Dzo kpo yi emenuwo dzi

Dzo kpo yi emenuawo dzi

Mɔxenuwo Ðeɖe Ða le Panama

Mɔxenuwo Ðeɖe Ða le Panama

 Mɔxenuwo Ðeɖe Ða le Panama

“PANAMA, dukɔ si te xexeame katã ƒo ƒui.” Ƒe 50 aɖewoe nye esia la, wogblɔna adegbeƒonya sia le radio dzi wɔna xɔŋkɔ aɖe me le Titina Amerika dukɔ sia me. Alea tututue ame geɖe bua dukɔ mae egbea.

Panama le abe tɔdzisasrã ene le Dziehe kple Anyiehe Amerika dome. Gawu la, woɖe tsimɔ gã aɖe to dukɔa me, eye tɔdzisasrã ŋutɔŋutɔ si woyɔna be Amerikatɔwo ƒe Tɔdzisasrã hã to tsimɔ gã ma si woyɔ be Panama Canal la dzi. Tsimɔ sia, si nye aɖaŋudɔ gã aɖe si ma dukɔa ɖe eve la, ƒe akpa ɖeka de nu Atlantik ƒugãa me, eye eƒe akpe evelia hã de nu Pasifik ƒugãa me. Esia wɔe be tɔdziʋu siwo toa tsimɔ ma la te ŋu ɖoa xexeame ƒe akpa bubuwo le gaƒoƒo ʋɛ aɖewo ko me, le esi teƒe be woazã ŋkeke alo kwasiɖa gbogbo aɖewo le ƒu dzi hafi aɖo.  Nyateƒee, Panama nye afisi wotona ɖoa xexeame ƒe akpa bubuwo kaba.

Eganye Afisi Ameƒomevi Vovovowo Le Hã

Menye ɖekoe wotoa Panama ɖoa xexeame ƒe akpa bubuwo kaba ko o, enye teƒe si dukɔ vovovo me tɔwo kple gbe vovovo dolawo le hã. Amesiawo, kple dukɔa me vidzidziwo, na ameƒomevi vovovowo va sɔ gbɔ ɖe dukɔ dzeani sia me. Ke hã, ɖe wòanya wɔ be woato nyateƒenya vevi siwo le Mawu ƒe Nya la me dzi aƒo amesiawo siwo ƒe hadomenuwɔnawo, dekɔnuwo, dzixɔsewo, kple gbegbɔgblɔwo le vovovo la nu ƒu ɖekae, be tamesusu kple taɖodzinu ɖeka nava nɔ wo siaa?

Ẽ! Apostolo Paulo ƒe nya siwo dze le Efesotɔwo 2:17, 18 ɖee fia be ƒe alafa gbãtɔ me Kristotɔwo—Yudatɔwo kple Trɔ̃subɔlawo siaa—te ŋu to Kristo ƒe tafevɔsaa dzixɔxɔse dzi wɔe nenema tututu. Paulo gblɔ be: “[Yesu va] gblɔ ŋutifafa ƒe nyanyui la fia mi amesiwo le adzɔge kple amesiwo le kpuiƒe la. Elabena eyama ke me mí kpakple eve la katã míekpɔ mɔnu le gbɔgbɔ ɖeka me [le] heyina Fofo la gbɔ.”

Nenema kee egbea la, Yehowa Ðasefo siwo le Panama la le gbeƒã ɖem “ŋutifafa ƒe nyanyui” na amesiwo tso didiƒe ŋutɔŋutɔ kple amesiwo ƒe dzixɔsewo to vovo kura na Biblia tɔ la. Ðekawɔwɔ blibo va le amesiwo te ɖe Yehowa ŋu la dome le afima. Esia wɔe be woɖo hamewo ɖe gbegbɔgblɔ vovovo ade me le Panama—woawoe nye Spaingbe, Cantongbe, Panama Tokunɔgbe, Eŋlisigbe, kple gbe eve bubu siwo wodona le dua me, siwo nye Kuna kple Ngobegbe (Guaymí). Adzɔ dzi na wò be nànya alesi gbegbɔgblɔ siawo dolawo le Yehowa subɔm ɖekae.

