Dzo kpo yi emenuwo dzi

Dzo kpo yi emenuawo dzi

“Le Fia Herodes Ƒe Ŋkekeawo Me”

“Le Fia Herodes Ƒe Ŋkekeawo Me”

 “Le Fia Herodes Ƒe Ŋkekeawo Me”

ESI Herodes Gãtɔ, si nye fia nɔ Yudea, nɔ agbagba dzem be yeawu Yesu ɖevi la, edɔ asrafowo woɖawu ɖevi siwo nye ŋutsuviwo la katã le Betlexem. Woŋlɔ nu siwo dzɔ le “fia Herodes ƒe ŋkekeawo me” la dometɔ geɖewo ɖi, siwo kpe ɖe mía ŋu míese ale si nuwo nɔ do ŋgɔ na Yesu dzidzi kple eƒe subɔsubɔdɔa wɔɣi la gɔme nyuie.—Mateo 2:1-16.

Nu kae na be Herodes di be yeawu Yesu? Eye nu ka tae esime wodzi Yesu la, fia nɔ Yudatɔwo si, gake esime Yesu ku la, Pontio Pilato, si nye Romatɔ lae nɔ wo dzi ɖum? Hafi míate ŋu ase akpa si Herodes wɔ le ŋutinya me gɔme bliboe eye míase nu si tae akpa si wòwɔ le ŋutinya me le vevie na Biblia xlẽlawo gɔme la, ehiã be míagbugbɔ ayi megbe adzro nu siwo dzɔ ƒe blananewo do ŋgɔ na Yesu dzidzi la me.

Fiaɖuɖu Le Yudea Ƒe Hoʋiʋli

Tso ƒe alafa evelia Do Ŋgɔ Na Mía Ŋɔli (D.M.Ŋ.) ƒe gɔmedzedze va ɖo eƒe titina la, Siriatɔwo ƒe Seleucus fiaƒomea, si nye fiaƒomedziɖuɖu ene siwo do tso Aleksanda Gãtɔ ƒe fiaɖuƒea me la dometɔ ɖeka, ye nɔ Yudea dzi ɖum. Ke hã, esi Seleucus fiaƒomea me tɔ si nɔ zia dzi la tee kpɔ le ƒe 168 D.M.Ŋ. me lɔƒo be yeatsɔ Zeus subɔsubɔ aɖo tadedeagu si wotsɔna naa Yehowa le Yudatɔwo ƒe gbedoxɔ si nɔ Yerusalem me teƒe la, Maccabee ƒomea nɔ ŋgɔ na Yudatɔwo wotso ɖe eŋu. Esia wɔe be Maccabeeawo, siwo wogayɔna be Hasmoneawo, va ɖu Yudea dzi tso ƒe 142 va ɖo ƒe 63 D.M.Ŋ.

Le ƒe 66 D.M.Ŋ. me la, Hasmoneawo ƒe fiavi eve, Hyrcanus II kple nɔvia Aristobulus, nɔ fiazikpuia ʋlim. Esia wɔe be wova te aʋawɔwɔ kple wo nɔewo, eye wo dometɔ ɖe sia ɖe di kpekpeɖeŋu tso Pompey, si nye Roma aʋafia si nɔ Siria ɣemaɣi la, gbɔ. Pompey hã wɔ mɔnukpɔkpɔ ma ŋu dɔ hede nu aʋa la me.

Romatɔwo nɔ dukɔwo dzi ɖum ɖo ta ɣedzeƒe, eye ɣemaɣi la, wokpɔ ŋusẽ ɖe Asia Sue ƒe akpa gã aɖe dzi. Gake esi Siriatɔwo ƒe fia vovovo, siwo ɖu dzi ɖe wo nɔewo yome la ƒe dziɖuŋusẽ me gbɔdzɔ ta la, ewɔe be aglãdzenuwɔnawo nɔ edzi yim le dukɔa me, eye Romatɔwo kpɔe be esia ate ŋu agblẽ ŋutifafa si ta yewodi be yewoakpɔ le Ɣedzeƒenutoa me la me. Esia wɔe be Pompey ho aʋa ɖe Siria ŋu hexɔe.

