Dzo kpo yi emenuwo dzi

Dzo kpo yi emenuawo dzi

Nu Si Ta Mekpɔa Dzidzɔ Le Nusrɔ̃lawo Wɔwɔ Dɔa Me

Nu Si Ta Mekpɔa Dzidzɔ Le Nusrɔ̃lawo Wɔwɔ Dɔa Me

 Agbemeŋutinya

Nu Si Ta Mekpɔa Dzidzɔ Le Nusrɔ̃lawo Wɔwɔ Dɔa Me

Abe Ale Si Pamela Moseley Gblɔe Ene

Aʋa nɔ edzi yim le England (Angleterre) le ƒe 1941 me esime danye kplɔm yi Yehowa Ðasefowo ƒe takpekpe aɖe le Leicester. Míese Nɔviŋutsu Joseph Rutherford ƒe nuƒo tɔxɛ aɖe si ku ɖe ɖeviwo ŋu. Esime mía kple Dada míexɔ nyɔnyrɔ le takpekpe ma me la, mede dzesii be ame siwo kpe ɖe mía ŋu míewɔ gbɔgbɔmeŋgɔyiyi la kpɔ dzidzɔ ale gbegbe. Ɣemaɣi la, nyemenya dzidzɔ si gbegbe dona tsoa amewo wɔwɔ Yesu Kristo ƒe nusrɔ̃lawoe me o.

MÍAƑE ŋgɔyiyiwɔwɔ ava zu nusrɔ̃lawo la dze egɔme tso ƒe si do ŋgɔ me. Megaɖoa ŋku September 1939 ƒe ŋkeke dziŋɔ si dzi Xexemeʋa II lia tɔ zi la dzi kokoko. Mekpɔ aɖatsiwo nɔ tsatsram le danye ƒe ŋkume, esime wònɔ biabiam be, “Nu ka tae xexeame mate ŋu awɔ ŋutifafa o?” Dzinyela eveawo siaa wɔ asrafodɔ le Xexemeʋa I me, eye woto nu dziŋɔwo me. Dada yi ɖabia nya si wònɔ eɖokui biam la Anglikan nunɔla aɖe le Bristol. Ðeko wògblɔ nɛ be: “Aʋawɔwɔwo nɔ anyi ɣesiaɣi eye woanɔ anyi ɣesiaɣi.”

Gake le nu siawo megbe kpuie la, nyɔnu tsitsi aɖe si nye Yehowa Ðasefowo dometɔ ɖeka la va mía ƒeme. Danye gabia nya ma ke eya hã be: “Nu ka tae xexeame mate ŋu awɔ ŋutifafa o?” Ðasefoa ɖe eme nɛ be, aʋawɔwɔwo nye dzesi siwo fia be míele nuɖoanyi vɔ̃ɖi sia ƒe ŋkeke mamlɛawo me la ƒe akpa aɖe. (Mateo 24:3-14) Eteƒe medidi o, Ðasefoa vinyɔnu te Biblia sɔsrɔ̃ kpli mí. Wo ame evea siaa nɔ ame siwo kpɔ míaƒe nyɔnyrɔxɔxɔa teƒe henɔ dzidzɔ kpɔm la dome. Nu ka tae nusrɔ̃lawo wɔwɔ dɔa nana amewo kpɔa dzidzɔ nenema gbegbe ɖo? Meva se nu si tae la gɔme emegbe. Azɔ mina magblɔ nu siwo mesrɔ̃ le nusrɔ̃lawo wɔwɔ dɔa me hena ƒe 65 kple edzivɔ la dometɔ aɖewo na mí.

 Dzidzɔ Si Le Nufiafia Amewo Me La Kpɔkpɔ Dze Sii

Medze gbeƒãɖeɖe le Fiaɖuƒea ŋuti gɔme le Bristol esime mexɔ ƒe 11. Nɔviŋutsu aɖe tsɔ agbaƒomɔ aɖe kple ɖaseɖigbalẽvi aɖe si dzi woŋlɔ ɖaseɖinya kpuiwo ɖo la nam hegblɔ be: “Azɔ, yi aƒe siwo katã le mɔdodoa ƒe akpa kemɛ dzi la me.” Eya ta nye ɖeka medze gbeƒãɖeɖedɔa wɔwɔ gɔme enumake. Le nyateƒe me la, menɔ vɔvɔ̃m ŋutɔ. Meƒoa Biblia me nuƒo aɖe si wolé ɖe agba dzi la na aƒemenɔlaa, eye emegbe metsɔa ɖaseɖigbalẽ si naa amewo nyana be woate ŋu axɔ Biblia srɔ̃gbalẽ aɖe la fiana wo.

