Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nuka Tututue Nye Biblia ƒe Nufiafia?

 TA WUIATƆ̃

Subɔsubɔ si Dzea Mawu Ŋu

Subɔsubɔ si Dzea Mawu Ŋu
  • Ðe subɔsubɔhawo katã dzea Mawu ŋua?

  • Aleke míawɔ adze si subɔsubɔha vavãtɔ?

  • Amekawoe nye Mawu subɔla vavãwo le anyigba dzi egbea?

1. Viɖe kae míakpɔ ne míesubɔ Mawu alesi dze?

YEHOWA MAWU tsɔa ɖe le eme na mí vevie eye wòdi be mɔfiame si yenaa mí lɔlɔ̃tɔe la naɖe vi na mí. Ne míesubɔe alesi dze la, míakpɔ dzidzɔ geɖe le agbe me eye míaƒo asa na kuxi geɖe hã. Azɔ hã, ayra mí eye wòakpe ɖe mía ŋu. (Yesaya 48:17) Gake subɔsubɔha gbogbo aɖewo li siwo gblɔna be yewofiaa nyateƒea tso Mawu ŋu. Evɔ nusi wofiana ku ɖe amesi Mawu nye kple nusi wòdi tso mía si ŋu la to vovo kura tso wo nɔewo gbɔ.

2. Aleke míawɔ anya mɔ nyuitɔ si dzi míato asubɔ Yehowa, eye kpɔɖeŋu kae akpe ɖe mía ŋu be esia me nakɔ na mí?

2 Aleke nàwɔ anya mɔ nyuitɔ si dzi nàto asubɔ Yehowa? Mehiã be nàsrɔ̃ nu tso subɔsubɔha siwo katã li ƒe nufiafiawo ŋu ahatsɔ wo asɔ kple wo nɔewo hafi anya o. Nusi wòhiã be nàwɔ koe nye be nàsrɔ̃ nusi tututu Biblia fia tso subɔsubɔha vavãtɔ ŋu. Míawɔ esia ƒe kpɔɖeŋu ale: Ga manyomanyo alo kantafit si amewo tso le bebeme bɔ ɖe dukɔ geɖe me. Ne wode dɔ asi na wò be nàtia ga manyomanyo mawo tso nyuiawo dome la, aleke nàwɔ akpɔ wo adze sii? Ðe wòhiã be nàlé ga manyomanyo ƒomevi vovovo siwo li la katã ƒe nɔnɔme ɖe susu mea? Mehiã o. Anyo wu ne èzã ɣeyiɣia tsɔ srɔ̃ nu tso alesi ga nyuia ƒe nɔnɔme le boŋ ŋu. Ne ènya nusiwo ade dzesi ga nyuia vɔ la, ekema àte ŋu akpɔ manyomanyoawo adze sii bɔbɔe. Nenema ke ne míesrɔ̃ alesi míawɔ akpɔ subɔsubɔha  vavãtɔ adze sii la, ana míate ŋu akpɔ alakpasubɔsubɔhawo hã adze sii bɔbɔe.

3. Nukae Yesu gblɔ be ele be míawɔ hafi Mawu nakpɔ ŋudzedze ɖe mía ŋu?

3 Ele vevie be míasubɔ Yehowa le mɔ si dze eŋu nu. Ame geɖe xɔe se be subɔsubɔhawo katã dzea Mawu ŋu, gake menye nenemae Biblia fia kura o. Egbɔgblɔ kple nu be Kristotɔe yenye ɖeɖe kura gɔ̃ hã mesu o. Yesu gblɔ be: “Menye amesiame, si le gbɔgblɔm nam bena: Aƒetɔ! Aƒetɔ! ayi ɖe dziƒofiaɖuƒe la me o, negbe amesi le Fofonye, si le dziƒowo la, ƒe lɔlɔ̃nu wɔm la koe.” Eyata hafi Mawu nakpɔ ŋudzedze ɖe mía ŋu la, ele be míasrɔ̃ nusi Mawu di tso mía si eye míawɔ ɖe edzi. Yesu yɔ amesiwo mewɔa Mawu ƒe lɔlɔ̃nu o la be wonye “nu madzɔmadzɔ wɔlawo.” (Mateo 7:21-23) Viɖe ŋutɔŋutɔ aɖeke mele alakpasubɔsubɔ ŋu o, abe alesi ko viɖe mele ga manyomanyo hã ŋu o ene. Esi vloe wue nye be, alakpasubɔsubɔhawo kplɔa ame yia afɔku me.

