Mawuli: Dodzi, èfɔa? Edzɔ dzi nam be míegado go.

Dodzi: Mefɔ; edzɔ dzi na nye hã be nèva.

Mawuli: Metsɔ Gbetakpɔxɔ kple Nyɔ! ƒe tata yeyeawo vɛ na wò. Meka ɖe edzi be wo me nyawo ado dzidzɔ na wò ŋutɔ.

Dodzi: Akpe. Enyo ŋutɔ be èva egbea, elabena nya aɖe le asinye medi be mabia wò.

Mawuli: Nyateƒea? Nya kae?

Dodzi: Meɖo dze kple nye dɔwɔhati aɖe nyitsɔ. Meƒo nu tso agbalẽ siwo nènam la ŋu nɛ eye megblɔ nɛ be agbalẽawo nyo ŋutɔ. Gake egblɔ nam be magaxlẽ wo o, elabena Yehowa Ðasefowo mexɔ Yesu dzi se o. Nyateƒee wòtoa? Megblɔ nɛ be ne ègatrɔ va la, mabia wò.

Mawuli: Tsitsiawo gblɔna be, segblɔ medea hadzila ƒe gbe nu o, eya ta èwɔe nyuie be èbia nya siam. Ne èdi be yeanya nu si dzi ame aɖe xɔ se la, ɖe menye amea ŋutɔe wòle be nàbia oa?

Dodzi: Nenemae mesusui.

Mawuli: Nyateƒeae nye be, Yehowa Ðasefowo xɔ Yesu dzi se bliboe. Míexɔe se be ele vevie be ame naxɔ Yesu dzi ase hafi akpɔ ɖeɖe.

Dodzi: Nye hã mesusui nenema, gake esi nye dɔwɔhatia gblɔ be miexɔ Yesu dzi se o tae medi be mabia wò ŋutɔ ɖo. Nyemeka ɖe edzi be mía kpli wò míedzro nya sia me kpɔ o.

Mawuli: Ðe manyo be míaxlẽ mawunyakpukpui aɖewo siwo ɖee fia be ele vevie be míaxɔ Yesu dzi se la le Biblia me oa? Yehowa Ðasefowo zãa mawunyakpukpui siawo zi geɖe le woƒe gbeƒãɖeɖedɔa me.

Dodzi: Adzɔ dzi nam.

Mawuli: Gbã la, míaxlẽ nya si Yesu ŋutɔ gblɔ le Yohanes 14:6. Esi Yesu nɔ dze ɖom kple eƒe apostolowo dometɔ ɖeka ye wògblɔ nya sia. Afi ma xlẽ be: “Yesu gblɔ nɛ be: ‘Nyee nye mɔ la kple nyateƒe la kpakple agbe la. Ame aɖeke mevaa Fofo la gbɔ o, negbe to dzinye ko.’” Le mawunyakpukpui sia ƒe nya nu la, mɔ ɖeka kolia si dzi míato ate ɖe Fofo la ŋue nye ka?

Dodzi: Eyae nye to Yesu dzi.

Mawuli: Ègblɔe nyuie. Eye Yehowa Ðasefowo xɔ nya ma dzi se ŋutɔ. Na mabia nya sia wò: Le nu siwo nènya tso Mawu ŋu nu la, ame ka ƒe ŋkɔ mee wòle be míado gbe ɖa le?

Dodzi: Le Yesu ƒe ŋkɔ me.

Mawuli: Nenemae. Esia tae medoa gbe ɖa le Yesu ƒe ŋkɔ me ɣesiaɣi ɖo. Eye Yehowa Ðasefowo katã hã doa gbe ɖa le Yesu ƒe ŋkɔ me.

Dodzi: Eme kɔ.

Mawuli: Mawunyakpukpui bubu si ŋu wòle be míade ŋugble lee nye Yohanes 3:16. Mawunyakpukpui sia le vevie ale gbegbe be wogblɔna be eyae ɖe Nyanyuigbalẽawo me nyawo katã gblɔ kpuie wu. Esia fia be, ne woagblɔ Yesu ƒe anyigbadzigbenɔnɔ kpakple eƒe subɔsubɔdɔ ŋuti nya bliboa kpuie ko la, ke mawunyakpukpui sia me nyawoe wòanye. Ðewohĩ àdi be yeaxlẽ kpukpui sia, alo?

 Dodzi: Ɛ̃. Afi ma xlẽ be: “Elabena Mawu lɔ̃ xexea ale gbegbe be wòtsɔ eƒe Tenuvi la na, bene ame sia ame si ɖenɛ fiana be yexɔ edzi se la nagatsrɔ̃ o, ke boŋ wòakpɔ agbe mavɔ.”

