Dzo kpo yi emenuwo dzi

Dzo kpo yi emenuawo dzi

Biblia La Le Amewo Ƒe Agbenɔnɔ Trɔm

Biblia La Le Amewo Ƒe Agbenɔnɔ Trɔm

 Biblia La Le Amewo Ƒe Agbenɔnɔ Trɔm

Nu kae ʋã sɔhɛ aɖe si nye Mexicotɔwo ƒe gbevuha si woyɔna be Satana Suetɔwo me tɔ be wòtrɔ va zu dukɔmevi ɖianukware dɔ sesẽ wɔla aɖe? Nu ka tae nyɔnu asitsala kpɔdzidze aɖe si nye Japantɔ la megabua kesinɔnuwo yome titi nu vevitɔ le agbe me o, eye aleke wòsena le eɖokui me le tɔtrɔ siwo wòwɔ la ŋu? Nu kae ʋã Russiatɔ aɖe si nye aʋawɔnuwo dzrala be wògbe nu le eƒe asitsatsa manɔsenu si me wòkpɔa ga geɖe le la gbɔ? Se nya siwo ame siawo ŋutɔ gblɔ la ɖa.

AMEA ŊUTI NYATAKAKAWO

ŊKƆ: ADRIAN PEREZ

ƑE SI WÒXƆ: 30

DUKƆ: MEXICO

AME SI TƆGBI WÒNYE TSÃ: GBEVUHA ME TƆ

AGBE SI MENƆ TSÃ: Esime mexɔ abe ƒe 13 ene la, míaƒe ƒomea ʋu yi Ecatepec de Morelos, Mexico State. Ɣemaɣi la, sɔhɛwo ƒe aglãdzedze, amewo ƒe nuwo dome gbegblẽ, kple atike vɔ̃ɖiwo zazã xɔ aƒe ɖe nutoa me ale gbegbe. Eteƒe medidi o, mete aha tsu nono, nɔa amewo ƒe nuwo dome gblẽm, eye meƒo ɖokuinye ɖe agbe gbegblẽ nɔnɔ me.

Emegbe la, míegaʋu yi San Vicente du si me wodzim ɖo la me ake. Ke hã, atike vɔ̃ɖiwo zazã va zu kuxi sesẽ aɖe le nuto ma me. Enye nu si bɔ be woakpɔ sɔhɛwo ku tsi ablɔwo dzi. Meɖo gbevuha aɖe si ŋkɔe nye Satana Suetɔwo me. Míefia fi, eye míezãa atike vɔ̃ɖiwo, vevietɔ míegbɔa thinner, si wotsɔ dzroa aŋɔwo, alo nutrenuwo (glue). Zi geɖe la, nyemeɖoa ŋku ale si mewɔna hafi ɖoa aƒe me la dzi o, eye ɣeaɖewoɣi la, ɖeko meyia ɖi me tsia ablɔ dzi. Wode xɔ̃nye aɖewo gaxɔ me le fififi kple amewuwu ta.

Togbɔ be menɔ nu gbegblẽ mawo wɔm hã la, mexɔ Mawu dzi se. Be nye dzitsinya ƒe fuɖename dzi naɖe kpɔtɔ la, mekpɔa gome le subɔsubɔwɔnawo, abe atsitsogamɔzɔzɔ le Kwasiɖa Kɔkɔewo me ene, me. Ke hã, ne míewu wɔna mawo nu vɔ la, mí katã míemua aha tsɔ  doa dzidzɔ na mía ɖokui le esi míekpɔ gome le wɔnawo me ta, eye ame si wɔ Kristo ƒe akpa dzi hã nɔa eme.

