Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nuka Tututue Nye Biblia ƒe Nufiafia?

 TA WUIASIEKE

Yi Edzi Nànɔ Mawu ƒe Lɔlɔ̃ la Me

Yi Edzi Nànɔ Mawu ƒe Lɔlɔ̃ la Me
  • Nukae wòfia be woalɔ̃ Mawu?

  • Aleke míawɔ ayi edzi anɔ Mawu ƒe lɔlɔ̃ la me?

  • Aleke Yehowa aɖo eteƒe na amesiwo yi edzi nɔ eƒe lɔlɔ̃ la mee?

Ðe nàna Yehowa nanye wò sitsoƒe le ɣeyiɣi sesẽ madeamedzi siawo mea?

1, 2. Afikae míate ŋu akpɔ sitsoƒe nyui aɖe le egbea?

TSƆE BE èle afɔ zɔm le mɔ aɖe dzi le ŋkeke si tsi gã aɖe ɖo. Tsia ɖo ale gbegbe be xexeame tsyɔ. Dzi le dzo kem miamiamia, dziɖegbewo nu le sesẽm, eye kasia, tsia te dzadza sesĩe. Èle du dzi le bebeƒe aɖe dim vevie. Kaka nàkpɔa, xɔ aɖee nye ma le mɔa to. Wotui wòsẽ ŋu nyuie, mele ɖuɖum o, eye wònye teƒe nyui aɖe. Àde asixɔxɔ teƒe ma si nèle dedie le la ŋu lo!

2 Míele ɣeyiɣi sesẽ madeamedziwo me. Gbegblẽm ko xexeame ƒe nɔnɔmewo le ɖe edzi. Gake bebeƒe nyui aɖe li, enye sitsoƒe si míate ŋu anɔ, si akpɔ mía ta tso nuveviwɔame me tegbee. Eyae nye ka? De dzesi nusi Biblia fia mí: “[Magblɔ] na Yehowa be: Nye sitsoƒe kple nye mɔ̃ sesẽ nènye, nye Mawu, si ŋu meɖoa ŋu ɖo.”—Psalmo 91:2.

3. Aleke míawɔ Yehowa nanye míaƒe sitsoƒe?

3 Bu nya mawo ŋu kpɔ! Yehowa, Wɔla kple xexeame katã ƒe Dziɖulagã, ate ŋu anye míaƒe sitsoƒe si míanɔ dedie le. Ate ŋu akpɔ mía ta, elabena ŋusẽ le eŋu boo wu amesiame alo  nusianu si ate ŋu awɔ nuvevi mí. Ne nuvevi aɖe wɔ mí gɔ̃ hã la, Yehowa ate ŋu aɖɔ nugbegblẽawo katã ɖo. Aleke míawɔ Yehowa nanye míaƒe sitsoƒe? Ehiã be míaka ɖe eyama dzi. Gawu la, Mawu ƒe Nya la de dzi ƒo na mí be: “Midzra mia ɖokui ɖo le Mawu ƒe lɔlɔ̃ la me.” (Yuda 21) Ẽ, ehiã be míayi edzi anɔ Mawu ƒe lɔlɔ̃ la me, ahana ƒomedodo kplikplikpli nanɔ mía kple mía Fofo si le dziƒo dome. Esia ana míaka ɖe edzi be enye sitsoƒe na mí. Gake aleke míawɔ ƒomedodo ma nanɔ mía kplii dome?

DE DZESI MAWU ƑE LƆLƆ̃ EYE NÀWƆ NU WÒASƆ ÐE ENU

4, 5. Mɔ siwo nu Yehowa ɖe lɔlɔ̃ fia mí le dometɔ aɖewo ɖe?

