BIBLIA gblɔ be: “Ame aɖeke mekpɔ Mawu ɣeaɖekeɣi kpɔ o.” (Yohanes 1:18) Mawu ƒe dzedzeme ƒe ŋutikɔkɔe de ŋgɔ ale gbegbe be nuwɔwɔ siwo nye ŋutilã kple ʋu la dometɔ aɖeke mate ŋu akpɔe kple ŋku aganɔ agbe o. (2 Mose 33:20) Ke hã, le Biblia me nuŋlɔɖi aɖewo me la, Yehowa na ame ɖekaɖeka aɖewo kpɔ dziƒo le ŋutega me. Wo dometɔ ɖekae nye nyagblɔɖila Daniel. Ðikeke mele eme o be nu si Daniel kpɔ la na wòde bubu deto Mawu ŋu, abe ale si ko wòle be wòanɔ le míawo hã gome ene. De dzesi ale si Daniel ɖɔ nu si wòkpɔ le ŋutega me. a—Xlẽ Daniel 7:9, 10.

‘Ame si li tso tititi.’ Dzesideŋkɔ si nye ‘Ame si li tso tititi’ la he susu yi “ame si tsi xɔ ƒe geɖe” dzi, eye Daniel ɖeɖe koe ɖɔ Mawu nenema. (Daniel 7:9, 13, 22) Aleke gbegbee Yehowa tsii? Esi wònye “Fia mavɔmavɔtɔ” ta la, eli ɣeawokatãɣi tso mavɔmavɔ me, eye anɔ anyi tegbee. (1 Timoteo 1:17; Yuda 25) Ale si Mawu li tso mavɔ me yi mavɔ me la na míeka ɖe edzi be goléƒe mele eƒe nunya ŋu o, elabena Biblia ɖee fia be nunya le ame siwo tsi wu la si. (Hiob 12:12) Nyateƒee, esi seɖoƒe le míaƒe nuŋububuŋutete ŋu ta la, esesẽna na mí be míase ale esi Mawu li tso mavɔ me yi mavɔ me la gɔme. Gake ɖe wòle be míakpɔ mɔ be míase Mawu, ame si ƒe nunya goglo sãsãsã wu mía tɔ la gɔme bliboea?—Romatɔwo 11:33, 34.

De dzesii be Ame si li tso tititi la “bɔbɔ nɔ anyi.” Nu ka tae? Nyagbewo, abe “woɖi ʋɔnu” kple “wòtso afia” ene siwo wozã le mawunyakpukpui siwo ƒo xlãe me la na míekpɔ nu si tae. (Daniel 7:10, 22, 26) Eya ta le ŋutegaa me la, Yehowa bɔbɔ nɔ anyi abe Ʋɔnudrɔ̃la ene. Ame kawoe wòadrɔ̃ ʋɔnui? Woawoe nye anyigba dzi dukɔwo, siwo Daniel ɖɔ do ŋgɔ be wonye lã wɔadãwo. b (Daniel 7:1-8) Ʋɔnudrɔ̃la ka ƒomevie Yehowa nye?

“Eƒe avɔ fu tititi, eye eƒe taɖa le abe ɖetifu, si me dza la ene.” Nu si le ɣie la tsia tre ɖi na dzɔdzɔenyenye kple dzadzɛnyenye. Amadede ɣi ye nɔa ɖetifu si. Eya ta taɖa si le abe ɖetifu ene la anɔ ɣie. Àte ŋu akpɔ nu si Daniel kpɔ la le susu mea? Ðe nèkpɔ Ʋɔnudrɔ̃la si ƒe taɖa le ɣie, eye wòdo awu si fu tititi abe sno ene la le susu mea? Kpɔɖeŋunyagbɔgblɔ siawo na míeka ɖe edzi be Yehowa drɔ̃a ʋɔnu dzɔdzɔe, eye wòtsoa afia le nunya me. Enye Ʋɔnudrɔ̃la si dzi wòle be míaka ɖo bliboe ahade bubu deto eŋu.

“Ame akpe teƒe akpe le esubɔm, eye ame akpe ewo teƒe akpe ewo tsi tre ɖe egbɔ.” Ame kawoe nye subɔla siawo siwo le dziƒo la? Biblia gblɔ be mawudɔlawo nye Mawu ‘ƒe subɔlawo.’ (Psalmo 104:4) Mawudɔla siwo ƒe xexlẽme ade akpe teƒe akpeakpewo la “wɔa eƒe nya dzi” hewɔa “nu si dzea eŋu!” (Psalmo 103:20, 21) Ðe esia hã menye kpeɖodzi be goléƒe mele Mawu ƒe nunya ŋu oa? To vovo na Yehowa la, ɖe ame aɖe gali si ate ŋu ana dziƒoʋakɔ gã sia gbegbe nanɔ nu wɔm le ɖoɖo nu ahanɔ dɔ dzi ƒe akpe manyaxlẽ siawoa?

Ŋutega si Daniel kpɔ la na míeka ɖe Yehowa, Ame si li tso tititi la dzi. Edrɔ̃a ʋɔnu dzɔdzɔe, eye míate ŋu aɖo dzi ɖe eƒe nunya ŋu. Ðe manyo ŋutɔ be nàsrɔ̃ nu geɖe tso ale si nàwɔ ate ɖe Mawu si ƒe nunya ƒo ɖe sia ɖe ta ŋu la ŋu oa?