ALE SI BIBLIA TRƆ NYE AGBENƆNƆE: Yehowa Ðasefowo te Biblia sɔsrɔ̃ kplim esime wòsusɔ vie maxɔ ƒe blaeve. Menyae be tameɖoɖo ŋutɔŋutɔ aɖeke mele nye agbe ŋu o, eye ne meyi nye agbe baɖa la nɔnɔ dzi la, nuwo mayi edzi nyuie nam o. Nu si wɔ dɔ ɖe dzinyee nye nya si dze le Galatiatɔwo 6:8, afi si gblɔ be: “Ame si le nu ƒãm hena eƒe ŋutilã la, aŋe gbegblẽ tso eƒe ŋutilã me, gake ame si le nu ƒãm hena gbɔgbɔa la, aŋe agbe mavɔ tso gbɔgbɔ la me.” Mawunyakpukpui ma na mekpɔe dze sii be ne medi be nuwo nayi edzi nyuie nam la, ele be maƒã nu ɖe etsɔme ŋuti.

Esi meyi Biblia sɔsrɔ̃ dzi la, meva te dzesidedee be Mawu gbagbe si tsɔ ɖe le eme nam ye Yehowa nye, eye mekpɔe hã be enye eƒe didi be yeatsɔ nu vɔ̃ siwo mewɔ va yi tsã la akem. Nye ŋutɔ mekpɔe be eɖoa to gbedodoɖawo heɖoa wo ŋu.

Menɔ bɔbɔe be mawɔ tɔtrɔwo le nye agbenɔnɔ me o. Dodo le gbevuha la me sesẽ ŋutɔ. Wode se ɖe gege ɖe nuto aɖewo me ŋu, eye nyemate ŋu ato nuto mawo me o, togbɔ be nyemeganye gbevuhaa me tɔ o hã. Ɣeaɖewoɣi la, enɔna nam be mabe na xɔ̃nye tsãtɔwo, elabena woadi yonyememɔ, eye woadze agbagba be yewoagakplɔm ayi agbenɔnɔ tsãtɔ me.

To vovo na ema la, esi mete Ðasefowo ƒe kpekpewo dede le Fiaɖuƒe Akpata me la, mekpɔe be wonye ame siwo doa vivi ɖe ame ŋu helɔ̃a ame. Ale si kakaɖedzi vavã le ame siawo si, eye wonɔa agbe ɖe nu siwo woawo ŋutɔwo wofiana nu la wɔ dɔ ɖe dzinye ŋutɔ. Woto vovo sãsãsã tso ame siwo dome menɔ tsã la gbɔ.

VIÐE SIWO MEKPƆ: Ƒe ewo ye nye esia si mexɔ nyɔnyrɔ hezu Yehowa Ðasefo. Medzea agbagba vevie be matsɔ Biblia ƒe nufiafiawo ade dɔwɔwɔ me le nye agbenɔnɔ me. Esia wɔe be ƒonyemetɔwo te bubudede ŋunye. Fifia wonyam be menye ame si wɔa dɔ sesĩe, eye metea ŋu naa gakpekpeɖeŋu gɔ̃ hã wo. Danye te Biblia sɔsrɔ̃, eye egbea ezu Yehowa Ðasefo. Fofonye hã le tɔtrɔwo wɔm le eƒe agbenɔnɔ me. Ƒonyemetɔ akpa gãtɔ menye Yehowa Ðasefowo o, gake esi wokpɔ ale si nye agbenɔnɔ trɔe la, wolɔ̃ ɖe edzi be Biblia ate ŋu akpe ɖe ame ŋu eƒe agbenɔnɔ nanyo ɖe edzi wu.

AMEA ŊUTI NYATAKAKAWO

ŊKƆ: YAYOI NAGATANI

ƑE SI WÒXƆ: 50

DUKƆ: JAPAN

AME SI TƆGBI WÒNYE TSÃ: NYƆNU ASITSALA KPƆDZIDZE AÐE

AGBE SI MENƆ TSÃ: Metsi le kɔƒedu sue aɖe si me yɔ fũu kple ame siwo lɔ̃a ame la me. Fiase gã aɖe nɔ fofonye si le dua me, eye wòxɔ dɔwɔvi ewo wowɔa dɔ nɛ. Míaƒe aƒe le fiasea xa, eya ta togbɔ be Papa kple Dada mevona o hã, nyemese le ɖokuinye me kpɔ be metsi akogo o.

