Dzo kpo yi emenuwo dzi

Dzo kpo yi emenuawo dzi

 NYATI SI LE AKPAA DZI

Ðe Wòhiã Be Nàdo Gbe Ða?

Ðe Wòhiã Be Nàdo Gbe Ða?

Ðewohĩ àbia be, ‘Ne Mawu nya nu sia nu eye wònya nye susuwo kple nye hiahiãwo la, ke nu ka tae wòhiã be magado gbe ɖa?’ Biabia ma le eteƒe. Ðe Yesu ŋutɔ megblɔ be Mawu “nya nu siwo le mia hiãm hafi mieva bianɛ gɔ̃ hã” oa? (Mateo 6:8) Blema Israel Fia David hã kpɔ esia dze sii, eye wòŋlɔ bena: “Nya aɖeke mele nye aɖe dzi o, kpɔ ɖa, Yehowa, ènya wo keŋ.” (Psalmo 139:4) Ke nu ka tae wògahiã be míado gbe ɖa na Mawu? Be míaɖo nya ma ŋu la, na míadzro nya si Biblia gblɔ tso Mawu subɔlawo ƒe gbedodoɖawo ŋu la me kpɔ. *

“Mite ɖe Mawu ŋu, eye ate ɖe mia ŋu.”Yakobo 4:8

 GBEDODOÐA TEA MÍ ÐE MAWU ŊU

Togbɔ be Biblia gblɔ be Yehowa * Mawu nya nu sia nu hã la, ena míenya hã be menye esubɔlawo nyanya gbadzaa koe le vevie nɛ o. (Psalmo 139:6; Romatɔwo 11:33) Kɔmpiuta tea ŋu dzraa amewo ŋuti nyatakaka geɖe ɖo, gake menyaa ameawo o, ke hã Mawu ya mele nenema o. Menye ɖeko Mawu nya mí nyuie ko o, ke etsɔ ɖe le míaƒe dzimesusuwo hã me, elabena edi be míate ɖe ye ŋu. (Psalmo 139:23, 24; Yakobo 4:8) Esia tae Yesu de dzi ƒo na eyomedzelawo be woado gbe ɖa na ye Fofo ɖo, togbɔ be Enya míaƒe hiahiãwo nyuie hã. (Mateo 6:6-8) Zi ale si míeɖea míaƒe susuwo gblɔna na mía Wɔla la, zi nenemae míanɔ tetem ɖe eŋu kplikplikpli.

Ɣeaɖewoɣi la, míenyaa nu si tututu míabia le gbedodoɖa me o. Ne edzɔ alea la, esi Mawu nya nɔnɔme si me tom míele nyuie ta la, etea ŋu dea dzesi míaƒe dzimesusu siwo míete ŋu ɖe gblɔ o la eye wòwɔa nu siwo hiã mí la na mí. (Romatɔwo 8:26, 27; Efesotɔwo 3:20) Ne míekpɔ ale si Mawu kpena ɖe mía ŋu le nu suewo gɔ̃ hã me la, esia tea mí ɖe eŋu.

ÐE MAWU ÐOA GBEDODOÐAWO KATÃ ŊUA?

Biblia ka ɖe edzi na mí be Mawu Ŋusẽkatãtɔ la ɖoa esubɔla wɔnuteƒewo ƒe gbedodoɖawo ŋu, gake egana míenya susu siwo tae meɖoa gbedodoɖawo aɖewo ŋu o. Le kpɔɖeŋu me, esi ŋutasẽnuwɔwɔ va do agbogbo le blema Israel la, Mawu dɔ nyagblɔɖila Yesaya be wòagblɔ na dukɔa be: “Ne mieli kɔ gbedodoɖa gleglegle hã la, nyemasee o, elabena ʋu yɔ asi me na mi!” (Yesaya 1:15) Eme kɔ ƒãa be Mawu meɖoa to ame siwo doa vlo eƒe sewo la ƒe gbedodoɖawo o, eye meɖoa to ame siwo medoa gbe ɖa kple susu nyui o la hã o.Lododowo 28:9; Yakobo 4:3.

