Dzo kpo yi emenuwo dzi

Dzo kpo yi emenuawo dzi

Bu Dɔwɔwɔ Kple Yehowa Ƒe Mɔnukpɔkpɔa Nu Xɔasii!

Bu Dɔwɔwɔ Kple Yehowa Ƒe Mɔnukpɔkpɔa Nu Xɔasii!

“Mawu ƒe hadɔwɔlawo míenye.”1 KORINTOTƆWO 3:9.

1. Aleke Yehowa sena le eɖokui me ɖe dɔwɔwɔ ŋu, eye nu kae esia ʋãnɛ wòwɔna?

YEHOWA sea vivi na dɔwɔwɔ. (Psalmo 135:6; Yohanes 5:17) Esi wòdi be mawudɔlawo kple amegbetɔwo hã nase vivi na dɔwɔwɔ ta la, edea dɔ siwo me dzidzɔ kple dzidzeme le wo si. Yehowa zã eƒe Ŋgɔgbevia le nuwo wɔwɔ me. (Mixlẽ Kolosetɔwo 1:15, 16.) Biblia na míenya be hafi Yesu nava anyigba dzi la, enye “dɔnunɔla” le Mawu gbɔ le dziƒo.Lododowo 8:30.

2. Aleke míewɔ nya be tso gbe aɖe gbe ke la, mawudɔlawo wɔa dɔ vevi si me dzidzeme le?

2 Edze le Biblia bliboa me tso Mose Ƒe Agbalẽ Gbãtɔ dzi va ɖo Nyaɖeɖefia be Yehowa dea dɔ asi na mawudɔlawo. Esi Adam kple Xawa wɔ nu vɔ̃ eye wonya wo le Paradisoa me la, Mawu de dɔ aɖe asi na eƒe dɔlawo. Mose Ƒe Agbalẽ Gbãtɔ gblɔ be Mawu na “Kerubiwo tsɔ yi, si trɔa eɖokui, eye wòklẽna abe dzo ƒe aɖe ene la, ɖanɔ Eden-bɔ la ƒe ɣedzeƒe gome, bena woadzɔ agbeti la mɔ nu.” (1 Mose 3:24) Eye Nyaɖeɖefia ƒe agbalẽa gblɔ be Yehowa “dɔ eƒe dɔla ɖa, be wòaɖe nu siwo ava dzɔ kpuie la afia,” si fia be agblɔ etsɔme ɖi.Nyaɖeɖefia 22:6.

 DƆ SIWO WODE AMEGBETƆWO SI

3. Esime Yesu nɔ anyigba dzi la, aleke wòsrɔ̃ Fofoae?

3 Esime Yesu nɔ anyigba dzi la, ewɔ dɔ si Yehowa de esi la kple dzidzɔ. Abe ale si Fofoa wɔnɛ ene la, eya hã de dɔ vevi aɖe asi na eƒe nusrɔ̃lawo. Ena wokpɔ dzidzɔ ɖe woƒe dɔa ŋu esi wògblɔ na wo be: “Vavã, vavã mele egblɔm na mi be: Ame si ɖenɛ fiana be yexɔ dzinye se la, ame ma hã awɔ dɔ siwo mewɔna; eye awɔ dɔ siwo lolo wu esiawo, elabena meyina Fofo la gbɔ.” (Yohanes 14:12) Yesu na eƒe nusrɔ̃lawo kpɔe be woƒe dɔa hiã kpata, elabena egblɔ be: “Ele na mí be míawɔ ame si dɔm ɖa la ƒe dɔwo esime ŋkeke li; zã le dodo ge, esime ame aɖeke mate ŋu awɔ dɔ o.”Yohanes 9:4.

4-6. (a) Nu ka tae míedaa akpe be Noa kple Mose wɔ nu siwo Yehowa gblɔ na wo la? (b) Nu eve kawoe dona tsoa dɔ siwo Mawu dea asi na amegbetɔwo me?

4 Ɣeyiɣi didi aɖe hafi Yesu nava anyigba dzi la, Yehowa de dɔ si me dzidzeme le la asi na amegbetɔwo. Togbɔ be Adam kple Xawa mewu dɔ si wode wo si la nu o hã la, ame bubu geɖewo ya wu dɔ siwo Mawu de wo si la nu. (1 Mose 1:28) Yehowa na mɔfiame siwo le tẽe Noa ku ɖe ale si wòakpa aɖakaʋuae ŋu ale be eya kple eƒe ƒomea natsi agbe le Tsiɖɔɖɔa me. Noa wɔ nu si Yehowa gblɔ nɛ la dzi pɛpɛpɛ. Míele agbe egbea le esi wòwɔ ɖe Yehowa ƒe mɔfiamewo dzi pɛpɛpɛ ta.1 Mose 6:14-16, 22; 2 Petro 2:5.

