Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nu Kae Biblia Fia Mí?

 TA GBÃTƆ

Ame Kae Nye Mawu?

Ame Kae Nye Mawu?

1, 2. Nu kawo ŋue amewo biaa nya tsoe zi geɖe?

ÐEVIWO lɔ̃a nya geɖe biabia. Zi geɖe ne èɖe nane gɔme na wo vɔ la, woagabia ake be, ‘Nu ka tae?’ Ne èdze agbagba kpɔ ŋuɖoɖo nyui aɖe na wo hã la, ɖeko woagabia ake be: ‘Ke nu ka tae?’

2 Míeɖanye ɖeviwo alo ame tsitsiwo o, mí katã míebiaa nya. Míebiaa nya tso nu si míaɖu, nu si míado alo nu si míaƒle ŋu. Eye míetea ŋu biaa nya vevi aɖewo hã tso míaƒe agbe alo etsɔme ŋu. Gake ne míekpɔ nyabiase siawo ƒe ŋuɖoɖo fakɔnamewo o la, ate ŋu ana míadzudzɔ ŋuɖoɖoawo didi.

3. Nu ka tae ame geɖe susui be yewomate ŋu akpɔ yewoƒe nyabiase veviwo ƒe ŋuɖoɖowo o?

3 Ðe nyabiase vevi siwo le mía si la ƒe ŋuɖoɖowo le Biblia mea? Ame aɖewo susui be ŋuɖoɖoawo le Biblia me, gake wo gɔme sese sesẽ akpa. Ewɔna na wo be nufialawo, fadawo kple pastɔwo koe ate ŋu aɖo wo ŋu. Eye enyea ŋukpe na ame bubu aɖewo hã be woalɔ̃ ɖe edzi be yewomenya ŋuɖoɖoawo o. Ke wò ya ɖe?

4, 5. Nyabiase vevi kawoe le asiwò? Eye nu ka ta wòle be nàyi edzi adi woƒe ŋuɖoɖowo?

4 Àdi godoo be yeakpɔ nyabiase siwo gbɔna la ƒe ŋuɖoɖowo: ‘Nu ka tae mele agbe ɖo? Nu kae adzɔ ɖe dzinye le nye ku megbe? Aleke tututue Mawu le?’ Nufiala xɔŋkɔ Yesu gblɔ be: “Minɔ ebiabia dzi, eye woana mi; minɔ edidi dzi, eye miakpɔe; minɔ ʋɔƒoƒo dzi, eye woaʋui  na mi.” (Mateo 7:7) Mègana ta o va se ɖe esime nèke ɖe ŋuɖoɖo siwo ŋu kakaɖedzi le la ŋu.

5 Ɛ̃, ne ‘èdia’ ŋuɖoɖoawo la, àkpɔ wo le Biblia me. (Lododowo 2:1-5) Ŋuɖoɖo siwo le Biblia me la gɔme sese mesesẽ akpa o. Nu si nàsrɔ̃ le eme la ana nàkpɔ dzidzɔ fifia eye wòana be etsɔmemɔkpɔkpɔ nyui aɖe hã nasu asiwò. Na míadzro biabia aɖe si ɖea fu na ame geɖe la me.

ÐE MAWU TSƆA ÐE LE EME NA MÍA, ALO TAMESẼLAE WÒNYE?

6. Nu ka tae ame aɖewo susui be Mawu metsɔa ɖeke le eme na yewo ne yewole fu kpem o?

6 Ame geɖe susui be Mawu metsɔa ɖeke le eme na mí o. Wogblɔna be ne ɖe Mawu tsɔa ɖe le eme na mí la, anye ne xexea me nyo wu sãsãsã. Aʋawɔwɔ, fuléle kple nuxaxa yɔ xexea me fũu. Amewo dzea dɔ, amewo kpea fu eye amewo kuna. Eya ta ame aɖewo biana be, ‘Ne ɖe Mawu tsɔ ɖe le eme na mí la, anye ne mexe mɔ ɖe fukpekpe siawo katã nu oa?’

7. (a) Aleke subɔsubɔhakplɔlawo naa ame geɖe susunɛ be Mawu nye tamesẽla? (b) Nu kae na míeka ɖe edzi be menye Mawue nana nu vɔ̃ɖiwo dzɔna o?