Ale si Pompey di be yeakpɔ Hasmonea ƒomea ƒe hoʋiʋlia gbɔ ye nye be yeada megbe na Hyrcanus; eya ta le ƒe 63 D.M.Ŋ. me  la, Romatɔwo va dze Yerusalem dzi hetsɔ Hyrcanus ɖo fiazikpuia dzi. Gake Hyrcanus maɖu dzi le eɖokui si o. Esi Romatɔwo nya de nu nyaa me ko la, woɖoe be yewoayi edzi akpɔ ŋusẽ ɖe wo dzi. Hyrcanus va zu fia si le Romatɔwo ƒe ŋusẽ te, si le zia dzi le Romatɔwo ƒe amenuveve me, eye wòle fia ɖum le esi Romatɔwo lɔ̃ eye wole kpekpem ɖe eŋu be wòakpɔtɔ anɔ fiazikpuia dzi ta. Ate ŋu akpɔ fiaɖuƒea me nyawo gbɔ abe ale si wòdii ene, gake le kadodo kple dukɔ bubuwo gome ya la, enɔ nɛ be wòawɔ ɖe Romatɔwo ƒe ɖoɖowo dzi.

Herodes Ƒe Ŋusẽkpɔkpɔ

Hyrcanus nye dziɖula si mete ŋu wɔa eƒe dziɖuŋusẽa ŋu dɔ ale si dze o. Ke hã, Antipater, si nye Edomtɔ si nye Herodes Gãtɔ fofo la naa kpekpeɖeŋui. Antipater ye nye ŋusẽ si nɔ megbe na fia la. Exe mɔ na Yudatɔwo ƒe ha siwo tsi tsitre ɖe fia la ŋu, eye eteƒe medidi o, Antipater va kpɔ ŋusẽ ɖe Yudea nutoa katã dzi. Ekpe ɖe Kaisaro Julius ŋu wòɖu eƒe futɔ siwo nɔ Egipte la dzi, eye Romatɔwo ɖo eteƒe nɛ hedoe ɖe dzi wòzu nutomefia, si nye Roma fiaɖuƒea teƒenɔla si anɔ dɔ wɔm kpli wo tẽe. Emegbe Antipater ŋutɔ hã tsɔ viaŋutsu siwo nye Phasael kple Herodes la ɖo nutomedziɖulawo, gbãtɔ nɔ Yerusalem eye evelia nɔ Galilea.

Antipater fia nu viaŋutsuawo be womate ŋu awɔ naneke Roma ƒe ŋusẽ manɔmee o. Nufiame sia tsi susu me na Herodes. Le eƒe dziɖuɣi katã la, edze agbagba da sɔ le nu siwo katã Roma dziɖuɖua, si nye eƒe aƒetɔ, kpakple nu siwo etevi, siwo nye Yudatɔwo, dina tso esi la dzi wɔwɔ me. Ðoɖowɔwɔ ƒe ŋutete si nɔ esi kple aʋafia si wònye la de edzi ŋutɔ. Esi woɖo Herodes, si xɔ ƒe 25 la nutomedziɖulae la, etso enumake hedze agbagba vevie ɖe adzoblasuwo ƒe ha siwo nɔ nutoa me la ɖa keŋkeŋ, eye esia wɔe be Yudatɔwo kple Romatɔwo siaa kpɔ ŋudzedze ɖe eŋu.

Esi Antipater ƒe futɔwo de aɖi nu me nɛ wòku le ƒe 43 D.M.Ŋ. me megbe la, Herodes ye va zu ŋusẽtɔ gãtɔ kekeake le Yudea katã. Ke hã, ame aɖewo lé fui. Amegã siwo nɔ Yerusalem la bui be menye eyae dze aɖu fia o, eye wodze agbagba be yewoaƒoe ɖe Roma nu wòaɖee le zia dzi. Gake womekpɔ dzidzedze o. Romatɔwo ɖo ŋku nu siwo Antipater wɔ na wo la dzi eye wokpɔ ŋudzedze ɖe ŋutete siwo le viaŋutsua si la hã ŋu.

