Dzo kpo yi emenuwo dzi

Dzo kpo yi emenuawo dzi

“Nye Agbemeŋkeke Vevitɔwo Kekeake Dometɔ Ðeka”

“Nye Agbemeŋkeke Vevitɔwo Kekeake Dometɔ Ðeka”

 “Nye Agbemeŋkeke Vevitɔwo Kekeake Dometɔ Ðeka”

DZIÐUÐU ƒe dɔwɔƒe si kpɔna blanuiléle ƒe kuxiwo gbɔ le Australia, gblɔ be: “Blanuilélee nye kuxi si ŋu wokaa nya ta le edzidzi wu, eye anɔ eme be eyae nye susumedɔ vevitɔ kekeake si ɖea fu na sɔhɛwo wu.” Numekukuwo ɖee fia be blanuiléle ɖea fu na sɔhɛ siwo ƒe xexlẽme anɔ abe 100,000 ene ƒe sia ƒe le Australia.

Sɔhɛ Kristotɔwo meto le blanuiléle ƒe nya sia me o. Gake Yehowa dzixɔxɔse kpe ɖe wo dometɔ geɖe ŋu be woɖu blanuiléle ƒe seselelãmewo dzi eye wokpɔ dzidzedze le woƒe sɔhɛmenɔɣiwo me. Woto esia wɔwɔ me kpɔ ŋusẽ nyui ɖe ame bubuwo dzi. Le mɔ ka nu?

De ŋugble tso Claire, si xɔ ƒe 18, ƒe nuteƒekpɔkpɔ ŋu kpɔ. Woa kple dadaa wobɔa ha kple Yehowa Ðasefowo ƒe hame aɖe le Melbourne. Claire lé blanui vevie, esime fofoa dzo hegblẽ ƒomea ɖi. Gake ekpɔtɔ lé eƒe Dziƒofofo, Yehowa, dzixɔxɔse me ɖe asi sesĩe. Gbeɖeka, Lydia, si nye ɖɔkta si kpɔa woƒe ƒomea ƒe lãmesẽnyawo gbɔ la, va srã wo kpɔ be yeado Claire dada si ƒe lãme gblẽ la akpɔ. Emegbe etsɔ Claire ɖe ʋu me dɔmenyotɔe yi fiase si me wòyina asi ƒle ge le. Esi wonɔ mɔa dzi yina la, ebia Claire be ahiãvi le esi hã. Claire ɖe eme nɛ be le esi yenye Yehowa Ðasefo ta la, yemeɖoa gbe ɖi kple ŋutsuviwo yakayaka o. Esia wɔ nuku na ɖɔkta la. Azɔ Claire ɖe alesi Biblia kpe ɖe eŋu be wòwɔ nyametsotso nyuiwo le agbe me la gblɔ nɛ. Mlɔeba la, Claire do ŋugbe na ɖɔktaa be yeatsɔ Biblia-srɔ̃gbalẽ aɖe si kpe ɖe ye ŋu ŋutɔ la dometɔ ɖeka vɛ nɛ. Agbalẽa ƒe tanyae nye Questions Young People Ask—Answers That Work.

Le agbalẽa xɔxɔ ƒe ŋkeke etɔ̃ megbe la, Lydia ƒo ka na Claire dada hegblɔ alesi gbegbe wòkpɔ ŋudzedze ɖe agbalẽa xexlẽ ŋui nɛ. Emegbe ebia be woatsɔ agbalẽa ade sɔŋ vɛ na ye yeatsɔ ana ye xɔlɔ̃ aɖewo. Esi Claire tsɔ agbalẽawo yi nɛ la, ɖɔktaa gblɔ alesi gbegbe Claire ƒe xɔse wɔ dɔ ɖe ye dzii la nɛ. Claire gblɔ nɛ be yeadi be yeasrɔ̃ Biblia kplii, eye ɖɔktaa lɔ̃ ɖe edzi.

Claire srɔ̃ nua kple ɖɔktaa le eƒe ŋdɔnuɖuɣiwo hena ɣleti geɖe. Emegbe Lydia bia Claire nenye be alɔ̃ be yeaƒo nu le numedzrokpekpe aɖe me ku ɖe sɔhɛwo ƒe blanuiléle ŋu. Togbɔ be Claire vɔ̃ vie hã la, elɔ̃. Ame 60 kple edzivɔwoe va numedzrokpekpea wɔƒe. Susumedɔdala bibi ene—siwo katã nye ame tsitsiwo la—ƒo nu na vavalawo. Emegbe eɖo Claire dzi be wòaƒo nu. Ete gbe ɖe alesi wòle vevie be ƒomedodo nanɔ sɔhɛwo kple Mawu domee dzi. Eɖe eme be Yehowa Mawu tsɔ ɖe le eme na sɔhɛwo vevie ŋutɔ eye wòkpena ɖe amesiwo katã trɔna ɖe eŋu hena kpekpeɖeŋu kple akɔfafa la ŋu. Gakpe ɖe eŋu la, eƒo nu tso alesi wòka ɖe edzii be eteƒe madidi o Yehowa ava ɖe ŋutilã kple susu me dɔlélewo katã ɖa ŋu. (Yesaya 33:24) Nukae do tso ɖaseɖiɖi nyui sia me?

Claire gblɔ be: “Wo dometɔ geɖe te ɖe ŋunye le kpekpea ƒe nuwuwu, hegblɔ alesi wòwɔ dɔ ɖe wo dzii be sɔhɛ aɖe naƒo nu tso Mawu ŋu nenema la nam. Mena Young People Ask ƒe agbalẽa ɖekaɖeka 23. Ðetugbi etɔ̃ siwo nɔ vavalawo dome tsɔ woƒe telefonxexlẽdzesiwo nam. Ðetugbi siawo dometɔ ɖeka le Biblia srɔ̃m fifia. Enye nye agbemeŋkeke vevitɔwo kekeake dometɔ ɖeka.”