Dzo kpo yi emenuwo dzi

Dzo kpo yi emenuawo dzi

Enye “Akɔfafa Katã Ƒe Mawu”

Enye “Akɔfafa Katã Ƒe Mawu”

 Te Ðe Mawu Ŋu

Enye “Akɔfafa Katã Ƒe Mawu”

2 Korintotɔwo 1:3, 4

NU GEÐE siwo dzɔna le agbe me, siwo ƒe ɖewoe nye fukpekpe, mɔkpɔkpɔbuɖeame, kple akogotsitsi, ate ŋu ahe blanuiléle kple dziɖeleameƒo gɔ̃ hã vae. Le ɣeyiɣi mawo tɔgbi me la, ɖewohĩ àbia ɖokuiwò be, ‘Afi kae makpɔ kpekpeɖeŋu le?’ Apostolo Paulo ƒe nya siwo dze le 2 Korintotɔwo 1:3, 4 he susu yi akɔfafatsoƒe aɖe si ŋu kakaɖedzi le, si nye Yehowa Mawu, la dzi.

Le kpukpui 3 lia me la, woyɔ Mawu be “dɔmetɔtrɔwo ƒe Fofo.” Nya sia gɔme ɖe? Helagbe me nya si gɔme woɖe be “dɔmetɔtrɔwo” ate ŋu ahe susu ayi vevesese ɖe amewo nu le fu siwo kpem wole ta la dzi. * Biblia gɔmeɖegbalẽ aɖe gblɔ be, woate ŋu aɖe nya sia gɔme be “ame ƒe nu nawɔ nublanui na ame” alo “ɖetsɔtsɔ le eme na ame vevie.” Mawu ƒe “dɔmetɔtrɔwo” ʋãnɛ wòɖea afɔ siwo hiã. Mawu ƒe amenyenye ƒe akpa sia nyanya nana míedina be míate ɖe eŋu, alo menye nenemae oa?

Paulo gayɔ Yehowa hã be “akɔfafa katã ƒe Mawu.” Le afi sia la, Paulo zã nya aɖe si wogblɔna be efia hã be “woafa akɔ na ame aɖe si ɖo kuxi me alo le nu xam eye woana kpekpeɖeŋu ŋutɔŋutɔ alo dzideƒoe.” The Interpreter’s Bible ɖe nu me be: “Míefaa akɔ na ame si le fu kpem ne míede dzi ƒo nɛ be wòanɔ te ɖe eƒe vevesesea nu.”

Ðewohĩ àbia be, ‘Aleke Mawu faa akɔ na mí hedea dzi ƒo na mí be míanɔ te ɖe míaƒe vevesesewo nui?’ Ewɔa esia to Eƒe Nya, Biblia la, koŋ, kple nunana si nye gbedodoɖa dzi. Paulo gblɔ na mí be Mawu tsɔ eƒe Nya la na mí lɔlɔ̃tɔe ale be to “akɔfafa si míekpɔna le Ŋɔŋlɔawo me dzi la, mɔkpɔkpɔ nasu mía si.” Tsɔ kpe ɖe eŋu la, gbedodoɖa si tso dzi blibo me ana “Mawu ƒe ŋutifafa, si ƒoa susu ɖe sia ɖe ta la” nasu mía si.—Romatɔwo 15:4; Filipitɔwo 4:7.

Nu kawo gbegbe mee Yehowa faa akɔ na eƒe amewo le? Paulo gblɔ be Mawu “faa akɔ na mí le míaƒe xaxa blibo la katã me.” (2 Korintotɔwo 1:4) Metsɔ le nuteɖeamedzi, nuxaxa, alo fukpekpe si ava mía dzi me o, Mawu ate ŋu ana dzideƒo kple ŋusẽ si hiã la mí be míatsɔ anɔ te ɖe enu. Ðe esia mena kakaɖedzi mí ŋutɔ oa?

Akɔfafa si Mawu nana la mesena ɖe ame si xɔe la dzi o. Paulo gblɔ yi edzi be Mawu faa akɔ na mí bene “míato akɔfafa si Mawu tsɔ le akɔ fam na mía ŋutɔwoe la dzi afa akɔ na ame siwo le xaxa ɖe sia ɖe ƒomevi me tom la.” Esi wofa akɔ na mí le míaƒe xaxawo me ta la, esia nana míesea veve ɖe amewo nu, eye wòʋãa mí míekpena ɖe ame siwo le hiã me la ŋu.

Yehowa, ame si nye “akɔfafa katã ƒe Mawu” la, meɖea míaƒe kuxiwo alo vevesesewo ɖa kokoko o. Ke hã, míate ŋu aka ɖe nya sia dzi be: Ne míetrɔ ɖe eŋu be wòafa akɔ na mí la, ate ŋu ado ŋusẽ mí míanɔ te ɖe nuxaxa alo kuxi ɖe sia ɖe si míado go le agbe me la nu. Nyateƒee, Mawu si sea veve ɖe ame nu alea dze na míaƒe tadedeagu kple kafukafu vavã.

[Etenuŋɔŋlɔ]

^ mm. 5 Woyɔ Mawu be “dɔmetɔtrɔwo ƒe Fofo [alo dzɔtsoƒe],” elabena veveseseɖeamenu tso egbɔ eye wònye eƒe amenyenye ƒe akpa aɖe hã.