Dzo kpo yi emenuwo dzi

Dzo kpo yi emenuawo dzi

Nyabiabia Siwo Tso Exlẽlawo Gbɔ

Nyabiabia Siwo Tso Exlẽlawo Gbɔ

 Nyabiabia Siwo Tso Exlẽlawo Gbɔ

Menye ɖe apostolo Paulo gbe nu le eƒe Kristotɔ ƒe xɔse gbɔ esime wògblɔ le Sanhedrin la ŋkume be: “Nye la farisitɔ menye” oa?

Be míase Paulo ƒe nya sia, si dze le Dɔwɔwɔwo 23:6 me nyuie la, ehiã be míabu nɔnɔme si me nua dzɔ le ŋu.

Esi Yudatɔwo ƒe ameha siwo me wode zii dze Paulo dzi le Yerusalem megbe la, eƒo nu na ameha siwo va kpe ta. Egblɔ be, “Gamaliel ƒe afɔ nu wofia num le pɛpɛpɛ [le Yerusalem]; le mía fofowo ƒe se la nu.” Togbɔ be ameha la ɖo to eƒe ɖokuinuɖenyawo sẽ hã la, dzi va ku wo vevie, eye asrafoha ƒe amegã kplɔ Paulo yi woƒe mɔ̃ la me. Esime wodi be woaƒoe la, Paulo gblɔ be: “Ðe woɖe mɔ na mi be, miaƒo amesi nye Romatɔ kple atam fɔ mabumabua?”—Dɔwɔwɔwo 21:27–22:29.

Le ŋkeke si kplɔe ɖo dzi la, aʋafia gã la kplɔ Paulo yi ɖe Yudatɔwo ƒe ʋɔnudrɔ̃ƒe kɔkɔtɔ, si nye Sanhedrin la ŋku me. Paulo lé ŋku ɖe wo ŋu nyuie eye wòkpɔe be Zadukitɔwo kple Farisitɔwoe ƒoƒu ɖi. Azɔ egblɔ be: “Ŋutsuwo, nɔviwo! Nye la farisitɔ kple farisitɔ ƒe vi menye, mɔkpɔkpɔ kple ame kukuwo ƒe tsitretsitsi ta wole ʋɔnu drɔ̃mem ɖo.” Esia na, nyaʋiʋli ɖo Farisitɔwo kple Zadukitɔwo dome, “elabena zadukitɔwo gblɔna bena, tsitretsitsi meli o, eye mawudɔlawo kple gbɔgbɔ hã meli o; gake farisitɔwo ʋua woa kple eve la me.” Farisitɔwo ƒe kɔmamã me tɔ aɖewo he dzre dzikutɔe gblɔ be: “Míekpɔ vɔ̃ aɖeke le amesia ŋu o.”—Dɔwɔwɔwo 23:6-10.

Esi wonya Paulo be enye Kristotɔ veviedonula ta la, mate ŋu aƒoe ɖe Sanhedrin la nu wòaxɔe ase be enye Farisitɔwo ƒe kɔmamã me tɔ dovevienu o. Farisitɔ siwo nɔ eteƒe hã malɔ̃ ɖe edzi alo axɔ amesi le eɖokui bum be yenye Farisitɔ evɔ mexɔ woƒe nufiafiawo katã dzi se o la o. Eyata woanya ase Paulo ƒe gbɔgblɔ be yenye Farisitɔ la gɔme vaseɖe afia aɖe, eye nenemae Farisitɔ siwo nɔ eteƒe la anya se Paulo ƒe nyaa gɔmee le nudzɔdzɔa me.

Esi Paulo gblɔ be wole ʋɔnu drɔ̃m ye le ame kukuwo ƒe tsitretsitsi mɔkpɔkpɔa ta la, enɔ fiafiam le afisia be le nya sia gome la, yele abe Farisitɔwo ene. Le nyaʋiʋli ɖesiaɖe si alɔ tsitretsitsi ɖe eme me la, woate abu Paulo akpe ɖe Farisitɔwo ŋu tsɔ wu be woabui kpe ɖe Zadukitɔ siwo mexɔ tsitretsitsi dzi se o la ŋu.

Nusiwo dzi Paulo xɔ se abe Kristotɔ ene la metsi tre ɖe Farisitɔwo ƒe dzixɔse le nya siawo abe tsitretsitsi, mawudɔlawo, kple Sea ƒe akpa aɖewo ene me ŋuti o. (Filipitɔwo 3:5) Eyata, Paulo ate ŋu agblɔ be kadodo aɖe le ye kple Farisitɔwo dome le nya siawo dza ko me, eye amesiwo nɔ eteƒe le Sanhedrin la hã se eƒe nyawo gɔme nenema ke. Eyata enɔ amesi wònye le Yudatɔwo ƒe dzixɔse ƒe akpa dzi tsã la zãm tsɔ nɔ eɖokui nu ɖem le Yudatɔwo ƒe ʋɔnudrɔ̃ƒe Kɔkɔtɔ si dea akpa ɖeka dzi la.

Gake kpeɖodzi gãtɔ kekeake si fia be Paulo megbe nu le eƒe xɔse gbɔ o la dze le alesi Yehowa ƒe ŋudzedzekpɔkpɔ gakpɔtɔ nɔ edzi la me. Esi Paulo gblɔ be: “Nye la farisitɔ menye” vɔ megbe ƒe zã me la, Yesu gblɔ nɛ be: “Wò dzi nedze eme; elabena alesi nèɖi ɖase le ŋutinye le Yerusalem la, nenema ke wòle be, naɖi ɖase le Roma hã.” Esi Mawu kpɔ ŋudzedze ɖe Paulo ŋu ta la, ele be míaƒo nya ta be Paulo megbe nu le eƒe Kristotɔ ƒe xɔse gbɔ o.—Dɔwɔwɔwo 23:11.