7 Ɣeaɖewoɣi la, subɔsubɔhakplɔlawo naa amewo susunɛ be Mawu nye tamesẽla. Le kpɔɖeŋu me, ne nya vɔ̃ aɖe dzɔ la, wogblɔna be Mawu ƒe lɔlɔ̃nue. Wogblɔna be eyae di be nu ma nadzɔ. Le nyateƒe me la, ne wogblɔ nya sia la, efia be wole fɔ bum Mawu. Gake Biblia fia nu be menye Mawue nana nu vɔ̃ɖiwo dzɔna gbeɖe o. Yakobo 1:13 gblɔ na mí be Mawu metsɔa nu vɔ̃ɖiwo tea ame aɖeke kpɔ o. Egblɔ be: “Ne ame aɖe le tetekpɔ me tom la, megagblɔ be: ‘Mawue le teyem [alo doyem]  kpɔ’ o. Elabena womate ŋu atsɔ nu vɔ̃ɖiwo ate Mawu akpɔ o, eye eya ŋutɔ hã metea ame aɖeke kpɔna o.” Esia fia be togbɔ be Mawu mexea mɔ na nu vɔ̃ɖiwo be womegadzɔ o hã la, menye eyae nana wodzɔna gbeɖe o. (Xlẽ Hiob 34:10-12.) Na míakpɔ eƒe kpɔɖeŋu aɖe ɖa.

8, 9. Nu ka tae masɔ be míabu fɔ Mawu ɖe míaƒe kuxiwo ta o? Gblɔ eƒe kpɔɖeŋu.

8 Tsɔe be ɖekakpui aɖe le edzilawo gbɔ le aƒe me. Fofoa lɔ̃e vevie eye wòfia ale si wòatso nya me le mɔ nyuitɔ nu lae. Emegbe ɖekakpuia va dze aglã ɖe fofoa ŋu heʋu le aƒea me. Ewɔ nu gbegblẽwo eye wòva ɖo xaxa me. Ðe nàbu fɔ fofoa ɖe nu si dzɔ ɖe via dzi le esi mexe mɔ nɛ be wòagadzo le aƒea me o ta? Kura o. (Luka 15:11-13) Abe vifofo ma ene la, Mawu mexe mɔ na amegbetɔwo esi wotiae be yewoadze aglã ahawɔ nu gbegblẽ o. Eya ta ne nya vɔ̃ aɖe dzɔ la, ele be míaɖo ŋku edzi be menye Mawue na wòdzɔ o. Eye masɔ be míabu fɔ Mawu ɖe eta o.

9 Susu nyui aɖe tae Mawu mekpɔ xe mɔ ɖe nu vɔ̃ɖiwo nu o. Le Ta 11 lia me la, àsrɔ̃ nu tso nya si Biblia gblɔ tso esia ŋu la ŋu. Gake ka ɖe edzi be Mawu lɔ̃ mí eye menye egbɔe míaƒe kuxiwo tsona o. Le nyateƒe me la, Eya ɖeka koe ate ŋu aɖe míaƒe kuxiwo ɖa.—Yesaya 33:2.

10. Nu ka tae míeka ɖe edzi be Mawu aɖɔ nu siwo katã dome ame vɔ̃ɖiwo gblẽ la ɖo?

10 Mawu le kɔkɔe. (Yesaya 6:3) Nu sia nu si wòwɔna la nyo hele dzadzɛe, eye eŋu kɔ. Eya ta míate ŋu aka ɖe eya amea dzi bliboe. Gake mele alea le amegbetɔwo ya gome o. Elabena wowɔa nu gbegblẽwo ɣeaɖewoɣi. Eye ŋusẽ mele amegbetɔ dziɖula si ɖia anukware wu ame bubu ɖe sia ɖe la gɔ̃ hã si be wòaɖɔ nu siwo dome amewo gblẽna la ɖo o. Ame aɖeke ƒe ŋusẽ mede Mawu tɔ  nu o. Ate ŋu aɖɔ nu siwo katã dome amewo gblẽ la ɖo, eye awɔe hã. Atsi nu vɔ̃ɖi wɔwɔwo nu tegbee.—Xlẽ Psalmo 37:9-11.

ALEKE MAWU SENA LE EÐOKUI ME NE EKPƆ AMEWO LE FU KPEM?

