Dzo kpo yi emenuwo dzi

Dzo kpo yi emenuawo dzi

Fiaɖuƒe Akpatawo Tutu Hena Yehowa Ƒe Kafukafu

Fiaɖuƒe Akpatawo Tutu Hena Yehowa Ƒe Kafukafu

 Fiaɖuƒe Akpatawo Tutu Hena Yehowa Ƒe Kafukafu

“Nu wɔnuku kae nye esi! Nyemebui kpɔ gbeɖe be míava kpɔ akpata dzeani sia gbegbe si me míanɔ ƒu ƒom le hena Yehowa kafukafu o. Màte ŋu aƒle dzidzɔ si gbegbe kpɔm mele la kple ga home aɖeke o!”—MARIA, MEXICO.

YEHOWA ÐASEFOWO lɔ̃a ƒuƒoƒo ɖekae hena nusɔsrɔ̃ tso Mawu ƒe Nya, Biblia la, me. (Psalmo 27:4; Hebritɔwo 10:23-25) Wogasea vivi geɖe le ƒuƒoƒo alea me ne tadeaguƒe si sɔ nyuie le wo si. Le ƒe ʋɛ siwo va yi me la, wotu tadeaguƒe akpe geɖe, siwo woyɔna be Fiaɖuƒe Akpata la, le dukɔ geɖewo me le xexea me godoo.

Nu kae ʋã wo hena akpata siawo tutu? Ame kawoe wɔa dɔa? Ŋusẽ kae akpata siawo tutu kpɔna ɖe ame siwo kpɔa gome le eme la dzi? Be nàkpɔ ŋuɖoɖo na biabia siawo la, bu nu siwo dzɔ le Mexico kple Belize la ŋu kpɔ.

Fiaɖuƒe Akpata Akpe Geɖewo Hiã!

Tsã la, Yehowa Ðasefo siwo le Mexico la ƒoa ƒu ɖe afi sia afi si wonya kpɔ ko hena tadedeagu—eɖanye gbadzaƒe siwo le aƒe aɖewo megbe, Ðasefowo ƒe aƒewo me, nudzraɖoƒexɔ gãwo me, ʋudaɖoƒexɔwo me, alo akpata siwo wohaya me o. Le ɣeyiɣi mawo katã me la, Ðasefo wɔnuteƒe siawo bua ale si gbegbe wòanyo ne Fiaɖuƒe Akpatawo va le yewo ŋutɔ si la ŋu vevie.

Le ƒe 1994 me la, Ðasefo 388,000 ye nɔ Mexico. Numekuku aɖe si wowɔ le ƒe ma me ɖee fia be, ne tadeaguƒewo anɔ wo katã si la, ahiã be woatu Fiaɖuƒe Akpata yeye 3,300 sɔŋ. Dɔ nyadri ka gbegbee nye esi!

Hame siwo le nutoa me la dometɔ siwo ate ŋui la nɔ woawo ŋutɔwo ƒe Fiaɖuƒe Akpatawo tum ɣemaɣi. Gake le ƒe atɔ̃ siwo kplɔe ɖo me la, eva dze ƒãa be hafi míate ŋu akpɔ hiahiãa gbɔ ale si dze la, ele be míatu akpata geɖewo kabakaba. Aleke míele hiahiã sia gbɔ kpɔmee?

Dɔwɔla Bibi Siwo Tsɔ Wo Ðokui Na Faa Hewɔa Dɔ Tso Teƒe Yi Teƒe

Le ƒe 1999 me la, wodze xɔtuɖoɖo yeye aɖe gɔme. Wote Fiaɖuƒe Akpata Tuhawo ɖoɖo ɖe nuto vovovowo me le Mexico. Yehowa Ðasefowo, siwo dometɔ geɖewo si xɔtuɖaŋuwo le la, tsɔ wo ɖokui na faa le dukɔa me godoo hena gomekpɔkpɔ le ɖoɖo dodzidzɔname sia me. Fifi laa la, xɔtulawo ƒe ƒuƒoƒo mawo tɔgbi 35 le Mexico, eye ɖeka le Belize.

