Dzo kpo yi emenuwo dzi

Dzo kpo yi emenuawo dzi

Biblia Le Amewo Ƒe Agbenɔnɔ Trɔm

Biblia Le Amewo Ƒe Agbenɔnɔ Trɔm

Biblia Le Amewo Ƒe Agbenɔnɔ Trɔm

NU KAE na ŋutsu aɖe si ɖe srɔ̃ geɖe, eye wòtsi tsitre ɖe Yehowa Ðasefowo ŋu la va zu Ðasefo? Nu kae ʋã Pentekosteha aɖe ƒe nunɔla wòɖe asi le eƒe dzixɔsewo ŋu? Nu kae kpe ɖe nyɔnu aɖe si ŋu wowɔ ŋlɔmi le le eƒe ɖevime ŋu be megava nɔ ŋu nyɔm eɖokui o, eye wòte ɖe Mawu ŋu? Nu ka tae ŋutsu aɖe si lɔ̃a heavy-metal hadzidziwo sese la va zu Ðasefo? Xlẽ ŋutinya siawo be nàkpɔ ŋuɖoɖoawo.

“Mezu srɔ̃ŋutsu nyui.”—RIGOBERT HOUETO

ƑE SI ME WODZII: 1941

DUKƆ SI ME WÒTSO: BENIN

AME SI TƆGBI WÒNYE TSÃ: SRƆ̃GEÐEÐELA, ETSI TRE ÐE YEHOWA ÐASEFOWO ŊU

AGBE SI MENƆ TSÃ: Benin ƒe dugã Cotonou ye metso. Dzinyelawo nye Katolikotɔwo, ke hã, nyemedea sɔleme edziedzi o. Srɔ̃ geɖe nɔ Katolikotɔ siwo nɔ afi si metso la dometɔ geɖe si, elabena se ɖe mɔ ɖe enu ɣemaɣi. Nyɔnu ene ye meɖe.

Esi dukɔmeviwo dze aglã ɖe dziɖuɖua ŋu le ƒe 1970-awo me la, mesusui be esia aɖe vi na dukɔa. Medo alɔ wo bliboe heƒo ɖokuinye ɖe dunyahehe me. Ame siwo tsi tsitre ɖe dziɖuɖua ŋu la melɔ̃ Yehowa Ðasefowo ƒe nya o le esi Ðasefowo medea nu dunyahehe me o ta. Nye hã menɔ ame siwo ti Ðasefowo yome la dome. Esi wonyã Ðasefo dutanyanyuigblɔlawo le dukɔa me le ƒe 1976 me la, meka ɖe edzi be womagatrɔ agbɔ gbeɖe o.

ALE SI BIBLIA TRƆ NYE AGBENƆNƆ: Ƒe 1990 mee woɖe dziɖuɖu xoxoa ɖa, eye yeyea xɔ ɖe eteƒe. Ewɔ nuku nam be ema megbe kpuie koe Ðasefo dutanyanyuigblɔlawo gatrɔ gbɔ. Meva nɔ sesem le ɖokuinye me be Mawu anya nɔ megbe na ame siawo. Ɣemaɣi lɔƒo la, meva kpɔ dɔ nɔ wɔwɔm le teƒe bubu. Enumake ko nye dɔwɔhati yeyeawo dometɔ ɖeka, si nye Ðasefo la, te nuƒoƒo nam tso eƒe dzixɔsewo ŋu. Exlẽ mawunyakpukpui siwo gblɔ tso Yehowa ŋu be enye lɔlɔ̃ ƒe Mawu kple dzɔdzɔetɔ la nam. (5 Mose 32:4; 1 Yohanes 4:8) Mawu ƒe nɔnɔme mawo dze ŋunye ŋutɔ. Medi be masrɔ̃ nu geɖe tso Yehowa ŋu, eya ta melɔ̃ be wòava nɔ Biblia srɔ̃m kplim.

Ema megbe kpuie la, medze Yehowa Ðasefowo ƒe kpekpewo dede gɔme. Lɔlɔ̃ akuakua si nɔ wo dome la wɔ dɔ ɖe dzinye—womedea vovototo ame me le ɖoƒe alo ame ƒomevi si me tɔ ame aɖe nye ta o. Zi ale si menɔ ha dem kple Ðasefowo la, zi nenemae mekpɔe dze sii kɔtɛ be woawoe nye Yesu yome dzela vavãwo.—Yohanes 13:35.