11. Aleke Mawu sena le eɖokui me le fu siwo kpem nèle ŋu?

11 Aleke Mawu sena le eɖokui me ne ekpɔ nu siwo le dzɔdzɔm le xexea me kple nu siwo me tom wò ŋutɔ nèle la? Biblia fia mí be Mawu “lɔ̃a nya dzɔdzɔe.” (Psalmo 37:28) Eya ta etsɔ ɖe le nu si nye nyui kple nu si nye vɔ̃ me vevie. Etena ɖe edzi ne ekpɔ amewo wole fu kpem. Biblia gblɔ be esi nu vɔ̃ɖi wɔwɔ va sɔ gbɔ ɖe anyigba dzi le blema la, ‘egbã dzi na’ Mawu. (1 Mose 6:5, 6) Mawu metrɔ o. (Malaki 3:6) Biblia gblɔ be Mawu tsɔa ɖe le eme na wò vevie.—Xlẽ 1 Petro 5:7.

Biblia fia mí be Yehowae nye Wɔla lɔ̃ame si wɔ xexe bliboa

12, 13. (a) Nu ka tae míelɔ̃a amewo hetsɔa ɖe le eme na wo, eye aleke míesena le mía ɖokui me ku ɖe fukpekpe siwo le xexea me ŋu? (b) Nu ka tae míeka ɖe edzi be Mawu aɖe fukpekpe kple nu madzɔmadzɔ wɔwɔwo katã ɖa?

12 Biblia gblɔ hã be Mawu wɔ mí ɖe eƒe nɔnɔme nu. (1 Mose 1:26) Esia fia be Mawu de nɔnɔme nyui siwo le esi la mía me. Eya ta ne etena ɖe dziwò ne èkpɔ ame maɖifɔwo le fu kpem la, ke nyae be etena ɖe Mawu dzi vevie wu! Aleke míewɔ nya?

13 Biblia fia mí be “Mawu nye lɔlɔ̃.” (1 Yohanes 4:8) Lɔlɔ̃e ʋãa Mawu le nu sia nu si wòwɔna la me. Eya ta esi Mawu lɔ̃a ame tae míawo hã míelɔ̃a ame ɖo. Bu eŋu kpɔ: Ne ɖe ŋusẽ le asiwò be nàɖe fukpekpe kple nu madzɔmadzɔ wɔwɔ siwo katã yia edzi le xexea me ɖa la, àɖe wo ɖa? Àɖe wo ɖa godoo, elabena èlɔ̃ amewo. Ke Mawu ya ɖe? Ŋusẽ le esi, eye esi wòlɔ̃ mí ta la, aɖe fukpekpe kple nu madzɔmadzɔ wɔwɔwo katã ɖa. Ka ɖe  edzi be Mawu ƒe ŋugbedodo siwo katã le agbalẽ sia ƒe gɔmedzedze la dometɔ ɖe sia ɖe ava eme! Gake be nàxɔ ŋugbedodo mawo dzi ase la, ehiã be nànya nu geɖe wu tso Mawu ŋu.

MAWU DI BE NÀDZE SI YE

Ne èdi be yeadze xɔlɔ̃ ame aɖe la, àyɔ ŋkɔwò nɛ. Mawu ɖe eƒe ŋkɔ fia mí le Biblia me

14. Mawu ƒe ŋkɔ ɖe, eye aleke míewɔ nya be ele be míazã ŋkɔ sia?

14 Ne èdi be yeadze xɔlɔ̃ ame aɖe la, nya kae nègblɔna nɛ gbã? Ðe mèyɔa ŋkɔwò nɛ oa? Ke ɖe ŋkɔ le Mawu hã sia? Subɔsubɔhakplɔla geɖe gblɔna be eƒe ŋkɔe nye Mawu alo Aƒetɔ, gake menye ŋkɔ ŋutɔŋutɔwoe nye emawo o. Bubuŋkɔwo koe wonye, abe ale si “fia” kple “dukplɔla” le ene. Mawu gblɔ na mí be yeƒe ŋkɔe nye Yehowa. Psalmo 83:18 gblɔ be: “Na woadze sii be wò, ame si ŋkɔe nye Yehowa la, wò ɖeɖe koe nye Dziƒoʋĩtɔ ɖe anyigba blibo la dzi.” Biblia-ŋlɔlawo zã Mawu ƒe ŋkɔa zi akpe geɖe. Eya ta Yehowa di be nànya yeƒe ŋkɔ ahazã ŋkɔa. Ena nènya eƒe ŋkɔa ale be nàte ŋu azu exɔlɔ̃.