4. Nukae Yesu fia tso mɔ eveawo ŋu, eye afikae mɔawo dometɔ ɖesiaɖe kplɔa ame yinae?

4 Yehowa tsɔ agbe mavɔ ƒe mɔnukpɔkpɔ ɖo amesiame si le anyigba dzi la ŋkume. Gake hafi míakpɔ agbe mavɔ le Paradiso me la, ele be míasubɔ Mawu le mɔ nyuitɔ nu eye míanɔ agbe fifia abe alesi wòdi ene. Nublanuitɔe la, ame geɖe gbe esia wɔwɔ. Esia tae Yesu gblɔ be: “Miyi ɖe agbo bii la me; elabena agbo la keke, eye mɔ la le gbadza, si kplɔa amewo yina ɖe tsɔtsrɔ̃ me, eye ame geɖewo nye amesiwo le edzi yina ɖe eme. Elabena agbo la le biie, eye mɔ la hã xaxa, si kplɔa amewo yina ɖe agbe la me, eye ame ʋɛwo nye amesiwo kpɔnɛ.” (Mateo 7:13, 14) Subɔsubɔha vavãtɔ kplɔa ame yia agbe mavɔ me. Alakpasubɔsubɔ ya kplɔa ame yia tsɔtsrɔ̃ me. Yehowa medi be ame aɖeke natsrɔ̃ o, ema tae wòle mɔnukpɔkpɔ nam amewo katã le afisiafi be woasrɔ̃ nu tso ye ŋu ɖo. (Petro II, 3:9) Eyata nya lae nye be alesi míesubɔa Mawui ana míakpɔ agbe loo alo ana míatsrɔ̃.

 ALESI NÀWƆ AKPƆ SUBƆSUBƆHA VAVÃTƆ ADZE SII

5. Aleke míawɔ akpɔ amesiwo le subɔsubɔha vavãtɔ me adze sii?

5 Aleke míawɔ ake ɖe ‘agbe mavɔ mɔ’ la ŋu? Yesu gblɔ be amesiwo le subɔsubɔha vavãtɔ me ƒe agbenɔnɔ ye ade dzesi wo. Egblɔ be: “Mitsɔ woƒe tsetsewo dze si wo. . . . Ati nyui sia ati nyui tsea ku nyui.” (Mateo 7:16, 17) Ne míagblɔe bubui la, míate ŋu akpɔ amesiwo le subɔsubɔha vavãtɔ me adze sii to woƒe dzixɔsewo kple woƒe agbenɔnɔ dzi. Togbɔ be amesiwo le subɔsubɔha vavãtɔ me mede blibo o eye wowɔa vodada hã la, ƒuƒoƒo bliboa katã dzea agbagba be yewoawɔ Mawu ƒe lɔlɔ̃nu. Na míadzro nu ade aɖewo siwo ade dzesi amesiwo le subɔsubɔha vavãtɔ me la me akpɔ.

6, 7. Aleke Mawu subɔlawo bua Biblia lae, eye aleke Yesu ɖo kpɔɖeŋu le esia gomee?

6 Biblia la dzie Mawu subɔla vavãwo tua woƒe nufiafiawo ɖo. Biblia ŋutɔ gblɔ be: “Ŋɔŋlɔ sia ŋɔŋlɔ, si tso Mawu ƒe gbɔgbɔ me la, enyo hã na nufiafia, na mokaka, na ɖɔɖɔɖo, na amehehe, si le dzɔdzɔenyenye me, bene Mawu ƒe ame la nade blibo, eye wòanɔ dzadzraɖoɖi hena dɔ nyui sia dɔ nyui wɔwɔ.” (Timoteo II, 3:16, 17) Apostolo Paulo ŋlɔ na nɔvia Kristotɔwo be: “Esime miexɔ mawunya, si miese le mía nu la, miexɔe abe amewo ƒe nya ene o, ke boŋ abe Mawu ƒe nya ene, abe alesi wònye Mawu ƒe nya vavã . . . ene.” (Tesalonikatɔwo I, 2:13) Eyata menye amegbetɔwo ƒe nukpɔsusuwo alo woƒe kɔnuwo dzie wotu subɔsubɔha vavãtɔ ƒe dzixɔsewo kple nuwɔnawo ɖo o. Ke boŋ Mawu ƒe Nya, Biblia, si tso gbɔgbɔ me, dzie wotui ɖo.