Metso nya me be ne medi be masubɔ Yehowa la, ke ele be mado go le Katolikohaa me. Esia wɔwɔ menɔ bɔbɔe nam o, elabena metsi dzi ɖe nu si amewo abu tso ŋunye la ŋu. Ɣeyiɣi didi aɖe megbe la, dzi ɖo ƒonye medo le haa me le Yehowa ƒe kpekpeɖeŋu me.

Tɔtrɔ gã bubu aɖe ganɔ ŋgɔnye wòle be mawɔ. Biblia sɔsrɔ̃ na meva nyae be Mawu meda asi ɖe srɔ̃ geɖe ɖeɖe dzi o. (1 Mose 2:18-24; Mateo 19:4-6) Le Mawu gbɔ la, nyɔnu gbãtɔ si meɖe la koe nye srɔ̃nye ŋutɔŋutɔ. Eya ta mede nye srɔ̃ɖeɖe gbãtɔ agbalẽ me le se nu, eye meɖe asi le nyɔnu mamlɛawo ŋu hewɔ ɖoɖo ɖe woƒe ŋutilãmenuhiahiãwo gbɔ kpɔkpɔ na wo ŋu. Emegbe nyɔnu siwo ŋu meɖe asi le la dometɔ eve va zu Yehowa Ðasefowo.

VIÐE SIWO MEKPƆ: Togbɔ be srɔ̃nye gakpɔtɔ nye Katolikotɔ hã la, metsi tsitre ɖe nyametsotso si mewɔ be masubɔ Yehowa ŋu o. Mí ame evea míede dzesii be mezu srɔ̃ŋutsu nyui.

Tsã la, mesusui be mate ŋu ato dunyahehe dzi ana nuwo nanyo le nuto si me mele la me, gake meva kpɔe be agbagba siwo dzem menɔ la nye dzodzro. Fifia menyae be Mawu Fiaɖuƒea koe ate ŋu akpɔ amegbetɔwo ƒe kuxiwo gbɔ. (Mateo 6:9, 10) Medaa akpe na Yehowa be efiam ale si manɔ agbe si me dzidzɔ vavãtɔ le.

“Tɔtrɔ siwo hiã la wɔwɔ menɔ bɔbɔe nam o.”—ALEX LEMOS SILVA

ƑE SI ME WODZII: 1977

DUKƆ SI ME WÒTSO: BRAZIL

AME SI TƆGBI WÒNYE TSÃ: PENTEKOSTEHA ƑE NUNƆLA

AGBE SI MENƆ TSÃ: Du si nye Itu, si le São Paulo State, la ƒe gbɔtoe menɔ tsi. Nu vlo wɔwɔ xɔ aƒe ɖe du sia me ŋutɔ.

Meƒo ɖokuinye ɖe ŋutasẽnuwɔwɔ kple agbe gbegblẽ nɔnɔ me atraɖii. Metsɔ atikevɔ̃ɖisitsatsa ɖo dɔe hã kpɔ. Meva de dzesii be gaxɔ alo yɔ me koe mava tsi ne nyemedzudzɔ agbe mawo nɔnɔ o, eya ta medzudzɔ. Emegbe mege ɖe Pentekosteha la me heva zu nunɔla.

Mesusui be mate ŋu akpe ɖe amewo ŋu to subɔsubɔdɔ si mewɔna le haa me dzi. Meɖea gbeƒã mawunya le nutoa me ƒe radiodɔwɔƒe aɖe gɔ̃ hã, si wɔe be ame geɖe dze sim le nutoa me. Ke hã, vivivi la, meva ka ɖe edzi be ha si me menɔ la metsɔ ɖe le eme na hameviwo ŋutɔŋutɔ o, eye bubudede Mawu ŋu menɔ vevie na wo koŋ o. Mekpɔe be gadidi koŋue nye nu si nɔ vevie na ha la. Eya ta medo le haa me.

ALE SI BIBLIA TRƆ NYE AGBENƆNƆ: Esi Yehowa Ðasefowo va nɔ Biblia srɔ̃m kplim la, mekpɔe dze sii enumake be woto vovo na subɔsubɔha bubuawo. Nu eve aɖewo koŋue wɔ dɔ ɖe dzinye le wo ŋu. Gbã, menye ɖeko Yehowa Ðasefowo ƒoa nu tso Mawu kple havilɔlɔ̃ ŋu o, ke woɖenɛ fiana hã. Evelia, womeƒoa wo ɖokui ɖe dunyahehe kple aʋawɔwɔ me o. (Yesaya 2:4) Nu eve mawo na meka ɖe edzi be meke ɖe subɔsubɔha vavãtɔ, si nye mɔ xaxɛ si kplɔa ame yia agbe mavɔ me la ŋu.—Mateo 7:13, 14.

