Dzo kpo yi emenuwo dzi

Dzo kpo yi emenuawo dzi

 Te Ðe Mawu Ŋu

Ðe Wò Ŋkɔ Le Mawu Ƒe “Ŋkuɖodzigbalẽ” Mea?

Ðe Wò Ŋkɔ Le Mawu Ƒe “Ŋkuɖodzigbalẽ” Mea?

ÐE Yehowa dea dzesi agbagba siwo esubɔlawo dzena le esubɔsubɔ mea? Ɛ̃, edea dzesii! Ke hã, menye woƒe nu nyui wɔwɔwo kple nya siwo wogblɔna tsɔ kafunɛ la koe wòdea dzesii o. Edea dzesii ne wodea asixɔxɔ eŋu le woƒe tamesusuwo me gɔ̃ hã. Gawu la, Yehowa maŋlɔ eƒe amewo kple nu siwo wowɔ la be akpɔ o. Nu kae na míeka ɖe nya sia dzi? Ŋuɖoɖoa dze le nya aɖe si nyagblɔɖila Maleaxi ŋlɔ la me.—Xlẽ Maleaxi 3:16.

Esime Maleaxi nye nyagblɔɖila le Israel le ƒe alafa atɔ̃lia Do Ŋgɔ Na Mía Ŋɔli la, nuteƒemawɔmawɔ xɔ aƒe ɖi ŋutɔ le agbenɔnɔ kple mawusubɔsubɔ gome. Nunɔlawo gblẽ woƒe dɔwo ɖi, eye dukɔ hahoo la ƒo wo ɖokui ɖe mawumavɔ̃mavɔ̃nuwɔnawo abe afakaka, ahasiwɔwɔ kple ametafatafa ene me. (Maleaxi 2:8; 3:5) Ke hã, Israel vi aɖewo ya lé nuteƒewɔwɔ me ɖe asi. Nu kae wonɔ wɔwɔm?

Maleaxi gblɔ be: ‘Yehowa vɔ̃lawo ƒo nu kple wo nɔewo.’ Mawuvɔvɔ̃ nye nɔnɔme nyui. Le afi sia la, Maleaxi nɔ nu ƒom tso Israel vi siwo dea bubu deto Mawu ŋu hevɔ̃na be yewoawɔ nu si madze eŋu o la ŋu. De dzesii be wogblɔ be mawuvɔ̃la siawo ‘ƒo nu kple wo nɔewo.’ Edze ƒãa be wonɔ nya nyuiwo gblɔm tso Yehowa ŋu henɔ dzi dem ƒo na wo nɔewo, ale be dzi nagaɖe le wo ƒo, eye nu gbegblẽ siwo nɔ edzi yim la nakpɔ ŋusẽ ɖe wo dzi o.

Israel vi wɔnuteƒewo gaɖe ale si wodea bubu deto Yehowa ŋui la fia le mɔ vevi aɖe nu: “[Woléa] ŋku ɖe eƒe ŋkɔ ŋu,” alo wobua eŋu. Gɔmeɖeɖe bubu gblɔ be “wonɔ Eƒe ŋkɔ dom ɖe dzi.” Mawuvɔ̃la mawo dea bubu Yehowa ŋu le woƒe tamesusuwo me gɔ̃ hã. Wodea asixɔxɔ Yehowa kple eƒe ŋkɔ gã la ŋu le woƒe dzimesusuwo me. Ðe Yehowa nya be wonɔ esia wɔma?

Maleaxi gblɔ be: “Yehowa ɖo to see.” Esia fia be togbɔ be Yehowa le eƒe nɔƒe kɔkɔa le dziƒo hã la, eƒua to anyi sea kafukafunya ɖe sia ɖe si esubɔlawo gblɔna le wo nɔewo dome tso eŋu. Eƒe susu nɔa nu siwo katã ŋu wobuna la hã ŋu. (Psalmo 94:11) Gake menye woƒe nuwɔna nyuiwo kple tamesusuwo ŋu koe wòléa ŋku ɖo o.

Maleaxi gagblɔ be: ‘Woŋlɔ ŋkuɖodzigbalẽ le eŋkume.’ Ame siwo katã subɔ Yehowa nuteƒewɔwɔtɔe la ƒe ŋkɔwoe le agbalẽ ma me. De dzesii be woyɔe be “ŋkuɖodzigbalẽ.” * Esia fia be Yehowa maŋlɔ nu siwo esubɔla wɔnuteƒewo wɔ tsɔ kafui la dometɔ aɖeke be o, eɖanye nuwɔna nyuiwo, nyagbɔgblɔwo alo tamesusuwo o. Susu aɖe tae Mawu ɖoa ŋku wo dzi ɖo. Edo ŋugbe be yeatsɔ agbe mavɔ aɖo eteƒe na ame siwo ƒe ŋkɔwo tsi yeƒe ŋkuɖodzigbalẽa me ɖikaa la. *Psalmo 37:29.

Aleke gbegbe wòfaa akɔ na amee nye esi be Yehowa dea asixɔxɔ nu siwo katã míewɔna be míaƒe tadedeagu nadze eŋu la ŋu! Ele be Maleaxi 3:16 me nyawo nana míade ŋugble le mía kple Yehowa dome ƒomedodoa ŋu vevie. Anyo be míabia mía ɖokui be, ‘Ðe nye ŋkɔ le Mawu ƒe “ŋkuɖodzigbalẽ” mea?’ Anɔ alea ne míedzea agbagba vevie gbe sia gbe be míaƒe nuwɔna, nuƒoƒo kple tamebubu nanye esi dzi Yehowa adi be yeaɖo ŋkui.

Biblia ƒe akpa si míade dzi ƒo na wò be nàxlẽ le December me:

Naxum 1-3Maleaxi 1-4

^ mm. 8 Hebrigbe me nya si gɔme woɖe be ‘ŋkuɖodzi’ la mefia be nane nava susu me na ame ko o. Egafiana hã be woawɔ nane tso nu si dzi woɖo ŋkui la ŋu.

^ mm. 8 Ne èdi be yeaxlẽ nu geɖe tso ŋugbe si Mawu do ku ɖe agbe mavɔ ŋu la, kpɔ agbalẽ si nye Nuka Tututue Nye Biblia ƒe Nufiafia? ƒe ta 3 lia. Yehowa Ðasefowoe tae.