Nyɔnuvi etɔ̃e míenye, eye nyee nye tsitsitɔ. Tso nye ɖevime ke la,  wona hehem be mava kpɔ ƒomea ƒe asitsatsa dzi emegbe. Nyemetsi hafi ɖe srɔ̃ o. Srɔ̃nye ɖe asi le dɔ si wòwɔna le gadzraɖoƒe la ŋu heva kpe asi ɖe míaƒe ƒomea ŋu le asitsatsa me. Míedzi vi etɔ̃, siwo nye kpedeviwo. Danye kpɔa ɖeviawo dzi eye wògawɔa aƒemedɔwo hã, nye ŋutɔ mewɔa dɔ le fiasea me tso ŋdi va se ɖe zã me. Togbɔ be ele alea hã la, míekpɔa ɣeyiɣi tsɔ nɔa anyi ɖekae abe ƒome ene.

Emegbe la, ganyawo va yi to le nutoa me, eye esia te nugbegblẽ le míaƒe asitsatsa hã ŋu. Esia wɔe be míeɖoe be míaʋu fiase aɖe ɖe mɔgã aɖe to anɔ nu siwo wozãna tsɔ ɖɔa aƒewo ɖoe la dzram. Le ŋkeke si do ŋgɔ na fiasea tutu dɔa gɔmedzedze ƒe wɔnawo la, susumedɔ aɖe dze fofonye si nye míaƒe adzɔha la ƒe amegã la dzi. Dɔléle la na megatea ŋu ƒoa nu tututu o, eya ta fiase yeyea dzi kpɔkpɔ va kpɔ ŋkunyeme. Srɔ̃nye yi edzi nɔ fiase xoxoa dzi kpɔm. Vovo megava nɔa mía ŋu kura o.

Míaƒe fiase yeyea kpɔ dzidzedze ale gbegbe. Dzidzedze si mekpɔ la nye dada nam, dɔ dzi ko menɔna hegbea alɔ̃dɔdɔ. Togbɔ be melɔ̃ vinyewo hã la, dɔwɔwɔ koe nɔa vevie nam. Nyemekpɔa ɣeyiɣi kura ɖoa dze kple srɔ̃nye o, eye ne míekpɔ ɣeyiɣi vi aɖe na dzeɖoɖo la, nya sɔŋ ko míenɔa hehem. Be manɔ te ɖe nuteɖeamedzia nu la, mete gbɔmeyiyi zã sia zã kloe ɖanoa aha kple xɔ̃nyewo kpakple asitsahati bubuwo. Nu siwo mewɔna koe nye: dɔwɔwɔ, ahanono, kple alɔ̃dɔdɔ. Ganyawo de dzinye, gake dzi megava nɔ dzɔyem kura o, eye nyemete ŋu se nu si tae la gɔme o.

ALE SI BIBLIA TRƆ NYE AGBENƆNƆE: Esi Yehowa Ðasefowo te Biblia sɔsrɔ̃ kplim la, mawunyakpukpui etɔ̃ aɖewo wɔ dɔ ɖe dzinye ale gbegbe. Mefa avi esime meva se nu si Mateo 5:3 fia la gɔme. Afi ma gblɔ be: “Dzidzɔtɔwoe nye ame siwo nyae be gbɔgbɔmenuwo hiã yewo, elabena woawo tɔe nye dziƒofiaɖuƒe la.” Mawunyakpukpui sia na meva se nu si tae nyemenɔ dzidzɔ kpɔm o, togbɔ be ganyawo de dzinye, eye nye asitsahatiwo kpɔa ŋudzedze ɖe ŋunye hã la gɔme. Meva de dzesii be ne menyae be gbɔgbɔmenuwo hiãm eye medze agbagba be makpɔ wo gbɔ ko hafi mate ŋu akpɔ dzidzɔ ŋutɔŋutɔ le agbe me.