Mede dzesii be hafi nye nu nadze Mawu ŋu la, ahiã be mawɔ tɔtrɔ vevi aɖewo. Ehiã be makpɔ vovo geɖe wu ɖe nye ƒomea ŋu. Eye wòhiã be mabɔbɔ ɖokuinye geɖe wu hã. Tɔtrɔ siwo hiã la wɔwɔ menɔ bɔbɔe nam o, gake Yehowa kpe ɖe ŋunye mewɔ tɔtrɔawo. Esia wɔ dɔ ɖe srɔ̃nye dzi ŋutɔ. Edze Biblia sɔsrɔ̃ gɔme do ŋgɔ nam, ke fifia ya, eva nɔ ŋgɔyiyi wɔm kabakaba le nua sɔsrɔ̃ me. Eteƒe medidi o didia va nɔ mía me be míanye Yehowa Ðasefowo. Mí ame evea míexɔ nyɔnyrɔ le ŋkeke ɖeka dzi.

VIÐE SIWO MEKPƆ: Dzidzɔe wònye na mía kple srɔ̃nye be míete ŋu kpe ɖe mía vi etɔ̃awo ŋu be ƒomedodo kplikplikpli va le woa kple Yehowa dome. Míaƒe ƒomea le dzidzɔ kpɔm. Medaa akpe na Yehowa be ena meva dze si nyateƒe si le eƒe Nya, Biblia me. Etrɔa amewo ƒe agbe vavã! Eye nye nuteƒekpɔkpɔa ɖo kpe esia dzi.

“Mele dzadzɛ, mele blibo, eye megbɔ agbe.”—VICTORIA TONG

ƑE SI ME WODZII: 1957

DUKƆ SI ME WÒTSO: AUSTRALIA

AME SI TƆGBI WÒNYE TSÃ: WOWƆ ŊLƆMI LE EŊU LE EƑE ÐEVIME

AGBE SI MENƆ TSÃ: Dugã si nye Newcastle, le New South Wales, ye menɔ tsi. Nyee nye vi tsitsitɔ le dzinyelawo ƒe vi adreawo dome. Ahanomunɔ kple ŋutasẽlae fofonye nye, eye danye nye ŋlɔmiwɔla. Danye ƒonam vevie hedzuam hã. Egblɔna nam enuenu be ɖevi vɔ̃ɖie menye, eye woawɔ fum le dzo mavɔ me. Nya mawo doa ŋɔdzi nam ŋutɔ.

Ale si danye ƒonam dea abi ŋunye la wɔnɛ be enuenu la, nyemetea ŋu yia suku o. Esi mexɔ ƒe 11 la, dziɖuɖua xɔm le dzinyelawo si hekplɔm va da ɖe afi si wokpɔa ɖeviwo dzi le. Emegbe woɖem yi nyɔnuwo ƒe saɖeagaxɔ aɖe me. Ke esi mexɔ ƒe 14 la, mesi le afi ma. Nyemedi be matrɔ ayi aƒe me o, eya ta metsi Kings Cross, si le Sydney ƒe gbɔto la, ƒe ablɔwo dzi.

Esi menɔ ablɔwo dzi la, meƒo ɖokuinye ɖe atike vɔ̃ɖi zazã, aha tsu nono, kple amamaɖeɖenuwɔnawo, kple gbolowɔwɔ me. Gbe ɖeka nane dzɔ si na mevɔ̃ ŋutɔ. Menɔ zãmodzakaɖeƒe aɖe dzi kpɔla gbɔ ɣemaɣi. Le fiẽ aɖe me la, ŋutsu eve va egbɔ. Ena meyi xɔgã me, gake menɔ woƒe dzeɖoɖoa sem. Modzakaɖeƒea dzi kpɔla nɔ ɖoɖo wɔm be yeadzram na ŋutsu siawo. Wodi be yewoaɣlam ɖe agbatsɔmeli aɖe me ayi Japan ne maɖawɔ dɔ le ahadzraƒe aɖe. Dzidzi ƒom, eye meti kpo tso dziƒoxɔa ƒe xɔxɔnu megbetɔ dzi hede afɔ du me nɔ xɔnametɔ dim.

