Dzo kpo yi emenuwo dzi

Dzo kpo yi emenuawo dzi

Nyabiabia Siwo Tso Exlẽlawo Gbɔ

Nyabiabia Siwo Tso Exlẽlawo Gbɔ

 Nyabiabia Siwo Tso Exlẽlawo Gbɔ

Nu kae nye “Mawu, ŋusẽkatãtɔ la, ƒe . . . aʋawɔwɔ” le Harmagedon, eye nu kae anye emetsonu?—Nyaɖeɖefia 16:14, 16.

Ne míagblɔe kpuie la, Harmagedon ʋa lae nye aʋa si Yesu Kristo, si nye Fia si Yehowa ŋutɔ ɖo la, awɔ le etsɔme atsɔ atsrɔ̃ Mawu ƒe futɔwo ɖa le anyigba bliboa dzi. Biblia ɖe eme be futɔ siawoe nye ‘xexeame katã ƒe fia’ siwo nu “gbɔgbɔ vɔ̃wo ƒe gbɔgbɔ” le ƒu ƒom “hena Mawu, ŋusẽkatãtɔ la, ƒe ŋkeke gã la, . . . ɖe teƒe, si woyɔna le Hebri-gbe me bena Harmagedon.”—Nyaɖeɖefia 16:14, 16.

Menye teƒe ŋutɔŋutɔe afi si woƒo dukɔwo nu ƒu ɖo la nye o. Nya Harmagedon, gɔmee nye Megido-to. (Nyaɖeɖefia 16:16) To aɖeke menɔ anyi kpɔ si woyɔ ŋkɔ ma na o. Gakpe ɖe eŋu la, “anyigba dzi fiawo kple woƒe aʋakɔwo” katã mate ŋu aƒo wo ɖokui nu ƒu ɖe teƒe ɖeka o. (Nyaɖeɖefia 19:19) Ke boŋ “teƒe” la fia nɔnɔme aɖe si me dunyahedziɖulawo kple woƒe akpadzinɔlawo ava nɔ—anye nɔnɔme si afia be wotsi tre ɖe Yehowa kple “aʋakɔ, siwo le dziƒo,” siwo le “Fiawo dzi Fia kple aƒetɔwo dzi Aƒetɔ,” Yesu Kristo, ƒe kpɔkplɔ te la ŋu.—Nyaɖeɖefia 19:14, 16.

Edze ƒã be nya Harmagedon do ƒome kple blema Israel du, Megido. Teƒe si du sia nɔ, si nye Karmel to la ƒe ɣedzeƒe gome la, sɔ nyuie na aʋawɔwɔ kple asitsatsa, elabena mɔ siwo to Megido la nye esiwo asrafowo kple asitsalawo zãna wu le ɣeyiɣi mawo me. Enye teƒe aɖe si hã wowɔa aʋa vevi siwo me aʋakɔ ɖeka ɖua dzi le godoo la le. Le kpɔɖeŋu me, ‘Megido-tɔsisi la nue’ Israel ʋɔnudrɔ̃la Barak ɖu Kanaanitɔwo ƒe aʋakɔ si Aʋafiagã Sisera nɔ ŋgɔ na la dzi le. (Ʋɔnudrɔ̃lawo 4:12-24; 5:19, 20) Nuto ma ke mee Ʋɔnudrɔ̃la Gideon ɖu Midiantɔwo dzi le. (Ʋɔnudrɔ̃lawo 7:1-22) Esi Biblia yɔ Megido tɔ ɖe aʋa si le ŋgɔ gbɔna ŋu la, ele kakaɖedzi nam mí be Mawu ato Via dzi aɖu aʋakɔ siwo katã tsi tre ɖe eŋu la dzi keŋkeŋ.

Nu kae anye emetsonua? Harmagedon ʋa la aɖe nu fitifiti wɔwɔ kple vɔ̃ɖinyenyewo katã ɖa le anyigba dzi. Esia ana ɣeyiɣi si anye nyuitɔ kekeake le ameƒomea ƒe ŋutinya katã me la adze egɔme. (Nyaɖeɖefia 21:1-4) Le Mawufiaɖuƒea ƒe dziɖuɖu si me lɔlɔ̃ le te la, woatrɔ anyigba la katã wòazu paradiso, afi si ame dzɔdzɔewo anɔ tegbee.—Psalmo 37:29.