7 Yesu Kristo ɖo kpɔɖeŋu nyuitɔ ɖi esi wòtu eƒe nufiafiawo ɖe Mawu ƒe Nya la dzi. Esi wònɔ gbe dom ɖa na Fofoa si le dziƒo la, egblɔ nɛ be: “Wò nya la enye nyateƒe.” (Yohanes 17:17) Yesu xɔ Mawu ƒe Nya la dzi se, eye nusianu si wòfia wɔ ɖeka kple nusiwo le Ŋɔŋlɔawo me. Yesu gblɔna enuenu be: “Woŋlɔ ɖi bena.” (Mateo 4:4, 7, 10) Ne Yesu gblɔ nya ma ko la, eyɔa nya siwo le ŋɔŋlɔ aɖe me. Nenema kee Mawu ƒe ame siwo li egbea mefiaa woa ŋutɔwo ƒe susuwo o. Woxɔe se be  Mawu ƒe Nyae Biblia la nye, eyata wotua woƒe nufiafiawo ɖe emenyawo dzi pɛpɛpɛ.

8. Tadedeagu na Yehowa bia be woawɔ nuka?

8 Amesiwo le subɔsubɔha vavãtɔ me la subɔa Yehowa ɖeka ko eye wofiaa eƒe ŋkɔa amewo. Yesu gblɔ be: “Aƒetɔ [Yehowa], wò Mawu la, nade ta agu na, eye eya ɖeka ko nasubɔ.” (Mateo 4:10) Eyata Yehowa ɖeka koe Mawu subɔlawo dea ta agu na. Tadedeagu ƒe akpa aɖee wònye be woana amewo nanya Mawu vavã la ƒe ŋkɔ kple amesi tututu wònye. Psalmo 83:19 gblɔ be: “Ŋkɔwòe nye Yehowa, eye wò ɖeɖe koe ɖo kpo ɖe anyigba blibo la dzi!” Yesu ɖo kpɔɖeŋu ɖi na mí esi wòkpe ɖe amewo ŋu wonya Mawu ƒe ŋkɔ, abe alesi eya ŋutɔ gblɔe le gbedodoɖa me ene be: “Meɖe wò ŋkɔ la ɖe go fia amesiwo nèɖe tso xexeame nam.” (Yohanes 17:6) Nenema kee egbea amesiwo le subɔsubɔha vavãtɔ me fiaa amewo be woanya Mawu ƒe ŋkɔ, eƒe tameɖoɖowo, kple eƒe nɔnɔmewo.

9, 10. Mɔ kawo nue Kristotɔ vavãwo ɖea lɔlɔ̃ fiaa wo nɔewo le?

9 Mawu ƒe amewo ɖea lɔlɔ̃ vavãtɔ fiaa wo nɔewo. Yesu gblɔ be: “Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” (Yohanes 13:35) Lɔlɔ̃ sia nɔ ƒe alafa gbãtɔ me Kristotɔwo dome. Lɔlɔ̃ sia si Mawu fia wo la nɔa wo me eɖanye gbegbɔgblɔ kae wodona, ɖoƒe kae wole, alo dukɔ ka mee wotso o, eye wòtea wo vaa nɔviwo dome ɖekawɔwɔ sẽŋu aɖe si me megblẽna o me. (Kolosetɔwo 3:14) Míekpɔa nɔviwo ƒe habɔbɔ si me tɔwo lɔ̃a wo nɔewo alea le alakpasubɔsubɔhawo me o. Nukatae míegblɔe alea? Wowua wo nɔewo le dukɔ me masɔmasɔwo alo gbegbɔgblɔ vovovo dolawo dome masɔmasɔwo ta. Gake Kristotɔ vavãwo ya metsɔa lãnuwo ɖe wo nɔvi Kristotɔwo alo ame bubu aɖeke ŋu o. Biblia la gblɔ be: “Esia me mawuviwo kple abosamviwo dze ƒã le. Amesiame, si mewɔa nu dzɔdzɔe o, kple amesi ke melɔ̃a nɔvia o la, metso Mawu me o. . . . [Ele be] míalɔ̃ mía nɔewo; menye abe Kain, si tso vɔ̃ɖitɔ la me, eye wòwu nɔvia la ene o.”—Yohanes I, 3:10-12; 4:20, 21.

