Dzo kpo yi emenuwo dzi

Dzo kpo yi emenuawo dzi

Petro Ye Nye Papa Gbãtɔa?

Petro Ye Nye Papa Gbãtɔa?

“Woɖo Papatenɔla Jorge Mario Bergoglio, S.J., wòzu Papa 265 lia ɖe Petro teƒe.”—VATIKAN NYATAKAKADƆWƆƑE YE ÐE GBEƑÃ NYA SIA LE VATIKAN DUGÃ ME, LE MARCH 13, 2013, DZI.

“Roma bisiɔp lae nye Ha bliboa ƒe tatɔ, le esi wònye be eyae nye Petro Kɔkɔe, si xɔ ɖoƒe ma tso Yesu Kristo gbɔ la teƒenɔla ta.”—NYA SIA TSO VINCENT ERMONI ƑE AGBALẼ SI NYE ROMA BISIƆP LA ƑE GÃNYENYE LE ƑE ALAFA ETƆ̃ GBÃTƆAWO ME, ƑE 1903 TƆ ME.

“Eya ta ne ame aɖe gblɔ be . . . Roma Papa la menye Petro Yayratɔ la teƒenɔla le ŋusẽnɔƒe sia o la, woabui aglãdzelae.”—VATIKAN ƑE ADAŊUDETAKPEKPE GBÃTƆ YE DE SE SIA, LE JULY 18, 1870, DZI.

LE KATOLIKOTƆ miliɔn geɖe siwo le xexea me gome la, se si Vatikan Ƒe Adaŋudetakpekpea de le ƒe 1870 me la nye ha la ƒe xɔsemeʋuʋu eye wònye nufiafia si dzi wòle be woalɔ̃ ɖo godoo. Gake biabia lae nye be, Ðe wònye nufiafia si tso Ŋɔŋlɔawo mea? Tsɔ kpe ɖe eŋu la, ɖe Papa Francis nye apostolo Petro teƒenɔla nyateƒea? Eye ɖe Petro nye papa gbãtɔa?

“KPE GBADZA SIA DZI MATU NYE HA LA ÐO”

Nya siwo dze le Mateo 16:16-19 kple Yohanes 21:15-17 la koŋ dzie Vatikan Ƒe Adaŋudetakpekpea tu se si wòde le ƒe 1870 me la ɖo. Dzeɖoɖo siwo yi edzi le Yesu kple Petro dome, siwo dze le mawunyakpukpui mawo me kple Biblia ƒe akpa bubuwo ɖee fia be apostolo Petro wɔ dɔ vevi aɖe le Kristo hamea me le gɔmedzedzea me. Eye le nyateƒe me la, zi gbãtɔ si woa kple Yesu wodo go la, Yesu gblɔe ɖi be Petro aɖee afia be yeli ke abe agakpe ene. (Yohanes 1:42) Gake ɖe Kristo ɖo Petro ha la ƒe tatɔea?

Le Mateo 16:17, 18 la, Yesu gblɔ na Petro be: “Mele egblɔm na wò bena: Wòe nye Petro [si gɔmee nye “Kpe”], eye nenem kpe gbadza sia dzi matu nye ha la ɖo.” * Ðe Yesu nɔ gbɔgblɔm be yele yeƒe “ha” la tu ge ɖe Petro si nye amegbetɔ dzia? Eye ɖe Yesu nɔ gbɔgblɔm be Petro anye ye yomedzelawo katã ƒe tatɔa? Aleke apostolo siwo nɔ eteƒe la se Yesu ƒe nyawo gɔmee? Nyanyuigbalẽawo ɖee fia be emegbe la, apostoloawo ʋli nya le wo nɔewo dome enuenu ku ɖe ame si nye gãtɔ le wo dome ŋu. (Mateo 20:20-27; Marko 9:33-35; Luka 22:24-26) Ne ɖe Yesu ɖo Petro tatɔe na wo xoxo la, ɖe apostoloawo agaʋli nya le wo nɔewo dome ku ɖe ame si nye gãtɔ le wo dome ŋua?

