Dzo kpo yi emenuwo dzi

Dzo kpo yi emenuawo dzi

Ðe Ɣeyiɣi Le Vɔvɔm Na Anyigba La?

Ðe Ɣeyiɣi Le Vɔvɔm Na Anyigba La?

 Ðe Ɣeyiɣi Le Vɔvɔm Na Anyigba La?

Aleke nàɖo nyabiase siwo gbɔna siwo ŋu woate ŋu aɖo le mɔ vovovowo nu la ŋui?

Le etsɔ si gbɔna kpuie me la, ɖe ale si nɔnɔmeawo le le anyigba dzi la

(a) anyo ɖe edzi wua?

(b) anɔ abe ale si ko wòle egbea enea?

(d) agblẽ ɖe edzi wua?

ÈDZEA agbagba be nukpɔsusu nyui nakpɔtɔ anɔ ye si ku ɖe etsɔme ŋua? Viɖe geɖewo le esia wɔwɔ me. Numekukuwo ɖee fia be ame siwo kpɔa mɔ be etsɔme anyo la kpɔa dzidzedze le agbalẽsɔsrɔ̃ me, eye wonɔa lãmesẽ me hã. Numekuku aɖe si wowɔ hena ɣeyiɣi didi aɖe la ɖee fia be, to vovo na ame siwo si mɔkpɔkpɔ aɖeke mele ku ɖe agbe ŋu o la, menɔa bɔbɔe kura be ame siwo kpɔa mɔ be nuwo ava nyo la nalé ʋukamexexedɔ si hea dzidɔ vanɛ la o. Numekuku siawo wɔ ɖeka kple nya aɖe si wogblɔ le Biblia me ƒe alafa geɖewoe nye esi va yi be: “Dzi kpɔdzidzɔ nana lãme hayana, ke gbɔgbɔ xanu nana ƒuwo ƒuna kplakplakpla.”—Lododowo 17:22.

Ke hã, nya si gblɔm dzɔdzɔmeŋutinunyala bibiwo le tso Anyigba la ƒe etsɔme ŋu la na be wòsesẽna na ame geɖe be woayi edzi anɔ dzidzɔ kpɔm ahanɔ mɔ kpɔm be etsɔme anyo. Bu nu dziŋɔ siwo gblɔm wole le nyadzɔdzɔwo me be wogbɔna dzɔdzɔ ge la dometɔ aɖewo ŋu kpɔ.

Anyigba La Ðo Afɔku Me

Le ƒe 2002 me la, Stockholm Anyigba Kple Eƒe Nutome Habɔbɔ si ŋu wodea bubui ŋutɔ la  xlɔ̃ nu be, ne míeyi edzi le anyigbadzinuwo dome gblẽm ɖe ga ta la, ate ŋu ana be “nanewo nadzɔ siwo atrɔ yame ƒe nɔnɔme kple nu gbagbe siwo le anyigba dzi siaa ƒe dɔwɔwɔ.” Nyatakakaa gblɔ yi edzi be ahedada le anyigba dzi godoo, nu madzɔmadzɔ wɔwɔ kple anyigbadzinuwo dome gbegblẽ si le edzi yim la ate ŋu akplɔ ameƒomea ade “nutoa me kuxi, hadomekuxi, kple dedienɔnɔ ƒe kuxi, siwo atre ɖe enu la me.”

Le ƒe 2005 me la, Dukɔ Ƒoƒuawo ɖe nyatakaka aɖe si dzi woda ŋkɔ ɖo be, Ƒe Akpe Ðeka Ƒe Ŋkuléle Ðe Anyigbadzinu Gbagbewo Ŋu Ŋuti Nyatakaka, ɖe go. Esia nye ƒe ene ƒe numekuku tso Anyigba la kple eƒe nutome ŋu. Numekula bibi siwo wu 1,360 siwo tso dukɔ 95 mee kpɔ gome le numekuku sia me, eye wona nuxlɔ̃ame sesẽ sia be: “Amegbetɔwo to woƒe dɔwɔnawo dzi le nu siwo Anyigba la wɔna le dzɔdzɔme nu la dome gblẽm ale gbegbe be míagate ŋu akpɔ mɔ be ŋutete si le anyigbadzinu gbagbewo si la alé dzidzime siwo gbɔna la ƒe agbe ɖe te o.” Nyatakaka la gblɔ be, be míaƒo asa na afɔku ma la, abia be míawɔ “tɔtrɔ gãwo le ɖoɖowo, habɔbɔwo, kple nuwɔna aɖewo ŋu, gake womekpɔ te wo wɔwɔ kura haɖe o.”

Anna Tibaijuka, si nye Dukɔ Ƒoƒuawo Ƒe Amegbetɔwo Ƒe Nɔƒewo Ŋuti Ðoɖowo ƒe dɔdzikpɔlagã la ɖe nya aɖe si dzi numekula akpa gãtɔ va le lɔlɔ̃m ɖo la gblɔ. Egblɔ be: “Ne míeyi nu siwo wɔm míele egbea la wɔwɔ dzi la, afɔku gã aɖe de xa ɖi na mí le etsɔ me.”

Susu Aɖe Si Tae Míakpɔ Mɔ Be Etsɔme Anyo

Yehowa Ðasefo siwo ta magazine sia hã xɔe se be tɔtrɔ gã siwo ana nɔnɔmeawo natrɔ kura le anyigba dzi la tu aƒe. Ke hã, woxɔe se be tɔtrɔ siawo ahe nɔnɔme nyuitɔ kekeake siwo teƒe anyigbadzitɔwo mekpɔ kpɔ o la avae, ke menye be nuwo agblẽ ɖe edzi o. Nu ka tae mɔkpɔkpɔ le wo si nenema gbegbe ɖo? Elabena woka ɖe ŋugbe siwo wodo le Mawu ƒe Nya, Biblia, me la dzi. Se ŋugbedodo siawo dometɔ ɖeka ɖa: “Ekpɔtɔ vie ko ame vɔ̃ɖi la maganɔ anyi o, eye ne èɖe ŋku ɖe eteƒe la, màgakpɔe o. Ke ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti.”—Psalmo 37:10, 11.

Ðe mɔkpɔkpɔ sia nye drɔ̃e dzro aɖe koa? Hafi nàɖo nya ma ŋu la, de ŋugble tso nya sia ŋu gbã: Biblia gblɔ kuxi sesẽtɔ siwo le nu gblẽm le anyigba la kple ameƒomea ŋu egbea la ŋu nya ɖi pɛpɛpɛ ƒe akpe geɖe do ŋgɔ. Míeɖe kuku, xlẽ mawunyakpukpui siwo woyɔ le nyati si kplɔ esia ɖo me, eye nàtsɔ wo me nyawo asɔ kple nu siwo le dzɔdzɔm le xexea me egbea. Ne èwɔ esia la, ale si nèxɔ Biblia dzi se be egblɔa etsɔmenudzɔdzɔwo ɖi pɛpɛpɛ la me agasẽ ɖe edzi.