Dzo kpo yi emenuwo dzi

Dzo kpo yi emenuawo dzi

Mawu Ƒe Nunya Edze Le Dzɔdzɔmenuwo Me

Mawu Ƒe Nunya Edze Le Dzɔdzɔmenuwo Me

 Mawu Ƒe Nunya Edze Le Dzɔdzɔmenuwo Me

“Ame si fia nu mí wu anyigba dzi lãwo, eye wòde nunya tagbɔ na mí wu dziƒoxewo.”—HIOB 35:11.

ŊUTETE wɔnukuwo le xewo si. Ale si wote ŋu dzona heɖea atsyã vovovowo bɔbɔe la wɔa dɔ ɖe yameʋuwɔlawo dzi ŋutɔ. Wo dometɔ aɖewo te ŋu dzona hetsoa atsiaƒu gbanaa si keke kilomita akpe geɖe la va ɖoa afi si woɖo tae la mɔmabumabui.

Ŋutete wɔnuku bubu aɖe si le xewo si—si ɖe wo Wɔlaa ƒe nunya fia geɖe wu—ye nye woƒe dzeɖoɖo ƒe ŋutete, to woƒe hadzidzi kple xɔxlɔ̃ dzi. Bu esiawo ƒe kpɔɖeŋu aɖewo ŋu kpɔ.

Xewo Ƒoa Nu

Xevi aɖewo dzea nuƒoƒo gɔme le woƒe aziwo me hafi wova ƒona gɔ̃ hã. Le kpɔɖeŋu me, teglinɔ te ŋu ɖɔa azi wòdea xexlẽme enyi, henɔa wo ɖɔm ɖeka gbe ɖeka, ɖeka gbe ɖeka. Ne ɣeyiɣi didime ɖekae aziawo dometɔ ɖe sia ɖe axɔ hafi aƒo la, wo dometɔ ɖe sia ɖe aƒo do ŋgɔ na nɔvia eye axɔ ŋkeke enyi sɔŋ hafi wo katã woaƒo. Ne edzɔ alea la, asesẽ na teglinɔa ŋutɔ be wòalé be na teglivi siwo ƒo xoxo la esime wòakpɔtɔ anɔ azi si mekpɔƒo haɖe o la dzi tsyɔm. Gake medzɔna nenema o, ke boŋ azi enyiawo katã va ƒona le ŋkeke ɖeka dzi le gaƒoƒo ade ko me. Aleke wòte ŋu dzɔna alea? Le numekulawo ƒe susu nu la, nu si koŋ gbɔ wòtsonae nye be esime tegliviawo kpɔtɔ le aziawo me la, woɖoa dze kple wo nɔewo, helalana wo nɔewo, si wɔnɛ be wova dona le aziawo me kplɔa wo nɔewo ɖo le gaƒoƒo ade me.

Ne xewo tsi la, zi geɖe la, atsua ye dzia ha. Ɣeyiɣi siwo me xewo doa atsu koŋue xetsu dzia ha tsɔ ɖea nuto si dzi wòkpɔ ŋusẽ ɖo ƒe liƒowo fiana alo tsɔ hea xenɔ aɖe ɖe eɖokui ŋu. Xe hamehame akpe geɖe siwo li kple woƒe dzeɖomɔnue, eye esia kpena ɖe xenɔawo ŋu wote ŋu dzeasi woƒe atsuawo  bɔbɔe le xe siwo ƒomevi woawo ŋutɔwo nye la dome.

Ŋdi kanya kple ɣeɖoto koŋue xewo dzia ha, eye susu nyui aɖe tae wowɔnɛ nenema ɖo. Ɣemaɣiwo la, ya meƒona fũu o eye toɣliɖenuwo hã dzi ɖena kpɔtɔ. Numekulawo de dzesii be xewo ƒe hadzidziwo dea didiƒe zi gbɔ zi 20 le ŋdi kple fiẽ wu ŋdɔ me.

Togbɔ be atsuawo koŋue dzia ha hã la, xɔxlɔ̃ ƒomevi vovovo, alo ɣlidodo sesĩwo hena ɣeyiɣi kpui aɖe ko, siwo si gɔmesese vovovo le la ƒe ŋutete le atsuawo kple nɔawo siaa si. Le kpɔɖeŋu me, xɔxlɔ̃ vovovo asieke ye le atsutsrɔewo si wotsɔ ƒoa nui. Xɔxlɔ̃ ƒomevi aɖe le wo si wotsɔ ɖenɛ fiana be afɔku aɖe—abe xe lénu siwo nɔa agba sam ene—tso ya me gbɔna, eye xɔxlɔ̃ bubu le wo si wotsɔ ɖenɛ fiana be afɔku aɖe tso anyigba gbɔna.