 Mɔxenuwo Ðeɖe Ða le Comarca

Ngobegbe selawoe sɔ gbɔ wu le gbegbɔgblɔ enyi siwo Panama vidzidziwo dona la dome. Ame 170,000 kloe ye se gbe sia, eye wo dometɔ akpa gãtɔ le nuto gã aɖe si wova na ŋkɔ nyitsɔ laa be comarca, alo saɖaganyigba, me. Teƒe sia ƒe akpa gãtɔ nye tonyigba glidzaglidzawo, eye afɔmɔ koe yia afima; eƒe nuto dzeani aɖewo hã te ɖe ƒu ŋu, eye tɔdziʋu koe woate ŋu aɖo ayii. Amewo tsoa kɔƒewo ɖe tɔwo to kple ɖe ƒuta, si nana wo gbɔ ɖoɖo te ŋu nɔa bɔbɔe wu. Kɔfigble dede le towo dzi, tɔƒodede, kple agbledede ye nye dɔ si amesiwo le comarca la wɔna. Wo dometɔ geɖe dea sɔleme vovovowo. Ke hã, wo dometɔ aɖewo le subɔsubɔha aɖe si woyɔna be Mama Tata me. Ame aɖewo hã yia sukias (bokɔwo) gbɔ ne wodze dɔ, alo ne wosusu be gbɔgbɔ vɔ̃wo le fu ɖem na yewo. Togbɔ be ame geɖe doa Spaingbe hã la, gbe si amewo se wue nye Ngobegbe.

Akro Kuku Ayi Amewo Gbɔ

Yehowa Ðasefowo kpɔe be menye ɖeko wòle vevie be yewoakpe ɖe amewo ŋu woasrɔ̃ nyateƒea ko o, ke boŋ be wòaɖo woƒe dzi gbɔ hã. Esia ate ŋu akpe ɖe ameawo ŋu woawɔ tɔtrɔ le woƒe agbenɔnɔ me wòasɔ ɖe Biblia ƒe gɔmeɖosewo nu. Eyata mɔɖela vevi siwo woɖo ɖe saɖaganyigbaa ƒe nuto enyi me la srɔ̃ Ngobegbe, eye nutoa me Ðasefo bibiwo kpe ɖe wo ŋu wose gbea nyuie.

Hame 14 ye woɖo ɖe nuto mawo me, eye ema ɖee fia be míate ŋu akpɔ mɔ be woakpe ɖe ame geɖewo ŋu. Le kpɔɖeŋu me, ƒe ʋɛ aɖewoe nye esia la, woɖo Dimas kple srɔ̃a Gisela, siwo nye mɔɖela veviwo, ɖe hame sue aɖe si ƒe gbeƒãɖelawo ade 40 la me. Hame sia le ƒutanuto si nye Tobobe me. Akro ɖoɖo edziedzi ayi Atlantik Ƒuta aɖaɖe gbeƒã na afimatɔwo menɔ bɔbɔe na wo le gɔmedzedzea me o. Dimas kple Gisela va kpɔe be togbɔ be atsiaƒua sina blewu hã la, ete ŋu dzea agbo ɣesiaɣi. Ne woku akroa tso kɔƒe ɖeka me yi evelia me la, abɔ kple dzime vea wo. Nutoa me gbe sɔsrɔ̃ hã nye kuxi bubu. Ke hã, woƒe ɖokuitsɔtsɔsavɔ kple kutrikukua ɖe vi esime ame 552 de Kristo ƒe ku ƒe Ŋkuɖodzia le ƒe 2001 me.

Kɔƒe si nye Punta Escondida hã gbɔ medidi tso Tobobe o. Ne yame ƒe nɔnɔme nyo la, gbeƒãɖela ʋɛ aɖewo kua akro tsoa afima vana kpekpe le Tobobe, eye nyatakakawo ɖee fia be woate ŋu aɖo hame yeye aɖe le kɔƒe ma me bɔbɔe. Esia ta woɖe Dimas kple Gisela yi Punta Escondida. Mede ƒe eve o, ƒuƒoƒo si le Punta Escondida la va zu hame si me gbeƒãɖela dovevienu 28 le, eye le mama dedie nu la, ame 114 va sea dutoƒonuƒo kwasiɖa sia kwasiɖa. Le ƒe 2004 me la, edzɔ dzi na hame yeye sia me tɔwo be ame 458 va Kristo ƒe ku ƒe Ŋkuɖodzia.

Nuxexlẽ Kple Nuŋɔŋlɔ Sɔsrɔ̃

Esi dzianukwaretɔ geɖe va srɔ̃ nuxexlẽ kple nuŋɔŋlɔ la, ekpe ɖe wo ŋu woa kple Yehowa dome va le kplikplikpli wu. Aleae wònɔ le nyɔnu aɖe si ŋkɔe nye Fermina, si  tso comarca nutoa me, la gome. Ðasefo dutanyanyuigblɔla siwo ɖea gbeƒã le saɖaganuto si me wòle me la kpɔe be Fiaɖuƒegbedasia doa dzidzɔ nɛ ŋutɔ. Esi wobiae be adi be yeasrɔ̃ Biblia hã la, elɔ̃. Gake eƒe kuxi enye be ese Spaingbe kple Ngobegbe, gake mete ŋu xlẽa wo alo ŋlɔa wo dometɔ aɖeke o. Dutanyanyuigblɔlawo dometɔ ɖeka ɖoe be yeazã agbalẽ si nye Srɔ̃ Nuxexlẽ Kple Nuŋɔŋlɔ atsɔ akpe ɖe eŋui. *