5 Yehowa gblɔ ale si tututu woatu avɔgbadɔa kpakple nunɔladɔa ŋuti ɖoɖowo na Mose. Mose wɔ nu si tututu Yehowa gblɔ nɛ be wòawɔ. (2 Mose 39:32; 40:12-16) Nu kae míate ŋu asrɔ̃ tso Mose ƒe kutrikuku kple toɖoɖo me egbea? Abe ale si apostolo Paulo ɖe eme ene la, avɔgbadɔa kple nunɔlanyenyea nye vɔvɔli na “nu nyui siwo ava” le etsɔme.Hebritɔwo 9:1-5, 9; 10:1.

Ne míewɔ dɔ siwo Yehowa de mía si la, enyea ŋutikɔkɔe nɛ

6 Ne Mawu ƒe tameɖoɖowo le eme vam la, dɔ siwo wòdea esubɔlawo si la tea ŋu trɔna. Togbɔ be dɔdeasiawo trɔna hã la, ɣesiaɣi la, ehea ŋutikɔkɔe vanɛ na Yehowa eye wòɖea vi na amegbetɔwo. Esia nye nyateƒe le dɔ siwo Yesu wɔ do ŋgɔ na eƒe anyigba dzi vava kple esime wònɔ anyigba dzi siaa gome. (Yohanes 4:34; 17:4) Egbea, ne míewɔ dɔ siwo Yehowa de mía si la, enyea ŋutikɔkɔe nɛ. (Mateo 5:16; mixlẽ 1 Korintotɔwo 15:58.) Nu ka tae míegblɔe nenema?

BU DƆDEASIWO BE WONYE MƆNUKPƆKPƆWO

7, 8. (a) Dɔ kawoe mɔnukpɔkpɔ su Kristotɔwo si be woawɔ egbea? (b) Nu kae wòle be míawɔ tso Yehowa ƒe mɔfiamewo ŋu?

7 Bubu gãe wònye be Yehowa kpe amegbetɔ madeblibowo be woanye yeƒe hadɔwɔlawo. (1 Korintotɔwo 3:9) Mɔnukpɔkpɔ su Kristotɔ aɖewo si be woawɔ xɔtudɔwo abe ale si Noa kple Mose wɔe ene. Wo dometɔ aɖewo kpea asi ɖe Takpexɔwo, Fiaɖuƒe Akpatawo kple alɔdzedɔwɔƒewo tutu ŋu. Èɖale asi kpem ɖe miaƒe nutoa me Fiaɖuƒe Akpata si ŋu wogale asi trɔm le, alo dɔwɔƒegã si tum wole ɖe Warwick, New York ŋu o, de asixɔxɔ  mɔnukpɔkpɔ si su asiwò la ŋu! (Kpɔ xɔ yeyea ƒe tata le nyati sia ƒe gɔmedzedze.) Subɔsubɔdɔ kɔkɔe ye wònye. Togbɔ ame aɖewo koe kpɔa gome le xɔtudɔ ŋutɔŋutɔ me hã la, Kristotɔwo katã kpɔa gome le gbɔgbɔmexɔtudɔ aɖe me. Eyae nye gbeƒãɖeɖedɔa, si hea ŋutikɔkɔe vanɛ na Yehowa eye wòɖea vi na amegbetɔwo. (Dɔwɔwɔwo 13:47-49) Mawu ƒe habɔbɔa ye fiaa mɔ gbeƒãɖeɖedɔa. Eye ɣeaɖewoɣi la, esia biana be woaɖɔ li dɔ na mí.

8 Yehowa subɔla wɔnuteƒewo lɔ̃na faa be yewoazɔ ɖe eƒe mɔfiamewo dzi. (Mixlẽ Hebritɔwo 13:7, 17.) Menye ɣesiaɣie míase nu si tututu tae wona mɔfiame yeye aɖe alo ɖɔ li dɔ na mí ɖo gɔme o. Gake míelɔ̃na trɔna ɖe eŋu, elabena míenyae be Yehowa gbɔe tɔtrɔawo tso eye nu nyuiwo ado tso eme.