Nunana Deŋgɔ Aɖe

Nunya si le xewo si le dzɔdzɔme nu la wɔ nuku ŋutɔ. Gake ne míaƒo nu tso dzeɖoɖo ŋutetewo ŋu la, amegbetɔwo de ŋgɔ wu sãsãsã. Hiob 35:11 gblɔ be, Mawu wɔ amegbetɔwo hede ‘nunya tagbɔ na wo wu dziƒoxewo.’ Nu si ɖe dzesi le amegbetɔwo ɖeɖe ko ŋutie nye ŋutete si le wo si be wote ŋu ƒoa nu tso nu makpɔmakpɔ siwo gɔme sese sesẽ la ŋu kple ale si wote ŋu ɖea tamesusuwo gblɔna to gbeɖiɖi alo dzesiwo wɔwɔ me.

To vovo na nuwɔwɔ bubuwo la, ewɔ abe le dzɔdzɔme nu la, ɖee wowɔ amegbetɔwo kple ŋutete be woasrɔ̃ gbegbɔgblɔ sesẽwo gɔ̃ hã tso woƒe ɖevime ene. Internet dzi nyatakakadzraɖoƒe aɖe gblɔ be: “Ðevi siwo le azɔlizɔzɔ srɔ̃m la te ŋu srɔ̃a gbegbɔgblɔ ne wo dzilawo meƒoa nu na wo tẽe o gɔ̃ hã; ɖevi siwo wodzi tokunɔwoe la te ŋu dzea agbagba toa woawo ŋutɔwo ƒe dzesiwo vae tsɔ ɖea woƒe susuwo gblɔna ne womewɔa dzesiwo na wo le aƒe me o gɔ̃ hã.”—American Scientist.

Le nyateƒe me la, nunana wɔnuku aɖe ŋutɔe ŋutete si le mía si be míaɖe míaƒe susuwo kple seselelãmewo agblɔ to nuƒoƒo alo dzesiwo wɔwɔ dzi la nye tso Mawu gbɔ. Gake nu si wona amegbetɔwo si gawɔ nuku wue nye ŋutete si le mía si be míaƒo nu kple Mawu le gbedodoɖa me. Le nyateƒe me la, Yehowa Mawu bia tso mía si be míaƒo nu kpli ye. Mawu ƒe Nya, Biblia la, gblɔ be: “Migatsi dzimaɖi le naneke ŋuti o, ke boŋ le nu sia nu me la, mitsɔ gbedodoɖa kple kokoƒoƒo kpakple akpedada ana Mawu nanya miaƒe didiwo.”—Filipitɔwo 4:6.

Ne nyametsotso sesẽ aɖewo wɔwɔ dze ŋgɔ mí la, Yehowa di be míawɔ nunya gbogbo siwo yena woŋlɔ ɖi ɖe Biblia me la ŋu dɔ woaɖe vi na mí. Eya ŋutɔ akpe ɖe mía ŋu hã be míanya ale si míawɔ aɖaŋuɖoɖo siwo míakpɔ le eme la ŋu dɔ. Biblia ŋlɔla Yakobo ŋlɔ bena: “Ne mia dometɔ aɖe le nunya hiãm la, neyi edzi wòanɔ Mawu biam, elabena enaa nu amewo katã faa, eye medoa ŋukpe ame o; eye wòanae.”—Yakobo 1:5.

Aleke Nèse Le Ðokuiwò Me?

Ne èse xevi aɖe ƒe hadzidzi viviwo alo èse ɖevi aɖe wòsrɔ̃ eƒe nyagbe gbãtɔwo yɔyɔ la, alekee nèsena le ɖokuiwò me? Ðe nèkpɔa Mawu ƒe nunya si dzena le nu siwo wòwɔ me la dzea sia?

Esi hakpala David de ŋugble le ale si gbegbe wowɔe aɖaŋutɔe ŋu vɔ la, eʋãe wògblɔ na Mawu be: ‘Meda akpe na wò le ale si wowɔm nukutɔe la ta; wò dɔwɔwɔwo nye nukunu, eye nye luʋɔ dze si esia keŋ.’ (Psalmo 139:14) Ne èsrɔ̃a nu tso Mawu ƒe nunya si dze le nuwɔwɔwo me ŋu la, kakaɖedzi si le asiwò be afia mɔ nyuitɔ kekeake wò la me ava sẽ ɖe edzi godoo.

[Nya si ɖe dzesi si le axa 5]

Nunanae ŋutete si le mía si be míaɖe míaƒe tamesusuwo agblɔ la nye tso Mawu gbɔ

[Nɔnɔmetata Tsoƒe si le axa 4]

© Dayton Wild/Visuals Unlimited