Tso ƒe 1950-awo me la, wotea gbe ɖe Biblia xexlẽ na aƒemenɔlawo le tso aƒeme yi aƒeme dɔa wɔwɔ me dzi. Le gɔmedzedzea me, esi ŋu kpeam ŋutɔ ta la, ɖaseɖiɖi na amewo kple mawunyakpukpuiwo me ɖeɖe na wo sesẽna nam. Gake mlɔeba dzi va ɖo ƒonye. Ɣemaɣie meva te vivisese le gbeƒãɖeɖedɔa me. Do ŋgɔ la, ame aɖewo bua mí abe agbalẽdzrala dzro aɖewo ko ene, gake ne míexlẽ mawunyakpukpuiwo heɖe wo me na wo la, wodea dzesii be Mawu ƒe Nya la fialawoe míenye. Esia wɔwɔ doa dzidzɔ nam ale gbegbe be medi be makpɔ gome le eme geɖe wu. Eya ta le September 1955 me la, medze ɣeyiɣiawo katã ƒe gbeƒãɖeɖedɔa wɔwɔ gɔme abe mɔɖela ene.

Veviedodonu Hea Viɖewo Vɛ

Nu gbãtɔ siwo mesrɔ̃ dometɔ ɖekae nye be, veviedodonu le nyuiwɔwɔ me hea viɖewo vɛ. Ɣeaɖeɣi la, mena Gbetakpɔxɔ magazine nyɔnu aɖe si ŋkɔe nye Violet Morice. Esi metrɔ yi ɖasrãe kpɔ la, eʋu ʋɔ nam hebla asi ɖe akɔta kpoo henɔ to ɖom vevie esime menɔ Ŋɔŋlɔawo me ɖem nɛ. Ɣesiaɣi si metrɔ yi ɖasrãe kpɔ la, edzena abe ame si tsɔ ɖe le eme vevie ene. Gake esi medoe ɖe egbɔ be míanɔ Biblia nusɔsrɔ̃ wɔm edziedzi la, egblɔ be: “Ao. Ne ɖeviawo tsi vie la, míasrɔ̃e.” Ete ɖe dzinye ŋutɔ! Biblia gblɔ be: “Nudiɣi li, . . . eye nuƒugbeɣi li.” (Nyagblɔla 3:6) Gake meɖoe be nyemana ta o.

Le ɣleti ɖeka megbe la, metrɔ yi ɖadzro mawunyakpukpui bubuwo me kple Violet. Kaka wòanya la, menɔ Biblia nusɔsrɔ̃ wɔm kpli kwasiɖa sia kwasiɖa le eƒe ʋɔtru nu. Mlɔeba eva biam be: “Manyo be nàge ɖe eme oa?” Violet va zu haxɔsetɔ nyui aɖe kple xɔlɔ̃ vevi aɖe nam! Ẽ, Violet va xɔ nyɔyrɔ̃ hezu Yehowa Ðasefo.

Gbe ɖeka, esi Violet va nya be yesrɔ̃ dzra yewoƒe aƒea le yeƒe manyamanya me hegblẽ ye ɖi la, ewɔ nuku nɛ ŋutɔ. Gake dzidzɔtɔe la, ekpɔ aƒe bubu le ɣetrɔ ma ke me to exɔlɔ̃ Ðasefo aɖe ƒe kpekpeɖeŋu me. Eya ta etso nya me be yeatsɔ yeƒe agbemeŋkeke mamlɛawo awɔ ɣeyiɣiawo katã ƒe gbeƒãɖeɖedɔa atsɔ ada akpee na Yehowa. Esi mekpɔ ale si Yehowa ƒe gbɔgbɔ de dzo eme ɖe tadedeagu vavãtɔa ŋu la, mekpɔ nu si tae nusrɔ̃lawo wɔwɔ dɔa hea dzidzɔ ma gbegbe vɛ la dze sii. Vavãe, dɔ siae mawɔ le nye agbemeŋkekeawo katã me!

