Dzo kpo yi emenuwo dzi

Dzo kpo yi emenuawo dzi

Èɖo Ŋku Wo Dzia?

Èɖo Ŋku Wo Dzia?

 Èɖo Ŋku Wo Dzia?

Ðe Gbetakpɔxɔ ƒe tata siwo do nyitsɔ laa xexlẽ do dzidzɔ na wòa? Ekema kpɔe ɖa be yeate ŋu aɖo biabia siwo gbɔna ŋu hã:

• Nukae ate ŋu akpe ɖe Kristotɔ vavã ŋu ne eƒe ame vevi aɖe dzudzɔ Yehowa subɔsubɔ?

Tu ɖokuiwò kple ƒomea me tɔ bubuwo ɖo. Kpɔ gome le gbɔgbɔ me dɔwo wɔwɔ me bliboe. Tsɔ ɖokuiwò na le kpekpeɖeŋunana amewo me. Mɔkpɔkpɔ megabu ɖe wò keŋkeŋ be wò ame vevia magate ŋu atrɔ ava Yehowa gbɔ o. Mègabu fɔ ɖokuiwò o. De bubu tohehe ƒe ɖoɖo si Mawu wɔ la ŋu, eye nàɖe wò seselelãmewo agblɔ na xɔ̃wòwo.—9/1, axa 18-21.

• Mɔ eve kawo nue Ŋɔŋlɔawo naa míekpɔa “ŋkeke mamlɛawo” dzea sii le?

Biblia gblɔ nusiwo adzɔ le “xexeame ƒe nuwuwu la” ɖi. (Mateo 24:3, 7, 8; Luka 21:11) Egblɔ alesi “ŋkeke mamlɛawo” me nɔlawo ƒe nɔnɔme kple nuwɔnawo atrɔe hã ɖi. (Timoteo II, 3:1-5) Vevietɔ wue nye be woaɖe gbeƒã Fiaɖuƒe ŋuti nyanyuia le ɣeyiɣi sia me.—9/15, axa 4-6.

• Afɔ kae hamea aɖe ne Kristotɔ ʋukula aɖe dze afɔku kple ʋu eye amewo ku?

Hamemetsitsi siwo le nya sia me kum ate ŋu akpɔe be ʋua kula meɖi ʋufɔ o elabena ɖee nu bliboa lilii kpata loo alo ɖee wògbɔ alɔme nɛ. Gake ne wokpɔe be amea ɖi ʋufɔ eye ʋufɔɖila la trɔ dzime la, woanɔ te ɖe Ŋɔŋlɔawo dzi aka mo nɛ eye woaxɔ mɔnukpɔkpɔ siwo le esi le hamea me la le esi.—9/15, axa 30.

• Nukata agbe mavɔ nɔnɔ menɔ te ɖe dzɔdzɔmeŋutinunya ƒe ŋgɔgbedede dzi o?

Dzɔdzɔmeŋutinunyalawo le agbagba dzem be yewoana agbenɔƒe nadidi ɖe edzi, to ɣeyiɣi didime si lãmenugbagbeviwo yia edzi nɔa li ɖɔm wo ɖokui la didi ɖe edzi me loo alo to dɔnɔa ƒe lãmenugbagbeviwo zazã atsɔ awɔ lãmenu bubu si sɔ nɛ bliboe me. Gake Biblia ya ɖee fia be Yesu ƒe tafevɔsa la ko dzie amegbetɔwo ate ŋu ato akpɔ agbe mavɔ.—10/1, axa 3-5.

• Yudatɔwo ƒe kɔnutsilele dzie wotu Kristotɔwo ƒe nyɔnyrɔxɔxɔ ɖoa?

Kura o. Yudatɔwo ŋutɔwoe yi ɖalea tsi le kɔnu nu le wo ɖokui si, gake esia menye nu si nyɔnyrɔ si Yohanes na amewo la bia o. Ehiã be ame nanɔ eɖokui ŋu kɔm edziedzi le Mose ƒe Sea nu, gake zi ɖeka koe ame xɔa Kristotɔwo ƒe nyɔnyrɔa ya.—10/15, axa 12-13.

• Nukae nye Subɔsubɔdɔ ƒe Hehenasukua?

Enye suku si hamemetsitsi kple subɔsubɔdɔwɔla siwo mekpɔ ɖe srɔ̃ o la dena kwasiɖa enyi eye emegbe wote ŋu ɖoa wo ɖe afisi hiahiã le bene woaɖana kpekpeɖeŋu. Wote ŋu ɖoa wo ɖe woa ŋutɔwo ƒe hameawo me loo, dukɔa ƒe akpa bubu loo, alo dukɔ bubu me faa.—11/15, axa 10-11.

• Nuka alo amekae nye Kristo ƒe futɔ si ƒe nya wogblɔ le Yohanes I, 2:18; 4:3 la?

Ne míagblɔe gbadzaa la, “Kristo ƒe futɔ” la fia amesiwo katã tsi tre ɖe Kristo alo eteƒenɔlawo ŋu alo daa alakpa be amesiawoe yewonye la. Yesu kple Yohanes ƒe nyawo fia be ame gbogbo siwo gbe Kristo eye woblea amewo le Mawu subɔsubɔ me eye wogbe Mawufiaɖuƒea lae ƒo ƒu nye Kristo ƒe futɔ la.—12/1, axa 4-6.