Dzo kpo yi emenuwo dzi

Dzo kpo yi emenuawo dzi

Nyabiabia Siwo Tso Exlẽlawo Gbɔ

Nyabiabia Siwo Tso Exlẽlawo Gbɔ

 Nyabiabia Siwo Tso Exlẽlawo Gbɔ

Esi blema Israel-fia Salomo mewɔ nuteƒe na Mawu le eƒe tsitsime o ta la, ɖe míate ŋu aƒo nya ta be womafɔe ɖe tsitre oa?—Fiawo I, 11:3-9.

Togbɔ be Biblia yɔ ŋutsu kple nyɔnu xɔsetɔ aɖewo, siwo anɔ eme be woafɔ wo ɖe tsitre godoo ƒe ŋkɔ hã la, megblɔna le amesiame si ŋkɔ wòyɔna la ŋu tẽ be tsitretsitsi mɔkpɔkpɔ li nɛ o. (Hebritɔwo 11:1-40) Gake le Salomo gome la, míate ŋu asusu nyametsotso si tɔgbe Mawu awɔ to alesi woƒo nu tso eŋu esime wòku la tsɔtsɔ sɔ kple alesi woƒo nu tso nuteƒewɔla aɖewo ŋui esime woku me.

Nɔnɔme eve ko mee Ŋɔŋlɔawo gblɔ le be ame kukuwo ate ŋu anɔ—anyimanɔmanɔ hena ɣeyiɣi aɖe ko kple tsɔtsrɔ̃ ɖikaa. Woatsɔ amesiwo wotso afia na be womedze na tsitretsitsi o la aƒu gbe ɖe “Gehenna” alo “dzota” me. (Mateo 5:22; Marko 9:47, 48, NW; Nyaɖeɖefia 20:14) Amesiawo dometɔ aɖewo anye ame eve gbãtɔwo, Adam kple Xawa, yomemɔfiala Yuda Iskariot, kple ame bubu aɖewo siwo ku esime Mawu drɔ̃ ʋɔnu wo, abe Noa ƒe ŋkekea me tɔwo kple amesiwo nɔ Sodom kple Gomora ene. * Le ku me la, amesi nu woave afɔ wo ɖe tsitre la lalana le ameƒomea ƒe yɔdo—Sheol, alo Hades—me. Esi Biblia nɔ nu ƒom tso amesiwo woafɔ ɖe tsitre ƒe etsɔme ŋu la, egblɔ be: “Atsiaƒu ɖe ame kuku, siwo le eme la, hena, eye ku kple tsiẽƒe woɖe ame kuku, siwo le wo si la, hena, eye wodrɔ̃ ʋɔnu amesiame ɖe eƒe dɔwɔwɔwo nu.”—Nyaɖeɖefia 20:13.

Eyata nuteƒewɔla siwo ŋu woƒo nu tsoe le Hebritɔwo ta 11 lia me la, le Sheol, alo Hades, hele ame kukuwo ƒe tsitretsitsi lalam. Amesiawo dometɔ aɖewoe nye Mawu subɔla wɔnuteƒe siwo nye Abraham, Mose, kple Dawid. Fifia de ŋugble tso alesi Biblia ƒoa nu tso woƒe ku ŋui ŋu kpɔ. Yehowa gblɔ na Abraham bena: “Ke wò la, àyi ɖe tɔgbuiwòwo gbɔ le ŋutifafa me, eye àku amegã belibeli hafi àku.” (Mose I, 15:15) Yehowa gblɔ na Mose bena: ‘Kpɔ ɖa, àɖamlɔ tɔgbuiwòwo gbɔ.’ (Mose V, 31:16) Biblia gblɔ le Salomo fofo, Dawid, ŋu be: “Dawid mlɔ fofoawo gbɔ, eye woɖii ɖe Dawid ƒe du la me.” (Fiawo I, 2:10) Eyata nyagbɔgblɔ ‘anyimɔmlɔ ɖe tɔgbuiawo alo fofoawo gbɔ’ nye egbɔgblɔ le mɔ bubu nu be amesi ku la le Sheol.

Nukae dzɔ ɖe Salomo dzi esime wòku? Biblia ɖo eŋu be: “Ɣeyiɣi, siwo katã Salomo ɖu fia le Yerusalem ɖe Israel blibo la dzi la, le ƒe blane. Eye Salomo mlɔ fofoawo gbɔ, eye woɖii ɖe fofoa Dawid ƒe du la me.” (Fiawo I, 11:42, 43) Eyata edze abe susu le eme be míaƒo nya ta be Salomo le Sheol, alo Hades ene, hele tsitretsitsi tso ame kukuwo dome lalam.

Nyataƒoƒo sia fia be edze abe woava fɔ ame bubu siwo ŋu Ŋɔŋlɔawo gblɔ le tẽ be ‘womlɔ wo tɔgbuiawo alo fofoawo gbɔ’ ɖe tsitre ene. Le nyateƒe me la, woƒo nu tso fia siwo va ɖu dzi kplɔ Salomo ɖo dometɔ geɖe ŋu alea, togbɔ be womewɔ nuteƒe o hã. Esia menye nya wɔmoya o, elabena “tsitretsitsi li na ame dzɔdzɔewo kple ame madzɔmadzɔwo siaa.” (Dɔwɔwɔwo 24:15) Ke hã nya lae nye be, ne wova fɔ ‘amesiwo katã le ŋkuɖodziyɔdowo me’ ɖe tsitre vɔ megbe ko hafi míava nya amesiwo nu wove hena tsitretsitsi la kɔte. (Yohanes 5:28, 29) Eyata le esi teƒe be míagblɔ be woafɔ blematɔ aɖe alo womafɔe o la, míalala, aɖo ŋu ɖe Yehowa ƒe nyametsotso deblibo ŋu boŋ.

[Etenuŋɔŋlɔwo]

^ mm. 4 Kpɔ Eŋlisigbe me Gbetakpɔxɔ, June 1, 1988 ƒe axa 30-1.