Nusrɔ̃vi nyui aɖee Fermina nye, edzrana ɖo ɖe nusɔsrɔ̃a ŋu, wɔa sukudɔ siwo woɖo nɛ, hesrɔ̃a nuŋɔŋlɔ le eɖokui si. Kaka ƒe ɖeka naɖo la, esrɔ̃ nu yi ŋgɔ va ɖo afisi wòate ŋu asrɔ̃ agbalẽ si nye Àte Ŋu Anye Mawu Xɔlɔ̃!* Esi wote kpekpewo wɔwɔ le kɔƒea me la, Fermina te wo dede. Gake esi ganyawo ɖea fu na eƒe ƒomea ta la, mekpɔa ʋuɖoga be woa kple viawo woade kpekpeawo ɣesiaɣi o. Esi mɔɖelawo dometɔ ɖeka se Fermina ƒe gakuxi ŋu nya la, eɖo aɖaŋu nɛ be wòanɔ awu siwo Ngobe nyɔnuwo lɔ̃a dodo la lɔ̃m anɔ dzadzram. Fermina wɔe nenema, eye togbɔ be hiahiã bubuwo le eŋu hã la, ekpɔa egbɔ be yezã ga siwo yekpɔna tsoa nudzadzraa me la ƒe akpa gãtɔ tsɔ ɖoa ʋu yia Kristotɔwo ƒe kpekpeawo. Woa kple eƒe ƒomea woʋu yi nuto bubu me fifia, eye wole ŋgɔ yim nyuie le gbɔgbɔ me. Menye nuxexlẽ kple nuŋɔŋlɔ si wova nya la koe nye dzidzɔ na wo o, edzɔa dzi na wo hã be yewova nya Yehowa.

Gbeƒã Ðeɖe na Tokunɔwo

Le Panama la, enyea ŋukpe na ame geɖe ne tokunɔ aɖe le woƒe ƒomea me. Ɣeaɖewoɣi la, womedea tokunɔ siawo suku aɖeke o. Esi wònye esesẽna be woaɖo dze kple tokunɔwo ta la, wo dometɔ geɖe senɛ le wo ɖokui me be woɖe yewo ɖe aga.

Eyata eva dze ƒã be ehiã be woawɔ nane atsɔ akpe ɖe tokunɔwo ŋu bene woate ŋu ase nyanyuia. Nutome sue dzikpɔla aɖe de dzi ƒo na mɔɖela kple gbeƒãɖela bubu siwo lɔ̃ faa la be woasrɔ̃ Panama Tokunɔgbe. Woƒe agbagbadzedzeawo ɖe vi geɖe.

Le ƒe 2001 ƒe nuwuwu lɔƒo la, woɖo tokunɔgbe ƒuƒoƒo aɖe le Panama City. Kpekpea delawo anɔ ame 20. Esi nɔviawo va nɔ gbea sem nyuie la, wote ŋu va nɔ gbeƒã ɖem na ame geɖe, eye zi gbãtɔe nye ema tokunɔawo “se” Biblia me nyateƒea le woƒe gbea me. Ðasefo geɖe siwo ƒe viwo nye tokunɔwo hã te kpekpeawo dede, eye wokpɔe be yewo viawo sea Biblia ƒe nufiafiawo gɔme nyuie heva tsɔa dzo ɖe nyateƒea ŋu wu. Zi geɖe la, dzilawo va srɔ̃a tokunɔgbea, si wɔnɛ be wote ŋu ɖoa dze kple  wo viwo nyuie wu. Esia wɔe be dzilawo te ŋu kpe ɖe wo viwo ŋu wowɔ ŋgɔyiyi le gbɔgbɔ me, eye wokpɔe be ƒomea me tɔwo dome hã va le kplikplikpli wu. Elsa kple via Iraida ƒe ŋutinya ɖo kpe esia dzi.

Ðasefo aɖe si nɔ tokunɔgbe ƒuƒoƒoa me la se Iraida ŋkɔ, edi eyome mɔ, henae agbalẽ si nye Se Agbe ƒe Vivi le Anyigba Dzi Tegbee! * Nusiwo Iraida srɔ̃ tso xexeme yeyea ŋu le nɔnɔmetataawo me la dzɔ dzi nɛ ŋutɔ. Wote agbalẽa sɔsrɔ̃. Esi wowu agbalẽ ma sɔsrɔ̃ nu la, wodze Nukae Mawu Di tso Mía Si? gɔme.* Esi wodze agbalẽ evelia sɔsrɔ̃ gɔme la, Iraida biana dadaa be wòakpe ɖe ye ŋu yeadzra ɖo ɖe nusɔsrɔ̃a ŋu, eye be wòakpe ɖe ye ŋu yease egɔme.