Woɖo Herodes Yudea Fia

Ale si Pompey kpɔ ʋiʋli si nɔ Hasmonea ƒomea me la gbɔ ƒe 20 do ŋgɔ la na dzi nɔ ame geɖewo kum vevie. Ameha siwo de Aristobulus dzi, siwo dzi woɖu tsã, la yi edzi nɔ agbagba dzem be yewoaxɔ fiazikpuia, eye le ƒe 40 D.M.Ŋ. me la, Partiatɔ siwo nye Roma fiaɖuƒea ƒe futɔwo la da megbe na wo wokpɔ dzidzedze azɔ. Esi dukɔmeviʋa nɔ edzi yim le Roma ta la, wowɔ mɔnukpɔkpɔa ŋu dɔ yi ɖadze Siria dzi; woɖe Hyrcanus le zia dzi, eye wotsɔ Hasmonea ƒomea me tɔ aɖe si lé fu Romatɔwo la ɖo fiazikpuia dzi.

Herodes si yi Roma, eye woxɔe alɔevee. Romatɔwo di be yewoanya Partiatɔwo ɖa le Yudea ale be yewoatsɔ nutoa ade asi na dziɖula si anɔ yewoƒe ŋusẽ te. Wohiã ame aɖe si dzi woate ŋu aka ɖo, eye wokpɔe be Herodes koe dze. Eya ta Romatɔwo ƒe Dunyahemegãwo ƒe Sewɔha la ɖɔ fiakuku na Herodes heɖoe Yudea fia. Herodes nɔ ŋgɔ na gbɔlɔlɔ aɖe tso Sewɔtakpeƒea yi ɖe Yupiter ƒe gbedoxɔ me ɖasa vɔ na trɔ̃subɔlawo ƒe mawuwo wònye dzesi be yele klalo awɔ nu sia nu si yeate ŋui be dziɖuŋusẽa nakpɔtɔ anɔ ye si me.

Romatɔwo ƒe asrafoha da megbe na Herodes wòɖawɔ aʋa kple eƒe futɔwo le Yudea heɖu wo dzi eye wòtrɔ xɔ eƒe fiazikpuia. Hlɔ̃ si wòbia ame siwo tsi tsitre ɖe eŋu la nu sẽ ŋutɔ. Etsrɔ̃ Hasmonea ƒomea kple Yudatɔ dziɖuɖumegã siwo katã de wo dzi, kpakple ame ɖe sia ɖe si medi be Roma fiaɖuƒea ƒe xɔlɔ̃ aɖeke naɖu fia ɖe yewo dzi o la.

Herodes Na Eƒe Dziɖuɖua Li Ke

Le ƒe 31 D.M.Ŋ. me esime Octavius ɖu Mark Antony dzi le aʋa si wowɔ le Actium la me heva zu Roma dziɖula si dze la, Herodes kpɔe be xɔlɔ̃wɔwɔ si nɔ ye kple Mark Antony dome la ava wɔe be dziɖula yeyea maka ɖe ye dzi o. Eya ta Herodes wɔ kaba na Octavius nya be yele megbe nɛ. Roma dziɖula yeyea hã da asi ɖe Herodes dzi abe Yudea nutoa ƒe fia ene eye wòkeke nuto si dzi ɖum wònɔ la ɖe enu.

Le ƒe siwo kplɔe ɖo me la, Herodes ɖo atsyɔ̃ na Yerusalem abe Helatɔwo ƒe dugãwo dometɔ ɖeka  ene heto esia me li ke eƒe dziɖuŋusẽ. Edze xɔtudɔ gã aɖe gɔme—etu fiasãwo kple melidzeƒedu si nye Kaisarea, eye wòwɔ xɔtudɔ gãwo le Yerusalem ƒe gbedoxɔa hã ŋu. Le ɣeyiɣi mawo katã me la, ekpɔa egbɔ be dukplɔɖoɖo ɖe sia ɖe si yeawɔ nana xɔlɔ̃wɔwɔ nakpɔtɔ anɔ ye kple Roma fiaɖuƒea dome eye be wòakpɔtɔ anɔ megbe na ye.

Herodes kpɔ ŋusẽ ɖe Yudea dzi bliboe; naneke menɔ anyi si dzi mekpɔ ŋusẽ ɖo o. Herodes te ŋu kpɔ ŋusẽ ɖe nunɔla gã nyenye ƒe ɖoɖoa hã dzi eye etea ŋu tiaa ame sia ame si dze eŋu wònyea nunɔla gã.