Le go bubu me la, Biblia gblɔ be: “Nu sia nu si míabia wòawɔ ɖeka kple eƒe lɔlɔ̃nu la, aɖo to mí.” (1 Yohanes 5:14) Gake ɖe esia fia be Mawu awɔ nu ɖe sia ɖe si esubɔlawo abiae la na wo godooa? Mefia nenema kokoko o. Le kpɔɖeŋu me, apostolo Paulo ɖe kuku na Mawu zi etɔ̃ sɔŋ be wòaɖe ‘ŋu aɖe si le yeƒe ŋutilã me’ la ɖa. (2 Korintotɔwo 12:7, 8) Ate ŋu anɔ eme be ŋkudɔ aɖe si gbe vɔvɔ lae nɔ fu ɖem na Paulo. Esia ate ɖe edzi ŋutɔ! Elabena wona dɔyɔyɔ ƒe nunana Paulo eye wòfɔ ame aɖe si ku la gɔ̃ hã ɖe tsitre, ke hã ele be wòado dzi le eya ŋutɔ ƒe dɔlélea me. (Dɔwɔwɔwo 19:11, 12; 20:9, 10) Togbɔ be Mawu meɖo Paulo ƒe gbedodoɖawo ŋu nɛ le mɔ si nu wòdii le o hã la, ekpɔ ŋudzedze ɖe ale si Mawu ɖo eŋu nɛ la ŋu.2 Korintotɔwo 12:9, 10.

“Kakaɖedzi si le mía si ku ɖe eŋu lae nye esi: be nu sia nu si míabia wòawɔ ɖeka kple eƒe lɔlɔ̃nu la, aɖo to mí.”—1 Yohanes 5:14

Enye nyateƒe be Mawu ɖo ame siwo ŋu Biblia ƒo nu tsoe la dometɔ aɖewo ƒe gbedodoɖawo ŋu nukutɔe ya. (2 Fiawo 20:1-7) Ke hã le Biblia ŋlɔɣiwo gɔ̃ hã la, ƒãa hafi esia dzɔna. Esi wòwɔ na mawusubɔla aɖewo be Mawu meɖo yewoƒe gbedodoɖawo ŋu na yewo o la, ete ɖe wo dzi. Fia David bia be: “Yehowa, va se ɖe ɣekaɣi nàŋlɔm be ɖikaɖika?” (Psalmo 13:2) Gake esi nuteƒewɔla David ɖo ŋku ale si Yehowa ɖee le afɔku me zi geɖe dzi la, egblɔ nya siwo ɖo kpe ale si wòɖoa ŋu ɖe Mawu ŋui la dzi. Egblɔ le gbedodoɖa ma ke me be: “Ke nyea mele ŋu ɖom ɖe wò amenuveve ŋu.” (Psalmo 13:6) Abe David ene la, ate ŋu ahiã ɣeaɖewoɣi be Mawu subɔla siwo li egbea nanɔ gbedodoɖa dzi madzudzɔmadzudzɔe va se ɖe esime wode dzesii be Mawu ɖo yewoƒe gbedodoɖawo ŋu na yewo.Romatɔwo 12:12.

 ALE SI MAWU ÐOA GBEDODOÐAWO ŊUI

Mawu naa nu siwo hiã mí ŋutɔŋutɔ la mí.

Dzila lɔ̃amewo ate ŋu atso nya me be yewomawɔ nu si yewo viwo bia la na wo enumake o, le susu nyui aɖewo ta. Nenema kee wòate ŋu adzɔ be Mawu mawɔ nu si míebiae la na mí le mɔ si míedii nu alo le ɣeyiɣi si me míele mɔ kpɔm nɛ o. Gake míate ŋu aka ɖe edzi be mía Wɔla la ana nu siwo míehiã ŋutɔŋutɔ la mí le mɔ nyuitɔ nu kple ɣeyiɣi nyuitɔ dzi, abe ale si vifofo lɔ̃ame wɔnɛ ene.Luka 11:11-13.

Mawu ate ŋu aɖo gbe si míedo ɖa be wòakpe ɖe mía ŋu la ŋu to Biblia dzi

Mawu ate ŋu aɖo míaƒe gbedodoɖawo ŋu le mɔ si menya kpɔna dzea sii bɔbɔe o nu.