4 Be míayi edzi anɔ Mawu ƒe lɔlɔ̃ la me ɖaa la, ehiã be míakpɔ alesi Yehowa ɖea eƒe lɔlɔ̃ fiaa míi la adze sii. De ŋugble le Biblia ƒe nufiafia siwo nèva nya le agbalẽ sia me la dometɔ aɖewo ŋu kpɔ. Yehowa si nye Wɔla la tsɔ anyigba sia na mí be wòanye míaƒe aƒe si me míanɔ ase vivi le. Ena anyigba dzi yɔ fũ kple nuɖuɖu kple tsi, dzɔdzɔmenu xɔasiwo, lã vovovowo, kple teƒe dzeaniwo. Mawu, si nye Biblia la Ŋlɔla, ɖe eƒe ŋkɔ kple eƒe nɔnɔmewo fia mí. Eƒe Nya la ɖee fia be edɔ eya ŋutɔ Via lɔlɔ̃a ɖo ɖe anyigba dzi, eye wòɖe mɔ Yesu to fukpekpe me heku ɖe mía ta. (Yohanes 3:16) Viɖe kae míekpɔ tso eƒe nunana sia me? Ena mɔkpɔkpɔ mí be etsɔme nyui aɖe le mía ŋgɔ.

5 Etsɔme mɔkpɔkpɔ si le mía si la nɔ te ɖe nu bubu aɖe hã si Mawu wɔ dzi. Yehowa ɖo dziɖuɖu aɖe ɖe dziƒo, si nye Mesia Fiaɖuƒea. Aɖe fukpekpe ɖesiaɖe ɖa kpuie eye wòana anyigba nazu paradiso. Bu eŋu kpɔ ko! Míate ŋu anɔ teƒe nyui ma le tomefafa kple dzidzɔ me tegbee. (Psalmo 37:29) Hafi ɣeyiɣi ma naɖo gɔ̃ hã la, Mawu naa mɔfiame mí le alesi míanɔ agbe ɖe mɔ nyuitɔ nu fifia. Ena nunana si nye gbedodoɖa ƒe mɔnukpɔkpɔ hã ʋu ɖi na mí, be míate ŋu aƒo nu kplii faa ɣesiaɣi. Mɔ siwo nu Yehowa ɖe lɔlɔ̃ fia ameƒomea katã, kple wò ŋutɔ hã, le ƒe kpɔɖeŋu ʋɛ aɖewo koe nye esiawo.

6. Aleke nàwɔ nu ɖe lɔlɔ̃ si Yehowa ɖe fia wò la nui?

 6 Biabia vevi si ŋu wòle be nàde ŋugble le enye: Aleke mawɔ nu ɖe Yehowa ƒe lɔlɔ̃ la nui? Ame geɖe agblɔ be, “Ele be nye hã malɔ̃ Yehowa.” Aleae nèsena le ɖokuiwò mea? Yesu gblɔ be sedede siae nye vevitɔ kekeake, be: “Lɔ̃ [Yehowa] wò Mawu, kple wò dzi blibo kple wò luʋɔ blibo kpakple wò tamesusu blibo.” (Mateo 22:37) Nyateƒee wònye be susu geɖe li siwo ta wòle be nàlɔ̃ Yehowa Mawu ɖo. Gake ɖe Yehowa lɔlɔ̃ kple dzi blibo, luʋɔ blibo, kpakple tamesusu blibo fia be nàse le ɖokui me be yelɔ̃e nenema ko evɔa?

7. Ðe lɔlɔ̃ na Mawu bia nu geɖe wu seselelãme dzro aɖe koa? Ðe eme.

7 Biblia la ɖee fia be lɔlɔ̃ na Mawu bia nu geɖe wu seselelãme dzro aɖe ƒe ame me nɔnɔ ko. Nyateƒee, togbɔ be ehiã be ame nase le eɖokui me be yelɔ̃ Yehowa hã la, elɔlɔ̃ vavã ƒe gɔmedzedze koe seselelãme ma nye. Le kpɔɖeŋu me, ne èdi be yeado atikutsetse aɖe wòatsi la, ehiã be eƒe ku nanɔ asiwò. Gake ne èle atikutsetse ma dim be yeaɖu la, ɖe wòadze ŋuwò ne ame aɖe tsɔ eƒe ku ko de asi na wòa? Kura o! Nenema ke esese le ame ɖokui me be yelɔ̃ Yehowa Mawu nye gɔmedzedze ko. Biblia fia mí be: “Lɔlɔ̃ na Mawu enye si bena, míalé eƒe seawo me ɖe asi, eye eƒe seawo mesesẽ o.” (Yohanes I, 5:3) Be míaƒe lɔlɔ̃ na Mawu nanye vavãtɔ la, ke ele be wòatse ku nyui. Ele be míaɖe lɔlɔ̃ ma afia le nuwɔna ŋutɔŋutɔ me.—Mateo 7:16-20.