Medo go ŋutsu aɖe si ɖi tsa va Sydney ɣemaɣi, eye megblɔ nu si dzɔ ɖe dzinye la nɛ henɔ mɔ kpɔm be ana gam. Le ema teƒe la, ekplɔm yi afi si wònɔ kple susu be male tsi ahaɖu nu. Gake ena metsi egbɔ koŋ. Ƒe ɖeka megbe la, míeɖe mía nɔewo.

ALE SI BIBLIA TRƆ NYE AGBENƆNƆ: Esi Yehowa Ðasefowo va nɔ Biblia srɔ̃m kplim la, nu siwo srɔ̃m menɔ la wɔ dɔ ɖe dzinye le mɔ vovovowo nu. Dzi kum esi meva nyae be Satana gbɔe vɔ̃ɖinyenye tso; tso nye ɖevime ke la, wofiam be Mawue nana míekpea fu. Nye dzi dze eme ŋutɔ esi meva nyae be Mawu mewɔa fu ame le dzo mavɔ me o. Nufiafia sia doa ŋɔdzi nam tso ɣeaɖeɣi ke.

Ale si Ðasefowo nana Biblia fiaa mɔ wo le woƒe nyametsotso ɖe sia ɖe wɔwɔ me la wɔ dɔ ɖe dzinye. Wonɔa agbe ɖe woƒe dzixɔsewo nu. Menye ame aɖe si mesea nu gɔme o, gake nya ka kee meɖagblɔ o, nu ka kee mewɔ o, Ðasefowo wɔa nu ɖe ŋunye le lɔlɔ̃ kple bubu me.

Nye kuxi gãtɔe nye be mesenɛ le ɖokuinye me be viɖe aɖeke mele ŋunye o. Menyɔa ŋu ɖokuinye, eye esi mexɔ nyɔnyrɔ zu Yehowa Ðasefo gɔ̃ hã la, seselelãme sia ganɔ menye ɣeyiɣi didi aɖe. Menyae be melɔ̃ Yehowa, gake mesusui be le agbe si menɔ va yi ta la, manya wɔ be wòalɔ̃m o.

Ƒe 15 le nye nyɔnyrɔxɔxɔ megbe hafi meɖɔ susu ma ɖo. Le nuƒo aɖe me le Yehowa Ðasefowo ƒe Fiaɖuƒe Akpata me la, nuƒolaa xlẽ Yakobo 1:23, 24. Kpukpui mawo tsɔ Mawu ƒe Nya la sɔ kple ahuhɔ̃e si me míate ŋu akpɔ mía ɖokuiwo le abe ale si Yehowa kpɔa míi ene. Menɔ ɖokuinye biam be, Ðe wòanye be ale si mekpɔa ɖokuinyee la to vovo na ale si Yehowa kpɔnama? Gbã la, nyemenɔ didim be malɔ̃ ɖe susu yeye sia dzi o. Eganɔ wɔwɔm na kokoko be manya wɔ be Yehowa nalɔ̃m o.

Ŋkeke ʋɛ aɖewo megbe la, mexlẽ mawunyakpukpui aɖe si na meɖe asi le susu ma ŋu. Mawunyakpukpui mae nye Yesaya 1:18, afi si Yehowa gblɔ le be: “Miva mídrɔ̃ ʋɔnu! Ne miaƒe nu vɔ̃wo le abe nyagadzĩ ene la, woafu abe sno ene.” Ðeko wòwɔ nam abe ɖe Yehowa le gbɔgblɔm na be: “Vicky, va ne míadzra mía dome ɖo. Medze si wò, menya wò nu vɔ̃wo, menya wò dzi—eye melɔ̃ wò.”