Ke ne míedo gbe ɖa be Mawu nana gbɔdzɔe mí tso xaxa aɖe si me tom míele me ya ɖe? Ne Yehowa meɖo eŋu nukutɔe o ko la, ɖe míaƒo nya ta be meɖo eŋu kura oa? Ao, ke boŋ anyo be míabia mía ɖokui be ɖe Mawu le kpekpem ɖe mía ŋu le mɔ aɖewo siwo míekpɔ dze sii haɖe o nu hã. Le kpɔɖeŋu me, ɖewohĩ xɔlɔ̃ aɖe si tsɔ ɖe le eme na mí la wɔ nu si wòate ŋui tsɔ kpe ɖe mía ŋu le ɣeyiɣi nyuitɔ dzi. (Lododowo 17:17) Ðe wòanye be Yehowa ye ʋã mía xɔlɔ̃ ma be wòava kpe ɖe mía ŋua? Tsɔ kpe ɖe eŋu la, Mawu ate ŋu aɖo gbe si míedo ɖa be wòakpe ɖe mía ŋu la ŋu to Biblia dzi. Ðewohĩ míakpɔ nunya si míehiã be míado dzi le míaƒe xaxaa me la le Biblia me.2 Timoteo 3:16, 17.

Mawu ate ŋu ato xɔlɔ̃ lɔ̃amewo dzi akpe ɖe mía ŋu le ɣeyiɣi si sɔ nyuie la dzi

Menye ɣesiaɣie Mawu ɖea kuxi si le fu ɖem na mí la ɖa o, ke boŋ zi geɖe la, edoa ŋusẽ mí be míado dzi. (2 Korintotɔwo 4:7) Le kpɔɖeŋu me, esi Yesu ɖe kuku na Fofoa be wòaxe mɔ ɖe xaxa aɖe si me to ge yele nu, le esi wònɔ vɔvɔ̃m be ahe vlododo ava Mawu ƒe ŋkɔa dzi ta la, Yehowa dɔ mawudɔla aɖe ɖa be wòado ŋusẽ ye Via. (Luka 22:42, 43) Nenema kee Mawu ate ŋu ato mía xɔlɔ̃ kplikplikpli aɖe dzi ade dzi ƒo na mí le ɣeyiɣi si tututu míehiãe la dzi. (Lododowo 12:25) Esi míekpɔnɛ dzea sii bɔbɔe be aleae Mawu le míaƒe gbedodoɖaa ŋu ɖom na mí o ta la, ahiã be míanɔ ŋudzɔ hafi ate ŋu ade dzesii.

Mawu ɖoa gbedodoɖa aɖewo ŋu le eya ŋutɔ ƒe ɣeyiɣi dzi.

Biblia gblɔ be Mawu Ŋusẽkatãtɔ la vea ɖokuibɔbɔlawo nu “le ɣeyiɣi si sɔ la dzi.” (1 Petro 5:6) Eya ta ne edze abe ɖe Mawu mele míaƒe gbedodoɖa ŋu ɖom na mí kaba o la, mele be míasusui be ɖe Yehowa metsɔ ɖeke le eme na mí o tae o. Ke boŋ esi mía Wɔla lɔ̃ame la ƒe nunya de ŋgɔ sãsãsã wu mía tɔ ta la, ɖikeke mele eme o be ebu míaƒe biabiaa ŋu nyuie henya ale si wòaɖo eŋu be wòaɖe vi na mí bliboe.

“Eya ta mibɔbɔ mia ɖokui ɖe Mawu ƒe asi sesẽ la te, bene wòado mi ɖe dzi le ɣeyiɣi si sɔ la dzi.”—1 Petro 5:6

Le kpɔɖeŋu me: Tsɔe be viwòŋutsuvi bia wò be nàƒle gasɔ na ye. Àƒlee nɛ le esi wòbia wò ko ta? Ne èkpɔe be viwòa ƒe mo mefa be wòado gasɔ haɖe o la, ɖewohĩ àtso nya me be yemaƒlee nɛ fifia o. Ke hã ɖewohĩ àva ƒlee nɛ le ɣeyiɣi aɖe megbe ne èva kpɔe be aɖe vi nɛ. Nenema kee Mawu hã ate ŋu ana ‘nu si míaƒe dzi di,’ siwo sɔ, la mí le ɣeyiɣi nyuitɔ dzi ne míeyi edzi le gbe dom ɖa.Psalmo 37:4.