9. Kpɔɖeŋu nyui kae hamemetsitsiwo ɖona na hamea?

9 Hamemetsitsiwo toa ale si woxɔa ŋgɔ le hamea me dzi ɖenɛ fiana be yewodi vevie be yewoawɔ Yehowa ƒe lɔlɔ̃nu. (2 Korintotɔwo 1:24; 1 Tesalonikatɔwo 5:12, 13) Hamemetsitsiwo wɔa dɔ kutrikukutɔe hewɔa mɔfiamewo dzi, eye womehena ɖe megbe be yewoasrɔ̃ ɖaseɖimɔnu yeyewo o. Nu nyuiwo dona tsoa eme ne wowɔ ɖoɖo ɖe telefon dzi ɖaseɖiɖi, ɖaseɖiɖi le melidzeƒewo, alo dutoƒoɖaseɖiɖidɔa ŋu, togbɔ be nɔvi aɖewo masusui le gɔmedzedzea me be adze edzi o hã. Le kpɔɖeŋu me, le Germany la, mɔɖela ene aɖewo ɖoe be yewoaɖaɖe gbeƒã le anyigbamama si me dɔwɔƒewo le si me nɔviwo megaɖe gbeƒã le kpɔ o la me. Wo dometɔ ɖeka si ŋkɔe nye Michael gblɔ be yewovɔ̃ vie, elabena yewomegate ɖaseɖimɔnu ma kpɔ o ƒe aɖewoe nye ema. Egblɔ kpee be: “Yehowa anya de dzesi esia, elabena ena nuwo yi nyuie le ŋdi ma me ale gbegbe be míaŋlɔe be akpɔ o. Dzi dzɔ mí ŋutɔ be míewɔ ɖe mɔfiame si le Míaƒe Fiaɖuƒe Subɔsubɔdɔa me ku ɖe ŋuɖoɖo ɖe Yehowa ŋu la dzi!” Ðe nèlɔ̃na faa be yeate ɖaseɖimɔnu yeyewo akpɔ le miaƒe anyigbamamaa mea?

10. Tɔtrɔ kawoe wowɔ le habɔbɔa me nyitsɔ laa?

10 Ɣeaɖewoɣi la, wowɔa tɔtrɔ aɖewo le Betel. Le kpɔɖeŋu me, nyitsɔ laa la, wotú alɔdzedɔwɔƒe sue aɖewo eye wona alɔdzedɔwɔƒe gã bubuwo wɔ dɔ siwo alɔdze mawo nɔ wɔwɔm tsã la. Togbɔ be esia bia be nɔvi siwo nɔ alɔdzedɔwɔƒe  mawo natrɔ ɖe nɔnɔmeawo ŋu hã la, eteƒe medidi hafi viɖeawo va dze ƒãa o. (Nyagblɔla 7:8) Dzidzɔe wònye na dɔwɔla mawo be yewole asi kpem ɖe dɔ si wɔm Yehowa ƒe amewo le egbea la ŋu!

Ðe nèlɔ̃na faa be yeate ɖaseɖimɔnu yeyewo akpɔ le miaƒe anyigbamamaa mea?

11-13. Aleke wòhiã be nɔvi aɖewo natrɔ ɖe nɔnɔmeawo ŋu le tɔtrɔ siwo habɔbɔa wɔ ta?

11 Míate ŋu asrɔ̃ nu vevi aɖewo tso ame siwo nɔ dɔ wɔm le alɔdzedɔwɔƒe siwo wotsɔ wɔ ɖekae la gbɔ. Nɔvi aɖewo subɔ le alɔdzedɔwɔƒe mawo ƒe geɖe. Wona atsu kple asi aɖe siwo nɔ subɔsubɔm le alɔdzedɔwɔƒe sue aɖe la ʋu yi Mexico alɔdzedɔwɔƒea, afi si Betel dɔwɔlawo ƒe xexlẽme sɔ gbɔ wu alɔdze kemɛa tɔ zi gbɔ zi 30. Srɔ̃ŋutsua, si ŋkɔe nye Rogelio gblɔ be: “Menɔ bɔbɔe kura be míaʋu le míaƒe ƒometɔwo kple xɔlɔ̃wo gbɔ o.” Juan, si nye Betel dɔwɔla bubu si woɖe yi Mexico la se le eɖokui me be yegale agbea gɔme dzem ake. Egblɔ be: “Ele be ame nadze xɔlɔ̃ yeyewo, ahatrɔ ɖe nɔnɔmeawo ŋu elabena dekɔnuwo kple amewo ƒe nuŋububu to vovo.”