Aleke Petro ŋutɔ se Yesu ƒe nyawo gɔmee? Esi Petro nye Israel-vi ta la, anɔ eme godoo be enya nu tso Hebri Ŋɔŋlɔawo me nyagblɔɖi siwo ƒo nu tso “kpe”  alo “dzogoekpe” aɖe ŋu la ŋuti. (Yesaya 8:13, 14; 28:16; Zakariya 3:9) Esi Petro ŋutɔ yɔ nya tso ŋɔŋlɔ mawo dometɔ ɖeka me le agbalẽ si wòŋlɔ na haxɔsetɔwo me la, eɖe nu me be “dzogoedzikpe” si ŋu nya wogblɔ ɖi lae nye Aƒetɔ Yesu Kristo, Mesia la. Le afi sia la, Petro zã Helagbe me nya si nye pe’tra (si nye nya si tututu Yesu zã le Mateo 16:18) la na Kristo la ɖeɖe ko.—1 Petro 2:4-8.

Apostolo Paulo hã nye Yesu yomedzela wɔnuteƒe bubu. Ðe Paulo xɔe se be Yesu ɖo Petro ha la ƒe tatɔea? Paulo lɔ̃ ɖe akpa si Petro wɔ le Kristo hamea me le gɔmedzedzea me dzi esi wòŋlɔ bena Petro nye ame siwo “wobuna bena, wonye sɔtiwo la” dometɔ ɖeka. Paulo kpɔe be menye ame ɖeka koe nye ‘sɔti’ le hamea me o. (Galatiatɔwo 2:9) Gakpe ɖe eŋu la, ne ɖe Yesu ɖo Petro ha la ƒe tatɔe la, ke nu ka tae wònye ame si haxɔsetɔwo susuna alo buna ko be enye sɔtiawo dometɔ ɖeka?

Esi Paulo ŋlɔ nu tso ale si Petro mewɔ nu ɖe amewo ŋu nyuie o ŋu la, eƒe agbalẽa me nya aɖe si wògblɔ bubutɔe evɔ wòyi nyaa gbɔ tẽe la yi ale: “Metsi tre ɖe eŋu le eya ŋutɔ ŋkume; elabena wotso enu.” (Galatiatɔwo 2:11-14) Paulo nyae be menye Petro alo amegbetɔ madeblibo aɖeke dzie Kristo tu eƒe ha la ɖo o. Ke boŋ exɔe se be Yesu Kristo tu eƒe ha la ɖe eya ŋutɔ ɖokui, si nye gɔmeɖoanyi la, dzi. Eya ta Paulo ka ɖe edzi be “kpe gbadza lae nye Kristo.”—1 Korintotɔwo 3:9-11; 10:4.

“WÒE NYE PETRO . . . ”

Ke aleke wòle be míase nya si nye, “Wòe nye Petro, eye nenem kpe gbadza sia dzi matu nye ha la ɖo,” gɔme? Hafi míate ŋu ase nuŋlɔɖi aɖe ƒe akpa sue aɖe gɔme la, ele be míaxlẽ nya siwo ƒo xlãe la katã. Nu ka ŋue Yesu kple Petro nɔ nu ƒom tsoe? Ðeko Yesu bia eƒe nusrɔ̃lawo be, “Ame kae miegblɔna bena, menye mahã?” vɔ teti koe nye ema. Petro ɖo eŋu enumake be: “Wòe nye Kristo, Mawu gbagbe la ƒe Vi!” Yesu kafu Petro eye eyome wògblɔ be yele yeƒe “ha,” alo hame la, tu ge ɖe “kpe gbadza” si li ke wu, si nye eya Yesu ŋutɔ, ame si dzi Petro ɖee fia be yeka ɖo teti koe nye ema la dzi.—Mateo 16:15-18.

Aleke wòle be míase Yesu ƒe nya si nye, “Wòe nye Petro, eye nenem kpe gbadza sia dzi matu nye ha la ɖo,” gɔme?