Le ƒe 1957 me la, wode dɔ asi na mía kple Mary Robinson be míayi ɖawɔ ɣeyiɣiawo katã ƒe gbeƒãɖeɖedɔ le mɔɖaŋudɔwɔƒegãwo ƒe nuto si nye Rutherglen, si le Glasgow, Scotland (Pays-Bas) la me. Míeɖea gbeƒã le afu, yaƒoƒo, tsidzadza, kple snow me, ke hã, nu nyuiwo do tso eme. Gbe ɖeka medo go nyɔnu aɖe si ŋkɔe nye Jessie. Biblia sɔsrɔ̃ kplii doa dzidzɔ nam ŋutɔ. Le gɔmedzedzea me la, srɔ̃a si ŋkɔe nye Wally, si nye Kɔmiunisttɔ la ƒoa asa nam. Gake esi wòva srɔ̃ Biblia hede dzesii be Mawufiaɖuƒea ɖeɖe koe ahe nɔnɔme nyuiwo vɛ na ameƒomea la, edzɔ dzi nɛ. Le ɣeyiɣi aɖewo megbe la, wo ame evea siaa va zu nusrɔ̃lawɔlawo.

Nɔnɔme Si Amewo Ðe Fia Gbã Ate Ŋu Aflu Ame

Emegbe míexɔ dɔdasi yeye be míaɖagblɔ nyanyuia le du si nye Paisley me, le Scotland. Gbe ɖeka esi menɔ gbeƒã ɖem le du sia me la, ɖetugbui aɖe gbe nyaa sese hetu ʋɔa adãtɔe. Gake eteƒe medidi o eva  nɔ diyem be yeaɖe kuku ɖe nɔnɔme si yeɖe fia la ta. Esi metrɔ yi egbɔ le kwasiɖa si kplɔe ɖo me la, egblɔ be: “Mese le ɖokuinye me abe Mawu nue metu ʋɔ ɖo nyitsɔ ma ene. Eya ta medo go va nɔ diwòm hafi.” Ðetugbui sia ŋkɔe nye Pearl. Egblɔ nam be do ŋgɔ na nye vava la, ye xɔlɔ̃wo kple ƒometɔwo ƒe nuwɔnawo na dzi ɖe le ye ƒo ale gbegbe be yedo gbe ɖa na Mawu be wòakpe ɖe ye ŋu yeakpɔ xɔlɔ̃ vavã aɖe. Egblɔ kpee be: “Ema megbee nèva ƒo ʋɔ nam. Fifia medze sii be wò kokokoe nye xɔlɔ̃ vavã ma.”

Esesẽ ŋutɔ be manye Pearl xɔlɔ̃. Togbɛ aɖe tamee wònɔ, eye ele nam be manɔ eliam anɔ egbɔ yim. Ɣeaɖeɣi esi meyi egbɔ be maɖakplɔe yi nusrɔ̃ƒe zi gbãtɔ la, ekpɔtɔ vie ya kple tsidzadza sesẽwo ɖe afɔ le tenye kloe. Ya la nu sẽ ale gbegbe be edze nye xexia eye metsɔe ƒu gbe. Le ɣleti ade pɛ ko megbe, tso esime Pearl tu ʋɔa ɖe nunye la, etsɔ eɖokui ɖe adzɔgbe na Mawu hexɔ nyɔnyrɔ.

Esia megbe kpuie la, srɔ̃a lɔ̃ be woasrɔ̃ Biblia kpli ye, eye le ɣeyiɣi kpui aɖe megbe la, mía kpli míeyi ɖawɔ tso aƒeme yi aƒeme subɔsubɔdɔa. Abe ale si wònɔna ɖaa ene la, tsi nɔ dzadzam. Egblɔ nam be: “Megatsi dzi o. Menɔa tsitre ɖe tsidzadza sia tɔgbe me henɔa bɔl kpɔm hena gaƒoƒo geɖe, eya ta mate ŋu anɔ tsia me le Yehowa ta.” Scotlandtɔwo ƒe kutrikuku ƒe nɔnɔme wɔa dɔ ɖe dzinye ɣesiaɣi.

Aleke gbegbee wòdo dzidzɔ nam esime metrɔ yi nuto ma me le ƒe bla nanewo megbe eye mekpɔ be ame siwo mesrɔ̃ nu kpli la dometɔ akpa gãtɔ gakpɔtɔ lé xɔse la me ɖe asi sesĩee nye esi! Emae nye dzidzɔ si dona tsoa nusrɔ̃lawo wɔwɔ dɔa me. (Tesalonikatɔwo I, 2:17-20) Le nye mɔɖeɖedɔa wɔwɔ le Scotland ƒe enyi megbe, le ƒe 1966 me la, wokpem be mava de Gbetakpɔxɔ Habɔbɔa Ƒe Gilead Biblia Suku ahaxɔ hehe abe dutanyanyuigblɔla ene.