Lɔlɔ̃nu faa dɔwɔla, siwo womexea fe na o, ŋutsuwo kple nyɔnuwo siaa, siwo wɔa dɔ gbe sia gbe la, dometɔ enyi lɔƒoe nɔa Fiaɖuƒe Akpata Tuha siawo dometɔ ɖe sia ɖe me. Xɔtuha siawo siwo me tɔwo kpɔa dzidzɔ ale gbegbe la xɔa ŋgɔ le xɔtuɖoɖowo me tso teƒe yi teƒe le dukɔa me godoo. Lɔlɔ̃nu faa dɔwɔla siawo dometɔ ɖe sia ɖe wɔa dɔ gaƒoƒo enyi gbe sia gbe tso Dzoɖa va se ɖe Fiɖa, kple Memleɖa evelia ɖe sia ɖe. Wodzea ŋkekea gɔme kple Biblia me  dzodzro le ŋdi gã 7 me, emegbe woɖua ŋdinu. Wo dometɔ ɖe sia ɖe wɔa dɔ ɖe sia ɖe si wode asi nɛ kple dzidzɔ. Le kpɔɖeŋu me, nyɔnuwo wɔa dɔ aduadu kple ŋutsuwo le plastawɔwɔ, tile (carreaux/tuiles) ɖoɖo, kple aŋɔsisi me.

Hame si le nutoa me me tɔwo naa kpekpeɖeŋu lɔlɔ̃nu faa dɔwɔlaawo to woƒe nuwo nyanya, nuɖaɖa, kple dɔƒewo didi na wo me. Hekpe ɖe akpatatudɔa wɔwɔ ɖekae ŋu la, lɔlɔ̃nu faa dɔwɔlaawo kple Ðasefo siwo le nutoa me dea Kristotɔwo ƒe kpekpewo ɖekae hekpɔa gome le gbeƒãɖeɖe tso ʋɔtru nu yi ʋɔtru nu hã me ɖekae.

Viɖe Siwo Le Lɔlɔ̃nu Faa Dɔwɔla Nyenye Me

Alekee lɔlɔ̃nu faa dɔwɔla siawo sena le wo ɖokui me le woƒe dɔa ŋu? Daniel, si nye lɔlɔ̃nu faa dɔwɔla hena ƒe etɔ̃ kple edzivɔ la gblɔ be: “Enye nyateƒe be míewɔa dɔ le dzoxɔxɔ kple vuvɔ me, heɖua nu siwo mema mí o, eye míenɔa ʋuʋum edziedzi yia adzɔ ge ʋĩ tso míaƒe ƒometɔwo gbɔ, eye nuhiahiã aɖewo mesua mía si ɣeaɖewoɣi o ya.” Eyi edzi gblɔ be: “Gake yayra siwo míekpɔna la ƒoa kuxi siwo míedoa goe la ta sãsãsã.”

Yayra siawo dometɔ aɖewoe nye kawo? Lɔlɔ̃nu faa dɔwɔla geɖewo va srɔ̃a xɔtuɖaŋu yeyewo. Lɔlɔ̃nu faa dɔwɔla siawo dometɔ ɖeka si ŋkɔe nye Carlos, si xɔa ŋgɔ na xɔtuha siwo me dɔwɔlawo sɔ gbɔ le wu dometɔ ɖeka me la, gblɔ nu si eya susu be enye viɖe gãtɔ kekeake. Egblɔ be: “Míeva zu abe ƒome aɖe si me ame 20 le ene. Míeɖua nu ɖekae, wɔa dɔ ɖekae, srɔ̃a nu ɖekae, hedoa gbe ɖa ɖekae. Mí katã míeva zu xɔlɔ̃ kplikplikpliwo.”

Xɔtudɔwɔlaawo kple nutoawo me hame siwo ŋu wokpena ɖo la me tɔwo hã va zua xɔlɔ̃ kplikplikpliwo. José, si kpɔ gome le akpata siwo wu 100 tutu me la, gblɔ be: “Ale si gbegbe dzi dzɔa nutoa me Ðasefowo woɖea ŋudzedzekpɔkpɔ fiana hefaa dzidzɔvi le esi woƒe didi vevie be Fiaɖuƒe Akpata yeye nasu yewo si la va eme na wo ta la teƒekpɔkpɔ wɔa dɔ ɖe ame dzi ŋutɔ.” Egblɔ kpee be: “Nyanya be akpa sue si míewɔna le akpata yeye aɖe tutu, hena tadedeagu dzadzɛ, dzidzedzetɔe me doa ŋusẽ ame bubuwo ƒe xɔse la naa dzi dzɔa mí ale gbegbe.”

