Dzo kpo yi emenuwo dzi

Dzo kpo yi emenuawo dzi

Edi Be Agbe Nadze Edzi Na Mí

Edi Be Agbe Nadze Edzi Na Mí

 Te Ðe Mawu Ŋu

Edi Be Agbe Nadze Edzi Na

Yosua 1:6-9

DZILA siwo tsɔa ɖe le eme na wo viwo la dina be nu nadze edzi na wo, taɖodzinu nanɔ wo si le agbe me, eye woakpɔ dzidzeme. Nenema kee Yehowa, mía Fofo si le dziƒo la, hã dina be ye vi siwo le anyigba dzi la nakpɔ dzidzedze le agbe me. Mɔ siwo dzi wòto ɖe eƒe lɔlɔ̃ fia mí la dometɔ ɖekae nye ale si wòfia ale si míawɔ akpɔ dzidzedze la mí. Le kpɔɖeŋu me, bu nya siwo wògblɔ na Yosua, si woŋlɔ ɖe Yosua 1:6-9 la ŋu kpɔ.

De ŋugble le nɔnɔme si me wògblɔ nyaa nɛ le, abe ale si wòdze le ɖusime ene, la ŋu kpɔ. Le Mose ƒe ku megbe la, Yosua ye nye Israel dukɔa, si ƒe xexlẽme ade miliɔn geɖe la, ƒe kplɔla yeyea. Israel viwo nɔ dzadzram ɖo be yewoayi anyigba si ŋugbe Mawu do na wo tɔgbuiwo la dzi. Eya ta Mawu ɖo aɖaŋu aɖewo na Yosua. Ne ewɔ ɖe wo dzi la, akpe ɖe eŋu wòakpɔ dzidzedze. Gake menye Yosua koe aɖaŋuɖoɖo siawo aɖe vi na o. Ne míewɔ ɖe wo dzi la, míawo hã míakpɔ dzidzedze le agbe me.—Romatɔwo 15:4.

Yehowa gblɔ na Yosua be wòalé dzi ɖe ƒo eye wòasẽ ŋu—menye zi ɖeka ko wògblɔ nya ma nɛ o, ke boŋ zi etɔ̃ sɔŋ. (Kpukpui 6, 7, 9) Le nyateƒe me la, ele be dzideƒo nanɔ Yosua si eye wòawɔ kalẽ hafi wòate ŋu akplɔ dukɔa ayi Ŋugbedodonyigba la dzi dzidzedzetɔe. Gake nu kae wòawɔ hafi nɔnɔme nyui siawo nate ŋu asu esi?

Yosua ate ŋu akpɔ dzideƒo kple ŋusẽ tso nya siwo Mawu to eƒe gbɔgbɔa dzi na woŋlɔ ɖi la me. Yehowa gblɔ nɛ be: “[Kpɔ egbɔ be nàlé] se, siwo katã nye dɔla Mose de na wò la me ɖe asi, eye nàwɔ wo dzi.” (Kpukpui 7) Ɣemaɣi la, Biblia gbalẽ ʋɛ siwo woŋlɔ koe anya nɔ Yosua si. * Ke hã, Mawu ƒe Nya la ƒe amesinɔnɔ ɖeɖe dzaa mawɔe be ame nakpɔ dzidzedze o. Eya ta hafi wòaɖe vi na Yosua la, ele be wòaɖe afɔ vevi eve.

Gbã la, ele be Yosua nanɔ Mawu ƒe nya la xlẽm edziedzi wòage ɖe eƒe dzi me. Yehowa gblɔ nɛ be: “[Nàxlẽe kple gbe blewu] zã kple keli.” (Kpukpui 8) Numekugbalẽ aɖe gblɔ tso nya sia ŋu be: “Mawu nɔ se dem na Yosua be wòaɖo ŋku yeƒe Sea dzi, ‘wòaxlẽe wòaɖi’ na eɖokui, ‘wòade ŋugble’ le eŋu, alo ‘anɔ eŋu bum ahanɔ nu si ŋu bum wòle la gblɔm.’” Mawu ƒe nya la xexlẽ kple ŋugbledede le eŋu gbe sia gbe akpe ɖe Yosua ŋu wòakpɔ kuxi ɖe sia ɖe si wòava do goe la gbɔ dzidzedzetɔe.

Evelia, ele be Yosua nawɔ ɖe nu siwo wòsrɔ̃ tso Mawu ƒe nya la me dzi. Yehowa gblɔ nɛ be: “[Kpɔ egbɔ be] nàlé nu siwo katã woŋlɔ ɖe eme la me ɖe asi, eye nàwɔ wo dzi.” (Kpukpui 8) Yosua ƒe dzidzedzekpɔkpɔ nɔ te ɖe Mawu ƒe lɔlɔ̃nu wɔwɔ dzi. Ðe mɔ bubu aɖe gali wu esia? Mawu ƒe lɔlɔ̃nu kpɔa dzidzedze godoo.—Yesaya 55:10, 11.

Yosua wɔ ɖe Yehowa ƒe aɖaŋuɖoɖoa dzi. Nu si do tso emee nye be, ekpɔ dzidzeme blibo le agbe me eye wòsubɔ Yehowa nuteƒewɔwɔtɔe.—Yosua 23:14; 24:15.

Ðe wò hã èdi be yeakpɔ dzidzedze le agbe me abe Yosua enea? Yehowa di be agbe nadze edzi na wò. Gake ne eƒe Nya, Biblia la, le asiwò hã la, esia ɖeɖe mesɔ gbɔ o. Kristotɔ aɖe si subɔ nuteƒewɔwɔtɔe hena ƒe geɖe la ɖo aɖaŋu be: “Xlẽ Biblia la edziedzi eye nàna eƒe nyawo nage ɖe dzi me na wò.” Ne èxlẽa Mawu ƒe Nya la edziedzi eye nènɔa agbe ɖe nu si nèsrɔ̃ tso eme nu la, ekema wò hã ‘àkpɔ dzidzedze le nu sia nu’ me abe Yosua ke ene.

[Etenuŋɔŋlɔ]

^ mm. 7 Nya siwo Mawu to eƒe gbɔgbɔa dzi na woŋlɔ ɖi, siwo anya nɔ Yosua si ɣemaɣie nye Mose ƒe agbalẽ atɔ̃awo, Hiob ƒe agbalẽa, kple psalmo ɖeka alo eve ko.