8, 9. Aleke míate ŋu aɖee afia be míelɔ̃ Mawu eye míenye akpedalawo?

8 Míeɖenɛ fiana be míelɔ̃ Mawu nenye be míewɔ ɖe eƒe sededewo dzi hezɔ ɖe eƒe gɔmeɖosewo dzi. Esia wɔwɔ mesesẽ akpa o. Yehowa ƒe sewo menye agba kura o, ɖe wòtsɔ wo na be woakpe ɖe mía ŋu míanɔ agbe si ade mía dzi, si me dzidzɔ kple dzidzeme le boŋ. (Yesaya 48:17, 18) Ne míenɔa agbe  wòsɔna ɖe Yehowa ƒe mɔfiamewo nu la, míeɖenɛ fiana mía Fofo si le dziƒo be míekpɔa ŋudzedze ŋutɔŋutɔ ɖe nusiwo katã wòwɔ na mí ŋu. Nublanuitɔe la, ame ʋɛ aɖewo koe le xexeame egbea siwo ɖea ŋudzedzekpɔkpɔ ma fiana. Míadi gbeɖe be míanye ŋudzedzemakpɔlawo abe alesi ame aɖewo wɔ esime Yesu nɔ anyigba dzi la ene o. Yesu da gbe le ame ewo siwo ŋu anyidɔ nɔ ŋu, gake ame ɖeka pɛ koe trɔ va da akpe nɛ. (Luka 17:12-17) Míadi godoo be míanɔ abe akpedala ma ene, ke menye abe akpemadala asiekeawo ene o!

9 Ekema Yehowa ƒe sedede kawo dzie wòle be míawɔ ɖo? Míedzro wo dometɔ geɖe me do ŋgɔ le agbalẽ sia me xoxo, gake na míagato wo dometɔ ʋɛ aɖewo me ake. Mawu ƒe sededewo dzi wɔwɔe akpe ɖe mía ŋu míakpɔtɔ anɔ Mawu ƒe lɔlɔ̃ la me.

YI EDZI NÀNƆ TETEM ÐE YEHOWA ŊU

10. Ðe nusita wòle vevie be míayi edzi anɔ Yehowa Mawu ŋuti sidzedze xɔm la me.

10 Nusɔsrɔ̃ tso Yehowa ŋu nye afɔɖeɖe vevi aɖe si akpe ɖe  ŋuwò nànɔ tetem ɖe eŋu ɖaa. Enye nusi wɔwɔ mele be nàdzudzɔ gbeɖe o. Ne èle xexe le dzo ƒum le zã si me vuvɔ le wɔwɔm vevie la, ɖe nàgblẽ dzoa ɖi wòatsia? Ao. Ànɔ dzoa tum ɖo be wòanɔ bibim nyuie. Dzoa ate ŋu alé wò agbe ɖe te! Abe alesi ko nake naa dzo nɔa bibim ene la, nenema kee ‘Mawu ŋuti sidzedze xɔxɔ’ nana míaƒe lɔlɔ̃ na Yehowa dea toe.—Lododowo 2:1-5.

