Dzo kpo yi emenuwo dzi

Dzo kpo yi emenuawo dzi

“Ɣekaɣi Manɔ Yɔwòm Sesĩe . . . Ase Ðo?”

“Ɣekaɣi Manɔ Yɔwòm Sesĩe . . . Ase Ðo?”

 “Ɣekaɣi Manɔ Yɔwòm Sesĩe . . . Ase Ðo?”

Jayne gblɔ kple avi be: “Medi vevie be nye vevesesea nu natso!” Kansadɔ nɔ fu ɖem nɛ eye dɔa nɔ kakam ɖe eƒe lãme katã. Ne ɖe ŋutete le eƒe ƒometɔwo kple xɔlɔ̃wo si la, anye ne woaɖe eƒe dɔlélea ɖa le edzi enumake, ale be eƒe nuxaxaa nu natso! Wodo gbe ɖa na Mawu be wòakpe ɖe eŋu. Ðe Mawu aɖo to woƒe gbedodoɖa? Ðe wòtsɔ ɖe le emea?

MAWU nya nu siwo me tom ameƒomea le. Eƒe Nya, Biblia la, gblɔ be: “Nuwɔwɔ blibo la katã le ŋeŋem ɖekae, eye wòle veve sem ɖekae.” (Romatɔwo 8:22) Mawu nya be ame miliɔn alafa geɖewo le veve sem le ŋutilã me, le seselelãme gome, alo le susu me gbe sia gbe abe Jayne ke ene. Mawu kpɔa ame miliɔn 800 siwo mlɔa anyi dɔmeɣi zã sia zã, ame miliɔn geɖe bubu siwo ŋu wowɔa ŋutasẽnuwo ɖo le aƒe me, kple dzila geɖe siwo tsia dzi ɖe ale si etsɔme ava nɔ na wo viwo kple woƒe dedienɔnɔ ŋu la hã. Ðe èbia ɖokuiwò kpɔ be, ɖe Mawu ava wɔ nane le nɔnɔme siawo ŋu hã? Esi wònye nyateƒe be míedina be míakpe ɖe míaƒe ame veviwo ŋu ta la, ɖe Mawu ya madi geɖe wu be yeakpe ɖe amegbetɔ, siwo nye eƒe nuwɔwɔ la, ŋu oa?

Ne èbia nya mawo ke ɖokuiwò kpɔ la, ekema nyae be menye wòe nye ame gbãtɔ si bia nya siawo o. Ƒe 2,600 kple edzivɔwoe nye esia la, ŋutsu nuteƒewɔla aɖe, si ŋkɔe nye Xabakuk, hã se le eɖokui me abe ale si wòle le ame geɖewo gome egbea ene, eye wòbia Mawu be: “Yehowa, ɣekaɣi manɔ yɔwòm sesĩe, eye nàgbe esese ase ɖo? [Va se ɖe ɣekaɣi mado ɣli na wò le ŋutasesẽ ta, eye màxɔ nam o?] Nukaŋuti nèna mele nu vlo wɔwɔ teƒe kpɔm, eye nèle hiãkame kpɔm kple ŋku, gbegblẽ kple ŋutasesẽ le ŋkunye me, avuwɔwɔ li, eye dzre dzɔ?” (Xabakuk 1:2, 3) Xabakuk, si nye Hebritɔ nyagblɔɖila la, kpɔ nu vlo wɔwɔ dziŋɔ siwo amewo wɔna tamemabumabutɔe kple anyrawɔwɔwo teƒe le eƒe ŋkekeawo me. Egbea la, míesea nuwɔna mawo, siwo gbãa dzi na ame siwo sea veve ɖe ame nu la, ŋu nya gbe sia gbe.

Ðe Mawu do toku nu siwo ŋu Xabakuk tsi dzi ɖoa? Ao. Eɖo to nya siwo Xabakuk bia tso dzi blibo me la, eye wòfa akɔ na ŋutsu sia si dzi nu te ɖo vevie la hede dzi ƒo nɛ. Yehowa Mawu do ŋugbe na Xabakuk be yeava ɖe fukpekpewo ɖa tsɔ do ŋusẽ eƒe xɔse. Mawu ƒe nya sia si naa mɔkpɔkpɔ ame la ate ŋu ana kakaɖedzi nasu wò hã asiwò, abe ale si wòna kakaɖedzi Jayne kple eƒe ƒometɔwo ene. Nyati siwo kplɔ esia ɖo la aɖo biabia siawo ŋu: Nu kae na míeka ɖe edzi be Mawu tsɔa ɖe le eme na mí vavã? Nu kae Mawu awɔ atsɔ aɖe fukpekpewo ɖa, eye ɣekaɣie wòle ewɔ ge?