Le Duta

Woɖom ɖe Santa Cruz si nye Boliavia ƒe dugã si me ŋdɔ ʋuna le nyuie la me, afi si hame ɖeka si me gbeƒãɖela 50 nɔ la. Nu siwo yia edzi le dua me na meɖoa ŋku ale si nu vlo wɔwɔ kple sedzimawɔmawɔ bɔ ɖe United States ƒe ɣedzeƒenutowo me do ŋgɔ na ƒe alafa 20 lia, abe ale si woɖenɛ fiana le Hollywood sinimawo mee ene la dzi. Ne metrɔ kpɔ megbe la, mekpɔnɛ be dutanyanyuigblɔla aɖe si meɖe dzesi boo o koe menye. Lowo medo ŋɔdzi nam kpɔ o, nu vlo wɔhawo meɖem ɖe enu kpɔ o, nyemebu le gbedadaƒo kpɔ o, eye ʋu hã megbã kplim le ƒu dzi kpɔ o. Ke hã, le gonye me la, nusrɔ̃lawo wɔwɔ dɔa doa dzidzɔ nam ale gbegbe.

Nyɔnu siwo mesrɔ̃ Biblia kpli le Santa Cruz la dometɔ ɖekae nye Antonia. Nufiafia amewo le Spaingbe me menɔ bɔbɔe nam o. Gbe ɖeka Antonia viŋutsuvi dzaa aɖe gblɔ be: “Dada, ɖe wòɖoe koŋ nɔa vodada wɔm be yeado nukokoe na mía?” Antonia va zu nusrɔ̃lawo wɔla mlɔeba, eye nenema ke wònɔ le vianyɔnu Yolanda hã gome. Xɔlɔ̃ aɖe si nye seŋutinunyasrɔ̃la si ƒe megbeŋkɔe nye Dito, la nɔ Yolanda si. Eya hã te Biblia sɔsrɔ̃ eye wòdea míaƒe kpekpewo. Nusɔsrɔ̃ kplii na mesrɔ̃ nu bubu aɖe le Biblia me nyateƒea fiafia amewo me; eyae nye be: Ɣeaɖewoɣi la, ehiã be woaƒo nya ɖe amewo nu vie.

Esi Dito va nɔ eƒe Biblia nusɔsrɔ̃awo dam ƒu la, megblɔ nɛ be: “Dito, Yehowa mele ezim ɖe dziwò be nànɔ eƒe Fiaɖuƒea ƒe akpa dzi o. Wò ŋutɔe atiae.” Esi wòɖo eŋu be yedi be yeasubɔ Mawu la, megblɔ nɛ be: “Dunyaheŋgɔnɔla ƒe fotowo le wò xɔ me. Ne amedzro aɖe va gbɔwò hekpɔ wo ɖe, ɖe wòaƒo nya ta be ètiae be yeanɔ Mawu ƒe Fiaɖuƒea ƒe akpa dzia?” Ehiã be maƒo nya ɖe enu vie alea.

Le kwasiɖa eve megbe la, aglãdzedze ɖe dziɖuɖu ŋu ƒe howɔwɔ aɖe tɔ zi, eye yinivɛsiti sukuviwo kple kpovitɔwo nɔ tu dam wo nɔewo. Dito do ɣli ɖo ɖe exɔlɔ̃ aɖe be: “Va míasi dzo le afi sia!” Exɔlɔ̃a ɖo eŋu be, “Gbeɖe! Esiae nye ŋkeke si míenɔ mɔ kpɔm na ɣeyiɣi didi aɖe la.” Enumake exɔlɔ̃a tsɔ tu heɖo ta sukuxɔa tame. Eya hã nye Dito xɔlɔ̃ enyi siwo ku gbe ma gbe la dometɔ ɖeka. Ðe nàte ŋu akpɔ dzidzɔ si gbegbe wònye nam be megakpɔ Dito, si anye ne eku gbe ma gbe ne menye ɖe wòwɔ nyametsotso be yeazu Kristotɔ vavã o la, le susu mea?