Ehiã be nànɔ wò lɔlɔ̃ na Yehowa tum ɖo abe alesi wotua dzo ɖo wòbinae ene

11. Dɔ kae Yesu ƒe nufiafia wɔ ɖe eyomedzelawo dzi?

11 Yesu di be lɔlɔ̃ deto si le yeƒe nusrɔ̃lawo me na Yehowa kple na Eƒe Nyateƒenya xɔasi la nayi edzi anɔ wo me ɖaa. Le Yesu ƒe tsitretsitsi megbe la, efia nu eyomedzela eve aɖewo le alesi nyagblɔɖi siwo le Hebri Ŋɔŋlɔawo me la dometɔ aɖewo va eme ɖe edzii ŋu. Dɔ kae wòwɔ ɖe wo dzi? Wogblɔ emegbe be: “Alo míaƒe dzi melé dzo le mía me, esi wòle nu ƒom na mí le mɔa dzi, eye wòle ŋɔŋlɔawo me ɖem na mí la o mahã?”—Luka 24:32.

12, 13. (a) Aleke ame akpa gãtɔ ƒe nɔnɔme le egbea le lɔlɔ̃ na Mawu kple na Biblia la gome? (b) Aleke míawɔ akpɔ egbɔ be míaƒe lɔlɔ̃ nu nagatsi o?

12 Èsi nèdze nusi tututu Biblia fia sɔsrɔ̃ gɔme la, ɖe nèkpɔe be nufiafiawo lé dzi na wò, hena dzo kple lɔlɔ̃ ɖo mewò na Mawua? Ðikeke mele eme o be nenemae nèkpɔe. Nenema tututue ame geɖe hã kpɔe. Dɔ si dze ŋgɔ wò fifia enye alesi nàna lɔlɔ̃ deto ma nakpɔtɔ anɔ mewò eye nàna wòanɔ tsitsim ɖe edzi. Míadi gbeɖe be míasrɔ̃ amewo ƒe nɔnɔme le xexeame egbea o. Yesu gblɔe ɖi be: “Ame geɖewo ƒe lɔlɔ̃ nu latsi.” (Mateo 24:12) Aleke nàwɔ akpɔ egbɔ be wò lɔlɔ̃ na Yehowa kple na Biblia me nyateƒeawo nu nagatsi o?

13 Yi edzi nànɔ nu srɔ̃m tso Yehowa Mawu kple Yesu Kristo ŋu. (Yohanes 17:3) De ŋugble le nusiwo srɔ̃m nèle tso Mawu ƒe Nya la me ŋu vevie, nànɔ ɖokuiwò biam be: ‘Nukae nya sia fiam tso Yehowa Mawu ŋu? Kpeɖodzi bubu kae esia nam si ta wòle be malɔ̃e tso dzi blibo, susu blibo, kple luʋɔ blibo me?’ (Timoteo I, 4:15) Ŋugbledede alea ana nàyi edzi alɔ̃ Yehowa vevie.

14. Aleke gbedodoɖa ate ŋu akpe ɖe mía ŋu míayi edzi alɔ̃ Yehowae?

 14 Nu bubu aɖe si ana nàyi edzi alɔ̃ Yehowa vevie enye be nànɔ gbedodoɖa dzi edziedzi. (Tesalonikatɔwo I, 5:17) Míesrɔ̃e le agbalẽ sia ƒe Ta 17 lia me be nunana xɔasi si tso Mawu gbɔe gbedodoɖa nye. Abe alesi ko amegbetɔwo dome ƒomedodo nyona ɖe edzi ne woɖoa dze faa ene la, nenemae mía kple Yehowa dome ƒomedodo hã anɔ vivim ɖe edzii ne míedoa gbe ɖa nɛ edziedzi. Ele vevie ŋutɔ be míagana míaƒe gbedodoɖawo nava zu kɔnu dzro aɖe ko o—wòaganye nya ɖeka mawo ke gbugbɔgagblɔ ɣesiaɣi, seselelãme alo gɔmesese vavã aɖeke manɔmee o. Ehiã be míaƒo nu na Yehowa abe alesi ko ɖevi dina be yeaƒo nu na fofoa si wòlɔ̃ vevie ene. Togbɔ be míaƒo nu bubutɔe hã, mele be míaɣla naneke o, eye míaƒo nu le anukwareɖiɖi me, wòatso dzi me na mí. (Psalmo 62:9) Ẽ, ɖokuisi Biblia nusɔsrɔ̃ wɔwɔ kple gbedodoɖa si tso dzi me nye míaƒe tadedeagu ƒe akpa veviwo, eye wokpena ɖe mía ŋu míeyia edzi nɔa Mawu ƒe lɔlɔ̃ la me.