 10 Nyateƒee wònye be lɔlɔ̃ vavã si anɔ ame me mefia be woagawu ame o ko evɔ o. Kristotɔ vavãwo zãa woƒe ɣeyiɣi, ŋusẽ, kple nunɔamesiwo hã tsɔ kpena ɖe amewo ŋu eye wodea dzi ƒo na wo nɔewo. (Hebritɔwo 10:24, 25) Wokpena ɖe wo nɔewo ŋu ne woɖo xaxa me, eye woɖia anukware na amewo katã. Le nyateƒe me la, wowɔna ɖe Biblia ƒe nuxlɔ̃ame si gblɔ be ‘woawɔ nyui na amesiame’ dzi le woƒe agbenɔnɔ me.—Galatiatɔwo 6:10.

11. Nukata wòle vevie be woaxɔ Yesu Kristo be eya dzie Mawu ato ana ɖeɖe amewo?

11 Kristotɔ vavãwo xɔ Yesu Kristo be eya dzie Mawu ato ana ɖeɖe amewo. Biblia gblɔ be: “Menye ame bubu aɖeke me xɔxɔ la le o; elabena ŋkɔ bubu aɖeke mele dziƒoa te, si wona amegbetɔwo, le esi me wòle be, míakpɔ xɔxɔ la le o.” (Dɔwɔwɔwo 4:12) Míekpɔe le Ta 5 lia me be Yesu tsɔ eƒe agbe xe tafee ɖe ameƒomea me tɔ toɖolawo ta. (Mateo 20:28) Azɔ hã Yesue nye amesi Mawu tia be wòanye dziƒo Fiaɖuƒea ƒe Fia si aɖu anyigba bliboa dzi. Hafi míakpɔ agbe mavɔ la, Mawu di be míaɖo to Yesu ahawɔ ɖe eƒe nufiamewo dzi. Esia tae Biblia gblɔ be: “Amesi xɔa Via dzi sena la, agbe mavɔ le esi; amesi meɖoa to Via o la, makpɔ agbe o.”—Yohanes 3:36.

12. Nukae wòfia be woaganye xexeame ƒe akpa aɖeke o?

12 Mawu subɔla vavãwo menye xexe sia ƒe akpa aɖeke o. Esi wokplɔ Yesu yi ʋɔnui le Roma-dziɖula Pilato ŋkume la, egblɔ be: “Nye fiaɖuƒe metso xexe sia me o.” (Yohanes 18:36) Eyata dukɔ ka ke mee Yesu yomedzela vavãwo ɖale o, womedea akpa aɖeke dzi kura le xexe sia me dunyahenyawo me o, elabena Fiaɖuƒe si le dziƒo la teviwoe wonye. Womeƒoa wo ɖokui ɖe xexe sia me ʋawɔwɔwo me o. Gake Yehowa subɔlawo mexea mɔ ɖe nusi ame bubuwo ya di be yewoawɔ, abe dunyaheha aɖe me nɔnɔ, dziɖuɖu ƒe ɖoƒe aɖe didi, alo akɔdada ene, nu o. Mawu subɔla vavãwo medea akpa aɖeke dzi le dunyahenyawo me o, ke hã, wowɔna ɖe dukɔa ƒe sewo dzi pɛpɛpɛ. Nukatae? Elabena Mawu ƒe Nya la de se na wo be  ‘woabɔbɔ wo ɖokui na dziɖuɖu siwo ŋusẽ li na.’ (Romatɔwo 13:1) Ne edzɔ be nusi dukɔ aɖe ƒe dziɖulawo bia be woawɔ la tsi tre ɖe nusi Mawu bia be woawɔ ŋu la, Mawu subɔla vavãwo srɔ̃a apostoloawo ƒe kpɔɖeŋu, amesiwo gblɔ be: “Ele be, woabu Mawu awu amewo.”—Dɔwɔwɔwo 5:29; Marko 12:17.