Le ɣeyiɣi mawo me la, Japan ƒe ganyawo yi to vevie, eye mekpɔ nya si le 1 Timoteo 6:9 si gblɔ be, “Ame siwo ɖoe kplikpaa be yewoazu kesinɔtɔwo la, gena ɖe tetekpɔ kple mɔtetre kpakple movidzɔdzɔ ƒe nudzodzro geɖe, siwo wɔa nuvevi ame, siwo nyrɔa ame ɖe tsɔtsrɔ̃ kple gbegblẽ me, la me” ƒe nyateƒenyenye le nye asitsahatiwo gome. Mekpɔe be Yesu ƒe nya siwo woŋlɔ ɖe Mateo 6:24 si gblɔ be, “Miate ŋu anye Mawu kple Kesinɔnuwo siaa ƒe kluviwo o” la ku ɖe ŋunye ŋutɔ. Eya ta meɖoe be mawɔ tɔtrɔ aɖewo le nye agbe me.

Meva kpɔe dze sii be nyemetsɔ ɖeke le eme na dzinyelawo, srɔ̃nye, kple vinyewo o. Eva dze ƒãa hã be nɔnɔme manyomanyo aɖewo va su asinye. Meva zu dadala. Nyemegbɔa dzi ɖi na amewo kura o. Eye medoa dziku kabakaba. Le gɔmedzedzea me la, mesusui be manya wɔ nam be mawɔ tɔtrɔ ahazu Kristotɔ o. Ke hã, melɔ̃ vinyewo ŋutɔ, eye mede dzesii be esi menɔ wɔwɔm ɖe Biblia ƒe aɖaŋuɖoɖo dzi le nuwɔwɔ kple nye ƒomea me la, vinyewo hã lɔ̃na ɖoa tom. Mekpɔa ɣeyiɣi geɖe ɖe wo ŋu, eye mekplɔa wo yia Kristotɔwo ƒe kpekpeawo.

VIÐE SIWO MEKPƆ: Taɖodzinu si le agbe ŋu nyanya, mɔnukpɔkpɔ si su asinye be mele Mawu subɔm, kple agbe si doa dzidzɔ nɛ nɔnɔ na mekpɔ dzidzɔ kple dzidzeme vavã le agbe me. Nyemegagblẽa nye ƒomea ɖi hevuna ɖe dɔ ŋu o, eya ta bubu si nɔ ŋunye tsã la gava su asinye ake.

Esi danye kpɔ ale si Biblia me gɔmeɖosewo ŋu dɔ wɔwɔ na nye agbenɔnɔ nyo ɖe edzi la, eʋãe wosrɔ̃ Biblia heva zu Kristotɔ. Dzidzɔtɔe la, fofonye alo srɔ̃nye metsi tsitre ɖe míaƒe nyametsotsoa ŋu o. Fifia mía kple vinyewo míeva le kplikplikpli wu, eye meva le dzidzɔ vavã kpɔm le ƒomegbenɔnɔ me.

AMEA ŊUTI NYATAKAKAWO

ŊKƆ: MIKHAIL ZUYEV

ƑE SI WÒXƆ: 51

DUKƆ: RUSSIA

AME SI TƆGBI WÒNYE TSÃ: AƲAWƆNU MANƆSENU DZRALA

 AGBE SI MENƆ TSÃ: Mía de Krasnogorsk nye du aɖe si me gbe damawo le fũu. Moscow Tɔsisi la sina ɖoa ta dua ƒe anyiehe gome. Ave ƒo xlã dua ƒe golɔgoe siwo le ɣetoɖoƒe kple dziehe la ƒe akpa sia akpa kloe.

Le nye ɖevime la, melɔ̃a kɔdada kple fefe kple lãnuwo. Mezã ɣeyiɣi geɖe ɖe ŋutilã me kamedede ŋu. Mewɔa tuwo, tukpewo, kple hɛwo le bebeme. Le ɣeyiɣi aɖe megbe la, esia va zu nye agbemedɔ. Mewɔ ɖoɖo ɖe nye dɔa ŋu nyuie hekpɔ dzidzedze le wo dzadzra na adzogliwo me.

ALE SI BIBLIA TRƆ NYE AGBENƆNƆE: Le ƒe 1990 ƒe gɔmedzedze la, medo go Yehowa Ðasefowo, gake gbã la, nyemeka ɖe wo dzi o. Le nye nukpɔsusu nu la, wobiaa nya fũu akpa.

