Dzo kpo yi emenuwo dzi

Dzo kpo yi emenuawo dzi

Nɔvinyɔnu Makpɔdzidzeme Siwo ‘Ðo Israel Ƒe Aƒe La Te’

Nɔvinyɔnu Makpɔdzidzeme Siwo ‘Ðo Israel Ƒe Aƒe La Te’

 Nɔvinyɔnu Makpɔdzidzeme Siwo ‘Ðo Israel Ƒe Aƒe La Te’

ESI agu nɔ dzedzem la, Lea nyae be eteƒe madidi o woakpɔ ye adze sii. Eteƒe madidi o, Yakob, si ƒe akɔnu wòmlɔ la ade dzesii be menye nɔvia nyɔnu suetɔ Raxel ye o. Anɔ eme be Lea wɔ ɖe fofoa ƒe aɖaŋuɖoɖo dzi tsɔ moxevɔ tsyɔ mo nyuie heyi ɖamlɔ srɔ̃ɖeba si wodzra ɖo ɖi na Yakob kple Raxel la dzi le zã me.

Kpɔ ale si wòanya te ɖe Yakob dzii esime ŋu ke eye wòva de dzesii be ɖe woflu ye ɖa! Dzi kui, eye wòhe nya kple Lea fofo Laban. Le ɣeyiɣi mawo me la, anɔ eme be Lea de ŋugble tso akpa si wòwɔ le amefuflua me kple nu siwo ado tso eme le etsɔme ŋu. Lea kple Raxel ƒe ŋutinyaa nye Biblia me ŋutinya ƒe akpa vevi aɖe. Eɖe nunya si le srɔ̃ ɖeka ɖeɖe kple nuteƒewɔwɔ na ame srɔ̃ me hã fia.

Amedzro Aɖe Le Vudoa To

Ƒe adre do ŋgɔ la, Raxel si du ɖagblɔ na fofoa be yekpɔ amedzro aɖe le vudo la to, si gblɔ be yewoƒe ƒometɔe yenye. Wova kpɔe dze sii be tasia ƒe vi Yakob, si hã nye Yehowa subɔla ye. Le ɣleti ɖeka megbe la, Yakob gblɔ na Laban be yeasubɔe hena ƒe adre bene wòatsɔ Raxel na ye yeaɖe. Esi Laban kpɔ ale si nyruiyɔvia wɔa dɔe, eye wònya be esɔ le yewoƒe nutoa me be ƒometɔwo naɖe wo nɔewo ta la, elɔ̃ ɖe edzi.—Mose I, 29:1-19.

Menye fiẽŋufiẽŋu dzro aɖe koe Yakob ƒe lɔlɔ̃ na Raxel nye o. Ƒe adre si wotsɔ nɔ srɔ̃ɖeŋugbedodo me la nɔ “nɛ abe ŋkeke aɖewo ko ene, le alesi gbegbe wòlɔ̃nɛ la ta.” (Mose I, 29:20) Ale si Yakob lɔ̃ Raxel va se ɖe Raxel ƒe kugbe la ɖee fia be nɔnɔme nyui lédziname geɖewo anya nɔ esi.

Ðe Lea hã nɔ didim be yeaɖe Yehowa subɔla wɔnuteƒe aɖea? Biblia megblɔe na mí o. Gake nuŋlɔɖia na Laban ya ƒe nukpɔsusu le eƒe srɔ̃ɖeɖea ŋu me kɔ ƒãa. Esi ɣeyiɣia de be Raxel naɖe srɔ̃ la, Laban na woɖu srɔ̃ɖezã. Gake Biblia ƒe nuŋlɔɖia gblɔ be esi zã do la, ekplɔ Lea yi na Yakob “eye wòdɔ kplii.”—Mose I, 29:23.

