Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nu Siwo Nàte Ŋu Asrɔ̃ Tso Biblia Me

 NUSƆSRƆ̃ 37

Yehowa Ƒo Nu Kple Samuel

Yehowa Ƒo Nu Kple Samuel

Viŋutsu eve siwo nye nunɔlawo le Eli, si nye Nunɔlagã la si, eye wosubɔna le avɔgbadɔa me. Woƒe ŋkɔwoe nye Hofni kple Finehas. Womewɔna ɖe Yehowa ƒe sewo dzi o, eye womewɔa nu ɖe dukɔa ŋu nyuie kura o. Ne Israel-viwo va vɔ sa ge na Yehowa la, Hofni kple Finehas tsɔa lãa ƒe akpa nyuitɔwo. Eli se nu tso nu siwo viawo nɔ wɔwɔm ŋu, gake mewɔ naneke tso eŋu o. Ðe Yehowa aɖe mɔ nu sia nayi edzia?

Togbɔ be Hofni kple Finehas tsi wu Samuel hã la, mesrɔ̃ woƒe nuwɔnawo o. Yehowa kpɔ ŋudzedze ɖe Samuel ŋu. Gbe ɖeka esi Samuel mlɔ anyi le zã me la, ese be ame aɖe yɔ ye. Efɔ, ƒu du yi Eli gbɔ hegblɔ be: ‘Nyee nye esi!’ Gake Eli gblɔ nɛ be: ‘Nyemeyɔ wò o. Heyi nàmlɔ anyi.’ Samuel trɔ yi ɖamlɔ anyi. Egase be ame aɖe yɔ ye. Esi Samuel gase gbea zi etɔ̃lia la, Eli kpɔe be Yehowae nɔ Samuel yɔm. Egblɔ na Samuel be ne egase gbea la, negblɔ be: ‘Yehowa ƒo nu, wò subɔla le to ɖom.’

Samuel trɔ yi ɖamlɔ anyi. Eye wòse yɔyɔa be: ‘Samuel! Samuel!’ Egblɔ be: ‘Ƒo nu, elabena wò subɔla le to ɖom.’ Yehowa gblɔ nɛ be: ‘Gblɔ na Eli be mahe to na eya kple eƒe  ƒomea. Enya be ye viwo le nu gbegblẽ wɔm le avɔgbadɔa me gake mewɔ naneke tso eŋu o.’ Esi ŋu ke la, Samuel ʋu avɔgbadɔa ƒe ʋɔtruwo abe ale si wòwɔna ɣesiaɣi ene. Enɔ vɔvɔ̃m be yeagblɔ nya si Yehowa gblɔ la na nunɔlagã la. Gake Eli yɔe hebiae be: ‘Vinye, nya kae Yehowa gblɔ na wò? Gblɔ nya sia nya nam.’ Eya ta Samuel gblɔ nya sia nya nɛ.

Esi Samuel nɔ tsitsim la, Yehowa nɔ kplii. Le Israel-nyigba bliboa dzi la Israel-viwo katã kpɔe be Yehowa tia Samuel be wòanye nyagblɔɖila kple ʋɔnudrɔ̃la.

“Ðo ŋku Wɔwòla Gã la dzi le wò sɔhɛmenɔɣi.”—Nyagblɔla 12:1