Metsi zãdomadɔlɔ̃e gbe ma gbe. Nyemenɔ kakam ɖe edzi be Yehowa ate ŋu alɔ̃m o, ke meva nɔ ŋugble dem le Yesu ƒe tafevɔsaa ŋu. Enumake nye susu gblɔ nam be Yehowa gbɔ dzi ɖi nam ƒe gbogbo siawo, eye wòle eɖem fia le mɔ vovovowo nu be yelɔ̃m. Ke hã, meto nye nuwɔnawo dzi nɔ gbɔgblɔm nɛ be: “Wò lɔlɔ̃ la mede to nenema gbegbe be wòaɖo gbɔnye o. Viwòa ƒe vɔsa la mate ŋu alé avu ɖe nye nu vɔ̃wo ta o.” Ðeko wònɔ abe ɖe menɔ vɔsa la tsɔm nɔ gbe ƒum do ɖe Yehowa ene. Ke mlɔeba esi mede ŋugble le nunana si nye tafea ŋu vɔ la, meva nɔ sesem le ɖokuinye me be Yehowa lɔ̃m.

VIÐE SIWO MEKPƆ: Mese le ɖokuinye me be mele dzadzɛ, mele blibo, eye megbɔ agbe. Fifia nuwo nyo wu le míaƒe srɔ̃ɖeɖea me, eye dzidzɔe wònye nam be mate ŋu azã nye nuteƒekpɔkpɔwo atsɔ akpe ɖe ame bubuwo ŋu. Mele tetem ɖe Yehowa ŋu kplikplikpli geɖe wu azɔ.

“Esiae nye gbe si medo ɖa la ƒe ŋuɖoɖo.”—SERGEY BOTANKIN

ƑE SI ME WODZII: 1974

DUKƆ SI ME WÒTSO: RUSSIA

AME SI TƆGBI WÒNYE TSÃ: ELƆ̃A HEAVY-METAL HADZIDZIWO

AGBE SI MENƆ TSÃ: Wodzim le Votkinsk, si nye du si me wodzi hakpala xɔŋkɔ Pyotr Ilich Tchaikovsky le. Míaƒe ƒomea da ahe. Nɔnɔme nyuiwo nɔ fofonye si, ke hã enye ahanomunɔ, eya ta míetsia dzodzodzoe le aƒea me zi geɖe.

Agbalẽsɔsrɔ̃ mede dzinye tututu le suku o, eye ƒe aɖewo megbe la, meva nɔ sesem le ɖokuinye me be nyemele ɖeke me o. Meɖe ɖokuinye ɖe aga, eye nyemekana ɖe amewo dzi o. Sukudede tena ɖe dzinye ŋutɔ. Le kpɔɖeŋu me, ne ehiã be madzra ɖo ɖe nyati aɖe ŋu ava ƒo nu tso eŋu le suku la, nyemetea ŋu gblɔa nya bɔbɔe siwo metea ŋu gblɔna ɣebubuɣiwo la gɔ̃ hã o. Esi medo le xɔ enyilia me la, woŋlɔ ɖe nye sukudɔwo ŋuti gbalẽvi dzi be: “Meɖu tu na gbea o, metea ŋu ɖea eƒe susuwo gblɔna o.” Nya mawo gbã dzi nam, si na megase le ɖokuinye me be nyemele ɖeke me kura o. Meva nɔ ŋugble dem le nu si ta mele agbe ɖo la ŋu.

Esi menɔ nye ƒewuiwo me la, mete ahanono. Le gɔmedzedzea me la, enana nye dzi dzea eme. Ke ne menoe wòsɔ gbɔ akpa la, nye dzitsinya ɖea fu nam. Ðeko wòdze abe ɖe viɖe mele agbea ŋu o ene. Melé blanui vevie, eye ɣeaɖewoɣi la, ŋkeke geɖe va yina si nyemedona le aƒe me o. Meva nɔ ɖokuinyewuwu ŋuti bum.

Esi mexɔ ƒe 20 la, meke ɖe nane ŋu si na mekpɔ gbɔdzɔe ɣeyiɣi kpui aɖe. Meva nɔ to ɖom heavy-metal hadzidziwo. Ha mawo dea dzo lãme nam, eye meva nɔ ha dem kple ame siwo hã ɖoa toe. Mena nye ɖa to legbe, meŋɔ nye towo, eye medoa awu abe hadzila siwo ƒe nu dzɔa dzi nam la ene. Vivivi la, meva zu ame si metsɔa ɖeke le naneke me o, nye mo medze anyi o, eye menɔa dzre dzi kple ƒonyemetɔwo.

Mesusui be toɖoɖo ha sia ana makpɔ dzidzɔ, gake nu si to vovo na emae dzɔ ɖe dzinye. Meva nɔ ame bubu kura zum! Eye esi meva nya nu tso hadzila xɔŋkɔ siwo ƒe nu lé dzi nam la ƒe nu gbegblẽ wɔwɔ aɖewo ŋu la, mese le ɖokuinye me be woblem.