KA ÐE EDZI BE YEHOWA ÐOA TO GBEDODOÐA

Biblia de dzi ƒo na Kristotɔ vavãwo be woaka ɖe edzi be gbedodoɖa ɖea vi. Ðewohĩ ame aɖewo agblɔ be, ‘Nya sia gbɔgblɔ le bɔbɔe wu edziwɔwɔ.’ Nyateƒee, ne míele dzi dom le kuxi aɖe si le nuxaxa dom na mí me alo le nu madzɔmadzɔ aɖe si wowɔ ɖe mía ŋu ta la, ate ŋu asesẽ na mí be míakpɔ Mawu si nu. Gake anyo be míaɖo ŋku nya si Yesu gblɔ ku ɖe gbedodoɖa madzudzɔmadzudzɔe ŋu la dzi.

 Yesu wɔ kpɔɖeŋu aɖe ku ɖe ahosi dahe aɖe si nɔa ʋɔnudrɔ̃la madzɔmadzɔ aɖe gbɔ yim enuenu be wòatso afia na ye la ŋu. (Luka 18:1-3) Togbɔ be ʋɔnudrɔ̃laa melɔ̃ gbã be yeakpe ɖe eŋu o hã la, eva gblɔ na eɖokui mlɔeba be: “Makpɔ egbɔ be wodrɔ̃ ʋɔnu dzɔdzɔe nɛ godoo, ale be wòagayi edzi anɔ vavam, ava de fe ŋkume nam o.” (Luka 18:4, 5) Nu si tae ʋɔnudrɔ̃laa va tso nya me be yeakpe ɖe ahosia ŋue nye be ‘wòagava de fe ŋkume na ye o,’ si fia be “wòagava gblẽ ŋkɔ na [ye] o.” * Ne ʋɔnudrɔ̃la madzɔmadzɔ gɔ̃ hã xa ɖe bubu si aklo le eŋu ta eye wòkpe ɖe ahosi dahea ŋu la, ke ɖe Mawu si tsɔa ɖe le eme na mí ya madrɔ̃ ʋɔnu dzɔdzɔe na ame “siwo doa ɣli nɛ zã kple keli” la geɖe wu oa? Abe ale si Yesu gblɔe ene la, Mawu “ana woadrɔ̃ ʋɔnu dzɔdzɔe na wo kaba.”Luka 18:6-8.

“Minɔ ebiabia dzi, eye woana mi.”—Luka 11:9

Togbɔ be ɣeaɖewoɣi la, ɖeɖi ate ŋu ate mía ŋu le kpekpeɖeŋu alo amenuveve biabia me hã la, mele be míana ta o. Ne míedoa gbe ɖa madzudzɔmadzudzɔe la, ekema míeɖenɛ fiana be míedi vavã be Mawu nakpe ɖe mía ŋu. Azɔ hã, míasrɔ̃ ale si míawɔ anya ne Mawu ɖo míaƒe gbedodoɖawo ŋu na mí; esia awɔe be míagate ɖe eŋu kplikplikpli wu. Ɛ̃, míate ŋu aka ɖe edzi be Yehowa aɖo míaƒe gbedodoɖa siwo wɔ ɖeka kple eƒe lɔlɔ̃nu la ŋu ne míeyia edzi bianɛ le xɔse me.Luka 11:9.

^ mm. 3 Ne míedi be Mawu nase míaƒe gbedodoɖawo la, ele be míadze agbagba atsɔ dzi blibo awɔ nu siwo wòdi tso mía si. Ne míewɔe alea la, ekema míawo hã míakpɔe be gbedodoɖa ɖea vi, abe ale si míadzro eme le nyati sia me ene. Àte ŋu axlẽ nu geɖe tso nya sia ŋu le agbalẽ sia si nye Nuka Tututue Nye Biblia ƒe Nufiafia? ƒe ta 17 lia, si Yehowa Ðasefowo ta la me, alo le Internet dzi le www.jw.org.

^ mm. 5 Biblia na míenya be Mawu ƒe ŋkɔe nye Yehowa.

^ mm. 22 Le Biblia ŋlɔɣiwo la, Mawu bia tso Israel ƒe ʋɔnudrɔ̃lawo si be woawɔ nu ɖe ahosiwo kple tsyɔ̃eviwo ŋu nyuie.5 Mose 1:16, 17; 24:17; Psalmo 68:6.