Dzo kpo yi emenuwo dzi

Dzo kpo yi emenuawo dzi

 NYATI SI LE AKPAA DZI | ÀLƆ̃ AXƆ MAWU ƑE NUNANA GÃTƆ KEKEAKE LA?

Mawu Ƒe Nunana Gãtɔ Kekeake—Nu Ka Tae Wòxɔ Asi Ŋutɔ?

Mawu Ƒe Nunana Gãtɔ Kekeake—Nu Ka Tae Wòxɔ Asi Ŋutɔ?

Nu kae ana nàbu nunana aɖe be exɔ asi? Ðewohĩ atso nu ene siwo gbɔna la gbɔ: (1) ame si na nua wò, (2) nu si ta wòna nua wò, (3) nu si wòtsɔ sa vɔ hafi na nua wò (4) ne nunanaa kpɔ hiahiã aɖe koŋ gbɔ na wò. Ne míede ŋugble le nu ene siawo ŋu la, awɔe be míakpɔ ŋudzedze ɖe Mawu ƒe nunana gãtɔ kekeake si nye tafea ŋu geɖe wu.

AME KAE NA NUA?

Nunana aɖewo xɔa asi na mí elabena ame aɖe si le ɖoƒe aɖe loo alo ame aɖe si ŋu míedea bubui vevie ye nɛ mí. Togbɔ be nunana aɖewo menye esiwo ŋu wozã ga geɖe ɖo o hã, woxɔ asi na mí elabena míaƒe ƒometɔ vevi aɖe alo xɔlɔ̃ aɖe si gbɔ míelɔ̃a nu le o ye nɛ mí. Nenemae nu si Russell na Jordan si ŋu nya míegblɔ le nyati si do ŋgɔ me la nɔ nɛ. Aleke esia ku ɖe tafe ƒe nunanaa ŋui?

Gbãa, Biblia gblɔ be: “Mawu dɔ eƒe Tenuvi la ɖo ɖe xexea me, be míakpɔ agbe to eya amea dzi.” (1 Yohanes 4: 9) Susu ma tae nunana sia xɔ asi vevie ɖo. Ŋusẽ mele ame aɖeke si de Mawu nu o. Hakpala aɖe si nye Hebritɔ ŋlɔ bena: “Wò, ame si ŋkɔe nye Yehowa la, wò ɖeɖe koe nye Dziƒoʋĩtɔ ɖe anyigba blibo la dzi.” (Psalmo 83:18) Ame bubu aɖeke meli si nye gã wu Mawu si ate ŋu ana nu mí wu esia o.

Evelia, Mawue nye “mía Fofo.” (Yesaya 63:16) Le mɔ ka nu? Eyae na agbe mí. Azɔ hã eléa be na mí nuteƒewɔwɔtɔe abe ale si vifofo lɔ̃ame léa be na viawo ene. Esi Mawu nɔ nu ƒom tso eƒe ame aɖewo siwo nɔ anyi le blema ŋu la, eyɔ wo be Efrayim eye wògblɔ be: “Ðe Efrayim menye vi vevi, vi si gbɔ nyemelɔ̃a nu le oa? . . . Esia tae nye dɔme trɔ ɖe eŋu. Makpɔ nublanui nɛ godoo.” (Yeremiya 31:20) Alea tututue Mawu sena le eɖokui me ɖe esubɔla siwo li egbea ŋu. Menye mía Wɔla ŋusẽkatãtɔ koe wònye o, enye mía Fofo wɔnuteƒe kple Xɔlɔ̃ vavã hã. Ðe esia mewɔe be nunana ɖe sia ɖe si tso egbɔ la xɔ asi na mí ŋutɔ oa?

 NU KA TA WÒNA NUA?

Ne lɔlɔ̃ ʋã ame aɖe wòna nu mí la exɔa asi na mí ŋutɔ wu ne amea na nua mí le esi wozi edzi be wòawɔe ta. Ame si naa nu faa tso dzi me la mekpɔa mɔ be woaɖo eteƒe na ye o.

Mawu tsɔ Via na ɖe mía ta elabe elɔ̃ mí. Biblia gblɔ be: “Esia me woɖe Mawu ƒe lɔlɔ̃ ɖe go fia le le mía me, be Mawu dɔ eƒe Tenuvi.” Ðe susu ka ta? “Be míakpɔ agbe to eya amea dzi.” (1 Yohanes 4:9) Dzizizie wònye na Mawu be wòawɔ nu sia? Kura o! “Tafe si Kristo Yesu xe” la nye Mawu ƒe “amenuveve” si wòɖe fia.—Romatɔwo 3:24.

Nu ka tae Mawu ƒe nunanaa nye “amenuveve”? Biblia ɖe eme be: “Mawu ɖe eya ŋutɔ ƒe lɔlɔ̃ na mí fia le esia me be, esime míeganye nu vɔ̃ wɔlawo la, Kristo ku ɖe mía ta.” (Romatɔwo 5:8) Lɔlɔ̃ akuakua ye ʋã Mawu wòtsɔ via na ɖe amegbetɔ nu vɔ̃ me wɔnamanɔŋutɔ siwo gbɔdzɔ la ta. Míedze na lɔlɔ̃ sia o eye míate ŋu axe fe ɖe eta hã gbeɖe o. Eƒe nunana lae nye lɔlɔ̃ɖeɖefia gãtɔ kekeake.