15. Gɔmesese kae le ŋkɔ Yehowa ŋu?

15 Gɔmesese vevi aɖe le Mawu ƒe ŋkɔ Yehowa ŋu. Eƒe ŋkɔa fia be ate ŋu ana eƒe ŋugbedodo ɖe sia ɖe nava eme  eye ate ŋu awɔ nu sia nu si wòɖo be yeawɔ. Naneke mate ŋu axe mɔ nɛ o. Yehowa ɖeka koe ate ŋu atsɔ ŋkɔ ma. *

16, 17. Nu kae bubuŋkɔ siwo gbɔna la fia? (a) “Ŋusẽkatãtɔ” (b) “Fia mavɔmavɔtɔ” (d) “Wɔla”

16 Míekpɔe va yi be Psalmo 83:18 gblɔ le Yehowa ŋu be: “Wò ɖeɖe koe nye Dziƒoʋĩtɔ.” Nyaɖeɖefia 15:3 gblɔ be: “Yehowa Mawu, Ŋusẽkatãtɔ, wò dɔwɔwɔwo lolo eye wowɔ nuku loo! Fia mavɔmavɔtɔ, wò mɔwo le dzɔdzɔe, eye wonye nyateƒe.” Nu kae bubuŋkɔ si nye “Ŋusẽkatãtɔ” fia mí? Efia be Yehowae nye ame si si ŋusẽ gãtɔ kekeake le le xexea me godoo. Eye bubuŋkɔ si nye “Fia mavɔmavɔtɔ” fia be eli ɣeawokatãɣi. Psalmo 90:2 gblɔ be eli tso mavɔ me yi mavɔ me. Esia wɔ nuku loo!

17 Yehowa ɖeka koe nye Wɔla la. Nyaɖeɖefia 4:11 gblɔ be: “Yehowa, mía Mawu, wòe dze be nàxɔ ŋutikɔkɔe, bubu kple ŋusẽ, elabena wòe wɔ nuwo katã, eye wò lɔlɔ̃nu ta woli, eye wowɔ wo ɖo.” Ɛ̃, Yehowae wɔ nu sia nu si ŋuti nàte ŋu abu, mawudɔla siwo le dziƒowo, ɣletivi gbogbo siwo le yame, atikutsetse siwo le atiwo dzi kple tɔmelã siwo le atsiaƒu kple tɔsisiwo me!

 ÀTE ŊU ANYE YEHOWA XƆLƆ̃A?

18. Nu ka tae wòwɔna na ame aɖewo be yewomate ŋu anye Mawu xɔlɔ̃ gbeɖe o? Aleke Biblia gblɔ tso nya sia ŋu?

18 Ne ame aɖewo xlẽ nu tso Yehowa ƒe nɔnɔme wɔnukuwo ŋu la, vɔvɔ̃ ɖoa wo eye wogblɔna be: ‘Mawu tri akɔ, ekɔkɔ akpa eye wòle adzɔge ʋĩ, eya ta nu ka tae wòatsɔ ɖe le eme nam?’ Gake nenemae Mawu di be míase le mía ɖokui mea? Kura o. Yehowa di be yeate ɖe mía ŋu. Biblia gblɔ be Mawu “mele adzɔge tso mía dometɔ aɖeke gbɔ hafi o.” (Dɔwɔwɔwo 17:27) Mawu di be nàte ɖe ye ŋu, eye edo ŋugbe be ‘yeate ɖe ŋuwò.’—Yakobo 4:8.

19. (a) Aleke nàwɔ anye Mawu xɔlɔ̃? (b) Mawu ƒe nɔnɔme kawoe lé dzi na wò wu?

