Dzo kpo yi emenuwo dzi

Dzo kpo yi emenuawo dzi

Susu Si Sɔ Nenɔ Asiwò Ðe Vodadawo Ŋu

Susu Si Sɔ Nenɔ Asiwò Ðe Vodadawo Ŋu

Dzi dzɔa Don kple Margaret * ne wo vinyɔnua kple eƒe ƒomea va srã wo kpɔ. Gbe ɖeka hafi woadzoa Margaret si nye nuɖala tsã si xɔ dzudzɔ le dɔme la ɖa makaroni kple nyinotsibabla si wotsɔ wɔ atadi na wo. Nuɖuɖu sia doa dzidzɔ na mamayɔvi eveawo ŋutɔ.

Esi wo katã wonɔ anyi la, Margaret tsɔ nuɖuɖua vɛ eye wòdae ɖe kplɔ̃a dzi. Esi wòʋu nu le enu la, eƒe ŋkume da tu, esi wòkpɔe be nyinotsibablatadi la koe nɔ agbaa me! Margaret ŋlɔ nu vevi aɖe be, mekɔ makaroni la ɖe atadia me o! *

Míeɖanye ame tsitsiwo alo ɖeviwo o, nuteƒekpɔkpɔ ka kee ɖasu mía si o, mí katã míedaa vo. Ate ŋu anye be míegblɔ nya aɖe eŋu mabumabui alo wɔ nane evɔ menye ɣemaɣie wòle be míawɔe hafi o alo ŋe aɖaba ƒu nane dzi loo alo míeŋlɔ nane si wòle be míawɔ hafi la be. Nu ka tae míedaa vo? Nu kae wòle be míawɔ ne mía ŋutɔwo loo alo ame bubu wɔ vodada? Ðe wòadzɔ be míawɔ vodada kura oa? Ne susu si sɔ le mía si ɖe vodadawo ŋu la, akpe ɖe mía ŋu míaɖo biabia siawo ŋu.

ALE SI MÍEBUA VODADAWO KPLE ALE SI MAWU HÃ BUNƐ

Ne míewɔ nane nyuie eye wokafu mí la, míaƒe ta tena elabe míekpɔnɛ be míedze nɛ. Gake ne míewɔ vodada eye ɖewohĩ menye ɖe míeɖoe wɔ o, alo ame aɖeke menya nu tso eŋu o la, ɖe manyo be míalɔ̃ ɖe míaƒe vodadaa dzi oa? Ebia ɖokuibɔbɔ hafi míate ŋu alɔ̃ ɖe edzi.

Ne míebua mía ɖokuiwo ŋu fũu akpa la, míanɔ mía ɖokuiwo nu ɖem, anɔ vodadaa dam ɖe ame bubuwo dzi alo agbe kura be menye míawoe wɔe o. Zi geɖea nuwɔna sia gblẽa nu. Ne edzɔ alea la, míate ŋu akpɔ kuxia gbɔ o, eye wòana míada vodadaa ɖe ame bubuwo dzi madzemadzee. Ne míete ŋu tutu vodadaa da ɖe ame bubuwo dzi fifia hã la, nenɔ susu me na mí be, “mía dometɔ ɖe sia ɖe abu akɔnta le eɖokui ŋu na Mawu.”—Romatɔwo 14:12.

Susu si sɔ le Mawu si ɖe vodadawo ŋu. Wogblɔ le Mawu ŋu le Psalmowo ƒe agbalẽa me be enye “nublanuikpɔla kple veveseɖeamenula”; “menɔa vodada dim le ame ŋu ɣesiaɣi o, eye meléa dziku ɖe dɔme ɖikaa o.” Enya be mímede blibo o eye wòsea míaƒe gbɔdzɔgbɔdzɔ gɔme, “eɖoa ŋui be kewɔe míenye.”—Psalmo 103:8, 9, 14.

Azɔ hã, esi Mawu nye vifofo nublanuikpɔla ta la, edi be mí ye viwo hã míabu vodadawo abe ale si yebunɛ ene. (Psalmo 130:3) Mɔfiame gbogbo aɖewo le eƒe Nya la me, si akpe ɖe mía ŋu míanɔ te ɖe mía ŋutɔwo ƒe vodadawo kple ame bubuwo siaa tɔ nu.

MƆ SIWO DZI MÍATO ANƆ TE ÐE VODADAWO NU

Zi geɖea, ne ame aɖe wɔ vodada la, egblẽa ɣeyiɣi nɔa didim be yeada nu si yewɔ la ɖe ame bubu dzi, alo aʋli nu si yewɔ alo nya si yegblɔ la ta. Ne ègblɔ nya aɖe si ve ame aɖe la, ɖe manyo be nàɖe kuku aɖɔ nɔnɔmea ɖo ale be miaƒe xɔlɔ̃wɔwɔa me nagagblẽ oa? Ðe nèwɔ nane si na wò ŋutɔ loo alo ame bubu aɖe se vevea? Le esi nàdo dziku ɖe ɖokuiwò ŋu alo atso ame bubuwo nu teƒe la, ɖe manyo  be nàwɔ tɔwò sinua aɖɔ nɔnɔmea ɖo oa? Be nànɔ agbagba dzem be yeaɖee afia be ame bubu gbɔe vodadaa tso la, ana nyaa nagblẽ ɖe edzi kura. Ðe ema teƒe la, srɔ̃ nu tso eme, ɖɔ nɔnɔmea ɖo eye nàɖe asi le nyaa ŋu.

