Dzo kpo yi emenuwo dzi

Dzo kpo yi emenuawo dzi

‘Ame Si Sea Nu Gɔme Nyuie La, Medoa Dziku Kabakaba O’

‘Ame Si Sea Nu Gɔme Nyuie La, Medoa Dziku Kabakaba O’

Wonyà kɔledzi aɖe ƒe basketbɔl fiala le esi metea ŋu léa eƒe dziku nu o ta.

Ðevi aɖe le avi fam le eɖokui xlãm ɖe anyi le esi womewɔ eƒe didiwo dzi nɛ o ta.

Vidada aɖe kple viaŋutsuvi le ɣli dom ɖe wo nɔewo ta le esi ɖevia wɔ eƒe xɔ me nyamaa ta.

MÍ KATÃ míekpɔ ame wòdo dziku kpɔ, eye ɖikeke mele eme o be míawo ŋutɔwo hã míedoa dziku ɣeaɖewoɣi. Togbɔ be míabu dzikudodo be menyo o, eya ta mesɔ be míanɔ dziku dom o hã la, ne edze abe ame aɖe wɔ nu madzɔmadzɔ ɖe mía ŋu la, míesena le mía ɖokui me zi geɖe be mía tɔ dzɔ be míado dziku. Amerika Susuŋutinunyalawo Ƒe Habɔbɔ ŋlɔ nyati aɖe si gblɔ be “dziku nye seselelãme aɖe si sɔ le dzɔdzɔme nu, eye zi geɖe la, naneke megblẽ le eŋu o.”

Nuŋububu sia adze nu si sɔ ne míetsɔe sɔ kple nya si gbɔgbɔ ʋã Kristotɔ apostolo Paulo wòŋlɔ bena: “Mibi dzi, gake migawɔ nu vɔ̃ o; miaƒe dzibibi la naganɔ anyi ɣe naɖo to ɖe edzi o.” (Efesotɔwo 4:26) Eƒe nya siawo ɖee fia be elɔ̃ ɖe edzi be etea ŋu dzɔna ɣeaɖewoɣi be ame nado dziku. Le esia ta ɖe wòle be míado dziku kaɖikaɖi alo ɖe wòle be míadze agbagba alé enua?

ÐE WÒSƆ BE NÀDO DZIKUA?

Esi Paulo nɔ nuxlɔ̃amenya mawo gblɔm la, hakpala ƒe nyawoe nɔ susu me nɛ. Hakpala ŋlɔ bena: “Dzi neku mi, ke migawɔ nu vɔ̃ o!” (Psalmo 4:5) Gake susu ka tututue le megbe na Paulo ƒe nuxlɔ̃amea? Eyi edzi ɖe eme be: “Mina woaɖe ameléleɖedɔme kaɖikaɖi kple dɔmedzoe kple dziku kple ɣlidodo kpakple dzugbewo, ɖa le mia dome hekpe ɖe nu gbegblẽ wɔwɔ ɖe sia ɖe ŋu.” (Efesotɔwo 4:31) Le nyateƒe me la, ɖe Paulo nɔ nu xlɔ̃m Kristotɔwo be woagado dziku wòagbɔ eme o. Amerika Susuŋutinunyalawo Ƒe Habɔbɔa gblɔ yi edzi be: “Dziku si nu womelé o la doa gã ɖe edzi eye wònana wowɔa nu si gbɔ eme, eye esia mekpɔa . . . nyaa gbɔ o.”

Ke aleke míawɔ ‘aɖe’ dzikudodo ɖa ahaƒo asa na emetsonuwo katãa? Blema Israel fia nyanu Salomo ŋlɔ bena: ‘Ame si sea nu gɔme nyuie la, medoa dziku kabakaba o.’ (Lododowo 19:11) Aleke nugɔmesese ate ŋu akpe ɖe ame ŋu ne eƒe dzi ho?

ALE SI NUGƆMESESE NANA WOMEDOA DZIKU KABAKABA O

Nugɔmesese nye ŋutete si nana ame kpɔa nu yia ŋgɔ. Be wòase nu gɔme fia be ame nase nya  siwo katã ku ɖe nudzɔdzɔ aɖe ŋu la gɔme. Aleke esia nyanya akpe ɖe mía ŋu ne wodo dziku na mí alo di nya le mía ŋu?

Ne wowɔ nu madzɔmadzɔ ɖe mía ŋu la, míate ŋu ado dziku. Gake ne míeɖe mɔ na dzikua, alo wɔ nu wògbɔ eme la, míate ŋu agblẽ nu le mía ɖokui kple ame bubuwo ŋu. Abe ale si ko dzo ate ŋu afia aƒe blibo ne womelé enu o ene la, nenema kee ne míelé míaƒe dziku nu o la, ate ŋu aklo bubu ɖa le mía ŋu eye mí kple ame bubuwo dome agblẽ, eye wòagblẽ mí kple Mawu dome ƒomedodo gɔ̃ hã me. Eya ta ne míaƒe dzi ho la, ɣemaɣi tututue wòle be míagbɔ dzi ɖi alé ŋku ɖe nya ŋu nyuie. Ne míese nya bliboa gɔme nyuie la, esia akpe ɖe mía ŋu míalé míaƒe dzikua nu.