KPƆ DZIDZƆ LE WÒ SUBƆSUBƆ ME

15, 16. Nukata wòsɔ be míabu Fiaɖuƒegbeƒãɖeɖedɔa be enye mɔnukpɔkpɔ gã kple kesinɔnu?

15 Ðokuisi Biblia nusɔsrɔ̃ wɔwɔ kple gbedodoɖa nye míaƒe subɔsubɔ ƒe akpa siwo wòle be míawɔ le mía ɖokui si. Gake azɔ na míabu subɔsubɔa ƒe akpa bubu aɖe si wòle be míawɔ le gaglãgbe ŋu: eyae nye nuƒoƒo na amewo tso míaƒe dzixɔsewo ŋu. Èle Biblia me nyateƒea gblɔm na amewo xoxoa? Ne èle esia wɔm la, ke mɔnukpɔkpɔ tɔxɛ aɖee nye ma su asiwò. (Luka 1:74) Ne míegblɔa nyateƒe si míesrɔ̃ tso Yehowa Mawu ŋu na amewo la, ke míele gome kpɔm le dɔ vevi aɖe si wode asi na Kristotɔ vavãwo katã be woawɔ la wɔwɔ me—si nye gbeƒãɖeɖe Mawu Fiaɖuƒe ŋuti nyanyuia.—Mateo 24:14; 28:19, 20.

16 Apostolo Paulo bu eƒe subɔsubɔdɔa nu xɔasii, eye wòyɔe be enye kesinɔnu. (Korintotɔwo II, 4:7) Nuƒoƒo na amewo tso Yehowa Mawu kple eƒe tameɖoɖowo ŋue nye dɔ nyuitɔ kekeake si nàte ŋu awɔ. Enye subɔsubɔ si míetsɔna nana Aƒetɔ  nyuitɔ kekeake, si hea viɖe gãtɔ kekeake vanɛ. To dɔ sia wɔwɔ me la, ànɔ kpekpem ɖe dzianukwaretɔwo ŋu be woate ɖe mía Fofo si le dziƒo ŋu eye woatrɔ ava agbe mavɔ mɔa dzi! Ðe dɔ aɖe agate ŋu ana dzidzeme wu esia? Gawu la, ɖaseɖiɖi tso Yehowa kple eƒe Nya la ŋu ana wò ŋutɔ wò xɔse nasẽ ɖe edzi eye  wò lɔlɔ̃ na eyama nade to ɖe edzi. Eye nyae be Yehowa dea asixɔxɔ wò agbagbadzedzewo ŋu. (Hebritɔwo 6:10) Veviedodonu le dɔ sia wɔwɔ me akpe ɖe ŋuwò nàyi edzi anɔ Mawu ƒe lɔlɔ̃ la me.—Korintotɔwo I, 15:58.

17. Nukatae Kristotɔwo ƒe gbeƒãɖeɖedɔa hiã kpata egbea?

17 Ele vevie be míaɖo ŋku edzi be Fiaɖuƒegbeƒãɖeɖedɔa hiã kpata. Biblia la gblɔ be: “Ðe gbeƒã nya la, nɔ edzi.” (Timoteo II, 4:2) Nukatae wòhiã kpata egbea be míaɖe gbeƒã? Mawu ƒe Nya la gblɔ na mí be: “Yehowa ƒe ŋkeke gã la tu aƒe, etu aƒe, eye wòle du dzi ŋutɔ.” (Zefanya 1:14) Ẽ, ɣeyiɣi si Yehowa ahe nuɖoanyi blibo sia ava nuwuwui la le aƒe tum kabakaba. Ehiã be woaxlɔ̃ nu amewo! Ehiã be woanya be fifiae nye ɣeyiɣi si wòle be woatia Yehowa be wòanye woƒe Dziɖulagã. Nuwuwua “mahe ɖe megbe o.”—Xabakuk 2:3.