NU KAE WÒTSƆ SA VƆE?

Nunana aɖewo xɔ asi elabe ame si na nua la tsɔ nu gã aɖe sa vɔe. Ne nane le vevie na ame aɖe gake wòlɔ̃ faa be yeaɖe asi le eŋu na mí la, míegadea asixɔxɔ nua ŋu wu le nu si wòtsɔ sa vɔe ta.

Mawu ‘tsɔ eƒe Tenuvi’ la na. (Yohanes 3:16) Eyae nye eƒe ame vevitɔ kekeake si wòtsɔ na ɖe mía ta. Le ƒe akpeakpe siwo Mawu nɔ xexea wɔm me la, Yesu wɔ dɔ kplii eye wònye ame si ‘wòlɔ̃ vevie.’ (Lododowo 8:30) Yesu nye Mawu ƒe ‘Vi lɔlɔ̃a’ kple “Mawu makpɔmakpɔ la ƒe nɔnɔme.” (Kolosetɔwo 1:13-15) Ame eve aɖeke megali siwo dome le kplikplikpli de wo nu o.

Ke hã Mawu “meve nu le eya ŋutɔ Via gɔ̃ hã ŋu o.” (Romatɔwo 8:32) Yehowa tsɔ eƒe nu vevitɔ kekeake na ɖe mía ta. Mawu ƒe nunana aɖeke mexɔ asi wu esia o.

NE NUNANAA KPƆ HIAHIÃ AÐE KOŊ GBƆ

Nunana aɖewo xɔ asi elabe wokpɔa hiahiã aɖewo gbɔ, esiwo hiã kpata gɔ̃ hã. Le kpɔɖeŋu me, ɖe dzi madzɔ wò ŋutɔ ne ame aɖe lɔ̃ faa xe atikewɔnya ŋu fe aɖe si axɔ wò ɖe agbe si màte ŋu axe o la na wò oa? Nunana ma axɔ asi na wò ale gbegbe, alo menye nenemae oa?

“Ale si ko amewo katã kuna le Adam me la, nenema kee woagbɔ agbe wo katã hã le Kristo me.” (1 Korintotɔwo 15:22) Esi míenye Adam ƒe dzidzimeviwo ta la, mí katã míele ‘kukum’ eye míate ŋu asi le dɔléle kple ku ƒe ti la nu alo adzra míawo kple Mawu dome ɖo be míaganye fɔɖilawo le eŋkume o. Eye mí amegbetɔ tsɛwo míate ŋu axɔ mía ɖokui alo ame bubu aɖeke ɖe “agbe” o. Biblia gblɔ be: “Wo dometɔ aɖeke mate ŋu axɔ na nɔvia akpɔ o eye mate ŋu axe etafe na Mawu o, . . . Womate ŋui akpɔ gbeɖe o.” (Psalmo 49:7, 8) Míehiã kpekpeɖeŋu vevie elabena míate ŋu axe tafea o. Ne míawo ɖeɖee la, aglo mí.

Yehowa ƒe lɔlɔ̃ gã la ʋãe wòlɔ̃ faa xe ‘fe sia’ ɖe mía ta, ale be to Yesu dzi la “woagbɔ agbe wo katã.” Aleke tafea wɔ esiae? “Via Yesu ƒe ʋu klɔa nu vɔ̃ ɖe sia ɖe ɖa le mía ŋu.” Ɛ̃, ne míexɔ Yesu ƒe ʋu si wòkɔ ɖi dzi se la, ana woatsɔ  míaƒe nu vɔ̃wo ake mí eye míakpɔ agbe mavɔ. (1 Yohanes 1:7; 5:13) Eye aleke tafe sia aɖe vi na míaƒe ame vevi siwo ku la hãe? “Esi wònye ame dzie ku to va ta la, ame kukuwo ƒe tsitretsitsi la hã to ame [si nye Yesu] dzi va.”—1 Korintotɔwo 15:21. *

Lɔlɔ̃ meʋã ame si le ŋusẽnɔƒe aɖe wòna nane si de ŋgɔ wu Yesu ƒe vɔsaa kpɔ o. Ame aɖeke mena naneke mí wòde nu si Yehowa Mawu na mí la nu o. Eye nunana aɖeke mekpɔ míaƒe hiahiã vevi aɖe gbɔ de Yesu ƒe vɔsa si ɖe mí tso nu vɔ̃ kple ku si me nu o. Nyateƒee, nunana aɖeke mate ŋu agogo asixɔxɔ si gbegbe le tafea ŋu o.

 

^ mm. 19 Àte ŋu axlẽ nu geɖe tso Mawu ƒe tameɖoɖo be yeafɔ ame kukuwo ɖe tsitre ŋu le agbalẽ si nye Nuka Tututue Nye Biblia ƒe Nufiafia? ƒe ta 7 lia me. Yehowa Ðasefowoe tae. Àkpɔe le Internet hã dzi le www.jw.org/ee.