Ðe Lea lɔ̃ faa be yeaflu Yakob ma? Alo ɖe fofoa zii ɖe edzia? Ke afi kae Raxel ya nɔ? Ðe wònya nu si nɔ dzɔdzɔma? Ne enya ɖe, ke alekee wòse le eɖokui me? Ðe fofoa ƒe nya me sẽ ale gbegbe be Raxel mate ŋu atsi tsitre ɖe eƒe lɔlɔ̃nu ŋu oa? Biblia meɖo biabia mawo ŋu o. Aleke kee Raxel kple Lea ɖasusu le nyaa ŋu o, nugbeɖoɖoa ɖu dzi na Yakob. Eye Laban ŋue Yakob do  dziku ɖo, ke menye ɖe via nyɔnuawo ŋu o, eye wògblɔ be: “Alo menye Raxel ta mesubɔ wò ɖo oa? Nukaŋuti nèblema?” Alekee Laban ɖo eŋu nɛ? Egblɔ be: “Menye míaƒe kɔ be, woatre ɖevitɔ ɖeɖe na xoxoetɔ o. Ne èwu kwasiɖa sia nu la, ekema matsɔ eya hã na wò ɖe dɔ, si nagawɔ nam le ƒe adre bubu me la nu.” (Mose I, 29:25-27) Aleae wòdzɔe be Yakob va ge ɖe srɔ̃ geɖe ɖeɖe, si he nuxaxa kple ŋuʋaʋã va eƒe ƒomea me la me.

Ƒome Makpɔdzidzɔ

Yakob lɔ̃ Raxel. Esi Mawu kpɔ bena “womelɔ̃a Lea ƒe nya o” la, eʋu eƒe vidzidɔ, esime Raxel ya tsi ko. Gake menye vi ko dimee Lea nɔ o, edi hã be Yakob nalɔ̃ ye. Esi wòkpɔ be Yakob lɔ̃ Raxel wu ye la, ezu nuxaxa nɛ. Ke hã, Lea nɔ mɔ kpɔm be Yakob alɔ̃ ye le esi yedzi viŋutsu gbãtɔ, Ruben, si gɔmee nye “Kpɔ ɖa, viŋutsu!” nɛ ta. Lea ɖe susu si ta wòtsɔ ŋkɔ ma na via me be: “Yehowa kpɔ nye nublanui, azɔ srɔ̃nye alɔ̃m.” Gake Yakob melɔ̃e o, eye esime wòva dzi viŋutsu evelia kura gɔ̃ hã melɔ̃e o. Lea yɔ vi ma be Simeon, si gɔmee nye “Nusese.” Eɖe eme be: “Yehowa se bena, womelɔ̃a nye nya o; eyata wòtsɔ esia hã nam.”—Mose I, 29:30-33.

Esi Lea gblɔ be Mawu see la, efia be edo gbe ɖa tso eƒe nɔnɔmea ŋu. Anɔ eme be nyɔnu si vɔ̃a Mawue wònye. Ke hã, eƒe nuxaxaa nu metso le eƒe viŋutsu etɔ̃lia, Lewi, dzidzi vɔ megbe gɔ̃ hã o. Lea ɖe nu me tso eƒe ŋkɔa, si gɔmee nye “Kukuɖeŋu,” alo “Ðekawɔwɔ” la ŋu ale: “Azɔ ko srɔ̃nye aku ɖe ŋunye, elabena medzi ŋutsuvi etɔ̃ nɛ.” Gake edze ƒãa be eƒe nu melé dzi na Yakob o. Ðewohĩ esi Lea kpɔ esia dze sii ta la, ena ta, elabena ŋkɔ si wòtsɔ na via ŋutsu enelia megaɖee fia be enɔ mɔ kpɔm be Yakob ava lɔ̃ ye o. Ke boŋ, gɔmesese si le vi sia ƒe ŋkɔ, Yuda, ŋu ɖe eƒe akpedada na Mawu fia. “Yuda” gɔmee nye “Kafu,” alo “Nu kafukafua.” Lea ɖe eme kpuie be: “Azɔ la makafu Yehowa!”—Mose I, 29:34, 35.

Esi Lea nɔ nu xam la, Raxel hã lé blanui. Egblɔ na Yakob nuteɖeamedzitɔe be: “Na madzi vi; ne menye nenem o la, maku!”  (Mose I, 30:1) Togbɔ be Raxel nya be Yakob lɔ̃ ye hã la, edi be yeadzi vi. Viwo le Lea ya si, gake edi be Yakob nalɔ̃ ye. Wo dometɔ ɖe sia ɖe nɔ nu si nɔ ame kemɛa si la dim, eye wo dometɔ aɖeke mekpɔ dzidzɔ o. Wo ame evea siaa wolɔ̃ Yakob, eye wodi be yewoadzi vi nɛ. Wonɔ ŋu ʋãm wo nɔewo. Nɔnɔme wɔnublanui ka mee nye esi ƒome sia nɔ!