Megava nɔ ɖokuinyewuwu ŋuti bum ake, gake fifia ya kple moveviɖoɖo. Ale si esia ana danye nase vevee la koe na nyemegaxa wɔe o. Elɔ̃m vevie, eye wòna kpekpeɖeŋu geɖem. Meɖo xaxa me vevie ŋutɔ, elabena agbea tim, evɔ nyemedi be maɖe nye agbe ɖa hã o.

Mede asi Russiatɔwo ƒe ŋutinyagbalẽwo xexlẽ me bene nye susu nadzo le nya ma dzi. Ŋutinyawo dometɔ ɖeka ku ɖe kalẽtɔ aɖe si nɔ sɔleme dem ŋu. Esia na medi vevie enumake be masubɔ Mawu ahakpe ɖe amewo ŋu. Megblɔ nye dzimenyawo na Mawu le gbedodoɖa me zi gbãtɔ le nye agbe me. Megblɔ na Mawu be wòafiam ale si manɔ agbe si ŋu viɖe le. Esi menɔ gbea dom ɖa la, nye dzi dze eme ale gbegbe. Gake nu si gawɔ nuku wue nye nane si dzɔ le ema megbe. Gaƒoƒo eve pɛ ko megbe la, Yehowa Ðasefo aɖe va ƒo ʋɔ nam, eye wòdo Biblia sɔsrɔ̃ ɖe gbɔnye. Mexɔe se be esiae nye gbe si medo ɖa la ƒe ŋuɖoɖo. Esiae nye agbe yeye si me dzidzɔ le la ƒe ŋkeke gbãtɔ nam.

ALE SI BIBLIA TRƆ NYE AGBENƆNƆ: Metsɔ nu siwo katã nɔ asinye siwo do ƒome kple heavy-metal hawo la ƒu gbe, togbɔ be esia wɔwɔ menɔ bɔbɔe nam kura o hã. Ke hã, hadzidziawo tsi susu me nam ɣeyiɣi didi aɖe. Ɣesiaɣi si mezɔ to teƒe aɖe hese haa ko la, meɖoa ŋku agbe si menɔ tsã la dzi enumake. Ŋkuɖoɖo nu mawo dzi ɖea fu nam, eye nyemedi be nu mawo nahe nye susu ɖa le nu nyui siwo katã ƒãm menɔ ɖe nye susu kple dzi me azɔ la ŋu o. Eya ta meƒo asa na teƒe mawo toto. Eye ɣesiaɣi si wòdzrom be mabu nu siwo megblẽ ɖi ŋu la, medoa gbe ɖa vevie. Esia wɔwɔ nana mekpɔa “Mawu ƒe ŋutifafa, si ƒoa susu ɖe sia ɖe ta” la.—Filipitɔwo 4:7.

Esi menɔ Biblia srɔ̃m la, meva nyae be agba le Kristotɔwo dzi be woaƒo nu tso woƒe dzixɔsewo ŋu na amewo. (Mateo 28:19, 20) Meka ɖe edzi vevie be esia manya wɔ nam gbeɖe o. Ke hã, nu yeye siwo srɔ̃m menɔ la na mekpɔ dzidzɔ kple dzidzeme geɖe. Menyae be ele be ame bubuwo hã nasrɔ̃ nyateƒe siawo. Togbɔ be vɔvɔ̃ nɔ menye hã la, nye hã meva nɔ nu siwo srɔ̃m menɔ la ŋu nya gblɔm na amewo. Ewɔ nuku nam ŋutɔ be Biblia me nyawo gbɔgblɔ na amewo na dzi gaɖo ƒonye geɖe wu. Eye wòna nu siwo srɔ̃m menɔ la gaƒo ke ɖe to ɖe dzi me nam wu.

VIÐE SIWO MEKPƆ: Mele dzidzɔ kpɔm le srɔ̃ɖeɖe me fifia, eye dzidzɔe wònye nam be mekpe ɖe ame aɖewo ŋu wosrɔ̃ Biblia—nɔvinyenyɔnu kple danye hã le wo dome. Mawusubɔsubɔ kpakple kpekpe ɖe amewo ŋu be woasrɔ̃ nu tso Mawu ŋu na viɖe le agbea ŋu nam ŋutɔŋutɔ azɔ.