Mawuli: Akpe. Èse mawunyakpukpui sia me nyawo kpɔ ɖe?

Dodzi: Ɛ̃, mesee zi geɖe, eye mekpɔnɛ woŋlɔnɛ ɖe boblodoʋuƒowo hã dzi.

Mawuli: Ɛ̃, mawunyakpukpui nyanyɛe wònye. Na míagalé ŋku ɖe nya si Yesu gblɔ la ŋu nyuie. Egblɔ be ale si Mawu lɔ̃ ameƒomea ye na wòʋu agbe mavɔ nɔnɔ ƒe mɔnukpɔkpɔ ɖi na mí—gake nu kae esia bia tso mía si?

Dodzi: Ebia be xɔse nanɔ mía si.

Mawuli: Nenemae. Ele vevie be míaxɔ Mawu ƒe Tenuvi, Yesu Kristo, dzi ase. Eye magazine sia si metsɔ vɛ na wò ƒe axa 2 lia ɖe nyateƒe si wònye be ele be míaxɔ Yesu dzi se hafi akpɔ agbe mavɔ la me nyuie. Taɖodzinu siwo ta wotaa Gbetakpɔxɔ magazinea ɖo dometɔ ɖekae nye be “edea dzi ƒo na amewo be woaxɔ Yesu Kristo, si ku ɖe mía ta bene agbe mavɔ nasu mía si, eye wònye Mawu Fiaɖuƒea ƒe Fia si le dzi ɖum fifia la, dzi ase.”

Dodzi: Mese egɔme nyuie azɔ. Miaƒe magazinea ŋutɔ hã ɖo kpe edzi be Yehowa Ðasefowo xɔ Yesu dzi se.

Mawuli: Nenema tututue.

Dodzi: Ekema nu ka tae amewo gblɔna be miexɔ Yesu dzi se o?

Mawuli: Anɔ eme be susu vovovowo tae wogblɔa nya ma ɖo. Le ame aɖewo gome la, esi wose nya ma le ame bubuwo nu ta koe woawo hã wogblɔnɛ ɖo. Alo anɔ eme be woƒe nunɔlawoe gblɔ alakpanya ma wose.

Dodzi: Ewɔ na nye hã be esi mieyɔa mia ɖokuiwo be Yehowa Ðasefowo, ke menye Yesu ƒe Ðasefowo o tae amewo gblɔa nya ma ɖo.

Mawuli: Ema hã ate ŋu anye susu bubu.

Dodzi: Ke nu ka tae mieƒoa nu tso Yehowa ŋu alea gbegbe ɖo?

Mawuli: Susu ɖekae nye be, míexɔe se be ele vevie be woazã Mawu ƒe ŋkɔ ŋutɔŋutɔ, si nye Yehowa, abe ale si ko Mawu ƒe Vi, Yesu hã zãe ene. Na míadzro nya aɖe si Yesu gblɔ na Fofoa le gbedodoɖa me la me kpɔ. Nya ma dze le Yohanes 17:26. Àdi be yeaxlẽ mawunyakpukpui sia na mía?

Dodzi: Faa. Exlẽ be: “Mena wonya wò ŋkɔ la, eye mana woanyae, ale be lɔlɔ̃ si nètsɔ lɔ̃m la nanɔ wo me, eye manɔ ɖekawɔwɔ me kpli wo.”

Mawuli: Akpe. De dzesii be Yesu gblɔ be yena wonya Mawu ƒe ŋkɔ. Èsusu be nu ka tae Yesu wɔ esia ɖo?

Dodzi: Hũm. Nyemenya o.

Mawuli: Enyo. Ðewohĩ, anyo be míaxlẽ mawunyakpukpui bubu aɖe si akɔ nya sia me. Esi le susu me namee nye Dɔwɔwɔwo 2:21. Afi ma xlẽ be: “Ame sia ame si yɔa Yehowa ƒe ŋkɔ la, woaɖee.” Azɔ meka ɖe edzi be àlɔ̃ ɖe edzi be ne Yehowa ƒe ŋkɔa yɔyɔ le vevie be ame nakpɔ ɖeɖe la, ke esia anɔ nyanya na Yesu godoo, alo?

Dodzi: Ɛ̃, mekpɔe nenema.

Mawuli: Eya ta Yesu yomedzelawo ƒe ɖeɖekpɔkpɔe nye susu vevi siwo tae wòkpɔe be ele be woanya Mawu ƒe ŋkɔ ahazãe la dometɔ ɖeka. Eye eya hã nye susu vevi siwo tae míeƒoa nu tso Yehowa ŋu alea gbegbe ɖo la dometɔ ɖeka. Míekpɔe be ele vevie be míana amewo nanya Mawu ƒe ŋkɔa, eye míakpe ɖe wo ŋu be woayɔe hã.