 “Sɔlemeha Fofo” geɖewo ƒe nuŋlɔɖiwo hã ɖo kpe edzi be kpe gbadza si dze le Mateo 16:18 lae nye Kristo. Le kpɔɖeŋu me, Augustine si nɔ anyi le ƒe alafa atɔ̃lia me la ŋlɔ bena: “Aƒetɔ la gblɔ be: ‘Kpe gbadza sia dzi matu nye Ha la ɖo,’ le nya si Petro gblɔ nɛ do ŋgɔ be, ‘Wòe nye Kristo, Mawu gbagbe la ƒe Vi’ ta. Esia fia be [Aƒetɔ la le gbɔgblɔm na Petro be] kpe gbadza sia si dzi nèxɔ se la dzie matu nye Ha la ɖo.” Augustine gblɔe zi gbɔ zi geɖe be “Kpe Gbadza (Petra) lae nye Kristo.”

Ne ɖe woatsɔ dzixɔse si le Katolikotɔwo si egbea adrɔ̃ ʋɔnu Augustine kple ame bubuwo la, woabu wo aglãdzelawoe. Le nyateƒe me la, Switzerlandtɔ mawunyaŋununyala Ulrich Luz gblɔ be le Vatikan Ƒe Adaŋudetakpekpea ƒe se si wòde le ƒe 1870 me nu la, woabu susu si dzi Biblia ŋuti nunyalawo da asi ɖo le nya sia me la be enye tsitretsitsi ɖe ha la ŋu.

PETRO TEƑENƆLAE PAPA LA NYEA?

Apostolo Petro menya naneke tso dzesideŋkɔ si nye “papa” ŋu o. Le nyateƒe me la, bisiɔp siwo menye Romatɔwo o la dometɔ geɖe tsɔa dzesideŋkɔ sia na wo ɖokuiwo kaka va ɖo ƒe alafa asiekelia me. Ke hã, womezãe wònye bubuŋkɔ tɔxɛ o, ke boŋ ƒe alafa 11 lia ƒe nuwuwu lɔƒo hafi dzesideŋkɔa va zu bubuŋkɔ tɔxɛ. Gakpe ɖe eŋu la, Kristotɔ gbãtɔwo dometɔ aɖeke mebui kpɔ be woɖo Petro hamea ƒe tatɔe eye ame bubu siwo ava ɖe eyome la anye eteƒenɔlawo o. Esia ta Germanytɔ agbalẽnyala Martin Hengel ƒo nya ta be, “naneke mele ŋutinya alo Ŋɔŋlɔawo me si dzi woanɔ te ɖo aɖee afia be ɖoɖo si wova wɔ be papa la nye ame si ‘ƒo ame sia ame ta’ la le eteƒe o.”

Azɔ aleke míaƒo nya tae? Petro ye nye papa gbãtɔa? Ðe ame aɖewo va nye eteƒenɔlawoa? Ðe Katolikotɔwo ƒe dzixɔse si nye be papa la nye hamea ƒe tatɔ la sɔ le Ŋɔŋlɔawo nua? Nyabiase siawo dometɔ ɖe sia ɖe ƒe ŋuɖoɖo si sɔ koe nye ao. Ke hã egakpɔtɔ nye nyateƒe matrɔmatrɔ be Yesu tu eƒe ha vavã la ɖe eya ŋutɔ ɖokui dzi. (Efesotɔwo 2:20) Eya ta nya vevi si wòle be míabia mía ɖokui ye nye be, Ðe meke ɖe ha vavã ma ŋua?

^ mm. 8 Biblia gɔmeɖeɖe si me mawunyakpukpui siwo katã míeyɔ le nyati sia me la tsoe nye Biblia Alo Ŋɔŋlɔ Kɔkɔe La—Le Eʋegbe Me, le esi wònye be Biblia sia ye Katolikotɔ geɖewo hã zãna ta.