12 Esi wotsɔ alɔdzedɔwɔƒe aɖewo wɔ ɖekae le Europa la, eva hiã be Betel dɔwɔla geɖewo naʋu ayi alɔdzedɔwɔƒe si le Germany. Ehiã be woawo hã woatrɔ ɖe nɔnɔmeawo ŋu, elabena menye ɣesiaɣie wònɔa bɔbɔe be ame naʋu le wo de o. Nɔvi siwo ʋu le Switzerland la ɖoa ŋku Alps-to dzeani siwo gbɔ wodzo le le wo de la dzi, eye nɔvi siwo ʋu le Austria la dometɔ aɖewo ɖoa ŋku ale si Betel-ƒe sue me nɔnɔ vivinae la dzi.

13 Ehiãna be nɔvi siwo ʋu yi alɔdzedɔwɔƒe si le dukɔ bubu me la natrɔ ɖe nɔnɔme vovovowo ŋu. Ele be woatrɔ ɖe teƒe yeye nɔnɔ, dɔwɔhati yeyewo, kple ɖewohĩ dɔdeasi bubuwo ŋu. Ehiã be woayi hame yeye kple anyigbamama yeye me, eye ɖewohĩ woasrɔ̃ gbe yeye gɔ̃ hã. Tɔtrɔ siawo wɔwɔ menɔa bɔbɔe o, gake Betel dɔwɔla geɖe lɔ̃ faa wɔ wo. Nu ka tae? Na míase nya si wo dometɔ aɖewo gblɔ.

“Esi meɖo ŋku edzi be Yehowa gbɔe amekpekpea tso la, melɔ̃ kple dzidzɔ be maʋu ayi”

14, 15. (a) Aleke ame geɖe ɖee fia be yewodea asixɔxɔ mɔnukpɔkpɔ si wònye be yewoawɔ dɔ kple Yehowa la ŋu? (b) Nu ka tae wonye kpɔɖeŋu nyui na mí ɖo?

14 Nɔvinyɔnu Grethel gblɔ be: “Melɔ̃ faa ʋu yi, elabena medi be maɖee afia Yehowa be melɔ̃e wu dukɔ, xɔ, alo mɔnukpɔkpɔ aɖe si su asinye.” Nɔvinyɔnu Dayska hã gblɔ be: “Esi meɖo ŋku edzi be Yehowa gbɔe amekpekpea tso la, melɔ̃ kple dzidzɔ be maʋu ayi.” André kple Gabriela hã se le wo ɖokui me nenema eye wogblɔ be: “Esia ʋu mɔnukpɔkpɔ ɖi na mí be míaɖee afia be Yehowa ƒe lɔlɔ̃nu wɔwɔ le vevie wu mía ŋutɔwo tɔ.” Wokpɔe be ne Yehowa ƒe habɔbɔa wɔ tɔtrɔwo la, enyo be woatrɔ ɖe wo ŋu tsɔ wu be wotsi tre ɖe wo ŋu.

Mɔnukpɔkpɔ gãtɔ si su mía sie nye be míawɔ Yehowa ƒe dɔ!

15 Ne wotsɔ alɔdzedɔwɔƒewo wɔ ɖekae la, wonana Betel dɔwɔla aɖewo wɔa mɔɖeɖedɔa. Aleae wònɔ le Betel dɔwɔla geɖe gome esi wotsɔ Denmark, Norway kple Sweden ƒe alɔdzedɔwɔƒeawo ƒo ƒu wɔ Scandinavia alɔdzedɔwɔƒea. Florian kple Anja, siwo nye atsu kple asi la gblɔ be: “Míaƒe dɔdeasi  yeyea bia agbagbadzedze, gake enana míekpɔa dzidzɔ hã. Mɔnukpɔkpɔ gãe wònye be Yehowa nazã mí, afi ka kee wòahiã be míasubɔ le o. Míate ŋu agblɔ tso dzi me be yayra gãe wònye vavã!” Togbɔ be mía dometɔ akpa gãtɔ mele nɔnɔme sia me o hã la, míate ŋu asrɔ̃ nɔvi siawo ƒe ɖokuitsɔtsɔsavɔ ahatsɔ Fiaɖuƒea ƒe nuwo aɖo nɔƒe gbãtɔ. (Yesaya 6:8) Yehowa yraa ame siwo dea asixɔxɔ mɔnukpɔkpɔ si wònye be woawɔ dɔ kpli ye la ŋu, metsɔ le eme afi si wòhiã be woawɔ dɔa le o.

