Dzo kpo yi emenuwo dzi

Dzo kpo yi emenuawo dzi

Biblia Me Biabiawo Ƒe Ŋuɖoɖowo

Biblia Me Biabiawo Ƒe Ŋuɖoɖowo

Ðe wòanya wɔ be míanɔ agbe tegbeea?

Ðoɖo kae Mawu wɔ be yeatsɔ aɖe mí tso ku si me?

Ame gbãtɔ Adam nɔ agbe ƒe alafa geɖewo. Gake eva tsi, ku amegã heku. Tso ɣemaɣi la, amegbetɔwo te mɔnu vovovowo kpɔ be woana yewoanɔ agbe ɖaa. Gake wo dometɔ aɖeke mete ŋu ɖo taɖodzinu ma gbɔ o. Nu ka tae? Esi Adam gbe toɖoɖo Mawu hewɔ nu vɔ̃ tae wòva tsi ku amegã heku ɖo. Egbea, míawo hã míetsina kua amegã hekuna elabena míenyi nu vɔ̃ kple emetsonu, si nye ku, la dome tso Adam gbɔ.—Xlẽ 1 Mose 5:5; Romatɔwo 5:12.

Ehiã be ame aɖe naxe mía tafe hafi míate ŋu ava nɔ agbe tegbee. (Hiob 33:24, 25) Tafe nye fe si woxena ɖe ame aɖe si wolé la ta be woaɖe asi le eŋu, gake le míawo ya gome la, woaxe fe sia atsɔ aɖe mí tso ku si me. (2 Mose 21:29, 30) Yesu xe tafe ma esi wòva ku ɖe mía ta.—Xlẽ Yohanes 3:16.

Nu kae míawɔ hafi anɔ agbe tegbee?

Menye ame sia amee woaɖe tso tsitsi kple dɔléle si me o. Le nyateƒe me la, ame siwo gbe toɖoɖo Mawu abe Adam ene la makpɔ agbe mavɔ o. Ame siwo Mawu kpɔ be wodze yeatsɔ woƒe nu vɔ̃wo ake wo koe akpɔ agbe mavɔ.—Xlẽ Yesaya 33:24; 35:3-6.

Hafi woatsɔ míaƒe nu vɔ̃wo ake mí la, ele be míaɖe afɔ aɖewo. Ele be míanya Mawu to eƒe Nya, Biblia, sɔsrɔ̃ dzi. Eƒe Nya la fia ale si míawɔ anɔ agbe ɖɔʋu be Mawu nakpɔ ŋudzedze ɖe mía ŋu eye míakpɔ agbe mavɔ la mí.—Xlẽ Yohanes 17:3; Dɔwɔwɔwo 3:19.