Dzo kpo yi emenuwo dzi

Dzo kpo yi emenuawo dzi

 ŊUTINYA 73

Israel Fia Nyui Mamlɛtɔ

Israel Fia Nyui Mamlɛtɔ

ƑE ENYI ko Yosiya xɔ esime wòzu fia ɖe Israel ƒe anyieheto eve fiaɖuƒea dzi. Metsi kura hena fiaɖuɖu o. Eyata gbã la, ame tsitsi aɖewo kpe ɖe eŋu be wòaɖu dukɔ la dzi.

Esi Yosiya ɖu fia ƒe adre la, ede asi Yehowa didi me. Edze fia nyuiwo abe Dawid, Yosafat, kple Xizkiya ene ƒe kpɔɖeŋu yome. Emegbe esi wònye ƒewuivi ko la, Yosiya wɔ kalẽdɔ aɖe.

Israel-viwo dometɔ geɖe vɔ̃ɖi ŋutɔ hena ɣeyiɣi didi aɖe. Wosubɔ alakpamawuwo. Wode ta agu na legbawo. Eyata Yosiya kple eƒe amewo tso, eye wodze egɔme ɖe alakpamawuwo ɖa le anyigba la dzi. Dɔ gã aɖe enye esia, elabena alakpamawu subɔlawo sɔ gbɔ. Àte ŋu akpɔ Yosiya kple eƒe amewo le afisia wole legbawo gbãm.

Emegbe la, Yosiya ɖo ŋutsu etɔ̃ Yehowa ƒe gbedoxɔ la dzadzraɖo nu. Wodzɔ ga le ameawo si hetsɔ na ŋutsu etɔ̃ siawo be woatsɔ axe fee na dɔwɔlawo. Esi wonɔ gbedoxɔa tum la, nunɔlagã Xilkiya kpɔ nu vevi aɖe le afima. Enye segbalẽ, si Yehowa na Mose ŋlɔ gbaɖegbe ʋĩ ke la. Ebu hena ƒe geɖe.

Wotsɔ agbalẽ la yi na Yosiya, eye wòbia be woaxlẽe na ye. Esi Yosiya nɔ to ɖom la, edze sii be ameawo mele Yehowa ƒe se dzi wɔm o. Esia vee ŋutɔ, eyata wòvuvu eƒe awuwo abe alesi nàte ŋu akpɔe le afisia ene. Egblɔ be: ‘Yehowa do dɔmedzoe ɖe mía ŋu, elabena mía fofowo mewɔ se, si woŋlɔ ɖe agbalẽ sia me la dzi o.’

Yosiya bia nunɔlagã Xilkiya be wòadi nusi Yehowa le yewo wɔ ge la. Xilkiya yi nyɔnu nyagblɔɖila aɖe, si nye Xulda gbɔ hebia nya lae. Etsɔ Yehowa ƒe gbedasi sia nɛ be wòatsɔ ayi na Yosiya: ‘Woahe to na Yerusalem kple dukɔ la katã, elabena wosubɔ alakpamawuwo, eye nuvlowɔwɔ yɔ anyigba la dzi. Gake esi wò, Yosiya nèwɔ nusi nyo ta la, tohehe la mava o, negbe le wò ku megbe hafi.’