19 Aleke nàwɔ anye Mawu xɔlɔ̃? Yesu gblɔ be: “Esiae nye agbe mavɔ la bena woanya wò, Mawu vavã ɖeka la, kple Yesu Kristo si nèdɔ ɖa la.” (Yohanes 17:3) Yi nusɔsrɔ̃a dzi eye àva nya Yehowa kple Yesu nyuie. Ekema àte ŋu akpɔ agbe mavɔ. Le kpɔɖeŋu me, míekpɔe va yi xoxo be “Mawu nye lɔlɔ̃.” (1 Yohanes 4:16) Eye nɔnɔme nyoameŋu lédziname bubu geɖewo hã gale esi. Biblia gblɔ na mí be Yehowa nye “nublanuikpɔla kple veveseɖeamenula, ame si medoa dziku kabakaba o, eye eƒe lɔlɔ̃ si nu metsina o kple eƒe nuteƒewɔwɔ sɔ gbɔ.” (2 Mose 34:6) Yehowa ƒe ‘dɔme nyo eye wòlɔ̃a tsɔtsɔke.’ (Psalmo 86:5) Mawu gbɔa dzi ɖi eye wòwɔa nuteƒe hã. (2 Petro 3:9; Nyaɖeɖefia 15:4) Àgasrɔ̃ nu geɖe tso Yehowa ƒe nɔnɔme lédzinamewo ŋu ne èxlẽa Biblia.

20-22. (a) Aleke míate ŋu ate ɖe Mawu ŋu togbɔ be míekpɔnɛ o hã? (b) Nu kae nàwɔ ne amewo di be nàdzudzɔ Biblia la sɔsrɔ̃?

20 Ðe wòanya wɔ be nàte ɖe Mawu si mèkpɔna o la  ŋua? (Yohanes 1:18; 4:24; 1 Timoteo 1:17) Ne èxlẽa nu tso Yehowa ŋu le Biblia me la, àva nyae be ame ŋutɔŋutɔe wònye. (Psalmo 27:4; Romatɔwo 1:20) Ne èyi edzi le nu srɔ̃m tso Yehowa ŋu la, àva lɔ̃e geɖe wu eye mia dome anɔ kplikplikpli.

Vifofo lɔ̃a viawo, gake mía Fofo si le dziƒo la ya lɔ̃a mí vevie wu gɔ̃ hã

21 Àva kpɔe be mía Fofoe Yehowa nye. (Mateo 6:9) Ena agbe mí, eye wòdi hã be agbea nadze edzi na mí. Nu siae vifofo lɔ̃ame adi na viawo. (Psalmo 36:9) Vavãe, Biblia gblɔ hã be àte ŋu ava zu Yehowa xɔlɔ̃. (Yakobo 2:23) Wò ya bu eŋu kpɔ ko. Yehowa, ame si nye xexea me katã Wɔla la, di be nànye ye xɔlɔ̃!

22 Ame aɖewo adi be nàdzudzɔ Biblia la sɔsrɔ̃. Ðewohĩ woavɔ̃ be àva do le subɔsubɔha si me nèle la me. Gake mègana ame aɖeke naxe mɔ na wò be nàdo kpo Yehowa xɔlɔ̃ zuzu o. Eyae nye Xɔlɔ̃ nyuitɔ kekeake si nàte ŋu adze.

23, 24. (a) Nu ka tae wòle be nàyi edzi anɔ nya biam? (b) Nyati ka mee míadzro le ta si kplɔ esia ɖo me?

23 Ne èle Biblia srɔ̃m la, màse nanewo gɔme o. Megawɔ ŋukpe na wò be nàbia nya tso wo ŋu alo abia kpekpeɖeŋu o. Yesu gblɔ be ele be míabɔbɔ mía ɖokuiwo abe ɖeviwo ene. (Mateo 18:2-4) Eye ɖeviwo lɔ̃a nya geɖe biabia. Mawu di be nàkpɔ ŋuɖoɖo na wò nyabiasewo. Eya ta srɔ̃ Biblia la nyuie ale be nàka ɖe edzi be nu si srɔ̃m nèle la nye nyateƒe.—Xlẽ Dɔwɔwɔwo 17:11.

24 Mɔ nyuitɔ si dzi nàto asrɔ̃ nu tso Yehowa ŋue nye be nàdzro Biblia la me. Le ta si kplɔ esia ɖo me la, míakpɔ nu si tae Biblia to vovo na agbalẽ bubu ɖe sia ɖe.

^ mm. 15 Ne ŋkɔ Yehowa medze le wò Biblia me o alo èdi be yeanya nu geɖe ku ɖe Mawu ƒe ŋkɔa ƒe gɔmesese kple eyɔyɔ ŋu la, taflatsɛ kpɔ Dzesidenya 1.