Gake Elsa mese tokunɔgbe o, eye esi menye Ðasefo o ta la, menya Biblia me nyateƒea hã o. Amewo gblɔ nɛ be wòaganɔ asi wɔm na via o, ne wòasrɔ̃ nuƒoƒo. Esia wɔe be dzeɖoɖo aɖeke megava nɔ Elsa kple via dome o. Iraida ƒe biabia be ye dada nakpe ɖe ye ŋu la na dadaa bia Ðasefo aɖe be wòasrɔ̃ nu kplii. Elsa gblɔ be: “Esi wònye be nyemekpɔ Iraida wòdo vivi ɖe naneke ŋu alea gbegbe kpɔ o tae mebia be woasrɔ̃ nua kplii ɖo.” Elsa hã va te Biblia kple tokunɔgbea siaa sɔsrɔ̃. Esi Elsa va kpɔa ɣeyiɣi geɖe ɖe via ŋu ta la, wote ŋu va ɖoa dze le aƒea me nyuie. Iraida megava dzea xɔlɔ̃ amesiame ko o, eye wòte ha dede kple hamea. Elsa kple via dea Kristotɔwo ƒe kpekpewo edziedzi fifia. Elsa xɔ nyɔnyrɔ nyitsɔ laa, eye eteƒe madidi o Iraida hã axɔe. Elsa gblɔ be yeva le ye via nyam nyuie azɔ, eye be yewote ŋu ɖoa dze tso nu geɖe siwo le vevie na yewo kple evea ŋu.

Tokunɔgbe ƒuƒoƒoa va zu hame le April 2003 me, eye gbeƒãɖela siwo ade 50 ye le eme, gake amesiwo dea kpekpeawo ya sɔ gbɔ wu ema. Ne woma amesiawo ɖe akpa etɔ̃ la, akpa ɖeka nye tokunɔwo ŋutɔŋutɔ. Wole tokunɔgbe ƒuƒoƒo bubuwo ɖom ɖe dugã etɔ̃ siwo mele Panama City me o me. Togbɔ be dɔ geɖe gali woawɔ le tokunɔwo dome hã la, ɖikeke mele eme o be afɔ vevi aɖee woɖe, be wona ƒomedodo va le dzianukwaretɔ siwo nye tokunɔwo kple wo Wɔla lɔlɔ̃a, Yehowa Mawu, dome.

Nusiwo le dzɔdzɔm le Panama ƒe kpɔɖeŋu ʋɛ aɖewo koe nye esia. Togbɔ be amewo ƒe dekɔnuwo, gbegbɔgblɔwo, kple nɔnɔmewo le vovovo hã la, wo dometɔ geɖe va wɔ ɖeka le ta dem agu na Mawu vavã ɖeka kolia la. Nyateƒe si le Yehowa ƒe Nya la me te ameƒomevi vovovowo ƒo ƒui le dukɔ sia si ame geɖe buna be enye “dukɔ si te xexeame katã ƒo ƒui” la me.—Efesotɔwo 4:4.

[Etenuŋɔŋlɔwo]

^ mm. 15 Yehowa Ðasefowoe tae.

^ mm. 21 Yehowa Ðasefowoe ta wo.

[Anyigbatata siwo le axa 8]

(Edze nyuie le agbalẽa ŋutɔ me)

CARIB-ƑU

PANAMA

Tobobe

PASIFIK- ƑUGÃ

Panama Tsimɔ

[Nɔnɔmetata si le axa 8]

Kuna nyɔnuwo lé avɔ lɔlɔ̃ ɖe asi

[Nɔnɔmetata si le axa 9]

Dutanyanyuigblɔla aɖe le gbeƒã ɖem na Ngobe nyɔnu aɖe

[Nɔnɔmetata si le axa 10]

Ðasefo siwo tso Ngobe le akro ɖom ayi ŋkeke ɖeka takpekpe aɖe

[Nɔnɔmetata si le axa 11]

Biblia me nyateƒea te dekɔnu kple gbegbɔgblɔ vovovo me tɔwo ƒo ƒui

[Nɔnɔmetata si le axa 12]

Wole “Gbetakpɔxɔ” srɔ̃m le Tokunɔgbe me

[Nɔnɔmetata si le axa 12]

Elsa ɖoa dze nyuie kple via, Iraida

[Afisi míexɔ mɔɖeɖe tso]

Meli la kple Kuna nyɔnuwo: © William Floyd Holdman/Index Stock Imagery; kɔƒe: © Timothy O’Keefe/Index Stock Imagery