Woka ɖe edzi be Ame si wɔ agbe kple ʋu la nya nu si nyo na yewo. Wò hã eka ɖe edzi be Mawu nya nu si nyo na wòa?

MƆ ÐEKA SI KO NU YEHOWA ÐE MƆ WOZÃ ƲU LE

17. Le Israel la, mɔ ka ko nue Yehowa ɖe mɔ be woazã ʋu le?

17 Yehowa gblɔ na Israel-viwo le Se si wòtsɔ na Mose me be: “Ŋutilã ɖe sia ɖe ƒe agbe le ʋu la me, eya ta metsɔe na be miatsɔ alé avu [alo abia tsɔtsɔke] le vɔsamlekpui la dzi ɖe mia ɖokuiwo ta, elabena ʋu wotsɔ léa avu.” (3 Mose 17:11) Ne Israel-viwo wɔ nu vɔ̃ la, woate ŋu abia Yehowa be wòatsɔe ake yewo ne wotsɔ lã sa vɔe eye wona nunɔla la kɔ lãa ƒe ʋu ɖe vɔsamlekpuia dzi le gbedoxɔa me. Mɔ ɖeka sia ko nue Yehowa ɖe mɔ na Israel-viwo be woazã ʋu le.

18. Mɔnukpɔkpɔ kae Yesu ƒe vɔsaa ʋu ɖi na mí?

18 Esi Yesu va anyigba dzi la, etsɔ eƒe agbe alo ʋu na ale be woatsɔ nu vɔ̃wo ake, eye esia va xɔ ɖe lãwo tsɔtsɔ sa vɔe teƒe. (Mateo 20:28; Hebritɔwo 10:1) Asixɔxɔ le Yesu ƒe agbe ŋu ale gbegbe be esi Yehowa fɔ Yesu ɖe tsitre wòyi dziƒo la, Yehowa ate ŋu ana mɔnukpɔkpɔ ame sia ame be wòanɔ agbe tegbee.—Yohanes 3:16; Hebritɔwo 9:11, 12; 1 Petro 1:18, 19.

Aleke nàwɔ ade bubu agbe kple ʋu ŋu?

19. Nu kae míawɔ be ‘mía ŋuti nakɔ tso amewo katã ƒe ʋu me’?

19 Míedaa akpe na Yehowa ale gbegbe ɖe míaƒe  agbe si nye nunana wɔnuku la ta! Eye míedina be míagblɔe na amewo be ne woxɔ Yesu dzi se la, woate ŋu anɔ agbe tegbee. Míelɔ̃a amewo, eye míawɔ nu sia nu si míate ŋui be míafia ale si woawɔ akpɔ agbe la wo. (Ezekiel 3:17-21) Ekema mía dometɔ ɖe sia ɖe ate ŋu agblɔ abe apostolo Paulo ene be: “Ŋutinye kɔ tso amewo katã ƒe ʋu me, elabena nyemegbe Mawu ƒe lɔlɔ̃nu blibo la katã gbɔgblɔ na mi o.” (Dɔwɔwɔwo 20:26, 27) Ɛ̃, míeɖenɛ fiana be míedea asixɔxɔ agbe kple ʋu ŋu vevie ne míeƒo nu tso Yehowa kple ale si agbe xɔa asi nɛ la ŋu na ame bubuwo.

^ mm. 16 Ne èdi be yeanya nu geɖe tso ʋudodo ŋu la, kpɔ agbalẽ si nye “Minɔ Mawu Ƒe Lɔlɔ̃ La Me Ðaa” ƒe axa 77-79 lia. Yehowa Ðasefowoe tae.