13. Aleke Yesu yomedzela vavãwo bua Mawu ƒe Fiaɖuƒeae, eye le esia ta nukae wowɔna?

13 Yesu yomedzela vavãwo ɖea gbeƒã be Mawu ƒe Fiaɖuƒeae  nye ameƒomea ƒe mɔkpɔkpɔ ɖeka kolia. Yesu gblɔe ɖi be: “Woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu aɖo.” (Mateo 24:14) Yesu Kristo yomedzela vavãwo medea dzi ƒo na amewo be woakpɔ dziɖula siwo nye amegbetɔwo sinu hena woƒe kuxiwo gbɔ kpɔkpɔ o, ke boŋ woɖea gbeƒã be Mawu ƒe Fiaɖuƒe si le dziƒo koe nye ameƒomea ƒe mɔkpɔkpɔ. (Psalmo 146:3) Dziɖuɖu dzɔdzɔe mae Yesu nɔ mía fiam be míado gbe ɖa abia be wòava esi wògblɔ be: “Wò fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo ene!” (Mateo 6:10) Mawu ƒe Nya la gblɔe ɖi be Fiaɖuƒe ma si le dziƒo “agbã fiaɖuƒe [siwo li fifia] katã, eye wòagblẽ wo, ke eya ŋutɔ anɔ anyi tegbee.”—Daniel 2:44.

14. Subɔsubɔha kae nèkpɔ be woawoe ɖo mawusubɔla vavãwo ƒe nudidiawo gbɔ?

14 Va ɖo afisia la, bia ɖokuiwò be: ‘Subɔsubɔha kae tua eƒe nufiafia ɖesiaɖe ɖe Biblia dzi eye wòfiaa Yehowa ƒe ŋkɔ amewo? Habɔbɔ ka me tɔwoe ɖea lɔlɔ̃ fiaa wo nɔewo abe alesi Mawu fia wo ene, siwo xɔa Yesu dzi sena, siwo menye xexeame ƒe akpa aɖeke o, eye woɖea gbeƒã be Mawu ƒe Fiaɖuƒeae nye ameƒomea ƒe mɔkpɔkpɔ vavã ɖeka kolia? Le subɔsubɔha siwo katã le anyigba dzi dome la, wo dometɔ kae ɖo nudidi siawo katã gbɔ?’ Eme kɔ ƒã be Yehowa Ðasefowoe.—Yesaya 43:10-12.

NUKAE NÀWƆ?

15. Nuka dim Mawu le tsɔ kpe ɖe exɔxɔse be eyama li ŋu?

15 Mawu dzixɔxɔse ɖeɖe dzaa mefia be ame ƒe nu adze eŋu o. Le nyateƒe me la, Biblia gblɔ be gbɔgbɔ vɔ̃wo gɔ̃ hã xɔe se be Mawu li. (Yakobo 2:19) Gake edze ƒã be womewɔa Mawu ƒe lɔlɔ̃nu o, eyata Mawu mekpɔa ŋudzedze ɖe wo ŋu o. Be Mawu nakpɔ ŋudzedze ɖe mía ŋu la, menye ɖeko wòle be míaxɔ edzi ase ko evɔ o, ke ele be míawɔ eƒe lɔlɔ̃nu hã. Ehiã hã be míado le alakpasubɔsubɔ me ava subɔsubɔha vavãtɔ me.

16. Nukae wòle be ame nawɔ tso alakpasubɔsubɔhawo ƒe nuwɔnawo ŋu?

 16 Apostolo Paulo ɖee fia be mele be míakpɔ gome le alakpasubɔsubɔhawo ƒe nuwɔna aɖeke me o. Eŋlɔ bena: “Mido go le wo dome, eye miɖe mia ɖokui ɖa, Aƒetɔ la gblɔe, eye migaka asi nu makɔmakɔ ŋuti o, eye nye la maxɔ mi.” (Korintotɔwo II, 6:17; Yesaya 52:11) Eyata Kristotɔ vavãwo tsria nuwɔna ɖesiaɖe si do ƒome kple alakpasubɔsubɔ.

17, 18. Nukae nye “Babilon gã la,” eye nukatae wòhiã kpata be ‘woado go tso eme’?

17 Biblia ɖee fia be alakpasubɔsubɔha vovovoawo katã le “Babilon gã la” me. * (Nyaɖeɖefia 17:5) Ŋkɔ ma na míeɖoa ŋku blema Babilon dugã la dzi, afisi alakpasubɔsubɔ dze egɔme tsoe le Noa ƒe ŋkekea me Tsiɖɔɖɔa megbe. Nufiafia kple nuwɔna siwo le alakpasubɔsubɔhawo me egbea la dometɔ geɖe dze egɔme tso blema ke le Babilon. Le kpɔɖeŋu me, Babilontɔwo dea ta agu na mawuɖekaetɔ̃, alo mawu etɔ̃ ƒokpliwo. Egbea Mawuɖekaetɔ̃ ƒe nufiafia koŋue nye subɔsubɔha geɖe ƒe nufiafia vevitɔ. Gake Biblia fia eme kɔ ƒã be Mawu vavã ɖeka, Yehowa, koe li, eye be Yesu Kristo enye Via. (Yohanes 17:3) Babilontɔwo xɔe se hã be luʋɔ makumaku aɖe le amegbetɔwo si si yia edzi nɔa agbe le ku megbe eye be ate ŋu ava kpe fu le teƒe aɖe si wowɔa fu amewo le. Egbea wofiaa luʋɔ alo gbɔgbɔ makumaku si ate ŋu ava kpe fu le dzomavɔ me ƒe dzixɔse sia le subɔsubɔha akpa gãtɔ me.