18. Nukatae wòle be míaƒo ƒu ɖekae kple Kristotɔ vavãwo asubɔ Yehowa?

18 Yehowa di be míaƒo ƒu ɖekae kple Kristotɔ vavãwo asubɔ ye. Le ema ta eƒe Nya la gblɔ na mí be: “[Mina] míalé ŋku ɖe mía nɔewo ŋu, bena míade dzi ƒo na mía nɔewo le lɔlɔ̃ kple dɔ nyui wɔwɔ me, eye míagagblẽ mía ŋutɔwo míaƒe ƒuƒoƒewo ɖi, abe alesi ame aɖewo wɔna ene o, ke boŋ míaxlɔ̃ nu mía nɔewo, eye míawɔ esia geɖe wu, zi alesi miekpɔ bena, ŋkeke la le ɖoɖom la.” (Hebritɔwo 10:24, 25) Ne míeƒo ƒu kple hati Kristotɔwo le kpekpewo me la, mɔnukpɔkpɔ nyui aɖe sua mía si be míasubɔ mía Mawu lɔlɔ̃a ɖekae. Míetua mía nɔewo ɖo hedea dzi ƒo na mía nɔewo hã.

19. Aleke míawɔ ana lɔlɔ̃ kple xɔlɔ̃wɔwɔ si le Kristotɔwo ƒe hamea me tɔwo dome la me nasẽ ɖe edzi?

19 Ne míewɔa ɖeka kple Yehowa subɔla bubuwo la, míenaa lɔlɔ̃ kple xɔlɔ̃wɔwɔ si le hamea me tɔwo dome la me sẽna ɖe edzi. Ele vevie be míaƒe ŋku nanɔ mía nɔviwo ƒe nɔnɔme nyuiwo ŋu, elabena míaƒe nɔnɔme nyuiwoe Yehowa kpɔna. Mèganɔ mɔ kpɔm be nɔviwò xɔsetɔwo nawɔ nusianu wòade blibo o. Ðo ŋku edzi be mí katã míaƒe gbɔgbɔmeŋgɔyiyi le vovovo, eye be mía dometɔ ɖesiaɖe wɔa vodada. (Kolosetɔwo 3:13) Dze agbagba nàna ƒomedodo kplikplikpli nanɔ mia kple  amesiwo hã lɔ̃ Yehowa vevie la dome, eye àkpɔe be àyi edzi anɔ tsitsim le gbɔgbɔ me. Ẽ, Yehowa subɔsubɔ ɖekae kple gbɔgbɔ me nɔviŋutsuwo kple nɔvinyɔnuwo akpe ɖe ŋuwò nàyi edzi anɔ Mawu ƒe lɔlɔ̃ la me. Aleke Yehowa aɖo eteƒe na amesiwo subɔe nuteƒewɔwɔtɔe eye woyi edzi nɔ eƒe lɔlɔ̃ la me?

MINYÃ “AGBE VAVÃ LA”

20, 21. Nukae nye “agbe vavã la,” eye nukata wònye mɔkpɔkpɔ nyui ŋutɔ aɖe?

20 Yehowa atsɔ agbe aɖo eteƒe na esubɔla wɔnuteƒewo, gake agbe ka ƒomevie wòanye? Bu nya sia ŋu kpɔ: Ðe nèle agbe ŋutɔŋutɔ fifia? Mía dometɔ geɖe agblɔ be ẽ, míele agbe. Míagblɔ be esi míenya le ya gbɔm, le nu ɖum, hele nu nom ko la, ke efia be míele agbe. Eye ne dzi le mía dzɔm ŋutɔ la, míegblɔna be, “Agbee le vivim ŋutɔŋutɔ alea!” Gake Biblia la ɖee fia be le susu vevi aɖe nu la, amegbetɔ aɖeke meli egbea si le agbe ŋutɔŋutɔ o.