Ðe Raxel Adzi Via?

Le ɣeyiɣi mawo me la, wobua vimadzimadzi fiƒodee. Mawu do ŋugbe na Abraham, Isak, kple Yakob be woƒe ƒomea mee ‘dzidzimevi’ si dzi ƒomewo katã ato akpɔ yayra la adzɔ tso. (Mose I, 26:4; 28:14) Ke hã, Raxel tsi ko. Yakob kpɔe be Mawu koe ate ŋu ana viwo Raxel bene wòate ŋu awɔ akpa aɖe le nyagblɔɖi sia me vava me. Gake Raxel do kpo dzigbɔgbɔ ɖi. Egblɔ be: “Nye kosi Bilha enye si, dɔ kplii, bena wòadzi vi ɖe nye akɔ, eye maxɔ mamayɔvi tso egbɔ!”—Mose I, 30:2, 3.

Ðewohĩ asesẽ be míase Raxel ƒe nuwɔna sia gɔme. Gake blemasrɔ̃ɖenubabla ŋuti nuŋlɔɖi siwo ŋu woke ɖo le Ɣedzeƒenutowo me la ɖee fia be srɔ̃nyɔnu si tsi ko ƒe kosi tsɔtsɔ na srɔ̃a bene wòadzi viwo na ye la nye dekɔnu si dzi woda asi ɖo ɣemaɣi. * (Mose I, 16:1-3) Le go aɖewo me la, wobua kosia ƒe viwo be wonye srɔ̃nyɔnua ƒe viwo.

Esi Bilha dzi ŋutsuvi la, Raxel gblɔ dzidzɔtɔe be: “Mawu tso afia nam, ese nye gbe, eye wòna ŋutsuvim.” Eyɔ eƒe ŋkɔ be Dan, si gɔmee nye “Tso afia.” Esia fia be eya hã tsɔ eƒe nuxaxawo de gbedodoɖa me. Esi Bilha dzi ŋutsuvi evelia, Naftali, si gɔmee nye “Nye hoʋiʋli” la, Raxel gblɔ be: “Meʋli heƒo koko na Mawu le nɔvinye ta, meɖu dzi.” Ŋkɔawo ɖe dzre si nɔ atsusi eve siawo dome la fia.—Mose I, 30:5-8.

Ðewohĩ Raxel susui be yenɔ nu wɔm le ɖekawɔwɔ me kple yeƒe gbedodoɖawo esime wòtsɔ Bilha na Yakob, gake menye mɔ ma dzie Mawu ato anae vi o. Nufiame aɖe  le esia me na mí. Ne míebia nane Yehowa le gbedodoɖa me la, mele be míayɔ le mía ɖokui me o. Ate ŋu aɖo gbedodoɖawo ŋu le mɔ siwo míele mɔ kpɔm na, alo si ava susu me na mí kura gɔ̃ hã o nu.

Nu si Raxel wɔ na be Lea hã tsɔ eƒe kosi, Silpa, na Yakob. Silpa dzi Gad gbã, emegbe edzi Aser.—Mose I, 30:9-13.

Nudzɔdzɔ aɖe si na dzre si nɔ Raxel kple Lea dome dze ƒãa la ku ɖe agbitsa aɖewo siwo Lea vi Ruben fɔ ŋu. Woxɔe se ɣemaɣi be agbitsa siawo nana wofɔa fu. Esi Raxel bia be woana ɖe ye la, Lea ɖo eŋu nɛ dzikutɔe be: “Alo mesɔ gbɔ be, nèxɔ srɔ̃nye le asinye oa? Azɔ nèle didim be, nàgaxɔ vinye ƒe agbitsa hãa?” Ame aɖewo se eƒe nyaa gɔme be Yakob nɔa Raxel gbɔ wu Lea. Ðewohĩ Raxel kpɔe be Lea tɔ dzɔ, elabena eɖo eŋu nɛ be: “Ekema nedɔ gbɔwò egbe zã ɖe viwò ƒe agbitsa la nu!” Eya ta esi Yakob gbɔ va aƒe me fiẽ ma la, Lea gblɔ nɛ be: “Gbɔnyee nàva, elabena mexe fe ɖe tawò kple vinye ƒe agbitsa!”—Mose I, 30:15, 16.

