Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nu Siwo Nàte Ŋu Asrɔ̃ Tso Biblia Me

 NUSƆSRƆ̃ 14

Kluvi Aɖe Si Ðo To Mawu

Kluvi Aɖe Si Ðo To Mawu

Yosef nye Yakob ƒe vi ɖevitɔwo dometɔ ɖeka. Foawo kpɔe be Yosef nye yewo fofo ƒe vi lɔlɔ̃a. Aleke nèsusu be woawɔ nui? Woʋã ŋu Yosef eye wolé fui. Esi Yosef ku drɔ̃e tɔxɛ aɖewo la egblɔ wo na foawo. Wosusu be drɔ̃eawo fia be gbe ɖeka la, yewoava bɔbɔ na Yosef. Esia na wogalé fui ɖe edzi!

Gbe ɖeka Yosef nɔviwo nɔ woƒe alẽwo kplɔm le teƒe si te ɖe Sekem du la ŋu. Yakob dɔ Yosef ɖe wo gbɔ be wòava kpɔ wo ɖa. Esi wokpɔe le adzɔge ʋĩi wògbɔna la, wogblɔ na wo nɔewo be: “Drɔ̃ekulae nye ema gbɔna. Mina míawui!” Eya ta wolée hetsɔe ƒu gbe ɖe do globo aɖe me. Gake nɔviawo dometɔ ɖeka si ŋkɔe nye Yuda gblɔ be: ‘Mígawui o, mídzrae wòazu kluvi boŋ.’ Eya ta wodzra Yosef klosalo 20 na Midiantɔ asitsala siwo yina Egipte.

Emegbe Yosef nɔviwo tsɔ eƒe awu ʋlaya nyrɔ ɖe gbɔ̃vi ƒe ʋu me eye wotsɔe ɖo ɖe wo fofo hegblɔ be: ‘Menye viwòa ƒe awue nye esia oa’? Eya ta Yakob susu be lã wɔadã aɖe wu Yosef. Esia na eƒe dzi gbã. Ame aɖeke mete ŋu fa akɔ nɛ o.

Le Egipte la, dziɖuɖumegã vevi aɖe si ŋkɔe nye Potifar ƒle Yosef abe kluvi ene. Gake Yehowa nɔ kple Yosef. Potifar kpɔe be Yosef doa vevi dɔ eye woate ŋu aka ɖe edzi. Eya ta eteƒe medidi hafi Potifar tsɔ Yosef ɖo eƒe nuwo katã nu o.

Potifar srɔ̃ kpɔe be Yosef dze ɖeka eye ŋusẽ le eŋu. Enɔ gbɔgblɔm nɛ tso ŋkeke yi ŋkeke be wòadɔ kpli ye. Nu kae Yosef awɔ? Egbe, eye wògblɔ be: ‘Esia mesɔ o, nye aƒetɔ ka ɖe dzinye  eye srɔ̃ae nènye. Ne medɔ kpli wò la, mawɔ nu vɔ̃ ɖe Mawu ŋu!’

Gbe ɖeka Potifar srɔ̃ dze agbagba be yeazi Yosef dzi wòadɔ kpli ye. Nyɔnua lé eƒe awu, gake Yosef si le egbɔ. Esi Potifar gbɔ va aƒe me la, srɔ̃a gblɔ nɛ be Yosef va dze ye dzi. Nyɔnua meto nyateƒe na srɔ̃a o. Potifar do dziku vevie, eye wòlé Yosef de gaxɔ me. Gake Yehowa meŋlɔ Yosef be o.

“Mibɔbɔ mia ɖokui ɖe Mawu ƒe asi sesẽ la te, ne wòado mi ɖe dzi le ɣeyiɣi si sɔ la dzi.”—1 Petro 5:6