Ŋuʋãla Amewula

Tomefafa menɔ Herodes ƒe agbe me o. Srɔ̃anyɔnu ewoawo dometɔ geɖe di be yewo viŋutsuwo dometɔ ɖeka nava ɖu fia ɖe fofoa teƒe. Nugbeɖoɖo siwo nɔ edzi yim le Herodes ƒe fiasã me na be wòva nɔa vɔ̃ bum ɖe ame ŋu hesẽa ŋuta hã. Ŋuʋaʋã sẽŋu aɖe na wòna wowu srɔ̃a, Mariamne, si gbɔ melɔ̃a nu le o la, eye emegbe wòna womia ve na viŋutsu siwo Mariamne dzi nɛ la dometɔ eve woku, elabena esee be woɖo nugbe ɖe ye ŋu. Eya ta Mateo ƒe nuŋlɔɖi si ku ɖe ʋukɔkɔɖi si yi edzi le Betlexem ŋu la ɖo kpe dziku ƒe nɔnɔme si wonya na Herodes kple ale si wòɖoe kplikpaa be yeawu ame sia ame si atsi tsitre ɖe ye ŋu la dzi.

Ame aɖewo gblɔ be, esi Herodes nya be amewo melɔ̃a yeƒe nya o ta la, ede se be gbe si gbe yeaku la, ele be wòanye konyifagbe na dukɔa katã, ke menye dzidzɔgbe o. Le agbagbadzedze be yeana woawɔ yeƒe sededea dzi me la, ena wolé amegã siwo le Yudea la hede se be woawu wo katã ne yeku eye wonya ɖe gbeƒã yeƒe ku ko. Gake womeva wɔ ɖe eƒe sedede ma dzi o.

Nu Si Wotsɔ Ðoa Ŋku Herodes Gãtɔ La Dzi

Esi Herodes ku la, Roma fiaɖuƒea tso nya me le se nu be, via Arxelao naxɔ ɖe eteƒe abe Yudea dziɖula ene, eye viaŋutsu eve bubuwo hã zu fiaviwo, alo nutomedziɖulawo—Antipa ɖu Galilea kple Perea dzi, eye Filipo ɖu Iturea kple Traxoniti nutoawo dzi. Dukɔa kple Arxelao ƒe aƒetɔ siwo ɖoe zia dzi la siaa meva kpɔ ŋudzedze ɖe eŋu o. Eɖu dzi hena ƒe ewo, gake eƒe dziɖuɖua mekpɔ dzidzedze o, eye le esia ta Romatɔwo ɖee ɖa hetsɔ woawo ŋutɔwo ƒe nutomefia ɖo eteƒe, si nye ame si ɖu dzi do ŋgɔ na Pontio Pilato. Le ɣeyiɣi mawo ke me la, Antipa—si Luka yɔ ko be Herodes—kple Filipo kpɔtɔ nye nutomedziɖulawo le woƒe nutoawo me. Alea ye nuwo nɔ le dunyahenyawo gome le Yesu ƒe subɔsubɔdɔa ƒe gɔmedzedze.—Luka 3:1.

Ðewohĩ nu vɔ̃ɖitɔ kekeake si Herodes Gãtɔ, si dze aye le dunyahehe me eye wònye amewula tagbɔsesẽtɔ, la ɖo be yeawɔ ye nye didi be yeawu Yesu vidzĩ la. Akpa si Herodes wɔ le ŋutinya me la me dzodzro ɖea vi na Biblia xlẽlawo—ena nu siwo dzɔ le ɣeyiɣi mawo me la me gakɔ na mí nyuie, ena míese ale si wòdzɔe be Romatɔwo va nɔ Yudatɔwo dzi ɖum, kple ale si nuwo nɔ le Yesu ƒe anyigbadzinɔɣi kple eƒe subɔsubɔdɔa wɔɣi la gɔme.

[Anyigbatata si le axa 15]

(Edze nyuie le agbalẽa ŋutɔ me)

Palestina kple nuto siwo ƒo xlãe le Herodes ƒe ŋkekeawo me

SIRIA

ITUREA

GALILEA

TRAXONITI

Galilea Ƒu

Yordan Tɔsisi

Kaisarea

SAMARIA

PEREA

Yerusalem

Betlexem

YUDEA

Dzeƒu

IDUMEA

[Nɔnɔmetata siwo le axa 13]

Dziɖula siwo ɖu Yudea dzi ɖe wo nɔewo yome le ƒe alafa eve siwo do ŋgɔ na Yesu ƒe subɔsubɔdɔa la dometɔ ɖeka koe Herodes nye