Lea dzi viŋutsu atɔ̃lia kple adelia siwo ŋkɔwoe nye Isaxar kple Zebulon. Eya ta egblɔ be: “Azɔ srɔ̃nye abum, elabena medzi ŋutsuvi ade nɛ.” *Mose I, 30:17-20.

Agbitsaawo mena Raxel fɔ fu o. Esi Yehowa ‘ɖo ŋku Raxel dzi’ heɖo eƒe gbedodoɖawo ŋu le eƒe srɔ̃ɖeɖe hena ƒe ade megbe lae wɔe be wòfɔ fu mlɔeba hedzi Yosef. Ɣemaɣi ko hafi Raxel te ŋu gblɔ be: “Mawu ɖe nye ŋukpe ɖa!”—Mose I, 30:22-24.

Ku Kpakple Domenyinu

Raxel ku le eƒe viŋutsu evelia, Benyamin, dzidzi me. Yakob lɔ̃ Raxel vavã, eye melɔ̃a nu le Raxel viŋutsu eveawo gbɔ o. Elabena ƒe geɖewo megbe, esime eya ŋutɔ ɖo ku do nu la, egaɖo ŋku eƒe Raxel lɔlɔ̃a, si ku kpata la dzi. (Mose I, 30:1; 35:16-19; 48:7) Míenya naneke le Lea ya ƒe ku ŋuti tsɔ wu be Yakob ɖii ɖe kpeto aɖe si me wòdi be woaɖi ye ɖo la me o.—Mose I, 49:29-32.

Esime Yakob ku amegã la, elɔ̃ ɖe edzi be yekpe hiã le yeƒe agbenɔƒewo katã me eye nuxaxa geɖe nɔ yeƒe ƒomea me. (Mose I, 47:9) Ðikeke mele eme o be, Lea kple Raxel hã xa nu geɖe le agbe me nenema ke. Woƒe agbemeŋutinya la na srɔ̃ geɖe ɖeɖe me tsonu wɔnublanuiawo dze ƒãa, eye wòɖe nu si tae Yehowa ɖoe be ŋutsu naɖe nyɔnu ɖeka ko la fia kɔte. (Mateo 19:4-8; Timoteo I, 3:2, 12) Ŋuʋaʋã sɔŋ koe wòhena vae ne srɔ̃ŋutsu alo srɔ̃nyɔnu meku ɖe srɔ̃a ɖeɖe ko ŋu le gbɔdɔnyawo kple lɔlɔ̃ɖeɖefia gome o. Esia nye susu siwo ta Mawu de se ɖe ahasiwɔwɔ kple matrewɔwɔ nu la dometɔ ɖeka.—Korintotɔwo I, 6:18; Hebritɔwo 13:4.

Le esiawo katã me hã la, Mawu yi edzi zã ŋutsu kple nyɔnu madeblibo siwo nye nuteƒewɔlawo la le eƒe tameɖoɖo dzi wɔwɔ me, eye wògakpɔtɔ le wo zãm egbea. Gbɔdzɔgbɔdzɔwo nɔ nɔvinyɔnu evea siaa ŋu abe míawo ke ene. Gake Yehowa to nyɔnu siawo dzi te wɔwɔ ɖe ŋugbe si wòdo na Abraham la dzi. Esɔ be wogblɔ be Raxel kple Lea ‘ɖo Israel ƒe aƒe la te.’—Rut 4:11.

[Etenuŋɔŋlɔwo]

^ mm. 15 Nubabla ma ŋuti nuŋlɔɖi aɖe si ŋu woke ɖo le Nuzi, Iraq la xlẽ be: “Wotsɔ Kelim-ninu na Shennima be wòaɖe. . . . Ne Kelim-ninu medzi [vi] o la, adi nyɔnu [kosi] tso Lullu nyigba dzi na Shennima abe srɔ̃a ene.”

^ mm. 20 Dina, si hã nye Lea viwo dometɔ ɖeka la, koe nye Yakob vinyɔnuwo dometɔ si ŋkɔ míenya.—Mose I, 30:21; 46:7.

[Nɔnɔmetata si le axa 9]

Lea kple Raxel siaa nɔ nu si nɔ wo nɔewo si la dim, eye wo dometɔ aɖeke mekpɔ dzidzɔ o

[Nɔnɔmetata si le axa 10]

Yakob viŋutsu 12-awo mee Israel dukɔa dzɔ tso