NƆ DƆWƆWƆ KPLE YEHOWA DZI KPLE DZIDZƆ!

16. (a) Le Galatiatɔwo 6:4 la, nu kae wogblɔ na mí be míawɔ? (b) Nu kae nye mɔnukpɔkpɔ gãtɔ si su mía si?

16 Esi míede blibo o ta la, míetsɔa mía ɖokuiwo sɔna kple ame bubuwo zi geɖe. Gake Mawu ƒe Nya la gblɔ na mí be míana míaƒe susu nanɔ nu siwo míawo ŋutɔwo míete ŋu wɔ la dzi. (Mixlẽ Galatiatɔwo 6:4.) Menye ame sia amee ate ŋu anye hamemetsitsi, mɔɖela, dutanyanyuigblɔla alo Betel dɔwɔla o. Togbɔ be esiawo katã nye mɔnukpɔkpɔ nyuiwo hã la, mɔnukpɔkpɔ gãtɔ ya su mí katã mía si. Eyae nye be míenye Yehowa ƒe hadɔwɔlawo le gbeƒãɖeɖe nya nyuia me. Mina míade asixɔxɔ mɔnukpɔkpɔ sia ŋu!

17. Le nuɖoanyi sia me la, aleke nɔnɔmea le? Gake nu ka tae mele be dzi naɖe le mía ƒo o?

17 Le nuɖoanyi sia me la, menye ɣesiaɣie míetea ŋu subɔa Yehowa ale si míedii o. Ðewohĩ míele nɔnɔme siwo ŋu míate ŋu awɔ naneke le o, abe ƒomegbanɔamedziwo alo lãmesẽkuxiwo ene me tom. Gake mele be dzi naɖe le mía ƒo o. Nɔnɔme ka ke me tom míele o, míate ŋu aɖe gbeƒã tso Yehowa kple eƒe Fiaɖuƒea  ŋu. Nu vevitɔe nye be míawɔ míaƒe ŋutete katã le Yehowa subɔsubɔ me, eye míanɔ gbe dom ɖa be wòakpe ɖe ame siwo ate ŋu awɔ geɖe wu la ŋu. Ðo ŋku edzi be Yehowa dea asixɔxɔ ame sia ame si kafua eƒe ŋkɔ la ŋu!

Ðo ŋku edzi be Yehowa dea asixɔxɔ ame sia ame si kafua eƒe ŋkɔ la ŋu

18. Nu kae míele mɔ kpɔm na le etsɔme, gake mɔnukpɔkpɔ gã kae su mía si fifia?

18 Yehowa ɖe mɔ na mí be míanye yeƒe hadɔwɔlawo togbɔ be míede blibo o hã. Mɔnukpɔkpɔ gã kae nye esi wònye be míanɔ dɔ wɔm kple mía Mawu le ŋkeke mamlɛ siawo me! Míele mɔ kpɔm na “agbe vavã la” le etsɔme esime míase vivi na agbea le mɔ siwo nu manya wɔ egbea o la me. Le xexe yeye si Yehowa ahe vɛ kpuie me la, atsɔ agbe mavɔ, dzidzɔkpɔkpɔ kple ŋutifafa ayra mí geɖe.1 Timoteo 6:18, 19.

Èdea asixɔxɔ subɔsubɔ ƒe mɔnukpɔkpɔ si su asiwò ŋua? (Kpɔ memama 16-18)

19. Etsɔme nyui ka ƒe ŋugbee Yehowa do na mí?

19 Xexe yeye si ŋugbe Mawu do la ava kpuie. Míeɖoa ŋku nya si Mose gblɔ na Israel-viwo hafi woayi Ŋugbedodonyigbaa dzi teti la dzi; egblɔ be: ‘Yehowa wò Mawu ana wò asinudɔwɔwɔwo katã nadze edzi na wò geɖe.’ (5 Mose 30:9) Le Harmagedon megbe la, Yehowa atsɔ anyigba la ana ame siwo le dɔ wɔm kplii, abe ale si wòdo ŋugbee ene. Ɣemaɣi la, míaƒe dɔdeasi yeyea anye be míatrɔ anyigba wòazu paradiso dzeani!