Dodzi: Gake ne amewo menya Mawu ƒe ŋkɔa alo yɔ ŋkɔa tẽe o hã la, ne wonya yɔ Mawu ko la, wonyaa Mawu si wowɔnɛ.

Mawuli: Ate ŋu anɔ eme nenema. Gake esi Mawu na míenya eƒe ŋkɔa la, esia na wòle bɔbɔe na mí be míate ɖe eŋu.

Dodzi: Le mɔ ka nu?

 Mawuli: Bu nya sia ŋu kpɔ: Mahiã kokoko be míanya Mose ƒe ŋkɔ hafi o. Míate ŋu anyae ko be eyae nye ame si ma Ƒudzĩa me alo ame si xɔ Se Ewoawo. Nenema kee wòle le Noa hã gome—ɖe wòhiã kokoko be míanya eƒe ŋkɔa? Woate ŋu agblɔ ko be eyae nye ame si kpa aɖakaʋua eye wòto esia dzi xɔ eƒe ƒomea kple lã geɖewo ɖe agbe. Ne ele alea la, ke ɖeko wòle be woagblɔ tso Yesu Kristo hã ŋu be eyae nye ame si tso dziƒo va ku ɖe míaƒe nu vɔ̃wo ta. Alo?

Dodzi: Ewɔ nam nenema.

Mawuli: Gake Mawu na míenya ame mawo ƒe ŋkɔwo. Woƒe ŋkɔwo nyanya na míebua wo be wonye ame siwo nɔ anyi kpɔ. Gake togbɔ be míekpɔ Mose, Noa, alo Yesu ŋkume kple ŋkume kpɔ o hã la, woƒe ŋkɔwo ɖeɖe nyanya wɔe be míeka ɖe edzi be wonɔ anyi kpɔ ŋutɔŋutɔ.

Dodzi: Nyemebu eŋu alea ya kpɔ o, gake eme kɔ!

Mawuli: Eye esia hã ganye susu bubu si tae Yehowa Ðasefowo yɔa Mawu ƒe ŋkɔa nenema gbegbe ɖo. Míedi be míakpe ɖe amewo ŋu woaxɔ Yehowa Mawu dzi ase ahaka ɖe edzi be enye Ame si li ŋutɔŋutɔ, si ŋu woate ŋu ate ɖo. Le ɣeyiɣi ma ke me la, míetea gbe ɖe akpa si wɔm Yesu le hena míaƒe ɖeɖekpɔkpɔ la dzi vevie. Ðewohĩ anyo be míagaxlẽ mawunyakpukpui bubu aɖe si ana míase nya sia gɔme nyuie.

Dodzi: Faa.

Mawuli: Do ŋgɔ la, míexlẽ Yohanes 14:6. Ðo ŋku edzi be Yesu gblɔ le afi ma be “nyee nye mɔ la kple nyateƒe la kpakple agbe la.” Azɔ na míaxlẽ nya aɖe si wògblɔ do ŋgɔ le Yohanes 14:1. Meɖe kuku, àte ŋu axlẽ nya si Yesu gblɔ le mawunyakpukpui sia ƒe akpa evelia?

Dodzi: Ɛ̃. Afi ma gblɔ be: “Mixɔ Mawu dzi se, eye mixɔ nye hã dzinye se.”

Mawuli: Akpe. Azɔ ɖe nàgblɔ be xɔse vavãtɔ fia be míaxɔ Yesu dzi se aɖe asi le Yehowa ŋu alo míaxɔ Yehowa dzi se ahaŋlɔ Yesu bea?

Dodzi: Ao. Yesu gblɔ be míaxɔ wo ame evea siaa dzi ase.

Mawuli: Èɖo eŋu nyuie. Eye meka ɖe edzi be àlɔ̃ ɖe edzi be esia bia be míawɔ nu geɖe wu gbɔgblɔ ko be míexɔ Mawu kple Yesu dzi se. Le nyateƒe me la, ele be míaƒe agbenɔnɔ naɖee afia be míexɔ wo dzi se vavã.

Dodzi: Nenema tututue.

Mawuli: Gake aleke tututue ame ate ŋu aɖee afia be yexɔ Mawu kple Yesu dzi se? Ðewohĩ anyo be míava dzro nya sia me ɣebubuɣi, alo? *

Dodzi: Ɛ̃, anyo nenema.