Ne ame bubu aɖe da vo la, enɔa bɔbɔe be míabu fɔe atsɔ afia be nu si wòwɔa medzɔ dzi na mí o. Ðe manyo boŋ be míawɔ ɖe aɖaŋu si Yesu Kristo ɖo la dzi oa? Egblɔ be: “Nu sia nu si miedina be amewo nawɔ na mi la, miawo hã miwɔ nenema ke na wo.” (Mateo 7:12) Ne èda vo, eye wònye vodada sue gɔ̃ hã la, àdi godoo be amewo nase veve ɖe ye nu alo aŋe aɖaba ƒu vodadaa dzi kuraa. Eya ta ɖe manyo be nanyo dɔme na amewo le mɔ sia ke nu oa?—Efesotɔwo 4:32.

MƆFIAME SIWO AKPE ÐE MÍA ŊU MÍATSO VODADAWO DZI

Nyagɔmeɖegbalẽ aɖe ɖe vodada gɔme be enye “nuwo ŋu mabumabu nyuie, nyatakaka blibo si mesu ame si o, alo nuwo gɔme masemase nyuie. Ele be míalɔ̃ ɖe edzi be ne mede ɖeke o la, mía dometɔ ɖe sia ɖe ɖea nɔnɔme siawo dometɔ ɖeka alo wo katã fiana. Ke hã, ne míewɔ ɖe Biblia ƒe mɔfiamewo dzi la, míaɖe vodadawo dzi kpɔtɔ.

Mɔfiame mawo dometɔ ɖeka dze le Lododowo 18:13, si gblɔ be: “Ne ame aɖe ɖo nya ŋu hafi va se eŋu nyateƒenyawo la, bometsitsi kple ŋukpe wònye nɛ.” Ne míegbɔ dzi ɖi vie ɖo to se nya bliboa eye míebu ale si míaɖo nyaa ŋui la, awɔe be mímaɖo eŋu dzitsitsitɔe alo aƒo nu eŋu mabumabui o. Ne míeɖo to se nyaa nyuie la awɔe be miaƒo nya ta madzemadzee o eye mana mía ŋutɔwo míazu agɔdzelawo o.

Biblia ƒe mɔfiame bubu gblɔ be: “Ne anya wɔ, eye wòanye nu si atso mia gbɔ la, minɔ anyi kple amewo katã le ŋutifafa me.” (Romatɔwo 12:18) Eya ta dze agbagba nànɔ ŋutifafa me kple amewo. Ne èle dɔ wɔm kple amewo la, bu wo ŋu eye nàde bubu wo ŋu, kafu wo eye nàde dzi ƒo na wo. Ne èwɔa nu siawo la, anɔ bɔbɔe be woatsɔ nya aɖe si ame aɖe gblɔ alo nane si wòwɔ eŋu mabumabui la ake alo aŋe aɖaba ƒu edzi, eye anɔ bɔbɔe hã be woatsɔ vodada gãwo ake ahakpɔ wo gbɔ.

Kpɔe ɖa be yeate ŋu asrɔ̃ nu nyui aɖe tso vodadaa me hã. Be nànɔ taflatsɛ dom ɖe nu si nègblɔ alo wɔ teƒe la, bui be enye mɔnukpɔkpɔ na ye be yeatu nɔnɔme nyuiwo ɖo boŋ. Ðe wòahiã be nàɖe nɔnɔme siwo nye dzigbɔgbɔ blewu, dɔmenyonyo kple ɖokuidziɖuɖu afia geɖe wua? Ke tufafa, ŋutifafa kple lɔlɔ̃ ya ɖe? (Galatiatɔwo 5:22, 23) Ne mede ɖeke o la, àsrɔ̃ nane si màdi be yeagawɔ ake o tso eme. Ne èlɔ̃ ɖe wò vodadaa dzi hã la, mègana wòate ɖe dziwò fũu akpa o. Tsɔe wɔ nukokoe ale be wòaganɔ fu ɖem na wò.

NE SUSU NYUI LE MÍA SI LA, AÐE VI NA MÍ

Ne míeda sɔ le ale si míebua vodadawoe me la, akpe ɖe mía ŋu míanɔ te ɖe vodada siwo míewɔna nu. Míado dziku ɖe mía ɖokuiwo ŋu o eye míanɔ ŋutifafa me kple amewo. Ne míedze agbagba be míasrɔ̃ nu tso míaƒe vodadawo me la, awɔe be míadze nunya eye amewo alɔ̃ mí. Mana be dzi naɖe le mía ƒo alo anɔ fɔ bum mía ɖokuiwo fũu akpa o. Ne ele susu me na mí be ame bubuwo hã le agbagba dzem be yewoaɖe vodadawo wɔwɔ dzi kpɔtɔ la, ana mía kple amewo dome nanɔ nyuie. Vevietɔ wu la, akpe ɖe mía ŋu be míasrɔ̃ Mawu ƒe lɔlɔ̃ kple ale si wòtsɔna kena faa la.—Kolosetɔwo 3:13.

Ðe vodada si Margaret wɔ, si ŋu míeƒo nu tsoe va yi la gblẽ ƒomea ƒe ɖoɖoa mea? Kura o. Ame sia ame tsɔe wɔ nukokoe, vevietɔ Margaret eye woɖu nua makaronia manɔmee! Ƒe aɖewo megbe la, mamayɔvi eveawo gblɔ nu si dzɔ gbe ma gbe si womaŋlɔ be akpɔ o la na wo viwo eye woɖo ŋku ale si wo kple wo tɔgbui kple wo mama wonɔa anyi ɖekae le dzidzɔ me la dzi. Ne míagblɔea, vodada koe!

^ mm. 2 Míetrɔ ŋkɔawo.

^ mm. 3 Nuɖuɖu sia nye Makaroni si woɖa si dzi wokɔ nyinotsibablatadi ɖo.