Dɔ Siwo Gbegbe Wowɔ La Wɔ Nuku!

Tadeaguƒe siawo menɔa kpeɖii alo nyea esiwo woɖoa atsyɔ̃ na fũu akpa o. Esia wɔe be wote ŋu tua Fiaɖuƒe Akpataawo kabakaba eye womezãa ga geɖe ɖe wo ŋu o. Ɣesiaɣi si wòanya wɔ la, wozãa xɔtunu kple xɔtumɔnu siwo bɔ ɖe nutoawo me. Le mɔ sia nu la, wote ŋu tua akpata yeye hewua enu le kwasiɖa ade pɛ lɔƒo ko me!

Kaka ƒe 2007 naɖo la, wotu Fiaɖuƒe Akpata 17 le Belize, siwo hame siwo katã le afi ma la zãna. Tso ƒe 1999 va se ɖe fifia la, wotu akpata 1,400 sɔŋ xoxo le Mexico!

Togbɔ be wowɔ dɔ nyui siawo gbegbe hã la, dɔ geɖe gakpɔtɔ li woawɔ. (Mateo 9:37) Ðasefo  siwo le Mexico la dzi ɖe edzi va ɖo 600,000 kple edzivɔ—eye wo katã kpena zi etɔ̃ le kwasiɖa ɖe sia ɖe me be woafia nu yewo tso Mawu ƒe Nya la me. Esia wɔe be wogahiã akpata yeye siwo ade 2,000 sɔŋ. Ne ɖe wòanye amegbetɔ ƒe agbagbadzedze dzro ko mee woawɔ xɔtudɔ sia si me amewo tsɔa wo ɖokui nana faa le la, anye ne taɖodzinu ma gbɔ manya ɖo o. Gake abe ale si dzidzedze siwo wokpɔ xoxo ɖee fia ene la, to Yehowa Mawu ƒe kpekpeɖeŋu me la, “woate ŋu awɔ nu sia nu.”—Mateo 19:26.

[Aɖaka/Nɔnɔmetata si le axa 22]

“Wowɔna Ðe Woƒe Nyawo Dzi”

Ne wotu Fiaɖuƒe Akpata aɖe le nuto aɖe me la, menye Yehowa Ðasefo siwo le afi ma dzi koe wòwɔa dɔ ɖo o. Le kpɔɖeŋu me, esi wonɔ Fiaɖuƒe Akpata aɖe tum le Belize la, ŋutsu aɖe gblɔ na srɔ̃a si nye Pentekosttɔ la be ne Yehowa Ðasefowo wu woƒe “sɔlemexɔa” tutu nu la, yedi be yeate woƒe kpekpewo dede. Nu kae nyɔ didi sia ɖe eme? Egblɔ be: “Mekpɔe dze sii be Mawu li kpli wo. Womewɔa dzre ne wole dɔ wɔm ɖekae o. Eye wowɔna ɖe woƒe nyawo dzi.”

[Nɔnɔmetata]

Fiaɖuƒe Akpata aɖe si le Orange Walk, Belize

[Aɖaka/Nɔnɔmetata siwo le axa 23]

Ele Edzi Yim Le Xexea Me Katã

Woɖo Fiaɖuƒe Akpata Tuhawo le dukɔ 120 me. Dukɔ siwo me lɔlɔ̃nu faa dɔwɔla siwo wɔa dɔ sia kple dzidzɔ le la dometɔ ʋɛ aɖewoe nye esiwo gbɔna:

Angola, Bolivia, Croatia, Dominican Republic, Ethiopia, Fiji, Ghana, Hong Kong, India, Jamaica, Kazakhstan, Liberia, Moldova, Nigeria, Papua New Guinea, Rwanda, Tuvalu, Ukraine, Venezuela, Zambia.

[Nɔnɔmetatawo]

Fiaɖuƒe Akpata aɖe si le Tlaxcala, Mexico

Fiaɖuƒe Akpata aɖe, Acapulco, Mexico

[Nɔnɔmetata si le axa 23]

Fiaɖuƒe Akpata Tuha aɖe, si le Mexico, me tɔwo