18 Esi wònye be blema Babilontɔwo ƒe subɔsubɔ va kaka ɖe xexeame katã ta la, woate ŋu ayɔ egbegbe alakpasubɔsubɔ ƒe xexemefiaɖuƒea be Babilon Gã wòasɔ. Eye Mawu gblɔe ɖi be alakpasubɔsubɔhawo ƒe fiaɖuƒe sia ƒe nuwuwu ava zi ɖeka kpoyi. (Nyaɖeɖefia 18:8) Eyata èkpɔ nusita wòle vevie be nàɖe ɖokuiwò ɖa tso Babilon Gã la ƒe nuwɔna ɖesiaɖe mea?  Yehowa Mawu di be ‘nàdo go tso eme’ kaba esi ɣeyiɣia gakpɔtɔ li na esia wɔwɔ.—Nyaɖeɖefia 18:4.

Ne èwɔ ɖeka kple Yehowa ƒe amewo subɔe la, viɖe si nàkpɔ asɔ gbɔ boo wu nusianu si ato ŋuwò

19. Viɖe kae Yehowa subɔsubɔ ana nàkpɔ?

19 Ne èwɔ nyametsotso be yeado le alakpasubɔsubɔ me la, ame aɖewo magalɔ̃ wò nya o. Gake ne èwɔ ɖeka kple Yehowa ƒe amewo subɔe la, viɖe si nàkpɔ asɔ gbɔ boo wu nusianu si ato ŋuwò fifia. Abe alesi wònɔ le Yesu ƒe nusrɔ̃la gbãtɔwo, amesiwo gblẽ nu bubuwo ɖi heva dze eyome, gome ene la, àva kpɔ gbɔgbɔ me nɔviŋutsu kple nɔvinyɔnu geɖe. Àva zu xexeame katã ƒe ƒome gã si me tɔwo nye Kristotɔ miliɔn geɖe siwo ɖea lɔlɔ̃ vavãtɔ fiaa wo nɔewo la dometɔ ɖeka. Eye mɔkpɔkpɔ dodzidzɔname sia asu asiwò be nànɔ ‘agbe mavɔ le nuɖoanyi si gbɔna me.’ (Marko 10:28-30) Ðewohĩ le ɣeyiɣi aɖe megbe la, amesiwo gbe wò le wò dzixɔsewo ta ava dzro Biblia ƒe nufiafiawo me eye woawo hã woava zu Yehowa subɔlawo.

20. Mɔkpɔkpɔ kae le amesiwo le subɔsubɔha vavãtɔ me la si ɖe etsɔme ŋu?

20 Biblia fia nu be eteƒe madidi o, Mawu ahe nuɖoanyi vɔ̃ɖi sia ava nuwuwui eye wòana nuɖoanyi dzɔdzɔe yeye si le eƒe Fiaɖuƒea ƒe dziɖuɖu te la naxɔ ɖe eteƒe. (Petro II, 3:9, 13) Aleke gbegbe xexe ma me nɔnɔ avivii enye si! Eye le nuɖoanyi yeye dzɔdzɔe ma me la, subɔsubɔ ɖeka pɛ koe anɔ anyi, si nye tadedeagu vavãtɔ ɖeka kolia la. Ðe nunya manɔ eme be nàwɔ afɔɖeɖe siwo hiã la fifia be nàva wɔ ɖeka kple amesiwo le subɔsubɔha vavãtɔ me oa?

^ mm. 17 Àkpɔ nyatakaka bubuwo ku ɖe nusita Babilon Gã la tsi tre ɖi na alakpasubɔsubɔ ƒe xexemefiaɖuƒe ŋu le Megbenyawo me, le axa 219-20.