Ale Si Yehowa Ƒe Gbɔgbɔa Wɔa Dɔe La Teƒekpɔkpɔ

Gbe ɖeka meto aƒe aɖe ŋu yina hexɔe se be míede afi ma xoxo, kasia nyɔnu si le aƒea me la do ɣli  yɔm. Eŋkɔe nye Ignacia. Enya nu tso Yehowa Ðasefowo ŋu, gake srɔ̃a, si nye kpovitɔwo ƒe amegã dzɔtsu aɖe, si woyɔna be Adalberto la ƒe tsitretsitsi ɖe eŋu vevie wɔe be mete ŋu wɔ ŋgɔyiyi le Biblia sɔsrɔ̃ me o. Nyɔnua mese Biblia me nufiafia vevi geɖewo gɔme o, eya ta mete Biblia sɔsrɔ̃ kplii. Togbɔ be Adalberto ɖoe kplikpaa be yeatɔ te míaƒe Biblia nusɔsrɔ̃a hã la, mete ŋu ɖo dze kple eya ŋutɔ tso nyati bubuwo ŋu hena ɣeyiɣi didi aɖe. Emae nye afɔɖeɖe gbãtɔ si wɔe be míeva zu xɔlɔ̃wo.

Kpɔ dzidzɔ si gbegbe wònye nam be Ignacia va zu hamea me tɔ si wolɔ̃na vevie, ame si naa kpekpeɖeŋu ame geɖe le ŋutilã kple gbɔgbɔ me siaa hefaa akɔ na woe la ɖa. Le ɣeyiɣi aɖe megbe la, srɔ̃a kpakple wo vi etɔ̃ sɔŋ gɔ̃ hã va zu Ðasefo. Le nyateƒe me la, esime Adalberto va ŋɔ ɖe nyanyuia ƒe gbedasia me mlɔeba la, eyi kpɔvitɔwo ƒe dɔwɔƒea heƒo nu tso eŋu dzonɔamemetɔe ale gbegbe be kpovitɔ 200 sɔŋ lɔ̃ be woade yewoƒe ŋkɔ ame siwo xɔa Gbetakpɔxɔ kple Nyɔ! magazinewo dzinu sia dzinu la dome.

Yehowae Nana Wòtsina

Le subɔsubɔ le Santa Cruz ƒe ade megbe la, woɖom ɖe Bolivia ƒe dugã si nye La Paz la me, afi si mesubɔ le hena ƒe 25 siwo kplɔe ɖo. Le ƒe 1970-awo ƒe gɔmedzedze lɔƒo la, ame 12 koe nɔ Yehowa Ðasefowo ƒe alɔdzedɔwɔƒe si nɔ La Paz ɣemaɣi. Esime gbeƒãɖeɖedɔa va nɔ ta kekem eye wòva hiã be woakeke dɔwɔƒea ɖe enu la, wova tu alɔdzedɔwɔƒe yeye aɖe ɖe Santa Cruz, du si me amewo nɔ agbɔ sɔm ɖe edzi kabakaba le la me. Woɖe alɔdzedɔwɔƒea yi afi ma le ƒe 1998 me, eye wokpem be mava wɔ dɔ le afi ma. Fifia la, dɔwɔlawo ƒe xexlẽme wu 50.

Hame ɖeka pɛ si nɔ Santa Cruz le ƒe 1966 me la, dzi ɖe edzi va zu hame siwo wu 50 fifia. Ðasefo 640 siwo nɔ Bolivia ɣemaɣi la dzi ɖe edzi va ɖo 18,000 kloe egbea!

Dzidzɔtɔe la, nye gbeƒãɖeɖedɔa wɔwɔ le Bolivia tse ku geɖe. Ke hã, Kristotɔ haxɔsetɔ siwo le afi sia afi ƒe nuteƒewɔwɔ dea dzi ƒo nam ɣesiaɣi. Dzi dzɔa mí katã ne míekpɔ ale si Yehowa le yayram ɖe Fiaɖuƒegbeƒãɖeɖedɔa dzii. Kakaɖedzitɔe la, dzidzɔ gã wònye be woakpɔ gome le nusrɔ̃lawo wɔwɔ dɔa me.—Mateo 28:19, 20.

[Nɔnɔmetata si le axa 13]

Mɔɖedɔa wɔwɔ le Scotland

[Nɔnɔmetata si le axa 15]

Subɔsubɔ le Bolivia ƒe alɔdzedɔwɔƒea; (emetɔ) Giliead-sukua ƒe klass 42 lia nuwuwu