Salomo fofo Fia David kɔ ʋu ɖi kloe le nya aɖe si dzɔ ɖe wo kple ŋutsu aɖe si ŋkɔe nye Nabal dome. David da akpe be wokpe ɖe ye ŋu yeva se nya bliboa gɔme. David kple eƒe amewo kpɔ Nabal ƒe lãhawo ta le Yudea-gbedzi. Esi David se be Nabal va fu ko ge na eƒe lãhawo la, edɔ ame ɖo ɖee be wòana nuɖuɖu yewo. Nabal ɖo eŋu be: “Ðe matsɔ nye nuɖuɖu kple nye nunono kpakple lã, si mewu na nye fukolawo la, na ame siwo nyemenya afi si wotso oa?” Gbedaɖeamegbɔ ka gbegbee nye esi! Esi nya va ɖo to me na David la, eɖe ame 400 kpe ɖe eɖokui ŋu eye wodze mɔ be yewoaɖatsrɔ̃ Nabal kple eƒe aƒemetɔwo katã.1 Samuel 25:4-13.

Esi Nabal srɔ̃ Abigail se nya si dzɔ la, edze mɔ yi ɖakpe David. Esi wòdo go David kple eƒe amewo la, edze klo ɖe eƒe afɔ nu gblɔ bena: “Na wò dɔlanyɔnu naƒo nu ɖe wò to me, eye se wò dɔlanyɔnu ƒe gbe!” Eyome egblɔ na David be movitɔe Nabal nye eya ta ne ebia hlɔ̃ na eɖokui hekɔ ʋu ɖi la ava vee emegbe.1 Samuel 25:24-31.

Aleke Abigail ƒe nyawo na David se nya bliboa gɔme si na eƒe dzikua nu fa? Gbã la, eva de dzesii be movitɔe Nabal nye, eye evelia David kpɔe be hlɔ̃biabia ana yeaɖi ʋufɔ. Abe David ene la, nane ate ŋu ado dziku na mí vevie. Nu kae wòle be míawɔ? “Gbɔ fuu eye naxlẽ ɖeka, eve, etɔ̃ va se ɖe ewo.” Aɖaŋuɖoɖo siae dze le nyati aɖe si ku ɖe ale si woalé dziku nui ŋu si kɔdzi si nye Mayo Clinic ŋlɔ la me. Nyateƒee, gbɔ dzi ɖi nàbu nu si he kuxia vɛ kple nu si ado tso afɔ si nàɖe la me ŋu nyuie. Na nuŋububu alea nakpe ɖe ŋuwò nàlé wò dzikua nu alo nàɖe asi le nya ŋu kura.1 Samuel 25:32-35.

Wokpe ɖe ame geɖewo ŋu egbea hã woɖu woƒe dziku dzi. Sebastian gblɔ ale si Biblia-sɔsrɔ̃ kpe ɖe eŋu wòsrɔ̃ ale si wòaɖu dziku kple eƒe seselelãmewo dzi le Polandtɔwo ƒe gaxɔ me esime wòxɔ ƒe 23. Egblɔ be: “Gbã la, medea ŋugble le kuxia ŋu. Eyome medzea agbagba be mawɔ ɖe Biblia ƒe aɖaŋuɖoɖowo dzi. Meva kpɔe be Bibliae nye mɔfiamegbalẽ nyuitɔ kekeake.”

Biblia ƒe aɖaŋuɖoɖowo dzi wɔwɔ akpe ɖe ŋuwò nàɖu ɖokuiwò dzi

Setsuo hã wɔ nu sia tɔgbi. Egblɔ be: “Medoa ɣli ɖe amewo ta le dɔme ne wodo dziku nam. Gake fifia esi meva srɔ̃ Biblia la, le esi teƒe be mado ɣli la mebia ɖokuinye be: ‘Ame ka ƒe agɔdzedzee? Ðe manye nye ŋutɔ gbɔnyee kuxia tso oa?’” Ne ebu nuwo ŋu alea la, ekpena ɖe eŋu wòɖua eɖokui dzi ale be eƒe dzi megahona wòdoa dziku helĩhelĩ o.

Nu si hoa dzi na ame nu ate ŋu asẽ, gake ŋusẽ geɖe le aɖaŋuɖoɖo si tso Mawu ƒe Nya Biblia me ŋu wu. Ne èwɔna ɖe Biblia ƒe aɖaŋuɖoɖo si me nunya le dzi eye nèdoa gbe ɖa biaa Mawu ƒe kpekpeɖeŋu la, gɔmesese ate ŋu akpe ɖe wò hã ŋuwò nàle dziku nu alo aɖu edzi kura.