Gbe ɖeka la, wo dometɔ ɖeka xlẽ Romatɔwo 14:12 nam; afi si gblɔ be, “Mía dometɔ ɖe sia ɖe abu akɔnta le ye ŋutɔ ɖokui ŋuti na Mawu.” Menɔ akɔnta si mabu na Mawu la ŋu bum. Mawunyakpukpui sia ʋãm meva srɔ̃ nu si Mawu di tso asinye.

Medze agbagba vevie be mawɔ ɖe Biblia ƒe aɖaŋuɖoɖo si le Kolosetɔwo 3:5-10 la dzi. Egblɔ be: “Miwu miaƒe ŋutinu siwo le anyigba dzi, le agbe gbegblẽ nɔnɔ, makɔmakɔnyenye, gbɔdɔdɔ ƒe dzodzro, dzodzro vɔ̃, kple ŋubiabiã, si nye trɔ̃subɔsubɔ, la gome. Nu mawo tae Mawu ƒe dziku gbɔna ɖo. . . . Miɖe wo ɖe aga tso mia gbɔ ŋutɔŋutɔ: dɔmedzoe, dziku, vɔ̃ɖinyenye, dzugbewo, kple yakanya siwo dona tso miaƒe nu me. Miganɔ aʋatso kam na mia nɔewo o. Miɖe amenyenye xoxo la kple eƒe nuwɔnawo ɖa, eye mido amenyenye yeye la.”

Tɔtrɔ mawo wɔwɔ sesẽ nam ŋutɔ. Ame siwo medzraa lãnuwo na tsã la yi edzi nɔ ga tsɔm vae nam be mawɔ lãnuwo na yewo, eye esesẽna nam be maɖu ɖokuinye dzi ne amewo dzum. Togbɔ be enɔ alea hã la, megblẽ nye aʋawɔnu gbogbo siwo axɔ ga gbogbo aɖe la dome. Esi meva srɔ̃ nu tso lɔlɔ̃ si Mawu kple Kristo ɖe fiam ŋuti la, eʋãm be nye hã malɔ̃ wo. Medoa vevie ɖokuisi Biblia sɔsrɔ̃, medea hamea ƒe kpekpewo, eye medoa gbe ɖa na Mawu be wòakpe ɖe ŋunye.

VIÐE SIWO MEKPƆ: To kutrikuku geɖe kple nɔvi Kristotɔwo ƒe kpekpeɖeŋu me la, metu nɔnɔme nyuiwo ɖo vivivi. Enyanya be Yehowa Mawu tsɔa ɖe le eme na mía dometɔ ɖe sia ɖe, eye wòtsɔa ɖe le eme na ame siwo ku gɔ̃ hã, naa dzi dzɔam ŋutɔ. (Dɔwɔwɔwo 24:15) Mekpɔa ŋudzedze ɖe anukwareɖiɖi kple dzimekɔkɔ si mekpɔ le Yehowa Ðasefowo dome la ŋu ŋutɔ. Eye mekpɔa ŋudzedze ɖe ɖetsɔleme vavã si woɖena fianam kple woƒe nuteƒewɔwɔ na Mawu la ŋu.

Le gɔmedzedzea me la, ƒonyemetɔwo kple xɔ̃nye aɖewo tsi tsitre ɖe nye dzixɔse yeyea ŋu. Gake wova kpɔe be enyo wu be manɔ ha dem kple subɔsubɔha aɖe wu be manɔ dɔ wɔm kple nu vlo wɔhawo. Enye dzidzɔ nam be nyemegale nye ɣeyiɣi gblẽm ɖe aʋawɔnuwo dzadzra ŋu o, ke boŋ mele nye ɣeyiɣiwo zãm tsɔ le kpekpem ɖe amewo ŋu be woasrɔ̃ nu tso ŋutifafa Mawu la ŋu.

[Nɔnɔmetata si le axa 27]

Mekpɔ gome le Katoliko subɔsubɔwɔnawo me be nye dzitsinya ƒe fuɖename dzi naɖe kpɔtɔ

[Nɔnɔmetata si le axa 28]

Ganyawo de dzinye gake dzi menɔ dzɔyem kura o