Yehowa di be nànɔ “agbe vavã la.” Ànɔea?

21 Mawu ƒe Nya la le nu xlɔ̃m mí be ‘míaminyã agbe vavã la.’ (Timoteo I, 6:19) Nya mawo fia be “agbe vavã la” nye nane si dzi míele mɔ kpɔm be míaƒe asi nasu le ɣeyiɣi si gbɔna me. Ẽ, ne míeva de blibo la, ekema míanɔ agbe si woyɔna be agbe ŋutɔŋutɔ, elabena ɣemaɣi míanɔ agbe abe alesi Mawu ɖoe tso gɔmedzedzea ene. Ne míele agbe le paradisonyigba dzi le lãmesẽ, ŋutifafa, kple dzidzɔ blibo me la, ekema mlɔeba míase vivi le “agbe vavã la” me—si nye agbe mavɔ. (Timoteo I, 6:12) Ðe menye mɔkpɔkpɔ nyui ŋutɔ aɖee nye ma oa?

22. Aleke nàwɔ be ‘wò asi nasu agbe vavã la dzi’?

22 Aleke míawɔ be ‘míaƒe asi nasu agbe vavã la dzi’? Paulo xlɔ̃ nu Kristotɔwo esime wònɔ nya sia ke gblɔm, be ‘woawɔ nusi nyo,’ eye be “woanye kesinɔtɔwo le nu nyui wɔwɔ me.” (Timoteo I, 6:18) Eyata eme kɔ ƒã be akpa gãtɔ aku ɖe alesi míetsɔa nyateƒenya siwo míesrɔ̃ le Biblia me la dea dɔwɔwɔ mee dzi. Gake ɖe Paulo ƒe nyawo fia be míate ŋu akpɔ fetu si nye “agbe vavã la” to dɔ nyuiwo wɔwɔ mea? Ao, elabena Mawu  ƒe “amenuvevenunana” koŋue awɔe be mɔkpɔkpɔ wɔnuku ma nasu ame si. (Romatɔwo 5:15) Gake enye dzidzɔ na Yehowa be yeaɖo eteƒe na amesiwo subɔa ye le nuteƒewɔwɔ me. Edi be nànɔ “agbe vavã la.” Amesiwo yi edzi nɔ Mawu ƒe lɔlɔ̃ la me akpɔ agbe mavɔ ma, si me dzidzɔ kple ŋutifafa anɔ ɖaa.

23. Nukata wòle vevie be míayi edzi anɔ Mawu ƒe lɔlɔ̃ la me?

23 Anyo be mía dometɔ ɖesiaɖe nabia eɖokui be, ‘Ðe mele Mawu subɔm wòsɔ ɖe alesi wòdii le Biblia me nua?’ Ne míedzroa mía ɖokui me gbesiagbe, hekana ɖe edzi be ŋuɖoɖoa enye ẽ la, ekema míele mɔ dzɔdzɔea dzi. Míate ŋu aka ɖe edzi be Yehowa enye míaƒe sitsoƒe. Akpɔ eƒe ame wɔnuteƒewo ta dedie le nuɖoanyi xoxo sia ƒe ŋkeke mamlɛ siwo me xaxawo bɔ ɖo la me. Yehowa ana ɖeɖekpɔkpɔ hã mí ayi eƒe ŋutikɔkɔe nuɖoanyi yeye si gogo ŋutɔ fifia me. Aleke gbegbe wòavivi mía nui be míakpɔ ɣeyiɣi mae nye si! Eye aleke gbegbe dzi adzɔ míi enye si be míewɔ nyametsotso nyuitɔwo le ŋkeke mamlɛ siawo me! Ne èwɔ tiatia siawo fifia la, àse vivi le “agbe vavã la” me, eye ànɔ agbe abe alesi Yehowa Mawu ɖoe tso gɔmedzedzea me ene, yi ɖe mavɔmavɔ me!